luns, 22 de marzo de 2021

Pizza de brócoli e bacon (mais unha mini-receita)

 Bo día, bolboreteir@s! Chegamos cun pouco de retraso porque na finde houbo moito trafego preparando as avaliacións. Vale, e tamén aproveitando un pouquiño o sol ;-)

Pois hoxe imos cun deses clásicos en calquera casa: a pizza. Aínda que ben sabemos que non todos optades pola masa caseira, non podemos máis que insistirvos en que vos animedes con ela pois a diferenza é notabilísima.

A pizza está sen dúbida, no noso top5 de pratos favoritos pero destaca entre eles por ser o que logra ter un día da semana fixo. Imos ver, fixo fixo non é, pero un día á semana nesta casa dedicado á pizza sempre hai. E normalmente asociado á fin de semana. É dicir, a pizza é pura alegría. 

Aquí vos traemos unha opción que probamos esta semana e que nos pareceu moi interesante para compartir convosco. 



Pizza de brócoli e bacon





Ingredientes:

  • Masa de pizza
  • Salsa de tomate  
  • Queixo relado
  • 150 g de bacon
  • 3-4 anacos de brócoli
  • 1/2 cebola
  • Ourego



Utensilios: unha bandexa de forno, papel vexetal, un rolete e un relador. 


Elaboración:


Para comezarmos, temos de estirar a masa da pizza. 


Botamos unha capa de salsa de tomate (se é caseira, moito mellor) e empoamos con ourego. 


Agregamos queixo relado. 


Os anacos de bacon. 


O brócoli relado e a cebola, cortada en tiras finas. 


Agregamos máis queixo relado. 


E enfornamos a 275º, calor abaixo e ventilador (ou, se tedes, función Pizza), durante 10-12 minutos. 


Deixamos que repouse 2-3 minutos. 



E xa estaría lista para comer!


Se nos sobra masa, podemos facer uns boliños con queixo relado, allo en po e un chisco de ourego. 


E enfornámolos, tamén a 275º, calor arriba e ventilador, durante 8-10 minutos. 


E tamén estarían listos para comer ;)


Apetece, non é? Pois xa sabedes. Deixade á marxe as pizzas conxeladas e elaborade por completo a vosa pizza. Así presta máis. A fin de contas, sentídevos máis responsábeis do sabor logrado, que ha de ser ben bo! 

Forte aperta, amig@s!

Ningún comentario:

Publicar un comentario