Solombo á mostaza

Boas, bolboreteir@s! Como imos neste novembro sen bares? Non nos podemos queixar moito que canto menos estamos a ter sol para saír pasear. Aquí agradecémolo moito, sobre todo polo peque. 

E esta maña dedicámolo a organizar un pouquiño as cousas da casa e a preparar algunha receita nova. Alén da lambetada que vos presentaremos proximamente, traemos hoxe unha carne cociñada dun xeito pouco tradicional mais moi sinxelo e sobre todo saboroso, que é o que nos interesa aquí. 

Desta volta, procuramos inspiración e encontrámola na canle de Youtube de "Cocina con Carmen". Así pois, recreamos a idea para compartir cos nosos amig@s lectores. Aí vai!

Solombo á mostaza

Ingredientes (para 2 solombos):

 

• 2 solombos
• 2 cebolas
• 2 dentes de allo 
• 4 culleradas de mostaza
• 2 culleradas de mel
• 300 ml de caldo 
• 200 ml de cerveza
• Aceite de oliva
• Pementa moída
• Sal

Utensilios: unha pota baixa, unha táboa, un coitelo e un batedor eléctrico. 

Elaboración:

Para comezarmos, temos de cortar os solombos en lascas e douralos en dúas culleradas de aceite. Retiramos e reservamos. 

Nese mesmo aceite, rustrimos as dúas cebolas e os dentes de allo, ben picadiños. 

Cando abrande a cebola, agregamos 2 culleradas de mostaza.

 E a cerveza. 

Deixamos ferver 2 minutos e agregamos o caldo. 

Cociñamos 10 minutos.

Trituramos e botamos o resto da mostaza, botamos os solombos. Salpementamos ao gusto. 

Cociñamos 20 minutos máis. 

E xa estaría listo para comer! 

Agardamos que vos guste e que nos contedes que tal a preparación. Os que gustades de experimentar ides adorar. E os demais... tamén, seguro. Forte aperta, bolboreteir@s!