domingo, 14 de marzo de 2021

Tacos de Cochinita Pibil

Bo día, amig@s e que viva México!!!! Hoxe quedamos un pouquiño máis tranquilos xa que por fin, por fin, traemos unha das grandes descubertas que fixemos na nosa viaxe á Riviera Maya en 2018. É certo que moito da gastronomía que probamos estaba neutralizada polo efecto resort mais tamén tivemos oportunidade de visitar algunha vila e degustar a auténtica cociña do estado de Yucatán. Dalgúns pratos xa escoitáramos falar debido á súa evidente internacionalización: fajitas, chile... Pero a verdade é que non coñeciamos nada da cochinita pibil. E vaia!!! Que sorpresa. Xa vos falaramos dela no artigo que creáramos despois da lúa de mel pero non fora até agora que nos atreveramos a cociñar, entre outras cousas polo tempo que precisa a carne.

Tiramos dos ingredientes máis similares e obviamente non contamos co forno baixo terra en que orixinariamente deixaban cocer a carne nin coas follas de plátano mais na verdade é que cremos que obtivemos un resultado moi satisfactorio e que nos leva inmediatamente ao aroma do Caribe. 



Tacos de Cochinita Pibil


Ingredientes:


Para o lombo:
  • 1 kg de lombo de porco
  • 90 g de pasta de achiote
  • 200 ml de zume de laranxa    
  • 100 ml de zume de limón
  • 100 ml de vinagre branco
  • 2 culleradas de manteiga
  • 4 dentes de allo
  • 1 culleriña de comiño
  • 1 culleriña de ourego
  • Pementa moída
  • Sal

Para a cebola aliñada:
  • 1 cebola morada
  • O zume dunha laranxa
  • O zume dunha lima
  • Sal

Para os tacos:
  • Tacos de millo
  • Aguacate
  • Lima


Utensilios: unha bandexa de forno (ou para cociñar a baixa temperatura), un vaso batedor e un batedor eléctrico, unha cunca.


Elaboración:

Para comezarmos, temos de triturar todos os ingredientes do adobo da carne (pasta de achiote, o zume de laranxa, o zume de limón, o vinagre branco, a manteiga, os dentes de allo, o comiño, o ourego, a pementa moída e o sal). 


Adobamos a carne coa mestura anterior, tapamos e refrixeramos durante toda unha noite. 


Pasado ese tempo, temos varias opcións. Nós envasamos ao baleiro e cociñamos a baixa temperatura (70º durante 12 horas), ou podémolo envolver en papel de aluminio e facelo no forno (180º, calor arriba e abaixo, durante 2h-2h30min). 


Pasado ese tempo, e deixando que arrefríe un pouco. 


Desfacémolo coas mans. 


                                                
Á parte, cortamos a cebola en xuliana e botámoslle os zumes e o chisco de sal. Deixamos que repouse 2 horas. 


Pasado ese tempo, torramos as tortillas. 


Untámolas con guacamole. 


Botamos a carne e a cebola. 


Acompañamos con lima e xa estaría listo para comer! 



Agardamos que vos guste e que poñades a receita en práctica. Se queredes viaxar desde a casa a través do padal, esta é das vosas. E se sodes fan desa autenticidade da gastronomía mexicana, ides gozar inmensamente. Viva México, cabrones!


Ningún comentario:

Publicar un comentario