Patacas bravas

Bo día, bolboreteirxs! Como vai a volta á rutina? Nós xa estamos desexando que veña o tempo e os días de praia, mais mentres esperamos polo tempo estival seguimos cociñando. Esta receita é un dos grandes clásicos peninsulares, especialmente da zona central e sur. Fixéronse famosas como típica tapa de bar e hoxe en día atópanse en moitos locais, habendo verdadeiros templos das patacas bravas. 

A nós o que máis nos gusta da preparación caseira é o nivel de picante, adaptando así ao noso gusto, algo que cando se fala de picante, non é nada sinxelo. Desta volta non as fixemos moi endemoniadas mais queda nas vosas mans a posibilidade de darlles lume!

Patacas bravas

Ingredientes:

• 
  Patacas
• Bataca (opcional)
• 200 ml de caldo de verduras
• 100 g de cebola
• 30 ml de AOVE
• 25 g de fariña
• 1 dente de allo

Tortilla de pataca con cebola

Ola, bolboreteirxs! Que tal? A semana pasada, concretamente o día 9 de marzo foi o Día Internacional da Tortilla e como o peque e mais eu adorámola (o papi non tanto), decidimos facela para cear. É unha receita sinxela, á que lle podemos engadir os ingredientes que máis nos gusten (outras verduras, queixo, friames…), aínda que desta volta imos facer a versión tradicional, iso si, para nós ten que ser con cebola. Aquí vos deixamos a nosa versión: 

Tortilla de pataca con cebola

Ingredientes: 

• 4-5 patacas pequenas 
• 4 ovos     
• 1 cebola 
• AOVE 

Verduras gratinadas con patacas

Bo día, bolboreteir@s! Como imos? Hoxe traemos un prato moi moi sinxelo e ao tempo tamén moi eficaz para integrarmos verduras con sabor na nosa rutina. Interesante tamén se hai peques na casa para lles ofrecer unha variedade ampla de produtos ben beneficiosos e nutritivos.
Se algo non falta no noso frigorífico, a verdade, son verduras, xa que as aproveitamos para o que sexa. É certo que en moitas ocasións actúa de acompañantes mais en receitas coma estas ocupan o papel de protagonistas principais de luxo!
Ben, aquí vos vai. Parece obvio mais a clave deste prato non está na elaboración xa que non ten compelxidade ningunha e si en contar cuns bos produtos. E se os temos acabados de saír da nosa hortiña xa sería marabilloso. No noso caso non houbo esa sorte aínda que o saboreamos inmensamente de todas formas.

Verduras gratinadas con patacas

Ingredientes:

• 3-4 patacas
• 2-3 cenorias
• 1 cebola
• 1 pemento
• 1 tomate
• Queixo relado (opcional)
• Allo en po
• Ourego
• Pementa moída
• Sal

Abano de carne con patacas ao forno

Un día máis, un día menos, que diría o outro. Non sabemos vós mais aquí estamos aproveitando bastante estas semanas no tempo que nos deixa o famoso teletraballo.
Imaxinación ao poder co pequeno e creatividade a tope na cociña. Iso si, imos ter que ir parando coas receitas doces porque senón... haha.
Desta volta, fixemos unha receita de finde, de xantar especial cunha carne un chisco diferente que nos deixou encantadísimos. Ollade que sinxela e que pedazo resultado!

Abano de carne con patacas ao forno

Ingredientes:

Para a carne:

• 1 peza de lombo
• 10-12 lascas de bacon
• 10-12 lascas de queixo
• 75 ml de aceite
• 1 culleriña de allo en po
• 1 culleriña de ourego

Patacas ao pobre

Bo día, bolboreteir@s! Como vai todo? Seguimos cun tempo que dá ganas de coller a roupa de verán e comezar coas tuppers de ensaladas para papar fóra. Mais ollo, que aínda estamos en febreiro e se todo vai ben aínda queda moito por chover e moito prato quente por comer.

Hoxe traémosvos unha gornición que probamos esta semana. As patacas son desde hai ben de séculos un clásico na alimentación galega, sendo co pan, o acompañante máis habitual nos nosos menús. Así pois, gustamos de investigar diferentes modos de cociñar este tubérculo para non caer na rutina papatoria.

E desta forma, demos na rede con preparacións coma esta, das que oiramos falar mais non chegaramos a probar. Un prato andaluz que foi gañando sona por diferentes puntos do estado aínda que en Galiza non son demasiado habituais.

Ben, pois nós, preparámolas da seguinte forma, dándolle un tanto máis de substancia para as converter en prato principal e non en acompañante.

Patacas ao pobre

Ingredientes (para dúas persoas):

• 2-3 patacas medianas
• 300 g de carne de lombo (tipo raxo)
• 1 pemento vermello
• 1 cebola
• 2-3 dentes de allo
• 1/2 culleriña de pemento (picante)

Patacas hasselback

Bo día, bolboreteir@s! Desta volta chegamos coa receita para o sábado, estivemos máis espertos e non deixamos a tarxeta coas fotos na Coruña, como na semana pasada, haha.

O que hoxe vos traemos non sabemos se calificalo como petisco, acompañante ou prato principal pois serve para calquera deles. É certo que nós concebímolo como un acompañante, como se fosen unhas patacas fritas ou asadas máis. Porén, acabaron acaparando todo o protagonismo da nosa cea téndomos que deixar sobras do que viña sendo o prato principal.

Esta gornición ten a orixe en Suecia, nun prestixioso restaurante chamado Hasselbacken, no que se creo a primeira escola de cociña do país e onde o alumnado maxinou esta marabilla. Nun primeiro momento apenas levaban a manteiga da cuberta e o sal mais co paso do tempo foron gañando en adobíos aparecendo ingredientes como os que aquí ides ver e nos que o queixo e a panceta van ter moito que dicir. Imos con estas patacas tan apetitosas!!

Patacas hasselback

Ingredientes:

• Patacas de tamaño medio
• 3-4 lascas de bacon
• 3-4 lascas de queixo gouda
• Queixo relado
• 15 g de manteiga
• Pementa moída

Robaliza ao forno

Bo día, bolboreteir@s! Hoxe vimos orgullosos coa nosa receita pois, aínda sendo moi sinxela, é ben importante para nós pois se hai unha carencia que percibimos na nosa cociña é a falta de cociñado de peixes, o que procuraremos solucionar a partir de agora, sobre todo porque cada vez nos gusta máis papalo. É xa cuestión de orgullo. Galegos e mariñaos, como para non incluírmos receitas peixeiras.

Tamén hai que confesar que non foi casualidade que se dese este prato xusto nesta fin de semana. Nos últimos días tocou traballar o léxico mariñeiro co alumnado de 3º da ESO e xurdiron pratos moi apetecíbes que nos provocaron un apetito que agora vos tentamos transmitir a través desta sinxelísima  robaliza ao forno. A por ela!

Robaliza ao forno

Ingredientes:

• 1 robaliza
• 2-3 patacas
• 1 tomate
• 1 cebola
• 2 dentes de allo
• 1/2 pemento vermello
• 1/2 pemento verde
• 1/2 vaso de viño branco
• Aceite de oliva

Bombas pataqueiras con pavo e queixo

Bo día, bolboreteir@s! Nós xa estamos de volta dunhas minivacacións por Catalunya e vimos cheos de ideas traídas da gastronomía mediterránea!! Aínda que en ningún sitio se come como en Galiza, nós adoramos viaxar e desfrutar os países a través dos seus sabores.
Ben, pois aínda que non é unha receita catalá, hoxe presentamos un prato inspirado no noso último xantar en Barcelona, no barrio de Gracia, concretamente no Pirineus 1935. Alí metimos o dente a unhas bombas de pataca que aínda que non son coma estes si nos levaron a esta elaboración diferente e que serve como petisco para calquera menú.
Como ides comprobar a seguir, non ten apenas dificultades. Ten, pola contra, un resultado moi interesante en que o ingrediente a salientar é a pataca. Nós, ademais, como somos moi salseiros, acrecentamos unha salsa para mollalas e facelas aínda máis apetecíbeis. Velaí as tedes!

Bombas pataqueiras con pavo e queixo

Ingredientes:

• 3 patacas medianas
• 4-5 lascas de pavo
• 3-4 culleradas de queixo relado
• 2 culleradas de Maicena
• 1 ovo grande
• Pementa moída

Patacas "fritas" saudábeis

Sorpresa neste sábado completamente invernal. A xornada estavos para ficar na casa, coller a manta, realizar esas lecturas que tanto nos apetece e levar á práctica algunha desas receitas que tiñamos anotada para un día como o de hoxe. Mais... tamén apetece un novo vídeo de Bolboretas no bandullo, non é? Pois si, parece que vai día ideal para visualizarmos esta nova receita no Youtube, unha das nosas preferidas desde hai moito tempo pois revolucionou a nosa cociña desde que a descubrimos. E por que sendo simplemente unhas patacas "fritas"? Pois sabéndomos que en practicamente todos os fogares se comen patacas un par de veces, canto menos á semana, e téndomos en conta que talvez sexa un dos produtos máis calóricos da nosa alimentación habitual, resulta moi relevante mudarmos a súa preparación en beneficio da nosa saúde.

E non pensedes que vos hai que facer moita cousa... Botádelle unha ollada ao vídeo e á receita que aquí deixamos escrita e veredes que non ten moito conto. Mais si, os beneficios son evidentes. E o sabor? Pois deixámosvos que iso nolo digades vós. Por aquí xa houbo amig@s que se sumaron á moda das patacas saudábeis e non voltaron ás "normais". E vós? 

Pasteliños de patacas e nabizas

Bolboreteir@s, chegou o día da estrea!! Neste domingo de despedida de Nadal hai motivo de ledicia pois ábrese, por fin, unha canle de receitas en galego, cunha primeira videorreceita da que aquí vos queda a explicación e desenvolvemento escrito. Démoslle varias voltas á idea mais finalmente decidímonos por estes novidosos pasteliños de patacas e nabizas pois queriamos que a primeira receita fose sorprendente e ao tempo con identidade propia.

Agardamos agora impacientes os vosos comentarios, gústame e subscricións en Youtube pois queremos saber o que vos parece esta primeira creación en vídeo que preparamos con tanta ilusións para vós. Este vai ser un proceso de aprendizaxe en conxunto, ao igual que o do blogue, no que agardamos ir comezando con novas cousas pouco a pouco e traermos receitas ben gorentosas desas que tanto gustades.

Patacas fritas laminadas

Que ganas tiñamos de vos presentar a receita de hoxe. E por que? Pois porque levabamos moitísimo tempo con ganas de imitar as míticas patacas de bolsa tipo Bonilla e non atopabamos cando. Certo é que tamén influíu o feito de contar con mandolina na casa o que fai moitísimo máis cómodo calquera traballo de laminar na cociña, sobre todo cando o obxectivo está na finura deste tipo de patacas.

Evidentemente non é a gornición máis saudábel do mundo mais si un verdadeiro pracer que fai máis sabedeiro calquera menú. E claro, a engadir aínda temos o factor da sinxeleza. Abonda con laminar, fritir e pouco máis. 

Se adoitades ter como acompañante as patacas fritas, esta é unha boa opción para lles dar unha volta e as degustar dun modo en que destaca principalmente a textura, tan crocante debido á finura do corte. Ademais, se contades con pequen@s pola casa, halles de encantar esta opción para comer coas mans e que tanto lles recordará esas patacas de bolsa co beneficio de sabermos o que estamos a degustar. Preparad@s?

Patacas fritas laminadas aromatizadas

Ingredientes (para 4 persoas): 

• 2-3 patacas grandes
• Pementa moída
• Sal
• Auga
• Aceite de oliva
• Para aromatizar: 

Polbo vegano

Que gusto vermos este sol inundar de luz as nosas paisaxes, parece que sube o ánimo a unha velocidade imparábel. Xa vai quedando menos para esas xornadas de collermos o tupper e saírmos xantar ao parque ou á praia un pratiño ben fresco. Canto nos gusta!
Mentres tanto, seguimos argallando. E cumprimos unha débeda que tiñamos pendente de hai case un ano. Unha amiga e seguidora de Bolboretas no bandullo, enviounos ao Facebook hai xa ben tempo un prato que nos deixou coa boca aberta. Por un lado por como se xoga coa técnica do engano e das similitudes, e por outro por coñecermos máis da alimentación vegana, que segue a ficar moi descoñecida para nós.
Supomos que os máis puristas rexeitarán todo aquilo que se chame polbo e non o sexa, mais convén de cando en vez abrirmos a mente e ollarmos outras posibilidades, que son enxeñosas e moi moi saborosas.
Parece un oxímoro iso de polbo vegano, mais esa denominación é a que conleva o efecto sorpresa no momento de nos achegarmos ao prato e de lle meter o dente. O sabor non é o mesmo, mais si se logran matices e texturas moi moi semellantes. E aparentemente, xa vedes.
A nosa amiga vegana gusta deste prato e destácao como "saudábel, saboroso e libre de crueldade cos animais". Confirmamos moi alegremente e engadimos que algo máis económico tamén :-)

Polbo vegano

Ingredientes (para 2-3 persoas): 

• 2- 3 patacas medianas
• 15-18 cogomelos xitaque
• Pemento doce
• Pemento picante
• Sal
• Aceite de oliva
• Auga

Cocido bolboreteiro

Bo día amig@s! Como vai esta semana xa de pre-entroido? Preparando os disfraces seguro, mais non esquezades aproveitarvos da mellor época gastronómica do ano. Nós, á espera dos días grandes, estivemos xa abrindo apetito cun bo feixe de freixós e roscas. Quédannos as orellas para completar a tríade. Tocaralles a finde.

Mais non todo pode ser doce. Este pasado domingo puxémonos cun dos pratos máis contundentes do mundo, e que adoita degustarse por estas datas. Unha receita que non ten dificultade ningunha xa que só precisa o cocido dos produtos. Con todo, queriamos mostrarvos a nosa versión e algún que outro truco na elaboración.

Xa sabedes que o cocido admite mil variantes e o que sempre o caracteriza é a combinación de moitísimos elementos ben diversos e que xogan moi ben. Ten reflexionado Álvaro Cunqueiro ao respecto, "é o mesmo que criticar a unha osquesta porque ten moitos músicos, todos eles maestros nos seus instrumentos. Porque o Cocido Galego é unha auténtica sinfonía de sabores, que non se opoñen uns a outros, senon que se axudan para constituir, ao final, unha obra maestra’’.

Tamén o noso autor e gastrónomo deixa dito do que pode formar parte: ‘’Un bo cocido leva moitas cousas: xamón e lacón, carne fresca, touciño e chourizos, galiña e garavanzos, e por descontado, patacas. E á carne de porco que vai ó cocido aínda se lle poden engadir orella e fuciño, e costela salpresa, se a hai. E ca auga na que se coceu a cerne pódese facer una excelente sopa, de arroz ou de pasta. […] O cocido ten que estar ben escurrido e ten que servirse moi quente. O cocido pide un tinto do país, o máis sereno e graduado que se poida’’

E nesas posibilidades nos movemos, na escolla dos produtos que máis gustamos. Así, deixamos fóra elementos dos que talvez para vós si formarían parte e introducimos outros para nós indispensábeis. Ademais, a aparición do xamón cocido polo lacón fai sentido por aproveitamento do que se ten na casa. E claro, tamén porque gustamos inmensamente desta carne en todas as súas versións.

Cocido bolboreteiro

Ingredientes (para 4-5 persoas):

• 1 anaco de xamón
• 1 repolo
• 2 chourizos
• 1 chourizo picante
• 3-4 patacas
• 200 gr de garavanzos

Luriñas e castañas en mollo de millo

Tranquil@s, que xa regresamos cunha nova receita. Xa sabemos que algúns e algunhas xa andabades impacientes por non saber dun novo prato así que despois do artigo gastronómico do pasado sábado, hoxe presentámosvos unha nosa creación diferente en que ten cabida o produto estrela do outono, a castaña, que amamos tanto que tememos constantemente pola súa fuxida invernal. Degustámolas de todas as formas posíbeis, aínda que no prato de hoxe queriamos facer unha homenaxe á castaña cocida, utilizada durante séculos como sustento alimenticio en Galiza, utilizado con moitísima frecuencia, xa for como elemento principal, ou como gornición, tal como nós fixemos aquí.
Comparte pois, protagonismo nesta receita coas luriñas e cun mollo de millo dificilmente comparábel con calquera outra salsa pola súa dozura. Estamos perante un deses pratos completos, dignos de constituír un menú por si só cun rotundo éxito.

Luriñas e castañas en mollo de millo

Ingredientes (para 4 persoas):

• 16 luriñas
• 4 dentes de allo
• 1/2 culleriña de romeiro
• 1/2 culleriña de aneto
• Pirixel ao gusto
• Catro culleradas de aceite de oliva
• Dúas culleradas de viño branco

A nosa ensalada rusa

Vemos saír un sol un pouquiño e nós xa nos emocionamos. Comezamos con pratos máis frescos e dignos dun verán caloroso que non destes días aínda fríos e mollados. A receita de hoxe havos de soar  e estamos seguros que a grande maioría de vós a preparou nalgún momento da súa vida, iso si, probabelmente con modificacións, que iso é o grande da cociña. Estamos a falar da ensalada rusa, un dos pratos que resulta frecuente encontrarmos en calquera casa e que admite practicamente de todo. De aí que poñamos como título, a nosa ensalada rusa. Difícil sería coñecer todos os ingredientes dunha ensalada rusa estándar.
No caso desta prato xa tradicional podemos dicir que si, a súa denominación é transparente e non leva a enganos canto á súa orixe xa que foi creada na década de 1860 nun restaurante popular de Moscova por Lucien Olivier. Parece ser que a receita orixinal levaba algún produto non moi económico como a carne de veado. Con todo, ao pechar o bar, perdérose os papeis desa primeira receita comezando a existir cada vez máis variantes.
Na Galiza, e tamén no estado español, é un clásico dos petiscos de bar e aquí adoita facerse con ovo, pataca, chícharos, olivas, pementos... e despois ao gusto de cada un/unha.
Iso si, parándonos en pequenos detalles, estabamos a matinar na curiosidade que supón que un prato para servir frío e que nós asociamos ao bo clima, fora inventado en Rusia... Cousas da vida...

A nosa ensalada rusa

Ingredientes (para 4 persoas):

• 1 patata grande
• 2 ovos cocidos
• 2 cenorias
• 2 tomates
• 1 cebola grande
• 1 lata de olivas
• 1 lata de atún
• 1 lata pequena de pementos
• Chícharos
• 3 paus de surimi

Moussaka

Xa vos traemos outra nova receita! O outro día presentabamos unhas saborosas berenxenas recheas, e a través das redes sociais recomendáronme probar a facer algunha outra receita con esta verdura, e un dos mellores pratos posíbeis é sen dúbida a MOUSSAKA. Seguro que moit@s de vós xa a coñecedes mais para @s que non coméntovos... 

A moussaka ou musaca parece ter a súa orixe nos países do Oriente Medio aínda que a receita que maior difusión alcanzou foi a grega. A base deste produto é a berenxena, e adoita levar carne picada e tomate. Con todo, é unha receita con milleiros de variantes que dá para adaptar ao gusto do consumidor sempre que respetemos eses ingredientes base. De feito chama a atención como varían certas partes dun país a outro.

Nós tentamos ser o máis fieis posíbeis ao modelo grego aínda que por suposto fixemos algunha adaptación que cremos pode facela máis saborosa aínda. Aí vai!

Moussaka

Ingredientes:

• 2 berenxenas
• 2 patacas
• 350 gr de carne picada
• 1 cebola grande
• 1 dente de allo
• 1/2 vaso de viño branco
• Salsa de tomate (2 tomates, 1 dente de allo, 2 culleradas de aceite de oliva, sal e alfábega)

Pizza de zorza con ovos e patacas

As promesas están para se cumprir, por iso hoxe presentamos a segunda das receitas escollidas entre as varias que nos propuxestes na chegada en Twitter a 500 seguidores/as. Neste caso a idea dunha apetitosa pizza de zorza con ovos e patacas debeuse a Ecolleita (twitter.com/Ecolleita), a quen vos recomendamos seguir polo seu traballo por unha agricultura local sostíbel. Neste caso nós non acrecentamos nada, simplemente elaboramos unha completa pizza botando man de todos os ingredientes recomendados por Ecolleita. O resultado é un verdadeiro deleite cun sabor moi intenso. Recomendámosvos que tamén probedes a facela, habedes de quedar con ganas de volvelas facer. Ademais é unha desas pizzas farturentas, así que cunha soa talvez comades vari@s.

Pizza de zorza con ovos e patacas

Ingredientes:

• Masa caseira de pizza (nós usamos á mesma que para a empanada)
• Salsa de tomate
• Queixo 
• Zorza 
• 1 pataca laminada
• 3 ovos
• Tomiño

Hot Dog venezolano

A receita de hoxe vén desde América do Sul, máis concretamente desde Venezuela. Porén, nós coñecímola en terras mallorquinas cando pasabamos uns días coa familia de alí. Como comprobaredes é unha receita sinxelísima e deliciosa, ademais de rápida xa que vos pode sacar de algún apuro. Con ela seguro que sorprendedes aos vos@s convidad@s pola súa orixinalidade. 

Parece ser que o bocadillo de salchicha, (tamén coñecido como hot dog, cachorro quente ou perrito caliente) ten a súa orixe alá por 1867 e, ao contrario do que poderiamos pensar, non nos EUA, senón na Alemaña, levando posteriormente os bávaros este manxar a América na súa emigración. Canto ao nome, canto menos curioso e divertido, parece que veu dado por analoxía con ese can de corpo alongado que tod@s coñecedes. Estes bocadillos encontrámolos en postos de rúa en todo o mundo, mais aquí deixámosvos unha receita diferente para o facerdes nos vosos fogares.

Hot Dog venezolano

Ingredientes:

• Salchichas 
• Pan
• Leituga 
• Cebola
• Cebola fritida
• Queixo relado
• Patacas fritidas de bolsa
• Salsas ao gusto (Mostaza, ketchup, brava, ali-oli...)