Baos de polo picante

Ola, bolboreteirxs! Aquí estamos unha semana máis cunha nova receita. Desta volta, o peque tiña antollo de pan bao e decidimos facer baos recheos de polo picante, para el reducimos o a cantidade de picante mais igualmente estaban deliciosos.

A verdade é que estes pans, que son tan sinxelos de facer, son moi versátiles porque podemos xogar cos ingredientes que máis nos gusten ou os que teñamos pola casa. Alén de que se vos gusta a cebola, recomendámovos ter un bote de cebola encurtida, xa que lle vai dar un toque diferencial aos vosos pratos: ensaladas, hamburguesas, pizzas...

Oxalá vos guste, aquí vola deixamos.

Baos de polo picante

Ingredientes:

• Pan bao
• Cebola encurtida
• Leituga
• Salsa maionesa
• Polo picante:
• 100 ml de siracha mayo      
• 100 ml de auga
• 1 cullerada de allo en po
• 1 cullerada de cebola en po
• 1 cullerada de ourego en po

Aperitivo de queixo e cebola

 Bo día, bolboreteirxs! Como vai a semana? Nós xa desexando que sexa mañá para descansar uns días e cargar as pilas para a recta final do curso. 

Hoxe traémosvos unha receita que se fixo viral nas RRSS, concretamente en TiKToK hai unhas semanas e como bos amantes do queixo e da cebola non podiamos pasar sen facela. Son só dous ingredientes máis as especias coas que queirades sazonalos para darlle un toque extra de sabor. Como ides ver, faise nun momento e pódenos servir para pór de aperitivo, para tapear ou incluso para acompañar outro prato.

Aquí vos deixamos coa receita: 

Aperitivo de queixo e cebola

Ingredientes:

• 1 cebola
• Queixo relado ao gusto  
• Ourego
• Pementa moída

Tortilla de pataca con cebola

Ola, bolboreteirxs! Que tal? A semana pasada, concretamente o día 9 de marzo foi o Día Internacional da Tortilla e como o peque e mais eu adorámola (o papi non tanto), decidimos facela para cear. É unha receita sinxela, á que lle podemos engadir os ingredientes que máis nos gusten (outras verduras, queixo, friames…), aínda que desta volta imos facer a versión tradicional, iso si, para nós ten que ser con cebola. Aquí vos deixamos a nosa versión: 

Tortilla de pataca con cebola

Ingredientes: 

• 4-5 patacas pequenas 
• 4 ovos     
• 1 cebola 
• AOVE 

Boliños de cebola e queixo

 Bo día, bolboreteirxs! Como estades? Nós estamos moi ben, cociñando moito aproveitando estes días que viñeron con tanta choiva, e animando ao peque a que participe con nós da cociña e el feliz amasando, mesturando e escollendo ingredientes. 

Como sabedes, somos consumidores de páxinas de cociñas para inspirarnos coas nosas receitas. Esta receita vímola nun deses vídeos de Youtube, de Violeta West, unha rapaza que fai unhas receitas sinxelas e deliciosas, e non podíamos deixar de facela: masa+cebola+queixo? Tiña que saír perfecta e así foi. Saíron uns boliños perfectos para tomar como petisco ou acompañar nas nosas comidas ou ceas. Ese recheo de cebola recórdanos ao sabor da típica sopa de cebola francesa e xunto co queixo, unha delicia absoluta. 

Aínda que parezan moitos ingredientes, a receita é moi sinxela. Aquí vola deixamos:

Boliños de cebola e queixo

Ingredientes:

• Masa de pizza, a que máis vos guste. 
• 2 cebolas
• 1 vaso de auga
• 1 onza de caldo de carne      
• 1 cullerada grande de fariña
• 6 anacos de queixo 

Hamburguesa con queixo de cabra e cebola caramelizada

Bo día, bolboreteirxs! Como van estas festas? Agardamos que as esteades gozando como máis vos guste. 

O outro día vimos unha receita dunha rapaza que recreaba a hamburguesa Kendall Bacon do Goiko e decidimos darlle unha volta para adpatala aos nosos gustos. Asegurámosvos que é exquisita e con moito sabor coa que triunfar cunha cea máis especial.  

 Hamburguesa con queixo de cabra e cebola caramelizada 

Ingredientes (para 2 hamburguesas): 

• 400 g de carne picada 
• 3-4 lascas de bacon 
• 20-30 g de queixo de cabra 
• 1 cebola pequena caramelizada (receita aquí)      
• Pementa moída 
• Allo en po 
• Cebola en po 

Tacos de Cochinita Pibil

Bo día, amig@s e que viva México!!!! Hoxe quedamos un pouquiño máis tranquilos xa que por fin, por fin, traemos unha das grandes descubertas que fixemos na nosa viaxe á Riviera Maya en 2018. É certo que moito da gastronomía que probamos estaba neutralizada polo efecto resort mais tamén tivemos oportunidade de visitar algunha vila e degustar a auténtica cociña do estado de Yucatán. Dalgúns pratos xa escoitáramos falar debido á súa evidente internacionalización: fajitas, chile... Pero a verdade é que non coñeciamos nada da cochinita pibil. E vaia!!! Que sorpresa. Xa vos falaramos dela no artigo que creáramos despois da lúa de mel pero non fora até agora que nos atreveramos a cociñar, entre outras cousas polo tempo que precisa a carne.

Tiramos dos ingredientes máis similares e obviamente non contamos co forno baixo terra en que orixinariamente deixaban cocer a carne nin coas follas de plátano mais na verdade é que cremos que obtivemos un resultado moi satisfactorio e que nos leva inmediatamente ao aroma do Caribe. 

Tacos de Cochinita Pibil

Ingredientes:

Para o lombo:

• 1 kg de lombo de porco
• 90 g de pasta de achiote
• 200 ml de zume de laranxa    
• 100 ml de zume de limón
• 100 ml de vinagre branco
• 2 culleradas de manteiga
• 4 dentes de allo

Ideas diversas para uns petiscos ben apetecíbeis

Bo día, bolboreteir@s! Por aquí estivemos algo apurados e foi unha semana de cociña moi rápida e mesmo de comida a domicilio. As opos e o final de curso é o que teñen... E como non temos reservas na recámara, aproveitamos para vos prsesentar un artigo que estaba no maxín desde hai tempo. Xa trouxeramos unha selección de receitas favoritas salgadas e doces, mais considerabamos que era preciso unha escolma concreta de petiscos, un elemento necesario nos menús que cada vez van ganando máis peso, especialmente nos eventos.

Así pois, hoxe que é día de festa en media Galiza, traémosvos unhas ideas ben apetitosas para abrirdes os menús.

Petiscos variados

Aros ceboleiros 

Este clásico vexetal, non dá moito traballo e logra colocar a cebola como protagonista, rompendo coa visión secundaria que ten en moitas ocasións na cociña.

É certo que non é un petisco para todos os días, mais de vez en cando desfrútase moito moito. 

Xa sabedes, hai clásicos que convén recuperar!

Chebureki

A estas alturas e só co título, seguramente vos esteades a preguntar que é isto de chebureki. E a iso imos, á explicación, porque cremos que non está mal saber o que temos diante antes de o preparar ou comer. 

Con esta receita, iniciamos unha ciclo ligado ao evento deportido deste verán. Xa sabedes que entre nós temos un futboleiro moi futboleiro e claro, pensamos en comezar unha edición gastronómica do mundial de Rusia. Así pois, nas próximas semanas, iremos traendo algunhas receitas ligadas aos diferentes países que participan nesta competición.

E claro, por cal iamos comezar senón polo anfitrión. Rusia é un país que nos chama a atención mais do que sabemos moi pouco, especialmente canto á gastronomía e todo o que podamos aprender, benvido será.

Chegamos entón a este chebureki, unha variante da empanada, cunha masa máis doce e cremosa, que pasa pola tixola logrando así o toque crocante diferencial. En San Petersburgo véndense milleiros cada día posto que hai comercios especializados na súa venda.

Imos ver os sinxelos pasos para a elaboración:

Chebureki

Ingredientes:

Para a masa:

• 300 gr de fariña
• 1 vaso grande de leite
• 2 culleradas de aceite
• 1 ovo
• 1 chisco de sal

Para o recheo: 

• 150 gr de carne picada de tenreira
• 150 gr de carne picada de porco

Sopa de cebola

Comezamos marzo e xa está aí a primavera que tanto nos gusta pola vitalidade que transmite a través do florecemento que dá luz e cor. E froitas. Moitas froitas. E dalgunhas xa temos ganas... Con todo, hoxe non vai a receita de froita, mais si de verdura, cunha receita da que tod@s oístes falar algunha vez mais non sabemos se tod@s probastes. Estamos a falar da sopa de cebola, con ampla tradición en Francia e tamén no Mediterráneo mais que se fixo un oco na cociña dalgúns fogares galegos, e mesmo nalguns locais que comezaron a ofrecelas, xunto coas sopas de allo, para as noites de troula. Ou máis ben para os amenceres de fin de festa!

Sexa como for, nós tiñamos ganas de probala e fomos conquistados polo resultado, intenso mais sen chegar a aborrecer.

Aquí tedes as indicacións para logrardes unha sopa de cebola ben saborosa! Nós inspirámonos nunha receita e Isasaweis. 

Sopa de cebola

Ingredientes:

• 3 cebolas
• 3 chalotas
• 2 dentes de allo
• 1 l de caldo de polo
• 1 vaso de viño
• 1 vaso de auga
• 1 cullerada de aceite
• 1 cullerada de manteiga
• 1 culleriña de tomiño

Volováns bolboreteiros (4º aniversario)

Última publicación do ano xusto no día en que se cumpre o 4º aniversario de Bolboretas no bandullo. Que contentos estamos, amig@s! Como pasa o tempo. Parece que foi onte que comezamos esta andaina cunha entrada de presentación e que se vería acompañada no día 31 pola primeira receita, unha espectacular Torta de profiterois. E aí seguimos, cheos de ilusión e con moitos proxectos por levar a cabo. A vida foi cambiando mais as nosas ansias larpeiras non decrecen!

E así pois, rematamos o 2017 cunha nova idea para os menús especiais destes días. Un petisco elegante co que dar inicio a un banquete cheo de delicias.

Obviamente, esta idea serve para calquera momento do ano aínda que é certo que nós pensamos nela para estas datas polo feito de seren bastante frescos, lixeiros e rapidísimos de facer. Os pratos principais adoitan roubarnos todo o tempo polo que nos queda pouquiño para os petiscos. Pois este cumpre a demanda e satisfainos.

Por certo, antes de nos pór a saborear. Recordade que hoxe é o último día para participar no sorteo dun exemplar de "Os arquivos de Escarlatina". 

Dúas opcións: para seguidores/as de Facebook, abonda con compartir calquera entrada das que falabamos do sorteo na propia páxina e seguir a mesma. 

Para @s do Twitter ou Instagram, abonda con comentar nunha das últimas entradas do blogue e seguir a páxina nunha desas redes sociais. Moita sorte!!

Volováns

Ingredientes:

• 20-25 gambas
• 9-10 volvováns grandes
• 1 aguacate
• 1 tomate
• 1 cebola
• 1 dente de allo
• 2-3 culleradas de maionesa
• Aceite de oliva

Boliños ceboleiros

Bolboreteir@s, aquí pola Mariña parece que o verán non ten moitas ganas de se instalar, uns días chuvia, outros néboa mais o sol anda escondido. Queda entón aproveitar as tardes para argallarmos na cociña e seguir traendo receitas a Bolboretas no bandullo :-)

Ademais, hoxe traemos unha desas que nos encanta preparar porque temos alma panadeira e adoramos meter as mans na masa. O pan. Ai, o pan! Que alimento tan básico e tan fundamental nas nosas vidas. Se tivermos que escoller un alimento para levarmos a unha illa durante un mes, cremos que nos quedariamos co pan. Xa sabedes o refrán, "onde hai pan, non hai fame" e se é bo, desfrútase, e moito! Velaí este pan sabedeiro:

Boliños ceboleiros

Ingredientes:

• 400 g de fariña
• 1 cebola grande
• 100 ml de viño branco
• 100 ml de auga
• 20 g de lévedo de panadaría
• 2 g de tomiño

Costeleta con salsa de mango

Amig@s, continúan as receitas. En Bolboretas no bandullo non deixamos de crear. As receitas do blogue baséanse na alimentación do noso día a día e iso queremos que vexades. É por iso que comprobades que nas últimas semanas presentamos receitas moi sinxeliñas e cun tempo de elaboración mínimo.
Gustamos de vos traer posibilidades accesíbeis tanto a nivel económico como dos propios produtos que temos ao noso redor. E aquí tedes un novo exemplo, a partir dunha costeleta, carne habitual nos nosos menús semanais e que desta volta tivo un acompañante ben novidoso, unha salsa de mango que lle refrescou as ideas!
Imos alá cun novo recurso :-)

Costeleta con salsa de mango

Ingredientes:

• 1-2 costeletas/ persoa
• 2-3 dentes de allo
• Pementa moída
• Ourego
• Sal

Para a salsa de mango:

• 1 manga
• 1/2 cebola
• 4-5 culleradas de auga

Aros ceboleiros

Unhas arandelas cargadas de sabor achéganse a Bolboretas no bandullo. Un clásico vido a menos que había anos que non probabamos e que queremos recuperar. Ollando un vello libro de receitas pola casa chegamos a esta e, sendo sinceros, non agardamos moitísimo dela. Simplemente pretendiamos recuperar sensacións cun prato que tiñamos comido con certa frecuencia na infancia. 

Non vos pasou nunca de agardar pouquiño dun prato e este sorprendervos gratamente? Pois a nós sucedeunos isto mesmo con estes aros ceboleiros que acabaron por levar todo o protagonismo da nosa cea.

Como podiamos ter no esquecemento tremenda delicia? Canto menos con estas indicacións que aquí deixamos podemos asegurar que fica un resultado ben saboroso que non vos ha de deixar indiferentes. Con todos vostedes, un vello amigo, aros ceboleiros!

Aros ceboleiros

Ingredientes:

• 2 cebolas grandes
• 200 g de fariña
• 200 ml de leite
• 200 ml de gaseosa
• 2 ovos
• 1 sobre de levedo
• Un chisco de sal
• Aceite de oliva

Crema de cabaza

Bolboreteir@s, xa estamos unha vez máis con vós para traer unha nova receita. A verdade é que estamos orgullosos da liña seguida desde comezo de ano pois dixemos que iniciariamos unha serie de receitas máis saudábeis e así está sendo: garavanzos crocantes, patacas fritas saudábeis, crumble de ananás, pasteliños de patacas e nabizas... e agora esta crema de cabaza!

Non pensedes que toleamos e deixamos a nosa esencia, as lambetadas (que tan hai as hai sas) mais non somos pouc@s @s que excedimos considerabelmente no Nadal con turrón, mazapáns, polvoróns e demais. E sabemos que proximamente, moi proximamente, chega outra etapa de doces, a época máis saborosa do ano, entón hai que tentar equilibrar un pouco.

E neste sentido as cremas de verduras son unha verdadeira marabilla que nos aporta vitaminas e que nos arrequece o corpo nestes días tan friorentos. Por aquí, por un motivo ou por outro, levabamos ben tempo sen degustar unha e chegados ao supermercado seleccionamos un produto e a argallar.

Seguramente vos tamén esteades desexando degustar unha crema; con esta receita teredes unha idea para lle dar cor e calor a esta semana. Adiante con ela!

Crema de cabaza

Ingredientes:

• 500 g de cabaza
• 1 pataca
• 1 cebola pequena
• 1-2 dentes de allo
• 20 g de mozzarella/ queixo fresco
• Pementa moída
• Sal
• 1 cullerada de aceite

Entrecosto en salsa de champiñóns ao viño tinto

Xa adaptad@s ao novo ano? Ou precisades uns días mais? Nós continuamos coa rutina para non vos sintades estraños neste 2017 e comezamos forte cun prato estrela para calquera menu pois xa só a carne atrae só con escoitar o seu nome. Estamos a falar do entrecosto, peza que ocupa un lugar privilexiado no maxín de tod@s @s amantes da boa carne.

Evidentemente non é unha receita para todos os días pois nin debemos inxerir acotío produtos cárnicos nin o noso peto o acepta de boa gana pois non é un alimento especialmente económico. Mais o que si ten é sabor. 

Ademais, cando pedimos un entrecosto en calquera restaurante manexamos apenas dúas opcións, ou a que conta con sala de viño Porto ou a que vén sen mollo. Así que na casa preparamos unha versión da primeira aínda que modificando o viño pois non era ese o que tiñamos a man.

O resultado podía ser bo ou moi bo e claro, foi mellor aínda pois a carne quedou tal e como queriamos e a salsa, aínda non sendo como a do Porto, si ofreceu esa humidade intensa que agradecemos ás veces para este tipo de pratos. En resumo, unha xoia gastronómica!!

Entrecosto en salsa de champiñóns ao viño tinto

Ingredientes (para 2 persoas):

• 2 entrecostos de tenreira
• 7-8 champiñóns
• 1 cebola morada
• 2 dentes de allo
• 1 vaso de viño tinto
• 2 culleradas de aceite
• Pementa moída

Escalivada

Cantas ganas de Mediterráneo e cantas ganas de Catalunya, que tanto nos encanta! Como nos entrou morriña daquelas terras tivemos que botar man do modo máis rápido e sinxelo que se nos ocurriu, a través dunha das súas receitas tradicionais, a escalivada que xira arredor das tan saborosas verduras que por alí teñen. Non pode estrañar, con ese clima...

Esta denominación, que por certo nos encanta, provén do verbo catalán caliu que significa brasa, e do verbo escalivar, asar ás brasas. Nós na cociña carecemos das brasas así que optamos polo modo simple, que traballe o forno! 

É un dos pratos máis sinxelos do mundo e que ao seu tempo teñen o toque de quen cociña mais a clave está no produto. Non temos berenxena, pemento e cebola mediterráneas mais si temos uns produtos da horta que dan para facer a mellor festa de verduras do mundo e desta volta lográmolo coa receita da escalivada! 

1,2,3... endavant!

Escalivada

Ingredientes:

• 1 berenxena
• 1 pemento vermello
• 1 pemento verde
• 2 cebolas
• 3-4 dentes de allo
• Aceite de oliva 
• Sal

Lembranza Box

Xa sabemos que non é frecuente encontrármonos cun novo artigo ou receita un día que non sexa martes ou sábado mais hoxe fixemos unha excepción posto que tiñamos algo que vos recomendar.
O pasado mes de abril, como xa vos comentáramos, estivemos convidados ao #EcomGastro Gastronomía y Comunicación 2.0 no Hotel Hesperia Finisterre. Ben, pois ademais do que supuxo para nós podermos presentar alí o proxecto Bolboretas no bandullo, resultou especialmente interesante polas persoas que puidemos coñecer. Unha delas foi Carol, que é quen está detrás dun fermoso proxecto como é Lembranza Box.

Desde o primeiro momento, o interese polos espazos foi recíproco e decidimos artellar algo que se foi adiando até estas datas. Hai unha semana chegou á nosa casa unha caixa desas marabillosas que preparan en Lembranza Box e abrímola de igual modo que os pequenos e pequenas cando encontran os agasallos de Nadal. E vaia sorpresas!

Mais primeiro... que é Lembranza Box? Pois como Carol nos explica no perfil da súa páxina, é unha caixa con varios produtos galegos, ecolóxicos e de produción sostíbel. Cada mes ten 5 produtos novos para desfrutar de alimentos cultivados, producidos e envasados en Galiza. Con isto procura dar a coñecer os nosos produtos ecolóxicos, de alta calidade creados por pequena empresas galegas de modo sostíbel. Pretende pois, axudar ao coñecemento destas marcas no noso territorio mais tamén alén das fronteiras.

Ensalada de cuscús

Estaba claro, tiña que ser antes ou despois. Con tanto doce, acabaría tocando unha ensalada para depurar. Festas, aniversarios e moitas larpeiradas derivan nun pouco de deporte e nalgunha que outra receita saudábel para compensar. Mais tranquil@s, non habemos de tardar en papar algunha outra lambetada.

Demos co cuscús xa hai algo máis de dous anos e desde aquel día converteuse en parte fundamental da nosa dieta diaria por saboroso e por recorrente pois permítenos combinacións de todo tipo. Desta volta integrámola cun pouco de pavo xa que recibimos hai pouco un conxunto de alimentos de El Pozo aos que lle estamos tirando moitísimo proveito. Polo demais, ir completando até a considerarmos axeitada para un xantar lixeiro mais tamén satisfactorio. E cremos que quedou unha ensalada ben xeitosa, ou non?

Ensalada de cuscús

Ingredientes (para 2 persoas):

• 250g de cuscús
• 3-4 lascas grosas de pavo
• 2 tomates
• 1/2 cebola
• 1 bote de chícharos
• 1 bote de millo doce
• 10 olivas
• Auga

Costelas con salsa barbacoa

Benqueridos amigos e amiga, chegou o día preferido da semana. Xa é fin de semana e por riba, nova receita de Bolboretas no bandullo de agasallo, ideal para afrontar con forza a última semana de abril.

E tiramos unha outra vez de clásico. Xa sabedes que gustamos da combinación entre pratos máis tradicionais e outros innovadores. Pois ben, a costela con salsa barbacoa é unha receita que, non sendo propia de Galiza, nin moito menos, todo o mundo coñece. Principalmente por ese mollo característico que normalmente mercamos no supermercado mais que desde hoxe seguro que o deixades para o facer na casa.

De feito, a salsa barbacoa é unha das nosas salsas preferidas e críamos que xa ía sendo hora de nos animar con ela. Ademais, que sempre nos chamou moito a atención os elementos que dela formaban parte (coca-cola, mel, vinagre...). Soa estraño, haha.

E como as salsas de por si soas perden sentido, optamos por ir ao seguro cunha costela de porco. Pouco vos podemos dicir, cremos que xa intuídes o resultado :-)

Costelas con salsa barcaboa

Ingredientes:

Para a costela:

• 2 tiras de costela
• Pementa moída 
• Sal

Para a salsa barbacoa:

• 1 cebola 
• 4 dentes de allo
• 1 vaso e medio de Kétchup
• 3 culleradas de mostaza
• 3 culleradas de mel

Marmelada de cebola con xitaque e queixo sobre follado

Que si, que si, a fin de semana xa está aquí!! E parece que ben con sol así que hai que aproveitar para saír das covas e desfrutar da beleza destes días.

E para darlle máis sabor a estes días, hoxe traémosvos un novo invento. Argallando argallando, fomos chegando a esta curiosa e especial larpeirada. Levamos un par de semanas que andamos vezando nesta masa tan saborosa que é o follado, así que pensamos en complementalo con algo novidoso e arriscado. E entendimos por risco a mestura do salgado e o doce, que neste caso se concretaba na marmelada de cebola. E parece que foi ben. Sobre todo porque logramos un prato cun toque moi moi característico e que se o prabades, veredes que nada ten que ver con ningún outro. Ollade:

Marmelada de cebola con xitaque e queixo sobre follado

Ingredientes:

• 1 lámina de follado
• 8-10 cogomelos xitaque
• 7-8 anacos de queixo San Simón afumado
• Marmelada de cebola
• Un chisco de fariña
• 1 cullerada de aceite
• Pementa moída
• Sal