Patacas "fritas" saudábeis

Sorpresa neste sábado completamente invernal. A xornada estavos para ficar na casa, coller a manta, realizar esas lecturas que tanto nos apetece e levar á práctica algunha desas receitas que tiñamos anotada para un día como o de hoxe. Mais... tamén apetece un novo vídeo de Bolboretas no bandullo, non é? Pois si, parece que vai día ideal para visualizarmos esta nova receita no Youtube, unha das nosas preferidas desde hai moito tempo pois revolucionou a nosa cociña desde que a descubrimos. E por que sendo simplemente unhas patacas "fritas"? Pois sabéndomos que en practicamente todos os fogares se comen patacas un par de veces, canto menos á semana, e téndomos en conta que talvez sexa un dos produtos máis calóricos da nosa alimentación habitual, resulta moi relevante mudarmos a súa preparación en beneficio da nosa saúde.

E non pensedes que vos hai que facer moita cousa... Botádelle unha ollada ao vídeo e á receita que aquí deixamos escrita e veredes que non ten moito conto. Mais si, os beneficios son evidentes. E o sabor? Pois deixámosvos que iso nolo digades vós. Por aquí xa houbo amig@s que se sumaron á moda das patacas saudábeis e non voltaron ás "normais". E vós? 

Tosta en pan de millo con camembert, salame e endivias

Que semana de sol levamos, que sorte! Canto se desfruta con tanta luz e cuns días que medran e medran. Cómpre aproveitar! Ademais, agardamos que xa logo suban as temperaturas para gozar dos xantares ao ar libre, en medio da natureza. Que idílicos e paradisíacos nos pon este sol primaveral, haha.

Mais non nos quita a fame, nin moito menos. Seguimos creando, argallando e degustando de todo un pouco. Xa non só con novas receitas senón que tamén aproveitamos sempre que podemos para probar novos alimentos xa que aínda non moitos os descoñecidos.

Así pois, achegámonos ao super nestes pasados días co obxectivo dun produto novo, e fomos dar ás endivias. O resto só foi cuestión de procurar combinación sen perder moito tempo, xa que pretendiamos facer unha cea rápida.

E aquí chegamos, a unha nova receita para presentar en Bolboretas no bandullo:

Tosta en pan de millo con camembert, salame e endivias

Ingredientes (para 4 tostas):

• 4 rebandas de pan de millo
• 4 anacos de queixo
• 4-5 lascas de salame
• 1 endivia
• 1 cullerada de vinagre de Xerez
• Ourego

Táboas de gruyère empanado

Inmersos xa no outono, estación que adoita ser un pouco de baixón após os meses de relax e suposta calor, convén seguirmos coas nosas receitas que vos presentamos con tanto gusto.

A de hoxe resulta unha posta en práctica dun petisco degustado nun restaurante de Viveiro. Quedamos abraiados co bo resultado que daba e pensamos en elaboralo canto antes. E aquí o tedes, un petisco orixinal que conquista todo tipo de padales queixeiros. Iso si, onde pon gruyère, poñede o queixo que máis vos praza. E que nós adoramos este queixo suízo...

Mais claro, despois dun petisco coma este, xa podedes pensar nun bo prato principal para non baixar o listón, haha. A ver que vos parece!

Táboas de gruyère empanado

Ingredientes:

• Lascas do voso queixo preferido
• Fariña
• Ovos batidos
• Pan relado
• Especias ao gusto (ourego, alfábega, pirixel etc.)

Flocos de millo ao curry

Despois do éxito da última receita, esa Torta de Santiago que tan pouco durou pola nosa casa, imos cun petisco moi orixinal. Desta volta a receita non é nosa. Estabamos onte vendo a TV mentres xantabamos e apareceu por alí o famoso Arguiñano. A pesar de que non somos moi seguidores del, si ten pratos moi interesantes e este así nolo pareceu. Atractivo e moi sinxelo de elaborar.

Ademais xa había tempo que tiñamos ganas de probar algo coas mazarocas de millo que temos pola casa alén dos tradicionais flocos de millo, aínda que nunca pensáramos nalgo así. Se gustades dos flocos de millo e do toque que lle dá o curry á comida, esta é a vosa. Ollade que pouco traballo...

Flocos de millo ao curry

Ingredientes:

• 2 mazarocas de millo
• 1 cullerada de curry
• 1 cullerada de aceite
• Un chisco de sal

Espárragos verdes gratinados con mozzarella

Xa andamos por aquí unha vez máis. Como podedes comprobar, no último mes incrementáronse as receitas saudábeis o que demostra que a chegada do verán adoita propiciar que melloremos a nosa alimentación xa que apetecen produtos algo máis lixeiros.

E como ultimamente lle collimos moito gusto aos espárragos verdes, decidimos preparar unha receita en que eles fosen os protagonistas. Unha receita saudábel, nutritiva mais á que non lle podía faltar sabor ningún, de aí a  presenza do queixo e as especias.

Este prato serve tanto como acompañante como principal así que coidamos que a podedes aproveitar tanto para unha cea nun día do verán que se aproxima como para un acompañamento nunha comida especial. Se non vos animábades até agora a probar esta nutritiva verdura, agora é o momento, seguindo uns pasos o máis sinxelos posíbeis. Aí vai:

Espárragos verdes gratinados con mozzarella

Ingredientes:

• Unha presa de espárragos verdes
• Mozzarella
• Aceite
• Pementa moída
• Noz moscada

Picos froiteiros

Con estes días énos imposíbel non pensar en receitas fresquiñas e lixeiras, que alén de estar boísimas, sérvennos para depurarmos e levarmos unha alimentación equilibrada. E a receita de hoxe está tan fresca que a acabamos de facer. Erguémonos cun pouco de tempo para almorzar e con moitas ganas de froita así que pensamos nun modo de degustar diversas froitas e esta foi a que se nos ocorriu. Ademais coincidiu que tiñamos algunha na casa moi doce e axeitada para unha saborosa combinación. Aquí vos queda; comprobaredes que pouco máis sinxela pode ser, alén das múltiplas posibilidades de elaboración que vos ofrece:

Pico froiteiro

Ingredientes:

• 1 manga
• 1 plátano
• 1 kiwi
• 5-6 amorodos
• 50 gr de chocolate branco

Smoothie de manga e amorodos

Un outro martes de receita, mais un martes diferente xa que boa parte da xente está de vacacións por mor da Pascua. É por iso, que vos animo a aproveitardes o tempo libre preparando algunha que outra receita das que aquí vos presentamos. A de hoxe, de feito, pouco tempo vos quitará, podédela facer mesmo para almorzar, son cinco minutiños. Sería, sen dúbida, unha forma de recargar enerxías para todo o día xa que este smoothie nos proporciona moitísimas vitaminas.

Incribelmente é a primeira vez que probamos unha manga natural. Tiñamos degustado produtos típicos como zume, iogures, ou pasteis mais nunca traballáramos con ela así que puxémonos mans á obra. De por si xa é unha froita doce e saborosísima, mais combinada con amorodos gana moitísimo. Ollade que pouco traballo para un batido tan delicioso:

Smoothie de manga e amorodos

Ingredientes (para dous smothies):

• 1 mango
• 10 amorodos
• 1 vaso de leite descremado
• Xeos

Dous aperitivos sinxelos e rápidos

Hoxe imos cunha entrada algo diferente porque xa sabedes que non queremos ficar na monotonía. Así pois traémosvos dúas ideas para esas ceas con convidad@s en que non sabedes que pórlles como aperitivos para os agradar e sen necesidade de perder moito tempo, xa que normalmente prefírese dedicar máis ao prato principal. Ben, pois poucas receitas pode haber máis fáciles e rápidas que estas. En apenas 5-10 minutos teredes preparados dous entrantes deliciosos cos que ir abrindo apetito.

O primeiro parte da idea dos rolos de salchichas, que nos encantan desde ben pequenos, mais que decidimos xuntar en espetos para lograr algo máis orixinal. Sexa como for, aseguran o éxito e dificilmente sobrará ningún.

O segundo aperitivo havos de sorprender como nos sorprendeu a nós. Coñecímolo en Mallorca, onde como xa dixeramos, temos familia. Son uns Doritos feitos ao forno. Dá o mínimo traballo, entre outras cousas porque o elemento principal xa vén preparado, mais co aderezo que lle pomos ganan moitísimo en sabor e fanse irresistíbeis. Ollade, de seguro que gustades destas ideas :-)

Espetos de rolos de salchichas

Ingredientes (para 6 espetos):

• 1 lámina de follado
• 6 salchichas
• 1 ovo batido

Utensilios: 6 picos e un pincel.

Trempó

E hoxe toca receita que chamamos compensatoria, xa que resulta do máis beneficiosa para compensar os excesos das nosas últimas tortas. Un prato ao que lle temos especial cariño por nos ser transmitido pola familia que reside nas Illes Balears, territorio do que é típica a receita.

Evidentemente, nós utilizamos produtos galegos no canto de mallorquinos, mais iso non lle vai restar nin un punto de sabor a esta mestura principalmente de verduras. Parece ser que o trempó orixinal consistía soamente en tomate, pemento e cebola. Con todo, a variante que nós coñecemos, inclúe tamén un pouquiño de atún para facer máis nutritiva esta especie de ensalada que para nós xa actúa non como acompañante, senón como prato principal.

O nome deriva do verbo "trempar", que significa aliñar, unha das claves desta deliciosa combinación de hortalizas.

Os pementos utilizados adoitan ser mallorquinos ou italianos, mais nós aproveitamos os da casa, galegos claro, ao igual que os tomates e as cebolas. A ver que vos parece:

Trempó

Ingredientes (para dúas persoas):

• 1 pemento vermello
• 1 pemento verde
• 1 tomate
• 1 cebola
• 1 lata pequena de atún
• 2 paus de surimi (opcional)
• Aceite, vinagre e sal

Delicias salgadas

Xa andamos por aquí de novo para traermos unha nova receita e hoxe si, deixamos á marxe, os doces para elaborarmos un manxar idóneo para os días de excursión ou para comerdes na praia pola súa comodidade e pola súa lixeireza. Estou seguro que vos encantarán estas delicias salgadas en que o vexetal se converte no elemento principal, sendo perfecto para calquera merenda destas de verán.

A idea orixinal vén da coñecida Isasaweis aínda que nós tentamos darlles o noso toque persoal esperando que vos guste e que probedes a facelas, son do máis sinxelo que hai :-) 

Delicias salgadas

Ingredientes (para 8 delicias):

• 16 obleas
• 8 lascas de berenxena
• 8 lascas de cabaciño
• 8 lascas de pemento vermello
• Queixo ao gusto
• Ovo batido
• Sal
  

Cogomelos crocantes

Xa chegou o sol e aquí seguimos con novas receitas!! E volvemos tirar dun dos nosos produtos favoritos: os cogomelos, que na cociña son un recurso óptimo. Desta volta, decidimos darlles un protagonismo principal, nun prato rapidísimo de elaborar en que eles son o máis importante: cogomelos crocantes. E iso é o bo, serven de entrantes, de acompañantes ou de prato central, toda unha xoia, que ademais nos ofrece diferentes vitaminas (B6, C, D), potasio e niacina. E o que nos interesa, o sabor é boísimo, e máis aínda con esta receita que os fai máis divertidos:

Cogomelos crocantes

Ingredientes:

• Cogomelos
• Un ovo
• Pan relado
• Aceite abundante

Torradas

Para moit@s xa comezan as vacacións da Semana Santa ou Pascua e nestas datas tamén destacan unha serie de produtos gastronómicos típicos. Non hai unha tradición gastronómica tan específica como a do Nadal ou Entroido, aínda que si hai certos pratos, e sobre todo sobremesas para esta época do ano.
E despois dunhas receitas máis saudábeis hoxe regresamos a un doce que parece propio desta semana, aínda que ben é certo que na Galiza cómese durante todo o ano (ou canto menos na nosa casa), as torradas. Unha receita das máis sinxelas posíbeis que serve para aproveitar o pan vello e para crearmos un doce ben saboroso.
Desde ben pequena comimos esta dozura elaborada pola avoa polo que o máis xusto é seguirmos a súa receita, aínda que supoño que haberá tamén outras variantes. Unha homenaxe a ela estas torradas!

Torradas

Ingredientes:

• Pan duro
• 1 ovo batido
• 1 vaso de leite
• Azucre
• Canela (opcional)

Rosca de xamón e tomate

Como ides comprobar a receita de hoxe é moi moi sinxela, algo máis que un simple bocadillo. Primeiro porque que serve para comermos varias persoas xa que utilizamos unha rosca de pan, e despois porque creamos un mollo para el que o fai do máis apetecíbel. Estamos así ante unha receita que parte dunha das mellores mesturas gastronómicas existentes, canto menos para min, a de tomate, aceite e xamón.
Aquí vos deixamos este prato para saírdes de calquera apuro e que vos encantará: 

Rosca de xamón e tomate

Ingredientes (para 2 persoas):

•  1/2 rosca de pan
• 200 gr de xamón
• 1 tomate
• 1 dente de allo
• Queixo relado
• Aceite de oliva
• Alfábega

Smoothie

De novo, presentámosvos unha receita fugaz. Un batido de froitas e verduras moi saudábel e nutritivo, perfecto para tomar a media mañá, á merenda ou mesmo como acompañante do almorzo.
Nunha dieta equilibrada debemos tomar, polo menos, 5 pezas de froita e verdura ao día, e moitas veces faise complexo por moitos motivos, por iso, estas bebidas se converten nunha solución posto que mesturamos nun batido todos eses elementos. Ademais son perfectos para @s pequen@s da casa debido a que, en moitas ocasións, cústalles comer este tipo de alimentos e así o farán ledamente.
Aquí propóñovos este smoothie en concreto, mais cadaquén pode escoller os ingredientes que máis lle gusten (froitas vermellas, pera, plátano, iogur, leite...). E se vos pracen este tipo de receitas, non dubidedes en dicilo, para mostrarvos máis exemplos destes fantásticos batidos que nos encantan. Coméntadenos as vosas suxerencias!!

Smoothie

Ingredientes:

• O zume de 2 laranxas e unha mandarina.
• 1 cenoria
• 1 mazá
• 100 gr de espinacas frescas
• Xeo, opcional

Biscoito fugaz

Hoxe comezamos unha nova sección, Receitas fugaces, pratos para facerdes en moi pouco tempo. A primeira, o biscoito fugaz, é perfecto para un almorzo ou merenda sen tempo a outra cousa, ou tamén para saírdes dalgún apuro ante unha visita imprevista. Sen dúbida esta receita resulta de moitísima utilidade e comprobaredes que, a pesar da súa rapidísima preparación, o sabor é moi sorprendente. Un biscoito ideal para @s máis preguiceir@s que non gosten de botar moito tempo na cociña.

Biscoito fugaz

Ingredientes:

• 4 culleradas de fariña.
• 4 culleradas de azucre.
• 4 culleradas de leite.
• 3 culleradas de aceite
• 2 culleradas de cacao en pó.
• Media culleriña de lévedo.