Crumpets

Ola, bolboreteir@s! Como estades? Nós andamos en modo lambóns e traemos unha receita que vos vai adozar a fin de semana. Especialmente para as persoas que sodes seguidoras das tortitas, pancakes e demais. 

Hoxe traemos unha variante inglesa, que a nós nos sorprendeu moitísimo e explicámosvos os motivos. Procurando receitas da cultura británica encontrámonos con isto e dubidabamos se igualarían as tortitas ao modificar algúns ingredientes. E están tan ricas ou máis. Son diferentes a pesar dos parecidos evidentes. Lémbrannos máis ao pan, hai un sabor máis puro da masa e a verdade percíbese nun sabor moi suave que nos conquistou. 

Aí van!

Crumpets

Ingredientes: 

• 250 g fariña de trigo
• 200 ml de leite
• 150 ml de auga tépeda
• 6 g de lévedo de panadaría
• 1 cullerada de azucre
• Un chisco de sal
• Manteiga

Utensilios: unha cunca, un batedor eléctrico, unha tixola e un cazo.

Elaboración:

Para comezarmos, mesturamos a fariña, o lévedo, a auga, o azucre e o sal. 

De seguir, agregamos o leite e batemos até que se integre. 

Ten que quedar unha masa líquida e homoxénea. Tapamos e repousamos 1 hora, aproximadamente.

Pasado ese tempo, o lévedo xa actuou e pasamos a facelas na tixola. Botamos un chisco de manteiga na tixola e imos botando a mestura.

Mentres imos facendo o resto, tapamos as que xa temos feitas cun pano. 

E xa estarían listas para comer! Podémolas acompañar con máis manteiga, crema de cacao, marmelada... Que homenaxe nos demos. Aperta forte, amig@s!