Tortilla rápida

Feliz día das tortillas, bolboreteirxs! Hoxe, ademais de San Patricio, en Viveiro celébrase o día das tortillas e, aínda que non estivemos por alí, seguimos coa tradición de comer tortilla. Porén, decidimos probar a facer a tortilla coas patacas fritidas de bolsa e, aínda que non tiñamos moitas expectativas, a verdade é que nos sorprendeu moi gratamente. Para esta tortilla, adaptamos a receita de Ferrán Adriá! Aquí vos deixamos a nosa versión:

Tortilla rápida

Ingredientes: 

• 6 ovos
• 1/2 paquete de patacas fritidas   
• 1 cebola caramelizada

Biscoito de pexegos e améndoa

Bo día, bolboreteir@s. Como estades?? Chegamos nesta noite de Domingo das mozas (viva o San Froilán!) para vos traer unha outra alternativa para os almorzos ou sobremesas.

Nós, no procura dunha primeira comida do día algo máis saudábel e variada, estamos eliminando os cereais que adoitabamos comprar (azucarados, chocolate...) e no seu lugar adoitamos comer unha froita con café ou biscoito caseiro. Así pois, despois da elaboración do último biscoito, de froitos vermellos, optamos por este cos pexegos como protagonistas. Uns pexegos de final de tempada que chegaron de agasallo dos veciños de Xinzo e que lle tiramos rapidamente proveito. 

Pois ben, substituímos o azucre por mel e contamos con fariña de améndoa que aínda que é bastante máis cara dálle máis sabor a estas receitas. O resultado... aquí!

Biscoito de pexegos e améndoa

Ingredientes:

• 8-9 pexegos grandes
• 360 g de fariña de améndoa        
• 200 g de mel
• 6 ovos
• A reladura dunha laranxa

Crumpets

Ola, bolboreteir@s! Como estades? Nós andamos en modo lambóns e traemos unha receita que vos vai adozar a fin de semana. Especialmente para as persoas que sodes seguidoras das tortitas, pancakes e demais. 

Hoxe traemos unha variante inglesa, que a nós nos sorprendeu moitísimo e explicámosvos os motivos. Procurando receitas da cultura británica encontrámonos con isto e dubidabamos se igualarían as tortitas ao modificar algúns ingredientes. E están tan ricas ou máis. Son diferentes a pesar dos parecidos evidentes. Lémbrannos máis ao pan, hai un sabor máis puro da masa e a verdade percíbese nun sabor moi suave que nos conquistou. 

Aí van!

Crumpets

Ingredientes: 

• 250 g fariña de trigo
• 200 ml de leite
• 150 ml de auga tépeda
• 6 g de lévedo de panadaría
• 1 cullerada de azucre

Ovos recheos

Bo día, bolboreteir@s! Seguimos con receitas. A verdade é que esta semana puxémonos algo clásicos e preparamos varios platos de tradición na nosa casa e sabemos que en moitas máis, polo que lemos nas redes.
Ben, pois a de hoxe son uns ovos recheos, que sempre funcionan moi ben en calquera xuntanza, tanto como aperitivo ou mesmo como prato principal.
Xa temos preparadas varias versións como esta co surimi como protagonista. Con todo, queriamos optar desta volta por unha das receitas máis elaboradas, a que ten o atún como elemento central.
Vendo como estaban de bos puidemos preparar dúas ducias de ovos mais queda para outra e sobre todo, queda aquí a idea para compartir con vós.

Ovos recheos

Ingredientes (para 3-4 persoas):

• 7-8 ovos
• 1 lata de atún grande
• 1 tomate
• 1/2 cebola
• 3-4 culleradas de salsa de tomate
• Maionesa

Niños de ovo

Olaaaaa!!! Seguimos creando aproveitando o tempo que nos ofrece o verán para ler, visualizar e saborear. Estivemos aprendendo estes días que os ovos son bastante recomendábeis durante o embarazo e como non estaba comendo moitos decidimos matinar unha receita que lle dese todo o protagonismo ao ovo, variando así das formas clásicas.
E xa vedes ao que chegamos, unha creación orixinal e con moito máis sabor do que se pode mostrar en ningunha imaxe xa que esa pseudoclara do ovo alberga unha intensidade dificilmente esquecíbel para o padal.
Probade a poñerlle estes niños de ovo á xente da casa a ver que vos din. Van flipar! Ollade que pouco para lograr un prato saborosísimo!!

Niños de ovo

Ingredientes:

• 2-3 ovos
• 3 lascas de bacon
• 2 culleradas de queixo parmesano
• Ourego
• Pementa moída
• Sal

Boliño de ovos (tradición da Pascua)

Bolboreteir@s, por aquí xa andamos desfrutando desta semana de descanso e aproveitando para aumentar o corpus culinario do blogue. A inquietude que tiñamos estes días era a de procurar na tradición gastronómica de Galiza nestas datas e a verdade é que cada vez se fai máis complexo dar con receitas autóctonas. A globalización é o que ten... 

Sabiamos das torradas, que tanto nos recordan a tempos da infancia, mais descubrimos outras das que nada coñeciamos como este bolo de ovos típico das comarcas do Salnés e Morrazo, onde parece ser que era, e aínda é (aínda que menos), regalo dos padriños aos afillados pola Pascua.

Así pois, foron de vital axuda as páxinas Sweet and sour e El amasadero onde nos mostraron os pasos. De todas formas, nós adaptámolo debido á incerteza do resultado e tendo en conta que aquí unicamente eramos dous comensais. De todas formas, xa vos podemos garantir que merece a pena dobrar as cantidades, porque resulta ben gustoso! Aí vai.

Boliños de ovos (tradición da Pascua)

Ingredientes:

• 250 g de fariña
• 160 ml de auga
• 25 g de manteiga
• 3 g de lévedo seco
• 2 ovos
• Aceite
  

Como facer ovos escalfados

Bolboreteir@s, unha vez máis pola rede para nos encontrar a través das receitas e das vosas agarimosas lecturas. Entretando andamos preparando a sorpresa máis grande dos últimos tempos que agardamos presentar nas próximas semanas, seguimos a ampliar o corpus culinario de Bolboretas no bandullo cunha desas ideas que temos durante moito tempo no maxín e que despois tardamos en levar á práctica. E non sabemos o motivo pois como puidemos comprobar, os ovos escalfados non presentan ningunha dificultade e si unha presentación ben atractiva e unha cocción do ovo moi especial, ideal sobre todo para @s amantes da xema, mmmmmm...
Está ben ter clara a preparación e tela como referencia pois moitas veces escoitamos falar de ovos escalfados pero non tod@s o levamos a cabo. E claro, que mellor para saírmos da rutina dos ovos fritidos e cocidos?
Imos con ela!!

Ovos escalfados

Ingredientes:

• Ovos
• Un chisco de ourego
• Un chisco de sal
• Aceite de oliva
• Auga

Brownie con doce de leite

Poucas veces o título dunha receita soou tan lambón, verdade? Pois non pensedes que leva ao equívoco. Nin moito menos. Encontrámonos perante unha das lambetadas máis doces da traxectoria de Bolboretas no bandullo. Tan tan doce, que si, resulta difícil repetir pois cada porción é unha bomba que nos deixa tremendamente satisfeitos. 

E como xa tiñamos elaborado varios brownie con total éxito, aventurámonos a probar unha nova versión coa seguridade do resultado final pois chocolate e doce de leite deben estar no top 5 de lambetadas. Ademais, como estas últimas semanas están a ser moi estadounidenses por cuestións mediáticas, tiramos do caixón unha das últimas receitas, preparada para un aniversario hai un par de semanas e que versiona a receita orixinal creada por un pasteleiro dos EUA cando esqueceu botar o lévedo a un pastel de chocolate, quedando este biscoito non demasiado elevado e sendo máis ben un bloque substancioso cargadísimo de sabor. Aí vos vai!

Brownie con doce de leite

Ingredientes:

• 350 g con chocolate con leite
• 300 g de doce de leite
• 400 g de azucre moreno
• 250 g de fariña
• 230 g de manteiga
• 60 g de cacao puro
• 1 cullerada de vainilla

Torta de turrón

Parabéns para nós e para tod@s @s lectores de Bolboretas no bandullo!!!!! 30 de decembro e xa todo un ano con vós!! Que rápido pasa o tempo. Xa non queremos insistir no de sempre, mais cómpre darvos mil millóns de grazas por estardes aí acompañándonos en todo momento e facendo coas vosas lecturas que este traballo non sexa en balde e mereza moitísimo a pena. 

Aprendemos moito día a día dos vosos comentarios, suxerencias e tamén nos deixamos guiar un pouco polos vosos intereses gastronómicos para tervos o máis content@s posíbel. Fomos medrando e grazas a vós chegamos ás 23000 visitas no blogue, a 336 gústame na páxina do Facebook e a case 1500 seguidores en Twitter, o que nos fai estar moi moi orgullosos xa que para nós esta era unha experiencia totalmente nova e estámola desfrutando ao máximo. Alegría para os bandullos!!

E como iamos celebrar o ano? Pois cunha larpeirada que representa o que cremos é a base deste blogue, o doce e as lambonadas, aínda que como fostes vendo... hai de todo :-) E tentamos, pois, adaptala á época do ano correspondente. Xa trouxemos polvoróns, mazapáns, arroz con leite... Tocaría turrón, mais desta volta quixemos ir un paso máis alá e elaborar non o turrón, senón unha torta de turrón que degustamos por primeira vez na Casa de xantar "As Tixolas" en Viveiro (asistencia obrigada, por certo). Unha vez que nos fixemos coa receita, démoslle o noso toque persoal e así puidemos saborear esta verdadeira delicia, que con seguridade vos ha de encantar, sexades amantes ou non do turrón xa que ten un sabor especial, moi diferente a outras tortas. Super recomendábel!!!

Porén, queríamos ofrecervos algo máis que unha receita neste día especial, no primeiro aniversario de Bolboretas no bandullo. Así pois, con toda a humildade que corresponde a este caderno dixital, realizaremos un pequeno sorteo entre todas aquelas persoas que deixen algún comentario na receita de hoxe até o día 6 de xaneiro. Haberá premio para dúas persoas, e este será un conxunto de galletas feitas con todo o agarimo do mundo e que vos encantará. Unha moi boa oportunidade para degustar algo elaborado por Bolboretas no bandullo e comprobar que isto non só fica en fotos e explicación, xa que o máis importante é o sabor :-)

Para pagarlle a un notario non hai, con todo, realizaremos o sorteo nunha aplicación xa idónea para este tipo de procesos e subiremos a fotografía co resultado. Despois solicitarémosvos a dirección de correo e para alá irán estas sorprendentes galletas :-) Agardamos os vosos comentarios!!!

E aquí vos vai a larpeirada de hoxe:

Torta de turrón

Ingredientes:

• 1 barra de turrón brando
• 7 ovos
• 7 queixiños
• 1 vaso de nata
• 1 vaso de fariña
• 1 vaso de azucre
• 1 iogur de limón
• Raiadura dun limón
• Para decorar (opcional): nata montada e boliñas de chocolate

Torta KitKat

Outro aniversario máis que tivemos e unha nova torta. E cando é así poñemos o maxín a traballar até dar coa larpeirada máis larpeira. Doutra volta probaramos cos produtos Kinder que tanto nos gustan, e desta pensamos nestas míticas barras de chocolate tan saborosas, os KitKat. Con todo, sería difícil imaxinarmos unha torta feita toda ela con isto xa que non os Kitkat non levan crema, senón galleta e chocolate, así que para o recheos optamos pola típica crema de cacao que nos garantía o triunfo e que faría imposíbel que nos quedara seca.

E nesta ocasión nos nos preocupamos tanto en realizar unha decoración con debuxos ou letras, simplemente deixamos caer unha doce chuvia de bolas de chocolate e lacasitos que lle ofrece a esta sobremesa moitísimo colorido e que se converte nunha oda ao chocolate. Aí vos vai ;-)

Torta KitKat

Ingredientes (para un molde de 26 cm):

Para o biscoito:

• 175 gr de fariña, máis extra para engrasar
• 175 gr de manteiga, máis extra para engrasar
• 175 gr de azucre
• 3 ovos
• 1 sobre de lévedo en po
• 1 cullerada de esencia de vainilla

Para o recheo:

• 500 gr de crema de cacao

Petit choux

Xa andamos por aquí unha outra vez, despois duns días de inactividade blogueira, que non gastronómica. Comentamos varias veces que a cociña que máis apreciamos é a galega, posibelmente polo feito de ser a nosa, mais tamén é certo que nos atrae moitísimo probar produtos de diferentes partes do mundo. Así pois, hoxe presentámosvos a nosa incursión na cociña francesa, a través destes pequenos doces feitos con masa de orixe gala. Con todo, non está clara a súa procedencia, xa que parecen existir documentos en que se menciona a Catalina de Medici como a persoa que levou a masa de Italia a Francia. O que si parece estar máis claro é que foi inventado por un pasteleiro chamado Popelini que nun primeiro momento lle daría o seu nome ao doce.

Son unha delicias de pequeno tamaño, como di o seu nome, que decidimos facer aínda máis petit para aproveitar a masa e desfrutarmos dun bo número destes pasteis.

Petit choux

Ingredientes (para 45 unidades):

• 125 gr de fariña
• 75 gr de manteiga
• 3 ovos
• Para o recheo: crema pasteleira
• Para a decoración: chocolate con avelás

Torta sanguenta "Red velvet"

Ai, o que nos pasou, iamos facer unha torta para un outro aniversario, neste caso de miña nai, e resulta que lle metimos unha tallada á man sen querer, co conseguinte rego de sangue por toda a torta. Evidentemente non a iamos tirar, así que deixámola así, que máis dá. Non se comen tamén as filloas de sangue?

Bon, por sorte, o vermello que encontraredes dentro da torta non procede das nosas veas, senón que é un simple colorante con efecto sanguento para celebrarmos o Samaín ou tamén o que no estranxeiro se coñece como Halloween, aínda que non son exactamente o mesmo. 

A etimoloxía do Samaín, este ano parece estar máis acertada que nunca, xa que significaba "fin de verán" Como algúns/has sabedes, esta celebración tivo un gran peso histórico na Galiza até hai trinta anos, cando foi desaparecendo en favor da celebración do Halloween que tanto se coñece en todo o mundo.

Nós que nos apuntamos a todas estas festas pois xa andamos argallando coa decoración das cabazas e na elaboración de tartas arrepiantes como a que hoxe vos traemos que espero que vos guste e que vos atrevades a facer. E se é nestes días mellor que mellor :-)

Torta sanguenta "Red velvet"

Ingredientes:

Para o biscoito

• 250 gr de fariña
• 250 gr de azucre
• 200 ml de aceite
• 1 iogur de amorodos
• 2 ovos
• 1 sobre de lévedo en po
• 3 culleradas de leite
• 1 cullerada de cacao 
• cullerada de vinagre
• 1 culleriña de vainilla

Flan de chocolate

E despois do arroz con leite hoxe seguimos co listón moi alto, cunha das sobremesas máis populares no mundo enteiro, o flan. Porén, ao igual que fixemos coa anterior receita, decidimos introducir un ingrediente básico na repostaría (e na vida de moitos nós XD), o chocolate. Desta volta a razón non estaba tanto na procura dunha variación da receita clásico senón en procurar un flan do meu agrado xa que a dicir verdade, non gusto moito do típico. Así pois, despois de dubidar un momento se facelo de froitas ou de chocolate, a miña parte máis lambona decidiuse pola segunda. E si, o experimento saiu ben xa que me encantou como quedou. É certo que pouco se parece ao flan de toda a vida xa que o chocolate modifica o sabor, mais si ten esa textura tan característica do flan. Aí vos vai:

Flan de chocolate

Ingredientes:

• 600 ml de leite
• 200 gr de chocolate para fundir
• 150-200 gr, máis 10 culleradas para o caramelo
• 4 ovos completos e 2 xemas
• 5 culleradas de auga

Torta de mazá

E despois destes días de descanso que collemos con motivo da Romaría do Bo Xantar, era necesario regresar cunha receita das que garanten o éxito e das que máis éxito ten na nosa casa: a torta de mazá. Realmente é todo un clásico que podemos encontrar na maioría das pastelarías da Galiza e que ten moi boa acollida por ese agradábel e doce sabor da mazá asada que tanto xogo nos dá para outras receitas como a propia empanada de mazá.
Non está moi clara a súa orixe, mais a verdade é que na actualidade converteuse nun dos símbolos da gastronomía inglesa e estadounidense. Sexa como for, é unha torta de moitas variantes e que dependen do lugar de creación.

Torta de mazá

Ingredientes:

• 1 lámina de follado
• 4 mazás
• 1/2 vaso de leite
• 1/2 vaso de nata
• 1/2 vaso de azucre, máis extra para espolvorear
• 1 ovos
• 4 culleradas de marmelada
  

Orellas de Entroido

Dise que non hai dous sen tres e neste caso é obrigado xa que quedaba por completar a tríade gastronómica do entroido, faltaban as orellas de frade ou orellas de entroido!! Un outro produto que Álvaro Cunqueiro resaltaba para o martes de Entroido : "Pra martes lardeiro, aparte das filloas, fanse froles e orellas, con masa de fariña, ovos e leite...".

A denominación de orellas vén polo suposto parecido con esta parte do corpo humano, e maior aínda coas dos frades, aínda que como podemos comprobar cando facemos e comemos as orellas pouco vai quedando deste parecido. Mantemos normalmente a súa forma xeométrica, mais acaban por ser un tanto irregulares. Non vaiamos facer orellas tampouco orellas con forma circular, mais o realmente importante é o sabor, e ese si que é exquisito. E ao igual que as filloas ou as roscas, son un produto que se conserva ben, polo que se facedes unha boa remesa delas, xa vos dá para todo o Entroido. Aí vos vai!

Orellas de Entroido

Ingredientes:

• 3 ovos
• 1 cunca do café de aceite
• 1 cunca do café de anís
• 2 cuncas do café de zume de laranxa
• Fariña, aproximadamente 500 gr

Pizza de zorza con ovos e patacas

As promesas están para se cumprir, por iso hoxe presentamos a segunda das receitas escollidas entre as varias que nos propuxestes na chegada en Twitter a 500 seguidores/as. Neste caso a idea dunha apetitosa pizza de zorza con ovos e patacas debeuse a Ecolleita (twitter.com/Ecolleita), a quen vos recomendamos seguir polo seu traballo por unha agricultura local sostíbel. Neste caso nós non acrecentamos nada, simplemente elaboramos unha completa pizza botando man de todos os ingredientes recomendados por Ecolleita. O resultado é un verdadeiro deleite cun sabor moi intenso. Recomendámosvos que tamén probedes a facela, habedes de quedar con ganas de volvelas facer. Ademais é unha desas pizzas farturentas, así que cunha soa talvez comades vari@s.

Pizza de zorza con ovos e patacas

Ingredientes:

• Masa caseira de pizza (nós usamos á mesma que para a empanada)
• Salsa de tomate
• Queixo 
• Zorza 
• 1 pataca laminada
• 3 ovos
• Tomiño

Roscas de entroido

Como cada vez está máis próximo o entroido, cómpre continuarmos coas receitas tradicionais destes días. Hoxe imos coas roscas de entroido. Neste caso non acostuma haber grandes diferenzas nas receitas como no caso dos freixós, aínda que si existen variantes. Forman parte da tradición gastronómica galega, e mesmo Álvaro Cunqueiro falou deste produto en máis dun dos seus textos louvando o seu sabor e marcándoo como típico do país: "El xa estamos na Galicia doceira, na Galicia dos biscoitos, dos amendoados, das rosquiñas das festas... Rosquillas fritas, rosquillas anisadas, roscos de viño..." [en A Cociña galega]. A receita das súas roscas era ademais ben parecida á que aquí vos presentamos. O caso é que traemos outra destas dozuras que apetecen en calquera momento do día.

Roscas de entroido

Ingredientes (para facer entre 25 e 30 rosquiñas):

• 2 ovos
• Dúas medidas de ovo de leite
• Dúas medidas de ovo de aceite de oliva
• 4 culleradas de azucre
• 1 sobre de lévedo
• Reladura de limón
• Un chorriño de anís

Biscoito de plátano

Nesta mañá de domingo aproveitamos para elaborar un delicioso biscoito que vos imos presentar. Xa sabedes, unha das múltiplas vantaxes dos biscoitos é que serven para calquera momento do día: de almorzo, de sobremesa, merenda... E cando se elaboran cunha das froitas máis doces como é o plátano, aínda entra mellor. Ben é certo, que o podedes elaborar coa vosa froita preferida: amorodos, laranxas, melón...

Ademais podemos aproveitar este biscoito como base para unha torta, que vos traeremos moi proximamente.

Biscoito de plátano

Ingredientes:

• 3 ovos
• 1 plátano
• 1 iogur de plátano
• 3 iogures de fariña
• 2 iogures de azucre
• 1 iogur de aceite de oliva
• 1 sobre de fermento

Cupcakes de vainilla con chocolate e banana

Esta fin de semana prevese moi mal tempo (choiva, vento e frío), polo que, que mellor plan que meterse na cociña e facer estes riquísimos cupcakes en familia? É, sen dúbida, un dos pasteis máis de moda ultimamente, un clásico desde hai anos nos EUA que pouco a pouco se foi estendendo a outros países. Converteuse nun auténtico "boom" nestes últimos anos e non é estraño ver na Galiza estabelecementos dedicados exclusivamente á súa venda. Dun produto básico como a madalena podemos chegar a facer un verdadeiro manxar totalmente personalizado, ao noso gusto, xa que admite milleiros de variábeis como veredes na seguinte receita.

Cupcakes de vainilla con chocolate e banana 

Ingredientes:

Para as madalenas:

• 130 gr de manteiga
• 140 gr de azucre
• 150 gr de fariña
• 2 ovos
• 1 culleriña de fermento
• 1 culleriña de vainilla
• A raiadura dun limón

Para o recheo:

• 187 gr de manteiga
• 187 gr de azucre
• 1 banana
• 75 gr de chocolate negro

Quiche de espinacas e xamón

Parece que toca volver á rutina e aos bos hábitos, mais sen esquecernos de tomar algún doce para facermos máis agradábel a vida. Hoxe comezamos cunha receita riquísima, unha torta salgada de orixe francés, ideal para o xantar acompañada dunha boa ensalada, que falta fai despois destes días de excesos. 

Quiche de espinacas e xamón

Ingredientes:

Para a base:

• 150 gr de fariña
• 75 gr de manteiga
• 1 xema de ovo

Para o recheo:

• Dous dentes de allo
• Unha cebola
• Espinacas ao gusto
• Xamón ao gusto
• Queixo relado
• Dous ovos
• 200 ml de nata