Patacas fritas laminadas

Que ganas tiñamos de vos presentar a receita de hoxe. E por que? Pois porque levabamos moitísimo tempo con ganas de imitar as míticas patacas de bolsa tipo Bonilla e non atopabamos cando. Certo é que tamén influíu o feito de contar con mandolina na casa o que fai moitísimo máis cómodo calquera traballo de laminar na cociña, sobre todo cando o obxectivo está na finura deste tipo de patacas.

Evidentemente non é a gornición máis saudábel do mundo mais si un verdadeiro pracer que fai máis sabedeiro calquera menú. E claro, a engadir aínda temos o factor da sinxeleza. Abonda con laminar, fritir e pouco máis. 

Se adoitades ter como acompañante as patacas fritas, esta é unha boa opción para lles dar unha volta e as degustar dun modo en que destaca principalmente a textura, tan crocante debido á finura do corte. Ademais, se contades con pequen@s pola casa, halles de encantar esta opción para comer coas mans e que tanto lles recordará esas patacas de bolsa co beneficio de sabermos o que estamos a degustar. Preparad@s?

Patacas fritas laminadas aromatizadas

Ingredientes (para 4 persoas): 

• 2-3 patacas grandes
• Pementa moída
• Sal
• Auga
• Aceite de oliva
• Para aromatizar: 
• Opción 1: allo e ourego.
• Opción 2: pemento picante.
• Opción 3: ao voso gusto 😉

Utensilios: unha cunca grande, unha mandolina (ou táboa e coitelo), unha tixola, papel absorbente e unha escumadeira. 

Elaboración:

Para empezarmos, temos que pelar e lavar moi ben as patacas. Despois, cortámolas o máis finas que poidamos, coa mandolina ou co coitelo sobre a táboa. 

De seguir, sumerxímolas en agua e deixámolas un bo anaco para quitar o almidón.

A continuación, quentamos unha tixola con abundante aceite e ímolas fritindo de poucas en poucas. É clave non enchermos de máis a tixola pois senón pegaranse e cociñaranse máis lentas non logrando o toque crocante.

Cando estean ben douradiñas, poñémolas nunha cunca con papel absorbente para eliminar o exceso de aceite. 

E, por último, aromatizámolas como máis nos gusten. Nós propoñémosvos dúas opcións: con sal, pementa moída, allo e ourego. 

E con sal, pementa moída e un chisco de pemento picante. 

Ou incluso as podedes comer só cun chisco de sal. 

Non nos digades que non son sinxelas, eh! Se contades con mandolina é a cousa máis cómoda do mundo. E senón... pois a practicar co coitelo un pouco. Tede en conta que a clave está en deixalas o moi finas para que así ao fritírense fican crocantes. 

Como proba do boas que están, comentámosvos que nós xa as preparamos tres veces en dúas semanas, e iso que nós optamos normalmente polo pan como acompañante e non polas patacas. Mais é que preparadas así son todo un vicio. Probade, ollade que opción é a que máis vos apetece e xa nos comentaredes o resultado. Temos a seguridade de que quedaredes encantad@s. Desfrutade desta fin de semana de temporal e aproveitade para pór en práctica algunha destas receitas tan proveitosas. Apertas!!!