Verduras gratinadas con patacas

Bo día, bolboreteir@s! Como imos? Hoxe traemos un prato moi moi sinxelo e ao tempo tamén moi eficaz para integrarmos verduras con sabor na nosa rutina. Interesante tamén se hai peques na casa para lles ofrecer unha variedade ampla de produtos ben beneficiosos e nutritivos.
Se algo non falta no noso frigorífico, a verdade, son verduras, xa que as aproveitamos para o que sexa. É certo que en moitas ocasións actúa de acompañantes mais en receitas coma estas ocupan o papel de protagonistas principais de luxo!
Ben, aquí vos vai. Parece obvio mais a clave deste prato non está na elaboración xa que non ten compelxidade ningunha e si en contar cuns bos produtos. E se os temos acabados de saír da nosa hortiña xa sería marabilloso. No noso caso non houbo esa sorte aínda que o saboreamos inmensamente de todas formas.

Verduras gratinadas con patacas

Ingredientes:

• 3-4 patacas
• 2-3 cenorias
• 1 cebola
• 1 pemento
• 1 tomate
• Queixo relado (opcional)
• Allo en po
• Ourego
• Pementa moída
• Sal

Muhammara

Bo día, bolboreteir@s!!! Como estamos??? Agardamos que moi ben, con ganas para desfrutar este sábado que pinta solleiro. Nós andamos por Monterroso, na IV Feira do Disco e Libro Galego, para presentarmos este fillo literario que tan ben queremos, o "Cociñando con Bolboretas no bandullo".

Con todo, hoxe no blogue ímonos ben lonxe, até Siria, para degustar unha receita tradicional ben curiosa para nós. Esta idea debémoslla a unha compañeira de instituto, amante da cociña e da gastronomía internacional. Que crack!

Agora que chegou a nós, trasladámosvola para que a preparades e saboreedes un pouco da cultura gastronómica siria (aídna que é certo que tamén é ben tradicional no Líbano). Agora si, unha outra alternativa ao hummus, ben curiosa. A gozala!!

Muhammara

Ingredientes:

• 1 pemento vermello
• 100 g de noces
• 100 ml de aceite, mais unha culleriña máis
• 1 dente de allo
• 2 culleradas de pan relado
• 1/2 culleriña de comiño

Patacas ao pobre

Bo día, bolboreteir@s! Como vai todo? Seguimos cun tempo que dá ganas de coller a roupa de verán e comezar coas tuppers de ensaladas para papar fóra. Mais ollo, que aínda estamos en febreiro e se todo vai ben aínda queda moito por chover e moito prato quente por comer.

Hoxe traémosvos unha gornición que probamos esta semana. As patacas son desde hai ben de séculos un clásico na alimentación galega, sendo co pan, o acompañante máis habitual nos nosos menús. Así pois, gustamos de investigar diferentes modos de cociñar este tubérculo para non caer na rutina papatoria.

E desta forma, demos na rede con preparacións coma esta, das que oiramos falar mais non chegaramos a probar. Un prato andaluz que foi gañando sona por diferentes puntos do estado aínda que en Galiza non son demasiado habituais.

Ben, pois nós, preparámolas da seguinte forma, dándolle un tanto máis de substancia para as converter en prato principal e non en acompañante.

Patacas ao pobre

Ingredientes (para dúas persoas):

• 2-3 patacas medianas
• 300 g de carne de lombo (tipo raxo)
• 1 pemento vermello
• 1 cebola
• 2-3 dentes de allo
• 1/2 culleriña de pemento (picante)

Coles de Bruxelas

Bo día, bolboreteir@s! Como vai a semana? Por aquí andamos de depuración despois dunha fin de semana de bastantes excesos culinarios como puidestes ver nas nosas RRSS.

Así pois, desta volta tiramos de verdura como protagonista principal e fómonos a unha que a verdade é que si comemos nalgúns momentos da nosa vida mais tiñamos esquecida completamente: as coles de Bruxelas. 

Xa sabedes, en cada casa téndese máis a uns produtos ou a outros e nós non o viñamos tendo de man aínda que descubrindo cociñados como este que vos imos presentar, convén ter estas coles á man.

Canto á orixe do produto confírmase o agardado no nome, proveñen de Bruxelas, onde se comezaron a cultivar no século XVIII estando hoxe xa estendidas por calquera territorio.

Preparad@s?

A por ela!

Coles de Bruxelas

Ingredientes:

• Coles de Bruxelas
• Xamón serrano
• 1 cebola
• 2 dentes de allo
• Queixo relado
• 1 culleriña de pemento picante
• Pementa moída

Chebureki

A estas alturas e só co título, seguramente vos esteades a preguntar que é isto de chebureki. E a iso imos, á explicación, porque cremos que non está mal saber o que temos diante antes de o preparar ou comer. 

Con esta receita, iniciamos unha ciclo ligado ao evento deportido deste verán. Xa sabedes que entre nós temos un futboleiro moi futboleiro e claro, pensamos en comezar unha edición gastronómica do mundial de Rusia. Así pois, nas próximas semanas, iremos traendo algunhas receitas ligadas aos diferentes países que participan nesta competición.

E claro, por cal iamos comezar senón polo anfitrión. Rusia é un país que nos chama a atención mais do que sabemos moi pouco, especialmente canto á gastronomía e todo o que podamos aprender, benvido será.

Chegamos entón a este chebureki, unha variante da empanada, cunha masa máis doce e cremosa, que pasa pola tixola logrando así o toque crocante diferencial. En San Petersburgo véndense milleiros cada día posto que hai comercios especializados na súa venda.

Imos ver os sinxelos pasos para a elaboración:

Chebureki

Ingredientes:

Para a masa:

• 300 gr de fariña
• 1 vaso grande de leite
• 2 culleradas de aceite
• 1 ovo
• 1 chisco de sal

Para o recheo: 

• 150 gr de carne picada de tenreira
• 150 gr de carne picada de porco

Tumbet mallorquino

Ola, bolboreteir@s!! Como levades a semana? Supomos que moit@s de vós de vacacións e outr@s, coma nós, estaredes agardando a que chegue o tempo de descansar. E máis se veñen días de sol coma o de onte e tamén hoxe, que ganas de praia!!

E como por aquí xa temos as vacacións reservadas a unha das nosas terras favoritas (tamén porque alí temos familia), decidimos preparar un dos seus pratos máis tradicionais, especialmente no verán. Si, estamos a falar do tumbet típico mallorquino.

Como é de agardar nos menús mediterráneos, as verduras son as protagonistas, aínda que aquí a atención culinaria é repartida entre tomates, pementos, berenxenas e patacas a partes iguais. Vaia prato tan completo e tan saboroso!

Velaquí o tedes:

Tumbet mallorquino

Ingredientes (para 2 persoas):

• 2 patacas
• 2 tomates
• 1 berenxena
• 1/2 pemento vermello
• 1 pemento verde
• 4-5 dentes de allo
• Aceite de oliva
• Pementa moída

Escalivada

Cantas ganas de Mediterráneo e cantas ganas de Catalunya, que tanto nos encanta! Como nos entrou morriña daquelas terras tivemos que botar man do modo máis rápido e sinxelo que se nos ocurriu, a través dunha das súas receitas tradicionais, a escalivada que xira arredor das tan saborosas verduras que por alí teñen. Non pode estrañar, con ese clima...

Esta denominación, que por certo nos encanta, provén do verbo catalán caliu que significa brasa, e do verbo escalivar, asar ás brasas. Nós na cociña carecemos das brasas así que optamos polo modo simple, que traballe o forno! 

É un dos pratos máis sinxelos do mundo e que ao seu tempo teñen o toque de quen cociña mais a clave está no produto. Non temos berenxena, pemento e cebola mediterráneas mais si temos uns produtos da horta que dan para facer a mellor festa de verduras do mundo e desta volta lográmolo coa receita da escalivada! 

1,2,3... endavant!

Escalivada

Ingredientes:

• 1 berenxena
• 1 pemento vermello
• 1 pemento verde
• 2 cebolas
• 3-4 dentes de allo
• Aceite de oliva 
• Sal

O Ratatouille de Escarlatina, a cociñeira defunta

Moitos de vós xa coñeceredes a famosa Escarlatina pois chegou á nosa literatura infanto-xuvenil para quedar eternamente, aínda desde o mundo dos mortos. Quen é entón esta pícara? Pois a personaxe creada por Ledicia Costas en 2014, que dá lugar á novela "Escarlatina, a cociñeira defunta", peza marabillosa que recomendamos encarecidamente a tod@s @s amantes da lectura, non só aos peques. O libro supón unha viaxe á infancia e á fantasía que esta etapa caracteriza da man de Román, un pequeno que adora a cociña e cuxo agasallo de aniversario é unha nena do Alén Mundo, que só o poderá acompañar unhas horas e que chega para acompañalo nunha viaxe polo Alén, no que se encontra con personaxes incríbeis e do que será máis difícil regresar do que podía parecer.

Non chega só coas nosas boas palabras, "Escarlatina, a cociñeira defunta" levou a que Ledicia Costas fose recoñecida co Premio Nacional de Literatura Infantil e Xuvenil 2015, que vén a demostrar todas as posibilidades da nosa literatura.

Ben, e por que chega a Bolboretas no bandullo unha receita deste libro? Porque ademais de nos namorar, non resulta común encontrar novelas que fusionen literatura e gastronomía como aquí fai Ledicia. A final de cada capítulo, inclúese unha receita do recetario de Román, o que conforma un álbum gastronómico ben interesante. Mais, o relato ten presente en todo momento a paixón duns personaxes pola cociña e reflicte á perfección a maxia do momento de elaboración de certos pratos. Aínda que ben é certo que aquí nos encontramos pratos... ben estraños, nauseabundos, mais claro esta era comida de defuntos, haha: "Albóndegas de cerebro de morcego con xarope de bile", "Sopa de ollos birollos con crías de víbora" ou "Filete de cu de avestruz empanado con crocante de cascuda e regado con mexo de burra". Alucinante, non?

Por todo isto, decidimos dedicar unha semana a "Escarlatina, a cociñeira defunta", á súa precuela, "Esmeraldina, a pequena defunta" e como non, á autora, Ledicia Costas. Hoxe comezamos este menú saboroso-terrorífico cun ratatouille que pode asustar. 

De feito, ollade como prepara o ratatouille Escarlatina:

[...]

- Bos días! - dixen bastante animado.

- Que tal durmiches, Román?

- Moi ben. O teu ataúde non é tan terríble como parece. Que é iso que estás cociñando?

- Ratatouille ao meu xeito.

Achegueime á pota na que a cociñeira tiña todo mesturado e observei o seu contido ao tempo que inspiraba profundamente polo nariz. Aquilo alcatreaba e tiña pinta de todo agás de ratatouille.

-Puag! Pero a que cheira isto, Escarlatina?

Por toda resposta, colleu coas dúas mans un bote grande de cristal rotulado cunha etiqueta onde poñía: RATA, púxomo diante dos ollos e tiven que esforzarme para non cuspirlle dento de puro noxo. Dentro do recipiente había rabos, patas e fociños de rata.

- Pero que é isto? Isto non é ratatouille, isto é rata!

Ela sorriu, divertida.

Así é como fago eu a ratatouille. Con rata cociñada no seu propio prebe.

[...]

Tranquil@s. Nós imos preparar o ratatouille máis parecido ao gusto de Román, que a fin de contas é dos viv@s, coma nós.

Ratatouille

Ingredientes: 

• 1 berenxena grande
• 1 cabaciña grande
• 2-3 tomates
• 1 pemento
• 1 cebola
• 2 dentes de allo

Tortillas aromatizadas recheas de gambas e verduras

Desde logo que este clima que vimos tendo lle sube o ánimo a calquera. Canto menos, pola Mariña Luguesa, onde a calor se resiste ben. E con tanto ánimo, continuamos a elaboración de receitas para nós e vós.
Xa vos contamos innumerábeis veces o que nos gusta meter as mans entre a masa e argallar até dar con alimentos que presentes características específicas, diferenciábeis. Deste xeito, sempre que podemos aproveitamos para facer pan, pizzas, empanadas... mais tamén tortitas, que nos dan moitísimo xogo á hora de facer pratos mexicanos mais tamén para preparar inventos moi bolboreteiros como o de hoxe. Xa as tortitas ficaron para se degustar elas soas, mais claro, precisabamos consistencia e aí é onde nos centramos nun recheo con protagonismo propio e que conxuga marabillosamente coa capa exterior.
Si, poderiamos inventar un nome, mais desta volta fomos máis tradicionais e optamos por unha denominación máis descritiva que xa nos anima a lle meter o dente!

Tortillas aromatizadas recheas de gambas e verduras

Ingredientes (para 4 tortillas):

Para as tortillas:

• 150g de fariña
• 2 ovos
• 1 culleriña de curry (opcional)
• Ourego, estragón, comiño...

Para o recheo:

• 500g de gambas
• 1 pemento vermello
• 1 pemento verde

Polbo vegano

Que gusto vermos este sol inundar de luz as nosas paisaxes, parece que sube o ánimo a unha velocidade imparábel. Xa vai quedando menos para esas xornadas de collermos o tupper e saírmos xantar ao parque ou á praia un pratiño ben fresco. Canto nos gusta!
Mentres tanto, seguimos argallando. E cumprimos unha débeda que tiñamos pendente de hai case un ano. Unha amiga e seguidora de Bolboretas no bandullo, enviounos ao Facebook hai xa ben tempo un prato que nos deixou coa boca aberta. Por un lado por como se xoga coa técnica do engano e das similitudes, e por outro por coñecermos máis da alimentación vegana, que segue a ficar moi descoñecida para nós.
Supomos que os máis puristas rexeitarán todo aquilo que se chame polbo e non o sexa, mais convén de cando en vez abrirmos a mente e ollarmos outras posibilidades, que son enxeñosas e moi moi saborosas.
Parece un oxímoro iso de polbo vegano, mais esa denominación é a que conleva o efecto sorpresa no momento de nos achegarmos ao prato e de lle meter o dente. O sabor non é o mesmo, mais si se logran matices e texturas moi moi semellantes. E aparentemente, xa vedes.
A nosa amiga vegana gusta deste prato e destácao como "saudábel, saboroso e libre de crueldade cos animais". Confirmamos moi alegremente e engadimos que algo máis económico tamén :-)

Polbo vegano

Ingredientes (para 2-3 persoas): 

• 2- 3 patacas medianas
• 15-18 cogomelos xitaque
• Pemento doce
• Pemento picante
• Sal
• Aceite de oliva
• Auga

Coca mallorquina vexetal

8 de febreiro, día especial. Agardamos que tod@s @s que podades esteades en Compostela reivindicando a nosa lingua e a nosa identidade. QUEREMOS GALEGO!!! Nós infelizmente non puidemos asistir, así que, mentres tanto, ímosvos abrindo o apetito e dándovos algunha que outra idea para cociñardes ao chegar á casa.
Xa tiñamos en mente hai tempo elaborar este prato aínda que o iamos deixando por mor dun prexuízo. Pensabamos que era demasiado similar á pizza e por tanto, tampouco nos corría tanta présa. Porén, unha vez degustada a coca, esta idea vénse abaixo. Si hai similitudes co manxar italiano, mais teñen ben cousas que as afastan, entre elas, a masa, cun textura crocante ben diferente.
Este prato de orixe catalá, xa hai tempo que se estendeu universalmente, aínda que é certo que en diferentes territorios a confunden coa pizza. Como curiosidade, queriamos comentar que a palabra coca, catalá, procede do holandés kok, a mesma que deu lugar ao termo inglés tan coñecido cake.
Con todo, a coca que hoxe vos presentamos é máis típica da zona mallorquina, aínda que nós, como sempre, puxémoslle o noso toque persoal. Agardamos que vos guste o prato mediterráneo de hoxe.

Coca mallorquina vexetal

Ingredientes:

Para a masa:

• 300 gr de fariña de forza
• 100 ml de auga
• 50 gr de manteiga
• 50 gr de aceite
• 10 gr de lévedo fresco de panadaría
• 1 chisco de sal

Para o recheo:

• 300 gr de espinacas
• 3 cebolas grandes
• 1 pemento vermello

Tortilla de pemento e queixo

Hoxe imos cun deses produtos clásicos na alimentación de case tod@s, a tortilla, mais a súa elección para vos presentar no blogue vén dada polo día en que estamos. Moitos de vós non o saberedes, mais en Viveiro vénse celebrando desde xa hai moitos anos, no domingo anterior ao de Ramos, o Día das tortillas. 

E nesta xornada o importante é saír comer a calquera praia, monte ou lugar exterior cos amigos e amigas, coa familia ou quen quixeras. Cada un/ha leva o que máis lle apeteza para xantar, iso si, a tortilla non pode faltar. E coa excusa deste produto, aquí por Viveiro a xente aproveita para andar un pouco de troula. @s máis nov@s mesmo xa van de madrugada, despois de saír, para aproveitar ben esta festa gastronómica.

É unha forma nosa de dar a benvida á primavera, saíndo a xantar á praia de Area, ao monte do Castelo, ao parque de Covas ou a moitos outros lugares da zona. Unha tradición ben fermosa que merece a pena conservar, e que parece que nos últimos anos se está estendendo aos concellos veciños.

Entón anímovos a saírdes coa vosa tortilla a xantar por aí, sexades de onde sexades, xa que sempre presta aproveitar os días libres para xantar no medio da natureza.

Para a maioría facer tortilla non é ningún segredo, e nós presentámosvos a nosa homenaxe para este Día das tortillas viveirés dun dos xeitos que máis nos gusta, con pemento e queixo. Aí vos vai!!

Tortilla de pemento e queixo

Ingredientes:

• 3 patacas medianas
• 2 ovos enteiros e 3 claras
• 1 pemento amarelo
• 1 cebola
• 80 gr de queixo relado
• Aceite de oliva
• Sal
• Pementa moída

Pastel de carne

A receita que hoxe vos presentamos tamén se caracteriza pola súa sinxeleza e rapidez ademais de ser un prato de moi boa presentación. Resulta moi apropiada eses días en que temos convidad@s ou para días de festa xa que non precisa moito tempo de preparación por ser o forno quen fai o traballo mías laborioso. Acostuma gustar a todas as persoas alén de ser un alimento moi completo por nos ofrecer proteínas, incluír un pouco de verdura e mesmo calcio. Ademais o sabor é... mmmmm... exquisito!

Pastel de carne

Ingredientes:

Para o pastel:

•  700 gr de carne picada
• 14-15 liscos de beicon
• 4 liscos de queixo 
• 4 pementos do piquillo
• Tortilla francesa dun ovo
• Sal, pementa moída, ourego e alfábega

Para a salsa:

• 1 cebola
• 1 cenoura