Roliños de froitos vermellos

 Bo día, bolboreteirxs! Que tal? Hoxe viñemos para adozarvos o día xa que vos traemos unha receita moi lambona, uns roliños de froitos vermellos. Esta lambonada non só é moi chamativa visualmente, senón que está espectacular de sabor, alén de que podedes adaptar o recheo ao voso gusto. 

Se vos fixades nos ingredientes, temos o puré de patacas, que é un pouco estraño para usar en repostaría, mais úsase para que a masa aguante máis tempo fresca e para darlle esponxosidade aos roliños. 

Aquí vos deixamos a receita:

Roliños de froitos vermellos

Ingredientes:

Para a masa:

• 360 g de fariña de forza
• 260 g de auga morna
• 90 g de manteiga derretida
• 45 g puré de patacas instantáneo       
• 40 g de azucre
• 30 g de leite en po
• 8 g de lévedo seco de panadaría
• Un chisco de sal
• Ovo batido
• AOVE

Para o recheo:

• 400 g de amorodos
• 200 g de arandos
• 1 cullerada de azucre
  

Boa noite, bolboreteir@s. Como estades? Os que sodes pouco amigos da calor, estaredes coma reis, non? Haha. Nós levamos mal a choiva nestes meses, a verdade, pero como sempre, non hai mal do que non se tire proveito. Así pois, sempre que hai días sen saír, aproveitamos para a cociña e desta volta rendiunos para tres receitas novas, unha das cales presentamos xa hoxe. 

Optamos por un pan que non ten moita tradición na gastronomía galega pero que si é habitual encontralo en moitas pastelarías. Falamos do pan brioche, un pan doce xa a camiño do biscoito con orixe francesa. Parece ser, que provén concretamente das terras de Normandía, onde os pobos vikingos traballan a miúdo coa manteiga, coas calorías que iso lles ofrecía. Aparece documentada por primeira vez co nome de brioche no século XV mais, como dicimos, sábese da súa elaboración bastante antes. 

Hoxe en día, falamos dun pan doce moi popular en varios territorios de Europa, moi proveitoso para diferentes momentos do día. 

Pan brioche

Ingredientes:

• 525 g de fariña
• 100 g de manteiga
• 90 ml de leite        
• 25 g de azucre
• 15 g de lévedo seco

Crumpets

Ola, bolboreteir@s! Como estades? Nós andamos en modo lambóns e traemos unha receita que vos vai adozar a fin de semana. Especialmente para as persoas que sodes seguidoras das tortitas, pancakes e demais. 

Hoxe traemos unha variante inglesa, que a nós nos sorprendeu moitísimo e explicámosvos os motivos. Procurando receitas da cultura británica encontrámonos con isto e dubidabamos se igualarían as tortitas ao modificar algúns ingredientes. E están tan ricas ou máis. Son diferentes a pesar dos parecidos evidentes. Lémbrannos máis ao pan, hai un sabor máis puro da masa e a verdade percíbese nun sabor moi suave que nos conquistou. 

Aí van!

Crumpets

Ingredientes: 

• 250 g fariña de trigo
• 200 ml de leite
• 150 ml de auga tépeda
• 6 g de lévedo de panadaría
• 1 cullerada de azucre

Doce de tomate

Boa tarde, bolboreteir@s! Como vai todo? Agardamos que moi moi ben. Por aquí estamos en plena presentación da nova casa e andamos felices con convidad@s día si día tamén. Iso ten moitas cousas boas, especialmente a compaña, mais nós adoramos as visitas para sorprender con pratos novos. 

Así pois, configurando menús, adoitamos tirar de pratos xa consagrados no blogue (e na nosa casa) e experimentos que cremos que poden gustar aos comensais. 

O que agora presentamos é unha receita moi sinxela que non utilizamos como protagonista principal nun destes menús nesta fin de semana mais que serviu para dar moita alegría a un prato que traeremos no próximo día. 

Cando falamos de doces coma estes ou marmeladas adoitamos asocialas máis ben a almorzos, sobremesas ou merendas mais é certo que hai algúns produtos como o tomate ou o pemento que na súa versión adozada permiten combinacións ben interesantes con produtos salgados. Ollade aquí:

Doce de tomate

 

Ingredientes:

• 4 tomates
• Azucre

Brownie en 5 minutos

Bo día, bolboreteir@s. Esperamos adozarvos un pouquiño o día de hoxe cunha receita das que hai que gardar na rede si ou si, imprimila ou enmarcala, posto que nos ofrece unha das larpeiradas máis doces e apetecíbeis cun traballo case ridículo.

Falamos do brownie. Se ollades polo noso blogue, na listaxe de receitas comprobaredes que o índice da letra B é maior. Débese á cantidade de brownies diferentes que levamos feitos e sen saber cal é o máis saboroso. Mais si sabemos cal é o máis sinxelo, con moitísima diferenza. 

Apenas 5 minutos de amasado e despois... que traballe o forno, que para iso está. Ollade o bo de ter estas indicacións á man.

Brownie en 5 minutos

Ingredientes:

• 200 g de azucre
• 100 g de fariña
• 100 g de manteiga
• 50 g de cacao en po 0%
• 2 ovos

Torta da avoa

Pero como podía ser, amig@s, que case 7 anos e 600 receitas despois non tiveramos no blogue unha das nosas receitas "fetiche"? Estabamos alucinados cando nos decatamos deste oco na nosa listaxe. Mais a solución foi sinxela. Poñémonos inmediatamente coa creación. E con isto non tardamos moito porque temos cada un dos pasos ancorados na nosa memoria pois son moitos anos recreando esta lambetada na nosa casa, tanto pola nosa parte como da mamá e a avoa.

Sexa como for, alén de clásica, é para nós unha das sobremesas máis efectivas nos fogares e restaurantes galegos. Unha combinación sinxela que serve para pór o broche larpeiro perfecto a calquera menú. Hai diversas variantes e aquí vos deixamos a nosa para que comparedes ou poñades en práctica.

Torta da avoa

Ingredientes: 

• 2,200 l de leite
• 3 sobres de Flanín
• 150/200 g de chocolate Paladín
• Galletas tipo “María”
• Viño doce

"Donuts" caseiros

Bo día, bolboreteir@s! Como estades? Aquí estamos tirando de imaxinación para pasar o tempo aínda que co peque faise un tanto máis complexo porque se aborrece rápido. 

Sexa como for, pensamos que este é un bo momento para recuperar a publicación de dúas receitas á semana, tanto para nós como para que vós teñades algo máis de entretemento e ideas para ocupar horas na cociña.

E imos con toda unha receitaza!!! Os donuts son para nós como o summum das dozuras e non vos contamos a desfeita que fixemos cando viaxamos aos EUA... Que perdición. Ben, pois os que nós seguides de hai tempo xa viriades algunha receita similar no blogue, destacando especialmente estas Berlinesas recheas.

Desta volta seguimos a receita da nosa admirada Alma Obregón e os resultados foron impresionantes. De feito fostes moitas e moitos os que nos pedistes as pautas para a elaboración o domingo ao subirmos as fotos a Instagram. Aquí o tedes, bolboreteir@s!

"Donuts" caseiros

Ingredientes:

Primeira masa:

• 180 ml de leite
• 90 g de fariña de forza
• 11 g de lévedo seco de panadaría

Masa:

• 270 g de fariña de forza
• 70 ml de leite
• 60 g de manteiga
• 9 g de lévedo seco de panadaría
• 3 xemas 

Pequenas pavlovas de trufa

Bolboreteir@s! Estamos aquí mes e medio despois, tras tomarnos un descanso mais vimos cargadiños de ilusión acompañados con Xiao para vos seguir traendo moitas máis receitas. Iso si, durante unha tempada reducimos a subida de artigos a só un por semana. Xa sabedes, o tempo cun bebé dá para algo menos, haha. Un período de adaptación, claro.

Ben, pois decidimos volver fortes, cun tipo de receita que adoramos e que marcou os inicios do blogue aínda que ultimamente non as temos tan traballadas. Falamos das sobremesas, unha perdición mais o noso campo favorito de creatividade.

A plavova non é a primeira vez que aparece por Bolboretas no bandullo, de feito xa temos publicado unha vídeo-receita á que podedes acceder abaixo. Chamada así na honra da bailarina Anna Pavlova sendo publicada a receita por primeira vez en Nova Zelandia. Desta volta fixemos a versión en pastel, con racións xa individuais. Difícil descrivirvos o pracer da degustación. Faltan adxectivos. Aí vai. 

Pequenas pavlovas de trufa

Ingredientes:

Para o merengue:

• 6 claras de ovo
• 300 g de azucre glas
• 1 cullerada de vinagre
• 1 cullerada de maicena

Para o recheo:

• 600 ml de nata

Madalenas frías de chocolate (sen forno nin microondas)

Boa tarde, bolboreteir@s!! Vai moitísima calor e talvez se nos derreta a receita de hoxe só de vola presentar mais tiñamos moitas ganas de doce e non puidemos resistir ante esta delicia. 

Esta creación é ideal para os lambóns e lambonas máis folgazanas pois crearán unhas madalenas exitosas sen preocupacións de que quede ben ou non a masa. Iso si, tedes que gustar do chocolate. Aínda que supomos que iso non será un problema, non?

Ben, fixádevos que larpeirada e ollo, non molledes o teclado babexando ;-)

Madalenas frías de chocolate

Ingredientes (para 8 madalenas):

• 210 g de crema de cacao
• 150 g de chocolate 
• 16 galletas redondas

Madalenas con sorpresa ( e vaia sorpresa)

Bo día, bolboretei@s! Home vimos con moita forza e ilusión. Ben, non é nada novo isto mais hai moito de especial na receita de hoxe. Si, repetimos madalenas mais desta volta as madalenas traen sorpresa. E vaia sorpresa!! 

Diciámosvos o outro día que para gozar dunhas madalenas abonda coa textura e sabor tan característicos, sendo as de vainilla que presentamos o pasado sábado unha moi boa opción. Pero sabemos tamén que hai lambonciñ@s que perden a cabeza polos recheos, polas cremas, de aí que decidíramos crear unha versión aínda máis larpeira. Xa vos adiantamos que é moi, moi doce! 

Imos contextualizar. Como algúns intuístes por diferentes comentarios, receitas e sobre todo se nos vistes en persoa, estamos agardando a chegada dun pequeno bolboreteiro. E estamos inmensamente felices. As persoas máis achegadas xa o sabían mais tiñamos preparada unha sorpresa para que as amizades coñecesen o sexo do bebé. Eles e elas xa a descubriron. Agora tócavos a vós (tiñamos as opcións de verde azulado para neno- vermello para nena e branco se aínda non se sabía... ;-)). Imos coa receita!

Madalenas con sorpresa

 

Ingredientes: 

• Madalenas de vainilla  

Crema de vainilla:

• 500 ml de leite
• 2 ovos
• 4 culleradas de azucre

Sopa máxica, de María Victoria Moreno

Bo día, bolboreteir@s! Pasou o 17 de maio mais permanece o compromiso e amor pola nosa lingua. Hoxe imos pechar a semana das Letras Galegas coa segunda homenaxe a María Victoria Moreno e para iso volvemos partir dos seus textos e da súa paixón culinaria.

Desta volta, fixemos a lectura dunha das súas pezas infantís, "Un cachiño de bica?" na que a imaxinación e o ludismo se encontran arredor dunha mesa onde pasan diferentes pratos e receitas. O protagonismo, alén da comensal, está en Iván, un meniño, e Nica, a súa cadela. Deixámosvos este fragmento no que nos inspiramos para crear esta sopa máxica que cremos representa a dozura da escrita infantil María Victoria Moreno e o efecto constante de sorpresa que nos encontramos na súa obra. Porque si, esta sopa sorprenderavos, e moito!

Pedín un café con leite á camareira e tróuxome unha taza chea de letras.
E unha culler, por se me viña antollo de remexer.

As letras eran doces, eu tiña fame, e decidín comelas, ata fartarme.
Mais tiñan vida, eu achegaba a boca e elas fuxían.

Eran lenes e dondas as máis das letras, sorrían en colores de bolboretas...
E chanceaban: cando eu quería pillalas, elas voaban.

Brincaban ó seu gusto sobre o mantel, xuntándose en palabras que puiden ler:
Amor e pan,
casa, escola e camiños,
Nica e Iván.

[...]

Agora animámosvos a descubrirdes coa lectura, como remata este fantástico relato. E mentres tanto, deixámosvos coa nosa receita-homenaxe:

Sopa máxica, de María Victoria Moreno

Ingredientes:

• 150 g de chocolate branco
• 100 ml de nata para cociñar
• 100 ml de leite
• 1 iogur grego (opcional)

Scones

Bo día, bolboreteir@s!! Como levades a fin de semana? Con ganas, non? Pois por aquí estamos aproveitando xa a mañá para preparar unhas receitas impresionantes que vos presentaremos proximamente e para acabar de papar estes scones que hoxe vos presentamos e que se converteron na revelación gastronómica do mes.

Encontrámonos con esta receita de casualidade xa que nunca escoitaramos falar até o momento dos ditos scones. Investigamos un pouquiño e pareceunos interesante preparar un clásico da cociña escocesa que até o momento non tivera cabida no blogue aínda que si a británica, por exemplo, nestas tortas galesas.

Ben, ao principio estabamos pensando neles como un pan para acompañar aínda que ao ter un toque doce talvez fose máis adecuado para a sobremesa. Unha vez degustados temos claro que serve para calquera momento do día aínda que talvez onde mellor cadren sexa no almorzo ou na merenda. Nós estámolos papando case a cada comida porque son todo un vicio. Se queredes aprender a preparalos, esta é a vosa!

Scones

Ingredientes:

• 225 g de fariña, máis para amasar
• 90 g de manteiga
• 70 ml de leite, máis para pintar
• 1 sobre de lévedo en po
• 1 cullerada de azucre
• 1 ovo
• Framboesas

Das nosas receitas preferidas... Parte II (TORTAS)

Feliz San Xoán, bolboreteir@s! Hoxe hai festa por medio país. E a outra metade do país, aproveita para celebrar tamén que chegou o verán.

A nós este ano o San Xoán colleunos metidos de cheo nos exames de oposición así que pouca forza haberá para festas. Mais si para comer, que fame sempre hai, haha e iso é boa cousa.

Ben, o caso é que esta semana tivemos moi pouquiño tempo para cociñar e así pois aproveitamos para continuar un apartado que comezaramos hai ben tempo, en marzo do 2016 con Das nosas receitas preferidas... Parte I. Ese primeiro fascículo estaba formado por varias das nosas receitas salgadas máis adoradas. E claro, como ía faltar a correspondente versión doce sabendo que Bolboretas no bandullo ten xénese e motivación lambisqueira.

Pois como é día de tanta festa e de aquí en diante todo vai ser festexos pola Galiza adiante, aquí unha acumulación de tortas para as vosas sobremesas.

As receitas doces preferidas 

Torta Ferrero

Agora mesmo comiamos un anaco, dous, tres... ou toda a torta!! Sen dúbida, esta é unha das nosas torta estrela e unha das que máis éxito tivo cando a publicamos no blogue e cando a presentamos ante os nosos convidad@s xa que o sabor é moi similar ao dos famosos bombóns que tanto nos gustan... (non, Ferrero non paga a publicidade, haha). 

Torta de 3 chocolates

Ben podería ir de primeira pois esta é o noso punto de partida. Como sabedes aqueles e aquelas que escoitastes ou lestes algunha das nosas entrevistas, todo comezou coa clásica torta de tres chocolates. Primeiro para a irmá, despois para o resto da familia, amig@s...

Berlinesas recheas

Bolboreteir@s, como levades o mes? Supoño que moit@s de vós content@s coa fin de curso que se aproxima. Hoxe ímosvos presentar unha lambonada moi moi gorentosa que presta para eses días en que andamos con moito estudo ou traballo. Tomar unha berlinesa coma esta ten un efecto relaxante que, calorías á marxe, pode darnos forza para continuar coa xornada de esforzo ou ben como recompensa a un día laborioso. O caso é pór unha excusa para comer, haha.

Sexa como for, a berlinesa é para nós un símbolo gastronómico da mocidade. Recórdanos á tempada de instituto cando na cafetaría vendían destas larpeiradas e algúns de nós as comprabamos case a cotío. Si, resistimos. O caso é que as tiñamos no esquecemento e a semana pasada, ollando un dos libros de Alma Cupcakes que temos pola casa ("Un año de dulces"), encontramos esta receita que non pensamos nin un segundo en levar á práctica.

E para lle dar máis variedade, preparámolas de dous sabores, amorodo e chocolate. E deixamos as de crema pendentes xa para outro día. Outra excusa máis para repetir.

O caso é que investigando descubrimos que este doce forma parte da repostaría tradicional alemá, algo que parece obvio ollando a denominación mais no que nin repararamos até o momento. Parece ser que as Berliner Pfannkuchen poden ter orixe, ou iso di a lenda, alá polo século XVIII, cando un panadeiro creou este pastel con forma de bóla de canón en honra ao emperador Federico o Grande. Como estaban no exterior, e ante a falta de fornos, tiveron que optar pola tixola. Neste caso non quedaría máis que berrar moitos "hurra!" a ese cociñeiro. Aí vai:

Berlinesas recheas

Ingredientes: 

Para as bombas:

• 200 g de fariña de forza
• 150 g de fariña de repostaría
• 110 g de auga
• 40 g de azucre
• 25 g de manteiga
• 2 ovos
• 5 g de lévedo de panadaría
• Un chisco de sal
• Aceite

Para o recheo:

• Crema de cacao

Brazo de xitano de chocolate

Seguimos de doce. Pasamos unha tempada en que apenas coincidiron tortas e doces e agora, por uns motivos ou outros, estamos a facer de Bolboretas no bandullo unha oda ao azucre e ao chocolate. E claro, tamén ás lambonadas.

Non é a primeira vez que preparamos un brazo de xitano, que para nós sempre é aposta segura, mais desta volta fixemos un especial para @s comensais, especialmente chocolateir@s. A pesar de que non é a sobremesa máis lixeira pola potencia de cada porción, fixémola desaparecer nun abrir e pechar de ollos. 

Desde aquí, aínda que estramos na fase final do curso e tamén na de última preparación para as ansiadas oposicións, damos por comezada a etapa de festas. E xa sabedes, en Galiza todo se celebra comendo, devorando. Deberemos ir facendo acumulación de recursos entón para estar preparados ante os festexos que veñen. Velaquí un ben saboroso!

Brazo de xitano de chocolate

Ingredientes:

Para o biscoito:

• 200 g de azucre
• 90 g de fariña
• 50 g de cacao
• 50 ml de aceite
• 6 ovos
• Un chisco de sal
• 1 culledada máis de cacao

Pavlova de chocolate

Tiña que ser, tiña que ser, a primeira torta da canle de Youtube. A primeira receita do blogue, alá por finais do 2013 foi unha torta sendo este tipo de receitas nas que nos centramos nos comezos. Curiosamente, cinco meses despois de abrir a canle de receitas no Youtube aínda non subiramos ningunha co que xa sentiamos un baleiro importante. É certo que a elaboración de tortas na nosa casa está orientada ás celebracións, de aí que nestes últimos meses, ao non coincidir apenas aniversarios ou festexos, non subiramos tortas.

Ben, pois agora nesta tempada veredes como se incrementan pois tivemos algunha persoa a cumprir anos, días especiais e aproxímanse xa as moi diversas festas de primavera e verán. 

Imos pois con esta xoia da cociña oceánica. Si, nunca tan lonxe chegaramos coas receitas e iso que probamos desde Brasil, a Alemaña até chegar a Rusia ou China. Porén, esta torta que encontramos nun vello libro de cociña transportounos a este novo continente. Non se sabe moi ben o país de orixe, ou máis ben, hai unha gran discusión entre dous territorios próximos arredor da súa propiedade orixinal: Australia e Nova Zelandia. 

Iso si, antes de nos adentrarmos na historia, por aquí estabamos seguros da orixe rusa debido a ese nome tan peculiar. Claro, está ligado a unha bailarina dese mesmo país que foi honrada coa elaboración desta torta á chegada a un destes países oceánicos. De feito, na actualidade é unha das sobremesas máis consagradas na repostaría deste territorio. Non sei vós, mais nós non nos perderiamos esta vídeo-receita por nada. Aquí vos deixamos a ligazón á receita na nosa canle de Youtube.

Pavlova de chocolate

Ingredientes:

Para o merengue:

• 6 claras de ovo
• 300 g de azucre glas
• 5 culleradas de cacao en po
• 1 cullerada de vinagre
• 1 cullerada de maicena

Para a crema de queixo:

• 500 ml de nata
• 250 g de mascarpone
• 2 culleradas de azucre

Torta Tatin

Seguimos co doce, amig@s! Hoxe cun clásico que a maioría coñeceredes, unha torta Tatin que ademais de ser un éxito seguro, sobre todo para @s que gustamos do sabor da mazá asada, ten unha historia ben curiosa. 

O nome parece estar relacionado directamente co Hotel Tatin, situado na localidade de Lamotte-Beuvron, en Francia. O seu dono era Jean Tatin e coa súa morte, o hotel ficou en herdanza para as súas fillas Caroline e Stéphanie, a finais do XIX. A orixe da torta parece ser que foi accidental xa que unha das irmás, ao parecer, cociñou tempo de máis as mazás, pondo finalmente por riba unha masa para non desperdicialas. Finalmente, ao dar a volta, encontráronse cunha larpeirada que acabaría por ser unha das mellores xoias da repostaría francesa. 

Hai algunha teoría diversa mais acaba por ser esta a máis difundida e que nos fai crer nunha fermosa anécdota. 

A esta delicia chámaselle tamen torta invertida pois como vedes no paso a paso imos montala ao contrario do que facemos habitualmente, deixando o que será o soporte para o final. Velaquí a tedes!

Torta Tatin

Ingredientes:

• 1 lámina de masa crebada
• 4 mazás
• 100 g de azucre
• 50 g de manteiga
• O zume dun limón

Croissant á moda de Porto (Brioche)

Bo martes, amiguiñ@s! Como levades este comezo primaveral mais frío que o propio inverno? Estabamos pensando en traervos unha ensalada mais parece que de momento aínda non apetecen tanto, non?

Así pois presentámosvos unha receita acabada de saír do forno. De feito, acabamos de almorzar con eles e que dozura para comezar o día, perfecto! Falabamos hai unhas semanas da nosa viaxe ao Norte de Portugal onde alén do bacallau, francesinha, café e demais, sobresaíu para nós un produto, os croissants. De feito, probámolos en diferentes confeitarías e son impresionantes. Nada teñen que ver cos que aquí se preparan. A masa difire da do follado típico, sendo máis ben tipo brioche e por tanto, máis substanciosos. Había con mil e un recheos, mais nós optamos por papalos mesmo sós. Ben, excepto un, que tiña que ser con chocolate, como non.

De feito, parece ser que Porto é o lugar do mundo que máis croissants vende, incluso máis que París. Por algo será!

Sexa como for, prometímonos pór en práctica esta lambetada na casa e unhas semanas despois aquí estamos desfrutando dela. Como a Porto non imos ir todos os meses, había que procurar unha solución.

Era a primeira volta que preparabamos croissants, así que ficamos encantados co resultado, que ademais recorda moito aos portuenses. Imos con eles? Aí os tedes!

Croissant á moda de Porto (Brioche)

Ingredientes:

• 350 g de fariña de trigo
• 150 g de fariña de forza
• 200 ml de leite
• 85 g de azucre
• 40 g de manteiga
• 12 g de lévedo de panadeiro
• 2 culleradas de aceite
• 2 ovos 
• Un chisco de sal

Bolo de cenoria e kiwi sen glute

E como por sorte seguimos desfrutando dunhas xornadas de moito sol, continuamos a tirar de froitas e verduras para as nosas receitas. E como xa había tempo que non traiamos nada para @s celíac@s, hoxe vai por eles e elas tamén.

Tiñamos cruzada desde hai tempo unha torta/biscoito de cenoria posto que nos encantan, alén de estar moi na moda ultimamente (as sonadas carrot cake). Mais claro, de vez en cando procuramos innovarmos un pouco para ver que sae... e atrevímonos co kiwi e unhas pébedas de cabaza. Se vos asusta a mestura, teredes que probala e comprobardes que é do máis acertada. 

Ademais, este biscoito non se fai nada aborrecido e resulta ideal para a primeira comida do día polas súas múltiplas vitaminas. Velaquí o tedes:

Bolo de cenoria e kiwi sen glute

Ingredientes:

• 100 gr de fariña de millo
• 75 gr de azucre
• 50 gr de manteiga
• 3 ovos
• 3 cenorias
• 2 kiwis 

Ensaimada mallorquina

E como cada martes presentamos unha nova receita que agardamos que vos sirva tamén como plan para un destes días en que non teñades que facer e vos apeteza probar cunha nova larpeirada.

Se vos serve de motivación, dicímosvos que é un dos nosos maiores caprichos desde ben pequen@s xa que sempre que viña a familia de Mallorca nos traía unha ou dúas coma estas converténdose xa nun dos momentos máis doces do verán. Se é que a fin de contas, este é o produto estrela da gastronomía balear que xa se elaboraba no XVII. Dise que na elaboración deste produto artesanal é fundamental a experiencia d@ pasteleir@ para lle dar as características que o fan tan específico. Porén, para nós é a primeira vez traballando con ensaimada, e ben boa que quedou...

Iso si, tentamos seguir ao pé da letra unha receita desta sobremesa tradicional que chegou a nós. E parece que foi ben. Probamos a facela sen manteca de porco (elemento típico da receita) xa que non a tiñamos, e ficou igualmente saborosa. 

E canto ao recheo non tiñamos dúbida. Para nós, se algo fai especial esta ensaimada, iso é o cabelo de anxo e o ben que combina con esta masa. De feito, foi sempre a que comimos de Mallorca aínda que ultimamente tamén temos visto con chocolate e crema. A nós encántanounos como quedou e estamos seguro que a vós tamén. Aí a tedes:

Ensaimada mallorquina

Ingredientes (para 4 ensaimadas):

• Para a primeira masa (40 gr):
• 20 gr de fariña de forza
• 10 gr de lévedo fresco
• 10 ml de auga

• Para a segunda masa:
• 1 ovo
• 125 gr de azucre
• 12 gr de lévedo fresco