Lambonadas de amorodos

 Bo día, bolboreteirxs! Como vai todo? Aquí esta semana está empezando así que precisamos adozar un pouco as próximas xornadas e para iso traemos un clásico da infancia, un dos nosos favs en versión caseira. 

Só a palabra "lambetadas" xa provoca alegría pero cando dedicamos un tempo en familia a preparalas, só queda gozar do sorriso dos peques e do resultado. 

Como sempre comentamos, hai receitas que compensan máis facelas na casa e outras menos. Esta desde logo resulta, ao noso parecer moito máis sabedeira e natural desta forma.  Ademais, de que nos permite libre elección de sabor, forma... pura fantasía!

Lambonadas de amorodos

Ingredientes:

• 150 g de amorodos
• 100 g de azucre
• 50 ml de auga    
• 1 sobre de xelatina neutra

Madalenas de arandos

Bolboreteir@s! Como estades?? Os que permaneces na Galiza vivindo os luxos de non estarmos a 50º, non? Luxo si, pero nós algo de sol queriámolo, eh!!

Ultimamente estamos bastante activos na cociña debido ao período vacacional. Hoxe traémosvos unha lambetada clásica, madalenas, que dá para xogar e experimentar canto queiramos. Desa volta, escollemos os arandos como protagonista xa que ultimamente están a ter moito éxito nesta casa posto que ao pequeno o namoran. A verdade é que as froitas de verán son un luxo: sandía, melón, cereixas, arandos...

Cremos que esta receita vos ha de entrar xa polos ollos mais ollade que non ten grande complicación e animádevos a descubrir tremenda lambonada!

Madalenas de arandos

Ingredientes:

Para as madalenas:

• 220 g de fariña
• 200 g de arandos
• 135 g de azucre
• 120 ml de leite       
• 110 ml de aceite de xirasol
• 1 sobre de lévedo

Biscoito de manga

Boa tarde, bolboreteir@s! Como vai esta última semana deste maio tan estraño? Aquí, como andamos de estrea de vivenda andamos a probar os novos trebellos de cociña para elaboración de novos pratos e estamos a gozar como ananos, claro. 

Para probar os fornos, sempre se lle preparou un biscoito así que o obxectivo estaba claro. Ora ben, tamén é habitual mentres se lle colle o truco aos electrodomésticos, que haxa algunha desfeita, así que fomos con moito coidadiño para que non se nos queimase a nosa larpeirada.

E facémolo de manga porque é unha froita que estamos a redescubrir tempo despois. Había tempo que non se facía moito oco na nosa cociña e nestas últimas semanas volvémolo mercar e vaia gozada. Os que collemos están que se desfán na boca. Así que tiñamos claro que lle darían todo o sabor que precisabamos a esta receita.

Biscoito de manga

Ingredientes:

• 
• 250 g de fariña
• 200 g de manga
• 180 g de azucre
• 100 g de aceite de oliva

Torta mousse de pexegos

Bo día, bolboreteir@s! Fin de semana de Maruxaina, finde de festas e finde de moito comer. @s lambóns estamos de noraboa, claro! Así pois, sumámonos con esta tremenda receita. Ides pensar que estamos obsesionados cos péxegos e moita razón non vos falta. Recordade que os antollos son frecuentes nesta familia ultimamente e desta volta deunos por unha froita. É certo que tivemos que mercalos porque aínda non se nos dan mais ante a gula pouco nos puidemos resistir.

Despois da marmelada e da torta de chocolate e pexegos, hoxe traemos unha outra torta moito máis fresca e lixeira, ideal para estes días de calmazo.

Aquí uns cantos amig@s  deron boa conta dela e pouco durou sobre a mesa. Preguntaban pola receita e agora xa vai ficar ao seu dispor para elas e tamén para tod@s vós.

Torta mousse de pexegos

Ingredientes (para un molde de 26 cm):

Para a base:

• 300 g de galletas oreo
• 2-3 culleradas de manteiga

Para o recheo:

• 600 g de pexegos
• 400 g de nata para montar
• 150 g de azucre
• 1 iogur de pexegos

Torta de pexegos e chocolate

Boas, bolboreteir@s!!! Como vai todo? Hoxe traemos unha oda ás receitas doces e unha perdición para as persoas máis lambonas. Esta fin de semana aproveitamos que David estaba de aniversario e que eran as festas do barrio en Cantarrana (Viveiro) para prepararmos unha sobremesa ambiciosa. O de ambiciosa é porque tiñamos ganas de algo moi doce, non pola dificultade.
Ben, pois vistes que no último día publicamos a receita da marmelada de pexegos e non era casual. Andamos con antollo deles e queriamos unha torta na que foran elemento clave. E así foi.
A verdade é que non recordamos ter probado esta combinación de pexegos e chocolate antes mais tamén por iso tiñamos grandes expectativas. E vaites se se cumpriron.
De igual modo que gustamos moito doutras mesturas choco-froita, namoramos desta xa que o pexego dá o frescor necesario nunha lambetada ben intensa por mor do chocolate. Babexamos só de matinar en degustala de novo, aí vai.

Torta de pexegos e chocolate

Ingredientes:

Para a base:

• 440 g de fariña
• 250 g de manteiga
• 150 g de azucre
• 40 g de cacao puro en po
• 2 ovos

Tiramisú de amorodos

Bo día, bolboreteir@s! Como vai todo? Por aquí andamos xa iniciándomos a tempada de festas. E claro, isto sempre dá para menús ben completos. Aínda que desta volta tocounos ir como convidados así que o menú non correu da nosa conta. Iso si, como celebrabamos tamén o aniversario dunha das nosas mellores amigas, decidimos levar unha sobremesa espectacularmente saborosa! Había ben tempo que non preparabamos unha torta coma esta así que gozamos a preparación e sobre todo a papatoria. Vaia festival.

Por aquí xa adoitamos degustar os tiramisú cando visitamos italianos porque representan moi ben a cociña identitaria desta terra aínda non sendo nós amantes do café. Pois desta volta decidimos preparar dita receita clásica renovada, dando o protagonismo a unha das nosas froitas favoritas, os amorodos. Velaquí esta xoia!

Tiramisú de amorodos

Ingredientes:

Para a crema:

• 600 g de amorodos
• 600 g de nata
• 500 g de queixo mascarpone
• 100 g de azucre moreno

Pudin de chocolate e froita ao microondas (saudábel)

Bo día, bolboreteir@s!! Que tal vai todo? Agardamos que teñades apetito porque traemos unha lambetada das que impulsan a preparalas e comelas, sobre todo tendo en conta que non nos vai quitar tempo. Desta forma, nós vémola ideal para almorzos diferentes, talvez de fin de semana, mais co que nos podemos afastar da rutina diaria.
Xa sabedes ademais que somos moi fans destes biscoitos de cunca que agora xa levan uns anos de moda e que chegaron coñecidos como mug cakes.
Temos feitos moitísimos e segundo lle vas collendo o truco, mellor saen. Quen lle diría ás nosas avoas que facían aqueles biscoitos como a roda dun carro con todo o seu tempo preciso que agora poderiamos preparar un biscoito en apenas cinco minutos! Pois si, aí vai!

Pudin de chocolate e froita ao microondas

Ingredientes:

• 8 amorodos
• 1 plátano
• Unha presa de abelás
• 1/2 vaso de bebida de améndoa

Gofres saudábeis

Tremendo día solleiro temos hoxe, bolboreteir@s! Nós xa temos a nosa ensalada preparada para saír xantar fóra. Hai que aproveitar! Mais antes de fuxir, temos un compromiso que cumprir por aquí. Un compromiso doce, por certo. Mais ollo, que ultimamente vedes que estamos probando a argallar con larpeiradas reducidas de calorías e moito máis saudábeis como as últimas bolachas de avea, a crema de cacao saudábel e o gofre que hoxe vos traemos. Si, si, podemos papar un gofre sen pecar, haha.
Por que escollemos este produto? Porque nos perden os gofres. E o curioso é que até hai apenas 5 anos non nos coincidira de comer un (si, non sabemos como puido pasar...). Ben, mais desde aquela, sempre no top das sobremesas. E claro, como facemos para degustalo con máis frecuencia sen caer no exceso? Pois aquí temos a solución.

[Ides ver que nós contamos con gofreira (agasallo vendo a nosa devoción haha) mais podedes optar, se non tedes, por facer a mesma masa nunha tixola, estilo tortitas.]

Gofres saudábeis

Ingredientes:

• 130 ml de bebida de améndoa
• 80 g de fariña de avea
• 30 g de manteiga
• 1 ovo
• 1 culleriña de lévedo

Brownie de froitos vermellos

Ola, bolboreteir@s! Canto había que non preparabamos un doce coma este. O brownie é unha das nosas larpeiradas favoritas e non falla cando nos queremos dar unha homenaxe, subir o ánimo ou simplemente desfrutar do chocolate en todo o seu esplendor.
Desta volta necesitabamos un biscoito ou torta para o aniversario da avoa e para non perdermos moito tempo agora que andamos algo enleados co inicio das aulas, optamos por un brownie no que as froitas entrasen en xogo.  

Se quixerdes arrasar entre os vosos comensais ou gozardes inmensamente desta lambetada, esta é a vosa receita. Para non perder!!

Brownie de froitos vermellos

Ingredientes:

• 125 g de framboesas
• 125 g de arandos
• 225 g de manteiga
• 200 g de azucre moreno
• 100 g de chocolate negro
• 50 g de fariña
• 50 g de cacao en po
• 1 cullerada de vainilla

Scones

Bo día, bolboreteir@s!! Como levades a fin de semana? Con ganas, non? Pois por aquí estamos aproveitando xa a mañá para preparar unhas receitas impresionantes que vos presentaremos proximamente e para acabar de papar estes scones que hoxe vos presentamos e que se converteron na revelación gastronómica do mes.

Encontrámonos con esta receita de casualidade xa que nunca escoitaramos falar até o momento dos ditos scones. Investigamos un pouquiño e pareceunos interesante preparar un clásico da cociña escocesa que até o momento non tivera cabida no blogue aínda que si a británica, por exemplo, nestas tortas galesas.

Ben, ao principio estabamos pensando neles como un pan para acompañar aínda que ao ter un toque doce talvez fose máis adecuado para a sobremesa. Unha vez degustados temos claro que serve para calquera momento do día aínda que talvez onde mellor cadren sexa no almorzo ou na merenda. Nós estámolos papando case a cada comida porque son todo un vicio. Se queredes aprender a preparalos, esta é a vosa!

Scones

Ingredientes:

• 225 g de fariña, máis para amasar
• 90 g de manteiga
• 70 ml de leite, máis para pintar
• 1 sobre de lévedo en po
• 1 cullerada de azucre
• 1 ovo
• Framboesas

Peras en salsa de cítricos

Bo día, bolboreteir@s! Como vai todo? Por aquí seguimos argallando receitas saudábeis aínda que é certo que esta fin de semana pecamos cos ansiados freixós (aí vos queda receita en vídeo, que xa vai tocando). Son a nosa perdición e talvez sexan a nosa lambetada preferida que tamén actúan como símbolo da repostaría galega.

Ben, deixando a xoia do Entroido a un lado, andabamos preocupados porque desde que comezamos con estes pratos sans non presentaramos ningunha sobremesa e non queremos que fiquen desconectados estes dous elementos. Así pois, démoslle unha volta a un dos nosos libros favoritos, "Cocina sana para disfrutar" de Isasaweis e chegamos a esta idea, que collemos prestada para vos presentar.

Gustounos pola asociación da pera cos cítricos xa que adoitan ir por separada. Chamounos a atención e efectivamente comprobamos que o resultado non deixa indiferente. Agora, é a vosa quenda.

Peras en salsa de cítricos

Ingredientes:

• 3 peras
• 2 laranxas 
• 1 limón
• 1 rama de canela
• 1 cullerada de vainilla

Pudin saudábel de plátano

Bo día, lambonciñ@s, como levades a última semana de novembro? Xa desexando a chegada do Nadal ou máis ben teméndoa? Nós agardámola con moita alegría entre outros motivos porque nos gusta o ambiente e tamén para ter uns días de descanso. Con todo, sabemos que veñen tempos de moito papar polo que convén ir compensar con anticipación polo que estamos a traballar en novas receitas saudábeis. Habitualmente adoitan ser estas das máis lidas, percíbese que hai un público lambón mais tamén moi amigo da healthy-food que lle chaman agora.

Desta volta, tiramos proveito dunha web interesante como é Postres saludables en que encontramos esta e outras mil ideas para preparar. Tiñamos claro o obxectivo, un biscoito para os almorzos da semana así que demos co perfecto. Velaquí fica:

Pudin saudábel de plátano

Ingredientes:

• 3 plátanos
• 3 ovos
• 3 culleradas de avea
• 1 culleriña de lévedo

Biscoito de plátano e coco

Agora si, aquí ficamos xa definitivamente de vacacións e ademais con moita alegría xa que tivemos moi moi boas novas esta semana. Toca desfrutar do verán e das festas así que hoxe xa vos presentamos unha das sobremesas preparadas para unha destas festas, neste caso nas Pontes, onde fomos como convidad@s esta pasada semana.
Como aínda non tiñamos todo o tempo dispoñíbel para elaborarmos unha torta máis complexa optamos por un biscoito, mais un biscoito diferente, especial en que sobresaen certos sabores como o do coco, esa froita amada por tant@s e dehostada por outr@s moit@s.
Talvez os biscoitos sexan a larpeirada máis feita en Galiza e parte do estranxeiro pois é algo que se fai relativamente rápida, sen complicación e que ademais dá para todas as comidas do día, desde o almorzo até a sobremesa. Así pois, deixamos unha nova opcións á hora de nos enfrontar a esta elaboración. 

Biscoito de plátano e coco

Ingredientes:

• 6 plátanos
• 300 g de azucre
• 250 g de fariña
• 225 g de manteiga
• 140 ml de leite
• 125 g de chocolate con avelás
• 30 g de coco
• 16 g de lévedo en po
• 4 g de bicarbonato
• 4 ovos

Costeleta con salsa de mango

Amig@s, continúan as receitas. En Bolboretas no bandullo non deixamos de crear. As receitas do blogue baséanse na alimentación do noso día a día e iso queremos que vexades. É por iso que comprobades que nas últimas semanas presentamos receitas moi sinxeliñas e cun tempo de elaboración mínimo.
Gustamos de vos traer posibilidades accesíbeis tanto a nivel económico como dos propios produtos que temos ao noso redor. E aquí tedes un novo exemplo, a partir dunha costeleta, carne habitual nos nosos menús semanais e que desta volta tivo un acompañante ben novidoso, unha salsa de mango que lle refrescou as ideas!
Imos alá cun novo recurso :-)

Costeleta con salsa de mango

Ingredientes:

• 1-2 costeletas/ persoa
• 2-3 dentes de allo
• Pementa moída
• Ourego
• Sal

Para a salsa de mango:

• 1 manga
• 1/2 cebola
• 4-5 culleradas de auga

Torta enreixada de cereixas

Todos os anos por estas datas traemos un doce novo ao blogue, que adoita ser unha torta. E a explicación está no aniversario dunha das partes de Bolboretas no bandullo. E vaia, como ía faltar torta caseira para unha celebración así? Ademais, como estamos en época de moita froita adoitamos aproveitar para tirar beneficio dos amorodos, da sandía ou das cereixas, como neste caso.

A de hoxe é unha típica sobremesa americana, desta que vemos que nos filmes que fan as avoas e quedan a arrefriar nas repisas das xanelas, hahaha. Con todo, nós non fomos procurar a recetarios estadounidenses senón que aproveitándomos a colaboración do último martes, con toda unha crack da repostaría como Merchi Rodal, pois procurámolo no seu último libro, "Novas lambetadas dunha larpeira feliz". 

Así pois, só quedaba procurar produtos bos e darlle o toque de agarimo que nunca debe faltar nun doce para que saia todo o saboroso que corresponde.

Aí vai!

Torta enreixada de cereixas

Ingredientes (para un molde de 30cm):

Para a base:

• 550g de fariña
• 320g de manteiga
• 150g de azucre
• 2 ovos
• Un chisco de sal

Para o recheo:

• 1kg e medio de cereixas
• 240g de azucre

Biscoito de espelta con papaia e banana

Vén o sol e veñen as ganas de produtos de tempada, frescos. Apetecen cada vez máis as froitas. E aí por sorte temos onde escoller, ben para as degustar por si soas, que xa son un manxar, ou ben para facermos larpeiradas algo máis saudábeis.

E esta quedou para non deixar migalla. O que máis chama a atención é a súa esponxosidade e o ben que se conserva a pesar do paso dos días. Nós preparámolo o pasado luns e os últimos anacos que quedaban a final de semana estaban igual que o primeiro día. E isto simplemente deixándoo protexido no forno.

Por aquí papouse só, con crema de cacao, mollado en leite... de mil xeitos e igualmente exitoso en todas. Nós que temos algo aborrecido o biscoito tradicional de iogur, agradecemos moitísimo estas novas posibilidades. De feito, é raro que repitamos biscoito, mais con este talvez teñamos que facer unha excepción...

Biscoito de espelta con papaia e banana

Ingredientes:

• 200 gr de papaia
• 2 bananas
• 150 gr de fariña de espelta   
• 100 gr de azucre
• 3 ovos
• 1/2 vaso de aceite
• 1 sobre de lévedo

Torta clafoutis de amoras

Estades tod@s xa? Pois imos cunha nova receita, feita en base a un dos produtos de tempada, deses que nos levan irremediabelmente a tempo de nen@s en que pasabamos tardes enteiras collendo nas amoras máis grandes e escuras. Para esta larpeirda non fixeron falta moitas amoras, e menos mal porque parece que xa viñeran a elas antes... Ademais, recollímolas nunha das paisaxes máis fermosas de Viveiro, no paseo da Xunqueira, onde precisamente se celebraron as festas esta fin de semana.

A pesar de que sempre saímos con algunha que outra rascada das silvas, recoller amoras ten algo de especial. Aínda recordo cando xogabamos a facer "viño" con elas de peques e a xuntar cantas máis se puidese... Desta volta, foi para elaborar unha torta de orixe francés que se adoita realizar con cereixas, mais como agora xa non quedan, preferímolas facer cun dos alimentos silvestres máis saborosos. E non sabemos como quedará con cereixas, mais con amoras... perfecta! Ollade:

Torta clafoutis de amoras

Ingredientes:

Para a base:

• 200 gr de galleta
• 120 gr de manteiga

Para o recheo:

• 250 gr de amoras
• 150 gr de azugre
• 100 gr de fariña de améndoas (ou de trigo)

Macedonia de froitas

Por sorte parece que volven subir as temperaturas, aínda que de momento ben se soporta a calor, haha. Sexa como for, neses días estivais de moita calor, convén hidratarse moito o que non se fai simplemente bebendo auga. Por tanto a nosa alimentación tórnase clave.

Así pois, nestes meses agardamos continuar presentando varias receitas que axudan a nos sentir mellor no verán. A de hoxe é todo un clásico e de seguro que a maioría de vós a ten feito en moitas ocasións xa que non ten a menor dificultade. Porén, como calquera prato de mesturas, ofrece millóns de variantes, e difícil será encontrar dúas familias en que a macedonia se faga de xeito idéntico. É cuestión de procurar o que preferimos encontrarnos nela. Nós por exemplo gustamos de macedonias, moi completas, con moitos froitos. 

Antes de pasarmos á elaboración queriamos mencionarvos a orixe desta denominación. Xa sabedes do noso interese por cuestións lingüísticas... Ao falarmos desta sobremesa, da macedonia, sempre nos vén á cabeza ipso facto o país balcánico. Mais... terán algo que ver?  De igual modo que noutras ocasións o imaxinario popular atribúe relacións lingüísticas do máis atrevidas, desta volta si anda no certo. Non no referido á macedonia de froitas en concreto senón ao termo "macedonia" xa que se coñecen así as combinacións de diversos produtos por causa do Imperio Macedónico. Na época de Alexandro Magno (século IV a.C), tiveron cabida neste imperio diversas nacións, culturas, idiomas... que provocou que hoxe coñezamos como macedonia as combinacións de produtos diferentes, sendo a de maior sona a de froitas.

E para que vaiades abrindo apetito... aquí tedes:

Macedonia de froitas

Ingredientes (para aprox. 10 racións):

• 5-6 laranxas
• 2 plátanos
• 2 kiwis
• 2 mandarinas
• 2 peras
• 2 mazás
• 10 amorodos
• 1/2 ananás

Picos froiteiros

Con estes días énos imposíbel non pensar en receitas fresquiñas e lixeiras, que alén de estar boísimas, sérvennos para depurarmos e levarmos unha alimentación equilibrada. E a receita de hoxe está tan fresca que a acabamos de facer. Erguémonos cun pouco de tempo para almorzar e con moitas ganas de froita así que pensamos nun modo de degustar diversas froitas e esta foi a que se nos ocorriu. Ademais coincidiu que tiñamos algunha na casa moi doce e axeitada para unha saborosa combinación. Aquí vos queda; comprobaredes que pouco máis sinxela pode ser, alén das múltiplas posibilidades de elaboración que vos ofrece:

Pico froiteiro

Ingredientes:

• 1 manga
• 1 plátano
• 1 kiwi
• 5-6 amorodos
• 50 gr de chocolate branco

Biscoitiños de cenoria e mazá

Como vai lectores/as? Xa recuperastes do Entroido e das súas larpeiradas?? Por aquí aínda andamos hoxe despedíndonos dos freixós :'( Aínda que vexo difícil agardarmos até o ano que vén por eles, algún día teremos que facer unha homenaxe ao Entroido aínda en datas distantes :-) Por certo, podedes botarlle un ollo ao artigo que escribimos para o xornal Sermos Galiza sobre esta larpeirada entroideira e o seu peso na gastronomía e cultura galega (Artigo Sermos) .

Con todo, as larpeiradas nós nunca as deixamos de lado. Esta semana queriamos facer un doce máis suaviño despois de todo o manducado estes días. Pensamos así nun biscoitiño fresco e lixeiro e no que integrarmos dous produtos que lle dan un sabor... impresionante!

Iso si, a modo de estratexia fixémolos cuns moldes de madalenas porque así talvez é máis sinxelo controlarse á hora de comer as porcións. Porque se o facemos o tamaño tradicional do biscoito arriscámonos a cortar cachos enormes deixándonos levar polo apetito dos ollos. E agora toca controlar un pouco e non exceder, haha. Aí vos vai: 

Biscoitiños de cenoria e mazá

Ingredientes:

• 150 gr de fariña
• 50 gr de manteiga
• 30 gr de azucre
• 4 cenorias
• 2 ovos
• 1 mazá
• 1/2 vaso de leite descremado
• 1/2 sobre de lévedo en po