Tortilla de pataca con cebola

Ola, bolboreteirxs! Que tal? A semana pasada, concretamente o día 9 de marzo foi o Día Internacional da Tortilla e como o peque e mais eu adorámola (o papi non tanto), decidimos facela para cear. É unha receita sinxela, á que lle podemos engadir os ingredientes que máis nos gusten (outras verduras, queixo, friames…), aínda que desta volta imos facer a versión tradicional, iso si, para nós ten que ser con cebola. Aquí vos deixamos a nosa versión: 

Tortilla de pataca con cebola

Ingredientes: 

• 4-5 patacas pequenas 
• 4 ovos     
• 1 cebola 
• AOVE 

Sándwich Monte Cristo

Boas, bolboreteir@s!! Como estades?? Traemos unha receita máis a Bolboretas no bandullo. Esta vai para a lista das sinxelísimas e rápidas. Talvez adoren especialmente @s estudantes que explotan os bocadillos e sándwichs pois ofrece a posibilidade de alternativa fácil dun clásico.

O sándwich Monte Cristo ten unha denominación moi literaria mais non xorde en Francia a pesar do que poda parecer. Aparece nos anos 40 nos Estados Unidos aínda que, iso si, a partir da cociña francesa, en concreto do famoso sándwich croque-monsieur.

Hai variantes na elaboración e o cociñado perfecto pide unha grella mais nós limitámonos á cociña de piso coa tixola correspondente. Ollade a ver que vos parece, amig@s!!

Sándwich Monte Cristo

Ingredientes (para cada sándwich):

• 3 rebandas de pan
• 2 lascas de pavo
• 2 lascas de queixo
• 1 ovo

Quiche de touciño entrefebrado con verduras

Bo día, bolboreteir@s! Que? Gustastes da sorpresa do último día, verdade! Estamos superfelices, a verdade.
Ben, antes de collermos unhas vacacións nesta semana próxima, queremos deixarvos cunha receita para relamber os dedos. Nós a verdade é que nunca viaxamos a Francia e aínda así adoramos a gastronomía francesa, é máis, este é un dos motivos polo que nos apetece coñecela!
E as quiches son unha verdadeira perdición por diferentes motivos. Un pastel salgado sempre ofrece algo diferente. Ademais, este é moi sinxelo de facer xa que optamos polo follado como base e iso leva consigo rapidez.
Os ingredientes van a gusto do consumidor mais é moi probábel que gocedes destes! A ver que vos parece!

Quiche de touciño entrefebrado con verduras

Ingredientes:

• 1 lámina de follado
• Queixo mozzarella
• 120 g de touciño entrefebrado (bacon)
• 1 cebola grande
• 1/2 pemento
• 4-5 champiñóns
• 2 dentes de allo
• 200 ml de nata para cociñar
• 2 ovos

Petiscos de aguacate

Continuamos na volta á rutina con máis e máis receitas. A cabeza está a traballar para vos traer moi diferentes opcións e hoxe presentámosvos a nosa última ocorrencia, uns petiscos de aguacate, ese produto tan na moda ultimamente polas súas múltiplas propiedades a pesar de non ser unha froita de día a día, entre outros motivos polo seu prezo.

Nós afeccionámonos a eles xa hai uns dous anos e desde aquela pasou a estar no noso menú semanal, habitualmente para os almorzos aínda que desta volta optamos por cociñalos para unha cea lixeiriña e, iso si, moi saborosa.

A árbore non se dá moi ben pola nosa terra debido a que necesita climas temperados (é común en zonas tropicais) aínda que hai zonas na Galiza en que curiosamente aparecen aguacates a moreas. Nós, por se acaso, xa temos a semente preparada, xa vos diremos se hai sorte.

Ademais, como xa sabedes das nosas inquietudes lingüísticas, queriamos comentarvos a orixe do termo, que aprendemos hai uns meses no estudo de americanismos na nosa lingua. Procede do  náhuatl, lingua nativa aínda hoxe de moit@s mexicanos, e vén significando "testículo" nunha asociación visual evidente. Ora ben, non por iso o imos comer con máis reparos, non? A por el ;-)

Petiscos de aguacate

Ingredientes:

• 1 aguacate
• 1 ovo
• 2-3 culleradas de fariña
• 2-3 culleradas de pan relado
• 1/4 de culleriña de curry
• 1/4 de culleriña de allo
• Un chisco de sal

Ovos recheos (2 versións)

Aquí chegou, finalmente, o ansiado momento das nosas vacacións despois dun curso longo. Xa fica máis tempo de novo para o blogue que aínda así non deixamos desantendido en ningún momento. Xa é moito tempo e xa é parte da familia, hahaha.

Ben, pois seguimos, agora que andamos en tempo de festas, cun petisco tradicional en moitos fogares e que presenta mil e unha variantes. Até o momento, só probaramos con moito éxito unha forma de os facer e que xa presentaramos hai ben tempo (ovos recheos) mais quixemos probar, esta semana, novas opcións. Desta forma, traemos hoxe estas dúas variantes para que teñades onde escoller en función dos vosos gustos. Nós non somos capaces de escoller. A ver vós ;-)

Ovos recheos (2 versións)

Ingredientes:

• 9-10 ovos
• 1 cullerada de vinagre
• Sal

Para o recheo de atún:

• 1 lata grande de atún
• 100 ml de salsa de tomate
• Olivas

Para o recheo de champiñóns:

• 200 g de champiñóns
• 1 cebola
• 1 dente de allo

Ensalada de atún, pataca e aguacate

Como levades o inicio de abril, bolboreteir@s? Nós encantados pois parece que agora si quega a primavera. Ademais, para máis felicidade onte xa superamos os 2000 seguidores/as en Facebook polo que vos temos que dar unha vez máis un millón de grazas!

Ben, pois esta subida de temperaturas para nós significa a consolidación da época de ensaladas. Si, nós comemos ensaladas todo o ano, mais así con caloriña apetecen moito máis e aperecen nos nosos menús día si, día tamén.

Temos algunha de referencia mais gustamos de probar outras novas, tal e como fixemos coa que aquí hoxe presentamos. Partimos da base de atún, ovo e pataca, un clásico na nosa casa, e fixemos uns retoques para lle dar maior complitude e sabor. Logramos deste modo un prato ben apetitoso, fresco e que non nos deixará con fame. Chegou pois, a hora das ensaladas!

Ensalada de atún, pataca e aguacate

Ingredientes:

• 1 pataca cocida
• 1ovo cocido
• 1 aguacate
• 1 lata de atún
• 1 tomate
• 1/2 cebola
• 1-2 culleradas de millo doce
• Leituga ao gusto
• Maionesa caseira

O Quiche Lorraine de Esmeraldina, a nena defunta

Despois dunha semana de emocións e sabores con Escarlatina, chega o momento do último prato. Unha outra delicia do mundo escarlatino creado por Ledicia Costas que se encontra na precuela, "Esmeraldina, a nena defunta". Escarlatina non sempre se chamou así, de feito este é o seu nome de defunta pola enfermidade que a levou. Mais entre a vida e a morte sucedéronlle unha serie de feitos incríbeis no Hotel Fantastique que se sitúa no Salvaxe Oeste. E entre outras cousas, neste libro descubrimos de onde procede a súa paixón pola cociña. A súa avoa, A Tremenda, que tiña unha gran conexión con Esmeraldina, preparaba as receitas máis saborosas que se podían degustar. Así pois, resultaba impensábel que esta historia non fose acompañada do seu recetario, do que precisamente tiramos este saborosísimo Quiche Lorraine.
Mais... ollo (e nunca mellor dito)! Porque é tal a ledicia da nena defunta cando alguén prepara o quiche da súa avoa, que temos a sensación de que se achega facer unha visita a quen o estea cociñando... E como o sabemos? Repetinamente notamos a aparición duns ollos no noso prato e a pesar do susto inicial,  recordamos que poderían ser de Escarlatina, que ás veces os perdía ou deixaba escapar como fixera coa sopa de Amancio, aínda que neste caso fora para lle dar un bo susto:
[...]
"Este Amancio é gggrancio insopogggrtable! -díxome Lady Horreur-. Que che parece se pggggracticas con el a comunicación selectiva cos vivos? Podemos dagggrlle un susto pánico!
A idea pareceume estupenda. Sobre todo, cando me explicou paso a paso en que consistía o seu plan.
- Pero iso é posíble? -preguntei, nada máis escoitar o que tiña entre mans.
-Poggggr suposto que si! Veggggrás que sinxelo e que divegggtido.
Agardamos á hora da cea. As dúas estabamos impacientes. [...] Agardamos agochadas debaixo e, tal e como acoradaramos previamente, en canto Lady me deu o aviso, púxenme a desenroscar os meus ollos a todo correr. Non era tan difícil como pensaba! Ata me alegrei de saber que era desmontables. Ñi, ñi, ñi, ñi... era como sacar a rolla dunha botella de viño. Dáballes voltas e saían pouco a pouco. Cando rematei de desenroscalos fixeron plop![...] En canto ela deu a volta, guindei os meus ollos dentro da sopa. Tiven que apertas a queixada pra non soltar un berrido. Estaba a ferver! 
[...]
Amancio descubriu que un dos meus globos oculares estaba a miralo en fite desde aquel universo de fideos. O gome cando descubriu o ollo aboiando placidamente na súa culler, pegou un berro, da impresión botouse cara atrás e caeu de cu, con cadeira e todo. Quedou de patas para arriba, coma un bechoco indefenso"
[...]

Trasnadas de pantasmas, hahaha. Agora si, a receita da Tremenda!

O Quiche Lorraine de Esmeraldina, a nena defunta

Imaxes impresas a partir das ilustracións de Víctor Rivas para
"Esmeraldina, a pequena defunta"

Ingredientes:

• 1 lámina de masa crebada
• 200 g de beicon
• 200 g de queixo emmental
• 1 bola de mozzarella
• 200 ml de nata para cociñar
• 100 ml de leite
• 4 ovos

Pasta con salsa carbonara

Aquí estamos bolboreteir@s. Vimos fortes cunha receita clásica para coller folgos durante unha semana que andaremos, como todos os anos, pola Romaría do Bo Xantar, o Naseiro. Non vos preocupedes, que habedes ir tendo noticiais nosas, mais até o sábado 3 de setembro non haberá novidades no blogue.

A idea do prato de hoxe xorde após tempo comprobando que na maior parte dos restaurantes adoitan facer a salsa carbonara con nata, incluso sendo algúns italianos. Chamounos a atención porque cando visitamos Milano, unha das primeiras cousas que aprendimos foi que botarlle nata á carbonara era un sacrilexio para eles/as.

Desde aquela, sempre imos observando o modo de preparación nos diversos lugares e desta vez fomos nós quen nos animamos a preparala. Mais antes cómpre comentar un pouco da súa orixe, que sempre crea apetito, haha.

Naceu ao abeiro da II Guerra Mundial en Italia. Curiosamente, contra o aborrecemento dos militares británicos, fartos de comer sempre o mesmo. Desde a orixe, os ovos e a pementa negra convertéronse en elementos fundamentais deste prato. Non a nata. Parece ser que os alimentos que máis abundaban nesta época de racionamento nas cociñas militares eran os ovos e a panceta, polo que solicitaron un novo prato con eses elementos. Por suposto, a pasta estaba presente en todas as casas italianas polo que esta converteuse na base desa creación.

Ademais, cómpre recordar a orixe dese termo "carbonara", que se debe á zona dos Apeninos en que comezou a degustar e na que a actividade mineira era realmente importante. Mesmo existe a lenda de que a pementa negra xorde no prato como homenaxe aos carboneiros. Mais... permítannos que o dubidemos, haha.

Pasta con salsa carbonara

Ingredientes (para 4 persoas):

• 300-350g de pasta
• 200g de panceta afumada
• 100g de queixo parmesano
• 3 ovos
• Pementa moída
• Un chisco de sal
• 2 culleradas de aceite

Ensalada de quinoa

Se xaneiro nos ofrece sol e unhas temperaturas máis propias de fin de primavera que de cumio invernal, pois nós respondémoslle coas nosas solucións gastronómicas. Sempre reivindicamos as ensaladas como xenial opción para nos alimentar e refrescar no verán, mais tamén cómpre non reducir a súa inxesta a esa tempada, xa que aínda que non sempre apetece, sobre todo cando vai moito frío, achéganos moi diferentes elementos nutritivos e fai da nosa, unha alimentación moito máis saudábel.

Ademais, esta ensalada era un obxectivo para nós pola utilización dun produto en concreto. Cantos anos tiveron que pasar para probarmos por fin a quinoa!! E agora canto nos arrepentimos de non o ter feito antes! A pesar de non ser un produto moi barato comparado con outros cereais ou sementes, teu un sabor moi moi diferencial que pode dar un enorme salto de calidade a calquera prato con non moita cantidade. Ademais, igual que o que sucede co arroz ou o cuscús, os paquetes dan moito rendemento.

Con todo, para lle sacar o máximo proveito a este produto, convén darlle unha boa compaña, como a que vemos nesta ensalada!

Ensalada de quinoa

Ingredientes (para 2-3 racións):

• 250 ml de auga
• 125 gr de quinoa
• 2 ovos cocidos
• 3-4 espárragos
• 1 aguacate
• 1 tomate
• Unha presa de avelás

Tiramisú

Vai chegando o inverno amigos e amigas, os días veñen a menos e o frío faise dono das rúas progresivamente. E ao tempo que se reducen as ganas de andar por fóra ás oito ou nove da tarde, aumentan as ganas de nos pór a cociñar e estar á calor que normalmente ofrece a cociña.

Con todo, desta volta traemos unha sobremesa fría co que cumprirmos cuestións pendentes como facer o clásico reposteiro italiano ou incluírmos outra receita para a sección internacional, aínda que ben é certo, que Italia xa non a debemos contar posto que para nós, como adoramos inmensamente, é do máis recorrente.

Como non somos moi amigos do café, sempre andabamos reticentes a preparar tiramisú, mais desta volta animados por un encargo para un aniversario, puxémonos con el.

Talvez sexa o feito de levar estudando italiano catro anos ou o feito de que nos encanta a cultura italiana, mais o certo é que todo o seu corpus gastronómico nos fai tolear. Tamén o tiramisú que non sabemos se coñecedes a orixe do nome. Contounola unha profesora do ano pasado e resulta ben curiosa. Provén do dialecto da zona de Venecia, tirame sù, que significaba literalmente "tráeme para arriba", e que se vén entendendo como "súbeme o ánimo". Todo cobra sentido cando ollamos a esencia do tiramisú con esas gotiñas de alcol, o protagonismo da cafeína e o seu doce sabor. Como para non nos subir o ánimo, vaia!

Tamén sorprende que, a pesar de para nos xa parecer un clásico, non teña unha antiga existencia, pois xurdiu após a II Guerra Mundial na zona do nordeste italiano.

Tiramisú

Ingredientes:

• 500 gr de queixo mascarpone
• 300 gr de biscoitos de soletilla
• 1 taza grande de café
• 8 xemas de ovo
• 4 claras
• 5 culleradas de azucre
• 3 culleradas de amaretto

Exaltación de "cherrys" en cama de nabizas

Como vai todo, amig@s!? Resistides o temporal e a auga? Seguro que si, que aquí xa estamos afeitos a isto. Para vos consolar, que saibades que polo sur da Península estaban aínda peor.

E non sei a vós, mais cando temos tempo así e estamos na casa, a nós increméntansenos aínda máis as ganas de nos meter na cociña a argallar novas receitas ou outras das que xa temos en Bolboretas no bandullo.

E nunha destas foi como nos puxemos a cociñar estes produtos que tiñamos na casa, na súa maioría da horta da casa. Veu unha gran cantidade de tomates e nabizas e xa matinamos en como lle tirar proveito. Tiñamos claro que tiña que ser unha receita fresca e lixeira en que destacasen eses elementos e as súas cores e isto foi o que se nos ocurriu:

Exaltación de cherrys en cama de nabizas

Ingredientes:

Para a cama de nabizas:

• Un bo feixe de nabizas
• 2 ovos
• 1 cebola grande
• 1 culleriña de pemento doce

Polbo á vinagreta

Acabaron as vacacións e supoño que como sempre que hai días de folgos, moit@s de vós excederíadesvos un pouquiño. Normal, xuntanzas familiares ou cos amig@s, máis tempo á mesa e todo acaba nunha boa enchenta. E o que corresponde despois disto é compensarmos un pouco así que toca pensar nalgunha receita algo máis lixeira. E a de hoxe cumpre cos requisitos, e ademais achega a frescura que ben presta nestes días en que o sol se presenta forte e con ansias de repartir calor.

Imos pois cunha ensalada diferente, en que teñen peso as verduras, mais onde destaca principalmente o polbo, que xa sabedes, está bo de todas cantas formas se faga. E á vinagreta... éxito seguro. Para @s que sodes pouc@s na casa e vos sobra un pouco de polbo, esta é unha outra moi boa opción para aproveitarmos o sobrante. E de feito, talvez sexa a mellor opción de degustar polbo para os días de calor. Aquí vos queda.

Polbo á vinagreta

Ingredientes (para 2-3 persoas):

• 3-4 raxos de polbo
• 8-10 gambas cocidas
• 1 ovo cocido
• 1/2 pemento vermello
• 1/2 pemento verde
• 1/2 cebola
• Aceite de oliva

Croquetas de castañas

Boas amig@s!!!! Tiñamos unha receita gardada hai un par de semanas e entre volta e revolta case vaia aló o outono, así que xa era hora de vos presentar esta novidosa receita que está máis que boa!  Quen os teña, debe tirar prexuízos, xa que hai outras moitas formas de degustar as castañas alén de asadas e cocidas, e con moi bo resultado, asegúrovolo. Xa nos temos encontrado con moitas persoas que no relativo á castaña é moi conservadora, mais na verdade, este produto un grandísimo recurso e ofrécenos moitas variantes pola intensidade do seu sabor.

Ben, é certo, nós ao principio tampouco o tiñamos moi claro mais decidimos probar tanto coa crema de castañas como agora con estas croquetas e quedamos moi satisfeitos. O malo, coma outros moitos produtos, é que temos un tempo reducido para desfrutar delas xa que os nosos castiñeiros non traballan todo o ano, haha. E aínda por riba, temos a sensación de que este ano non viñeron moi boas as castañas... Encontrámonos con moitísimas de mala calidade... Con todo, dedicando un pouco de tempo á escolla, xa que abonda con poucas, podemos elaborar delicatessen como estas:

Croquetas de castañas

Ingredientes:

• 12-15 castañas asadas 
• 1 cebola 
• 40 gr de manteiga
• 40 gr de fariña, máis extra para empanar
• 500 ml de leite
• 1 ovo
• Pan relado
• Pirixel
• Pementa moída
• Sal
• Aceite

Pastel de carne

A receita que hoxe vos presentamos tamén se caracteriza pola súa sinxeleza e rapidez ademais de ser un prato de moi boa presentación. Resulta moi apropiada eses días en que temos convidad@s ou para días de festa xa que non precisa moito tempo de preparación por ser o forno quen fai o traballo mías laborioso. Acostuma gustar a todas as persoas alén de ser un alimento moi completo por nos ofrecer proteínas, incluír un pouco de verdura e mesmo calcio. Ademais o sabor é... mmmmm... exquisito!

Pastel de carne

Ingredientes:

Para o pastel:

•  700 gr de carne picada
• 14-15 liscos de beicon
• 4 liscos de queixo 
• 4 pementos do piquillo
• Tortilla francesa dun ovo
• Sal, pementa moída, ourego e alfábega

Para a salsa:

• 1 cebola
• 1 cenoura

Mazapáns

Feliz ano 2014!! Esperamos que este ano sexa moi bo para tod@s vós, que se cumpran todos os vosos desexos e que levedes a cabo todos os propósitos!! E non esquezades pór doces na vosa vida, que seguro que a fan máis agradábel. Desde aquí tentaremos axudar para que así sexa.

Hoxe, para compensar a laboriosa receita do luns, presentámosvos unha sinxela e rápida. Os mazapáns son típicos desta época do ano, o Nadal, así que aínda estades a tempo de os facer. Xa haberá tempo de baixar os excesos destes días! 

Mazapáns

Ingredientes:

• 150 g de améndoa en pó
• 120 g de azucre glas
• 1 ovo