Empandilla de polo rechea

Bo día, bolboreteirxs! Que tal estades? 

Estamos aquí un xoves máis cunha nova receita. Esta vez presentámosvos unha forma bastante orixinal de facer empanadillas, xa que en lugar de usar masa imos usar o propio polo! Esta receita estivo viralizada en TikTok e non nos puidemos resistir a non probala. Nós propoñémosvos un recheo, moi sinxelo e saudábel, mais podedes xogar coa vosa imaxinación, ou cos ingredientes que teñades no frigorífico! 

Aquí vos deixamos a receita: 

Empanadilla de polo rechea

Ingredientes: 

• 2 peitugas de polo
• 1 tomate
• Queixo        
• Espinacas
• Parmesano en po

“Donuts” de pera e améndoa

Bo día, bolboreteirxs 🤗! Que tal estades? Hoxe traémosvos u ha receita sinxela, rápida e deliciosa 😋, que faremos só  con 4 ingredientes (+). A pera vai ser o ingrediente principal, dálle un toque fantástico e difícil de recoñecer! Coa excusa de coñecer á pequena da casa, estamos tendo moitas visitas e intentamos facer algunha rceitiña para sorprendelxs e que leven un bo sabor de boca, e esta foi unha desas receitas escollidas! 

O máis importante a receita é escoller a froita madura, e unha varidade que teña moito sabor,  para que sexan máis deliciosas 🥰🤤! Aquí vai a receita: 

Donuts de pera e améndoa

Ingredientes:             

• 250 g de pera 🍐 
• 160 g de fariña de améndoa. 
• 4 ovos
• Unha cullerada de lévedo en po

Pizza saudábel de quinoa

 Bo día, bolboreteirxs! Que tal estades? Xa preparados para o Entroido? Para nós, é unha das mellores épocas do ano. Gozamos moito de disfrazarnos, dos Entroidos tradicionais e, sobre todo, da comida. E o cocido está delicioso, mais onde estean unhas boas filloas, para nós freixós, ou unhas roscas pódese quitar o resto ;). Por isto, esta receita é ideal para estes días onde a comida ten unha grande presenza. Esta pizza é saudábel e lixeira para contrarestrarmos os grandes festíns destes días. Ademais de que é moi sinxela de facer, como ides ver a continuación. 

Algo que nos encanta das pizza é a infinidade de posibilidades que teñen, tanto para as masas coma para os ingredientes que poñemos sobre ela. Hoxe ímosvos dar dúas opcións, mais animámosvos a que xoguedes co que máis vos guste e que os peques da casa tamén participen do proceso. Agora si, imos coa receita.

Pizza saudábel de quinoa

Ingredientes (para dúas pizzas):

Para a masa:

• 250 g de quinoa
• Auga
• AOVE
• Pementa moída        
• Sal

Para a pizza 1:

• Queixos variados (mozzarella e cheddar)
• Heura (ou polo)
• Espárragos

Cunca de açai

Empezamos a semana cunha nova receita 🤩: CUNCA DE AÇAI 🍓🫐🍌😍 Un almorzo (ou merenda) perfecto, saudábel e moi completo. O açai está considerado coma un superalimento debido as súas múltiples propiedades beneficiosas para a saúde. Cultívase en América do Sur e púxose moi de moda nos últimos anos. 

Nós hai pouco tempo que probamos a CUNCAS DE AÇAI e desde aquela quedamos namorados e volvéronse fundamentais para nós 😍! O açai conseguímolo a través da rede, mais en grandes superficies ou herbolarios tamén o podedes comprar. Despois, é xogar cos sabores das froitas, e as texturas, e coas cantidades que son axeitadas para cada un. 

Cunca de açai

Ingredientes:

• 300 g de froita (amorodos, froitos vermellos, manga…)*.
• 2 plátanos, fundamentais, para dar cremosidade*.       
  
  
  
• 1/2 vaso de leite ou bebida vexetal.
• 1 cullerada de açai en po.

Para decorar: 

• Máis froita: plátano, arandos, amorodos…
• Granola.

Alcachofas con xamón

Boa noite, bolboreteir@s!! Xa vén o Nadal enriba e algún xa leva a pretempada moi adiantada coas enchentas e as lambetadas. Pois ben, como sabedes, este mes é complicado para comer e vai haber días que mesmo dubidemos se nos compensa preparar a comida e non subsistir coa enchenta da cea/xantar anterior. Pois ben, cremos que un prato como o que aquí hoxe presentamos, que cumpre con moitos requisitos, rápido-saudábel-sinxelo pode encaixar moi ben para as vosas ideas destas semanas. 

Estamos a falar dunha combinación bastante clásica e que en moitas casas xa coñecederedes, xa for así ou con outro tipo de verdura-legume tipo xudías, chícharos... Mais a verdade é que un pouquiño de xamonciño encaixa ben con case todo. Aquí unha proba ben satisfactoria. 

Alcachofas con xamón

Ingredientes:

• 1 bote de alcachofas
• Xamón ben picadiño
• 1 dente de allo

Berenxenas á parmesana

Boa tarde, bolboreteir@s. Como estades? Xa vedes que nós seguimos ofrecendo pratos saudábeis e ben apetitosos con verduras diversas como protagonistas. Desta volta tocoulle á berenxena. Tiñamos unhas poucas na casa e pensamos en facer unha receita clásica, as berenxenas recheas mais non nos apetecía moito desa maneira así que elaboramos algo máis lixeiro e cheo de sabor.

Aquí xa sabemos que este tipo de combinacións adoitan ser exitosas e máis cun queixo coma o parmesano. Imos ver os pasos para culminar con éxito esta receita.

Berenxena á parmesana

Ingredientes:

• 800 g de salsa de tomate
• 3 berenxenas
• Mozzarella        
• Parmesano
• 1 cebola
• Alfábega fresca
• Tomiño
• Ourego

Boa noite, bolboreteir@s!! Como estades? Algúns xa pensaban que remataba a fin de semana sen a ansiada receita mais... non!!! Aquí chega o recheo, o corazón que dá vida á receita da pasada semana. Recordade o pan de hamburguesa de espelta integral que xa conquistou a moit@s e que actuou como contorna desda tremenda delicia con moitas menos calorías das habituais e cun sabor para sacar os ollos das cuncas.

Dixémosvos moitas veces do noso interese pola cociña vegana  xa que a consideramos pura creatividade e  aquí volvemos coller ideas dela (aínda que desta volta sumamos tamén carne). Teñen así cabida sabores moi diversos xogando cada un o papel suficiente para lograr unha delicia perfecta. Ollade:

Hamburguesa saudábel 

Ingredientes: 

Para a carne:

• 300 g de carne picada 
• 150 g de soia textutizada
• Queixos tipo “Babybell”     
• 1 cullerada de allo en po
• 1 cullerada de cebola en po
• 1 cullerada de pemento doce
• Auga

Kebab da casa

Supoñemos que esta receita vai chamar a atención de moita xente e máis nestes tempos en que un kebab se converteu nun símbolo pasado de tempos festivos e de recuperacións nocturnas. A cea máis tardía tras troula ou o almorzo de máis adiantado? Sexa o que for, o kebab xa está instaurado na nosa gastronomía rutinaria de rúa desde hai arredor dunha década. Non hai vila sen o seu restaurante turco nin festa sen o parrandeiro que acuda ao kebab na procura da solución a todos os seus meigallos alcólicos. 

Aínda que aquí o asociamos, como escribimos, a restaurantes turcos, este alimento é un dos mellores representantes da gastronomía de Oriente Medio. Alí teñen moitas variantes aínda que o nacemento provén da carne espetada.

Iso si, a súa expansión por Europa vén da man do éxodo de turcos a Alemaña a mediados do século XX e hoxe en día hai máis postos de keban en Berlín que en Estabul, por exemplo, aínda que iso como sabemos, depende da comercialización e do éxito en moitas ocasións do foráneo. Reino Unido tamén é un clásico neste tipo de locais. E como mencionabamos ao principio, en Galiza veñen sendo moi habituais desde hai arredor de dez anos ganando un oco nos clásicos da comida rápida e tamén económica, algo que ao noso ver, fai que teña tamén a popularidade que ten. Aquí unha receita caseira, salvando obviamente as distancias co orixinal. 

Kebab da casa

Ingredientes:

Para a carne:

• 2 filetes de tenreira (grandes)
• 1 culleriña de ourego
• 1 culleriña de alfábega
• 1/2 culleriña de pemento doce
• 1/2 culleriña de comiño           
• 1/2 culleriña de canela
• Pementa moída
• Sal

Xeado de amorodos e plátano (saudábel)

Bo día, bolboreteir@s! Como vai? Nós deixamos Viveiro atrás entre a festa máxima do Resurrection e acudimos á voda da nosa mellor amiga, polo que deixamos publicada esta receita que tanta alegría nos trouxo. E por que esa felicidade? Porque levamos cinco anos e medio de blogue e aínda non foramos quen de preparar un xeado. Sempre era unha das tarefas pendentes do verán e desta volta foi e non imaxinabamos que podería ter sido tan sinxelo. Sempre nos botaba para atrás polo feito de non ter xeadeira e porque viamos que en moitas receitas o proceso de elaboración era moi lento e laborioso. 

Porén, con esta que hoxe vos traemos veredes que non hai complexidade ningunha. Deixarlle traballar ao conxelador e gozar dun xeado saboroso e moi moi saudábel. Aquí o tedes!

Xeado de amorodos e plátano

Ingredientes:

• 2 plátanos
• 4-5 amorodos
• 200 ml de bebida de améndoa

Para servir:

• Galletas de barquillo

Puré de coliflor

Ola, bolboreteir@s! Como vai todo? Por aquí andamos collendo forzas para a recta final de curso polo que hai que procurar achegas vitamínicas de onde for e cremos que a coliflor se dá moi ben para isto xa que contén vitamina C e B en grandes cantidades. Ademais, destaca por ser moi rica en auga (máis do 90%) e unha boa fonde de fibra. Vaia xoia! E ademais, apetitosa!

Tamén é certo que cremos o puré logra manter a intensidade de sabor das verduras e nesta receita que hoxe vos presentamos, o sabor a coliflor é clarísimo. Non está oculto.

Para peques dá, ademais moito xogo, coma todos os purés, mais cremos que convén ampliar o abano de posibilidades máis alá da pataca.

Nós desta volta preparámolo como base dun solombo que cociñamos mais xa sabedes que iso vai a gusto do consumidor.

Velaquí o tedes!

Puré de coliflor

Ingredientes:

• 1 coliflor
• 4 culleradas de leite
• 1 cullerada de aceite
• 1 culleriña de allo en po

Empanadillas de gambas ao curry

Bo día, bolboreteir@s! Como nos gusta maio! Achégase o verán, comezan as festas... Que ben! Entre todo isto, gústanos especialmente por comezarmos a facer as saídas para xantar fóra, no parque ou na praia. Así pois, vimos tendo unha acumulación de receitas para ir de picnic que aumentamos cada ano. E aquí é onde entra en xogo este petisco que hoxe vos presentamos, que vén cargadiño de sabor.
Xa sabedes, o curry non pasa desapercibido e hai quen o adora e quen o odia. Nós obviamente, estamos no primeiro grupo e nunca falta na nosa lacena un pouquiño desta especia asiática, que asociamos principalmente á cociña hindú. Ademais, sabiades que o termo curry chega a través do portugués? De feito, a nosa forma debería de ser "caril", tal e como na lusofonía se di, designando así "kari", que sería salsa en tamul, lingua que se falaba no sur da India.
Ben, denominada dunha forma ou outra, apetecen, non é?

Empanadillas de gambas ao curry

Ingredientes:

• Masa para empanadillas
• 200 g de gambas
• 100 ml de viño branco
• 1/2 cabaciña
• 1 cebola
• 2-3 dentes de allo
• 1 cullerada de curry
• Pementa moída

Cuscús ao curry con polo e verduriñas

Bo día, bolboreteir@s! Seguimos con acumulación de receitas para o día a día e para a rutina do inicio de curso. Hoxe imos cun ingrediente habitual na nosa alacena e do que tiramos un proveito infinito: o cuscús. De feito, esta receita ten un claro aroma marroquí grazas tamén á intensidade que nos achega o curry.
Esta sémola de trigo dános moitísimo xogo para combinar con carne, peixes ou verduras. De feito, aquí hoxe mesturamos con varios destes produtos. Que prato saboroso ficou!
Se andades na procura dun recurso con moita utilidade, esta é a vosa oportunidade. A por ela!

Cuscús ao curry con polo e verduriñas

Ingredientes:

• 150 g de cuscús
• 75 ml de auga
• 6-7 espárragos
• 2-3 champiñóns
• 1 cebola
• 1/2 pemento vermello
• 1 dente de allo
• 2 culleradas de curry

Paté de olivas negras

Bo día, bolboreteir@s! Como vai a entrada deste outono con aspecto estival? Agardamos que esteades a desfrutar do sol e tamén das terrazas, que estes días aínda prestan moito. Ben, falando de terrazas, esta semana fomos xantar a unha cafetaría da Coruña que non coñeciamos, o Grand Cru Café La Cantera (na rúa Cidade de Lugo). Situada fronte ao Palacio da Ópera, collemos sitio nunha terraza do máis agradábel e na que nos sorprendeu moi agradabelmente a calidade dos produtos. Alén dos pratos principais (canelóns de filloas e hamburguesa de chocos na súa tinta), quedamos conquistados cun petisco que nunca antes probaramos, un paté de olivas que hoxe vos imos presentar aquí. O bo, haino que compartir!

Paté de olivas negras

Ingredientes:

• 100 g de olivas negras
• 1 cullerada de alcaparras
• 3 culleradas de zume de laranxa
• 2 culleradas de aceite de oliva
• 1 culleriña de tomiño
• 1/2 culleriña de ourego

Salmorejo de amorodos

Que ben se levanta un para un día de folgar, non? Pois ben gañado o tedes, así que aproveitade para vos dar descanso e como non, para levar a cabo algunhas das receitas que tedes pendentes desde hai un tempo.

Por se non eran suficientes, hoxe traémosvos unha máis, pensada para a primavera-verán, especialmente para aqueles días de calor en que non apetece máis que algo fresco.

De seguro que todos probastes algunha vez o salmorejo,  este gaspacho típico de Córdoba e que se caracteriza por unha maior consistencia. Nós queriamos preparar unha nova versión e na rede vimos a xenial idea de Nenalinda, que collemos prestada inmediatamente.

Para perderdes moi pouco tempo e desfrutardes moito, aquí vai o salmorejo de amorodos.

Salmorejo de amorodos

Ingredientes:

• 1 kg de tomates
• 400 g de amorodos
• 1 anaco de pan
• 1 dente de allo
• 150 ml de aceite de oliva
• 2-3 culleradas de vinagre de sidra
• 2-3 follas de alfábega fresca

Crema de champiñóns

Bo día, bolboreteir@s! Hoxe traemos unha receita que tiñamos ganas de preparar hai ben tempo. As cremas son garantía de éxito sempre e para nós que somos fans dos fungos esta é unha delicatessen. Ademais, é unha especie de Madalena de Proust para nós pois era un clásico da nosa infancia xunto coa de espárragos, aínda que ben é certo que esta era de supermercado e unha vez degustada a caseira, fica a outra xa no esquecemento.

No noso frigorífico nunca faltan cogomelos e champiñóns xa que é un complemento ideal para carnes e pescados cunha chea de propiedades nutritivas. E agora, xa temos saída para esas ocasións en que sobran uns poucos e non sabemos onde encaixalos. Esta crema rouboounos o corazón. Ou máis ben, o bandullo.

Como o noso inverno se está a alongar en demasía, ollemos pola parte positiva: non hai fin para as cremas caseiras. Viva!

Crema de champiñóns

Ingredientes:

• 800 g de champiñóns
• 1 allo porro
• 1,5 l de caldo de verduras
• 200 ml de leite evaporado
• Aceite de oliva
• Pementa moída
• Sal

Para os crocantes de pan:

• 2 lascas de pan
• 2-3 culleradas de aceite de oliva
• 1/4 cullerada de romeu

Panquecas de avea

Con seguridade que xa almorzastes, mais nós traémosvos xa unha idea para estas próximas mañás nas que talvez teñades algo máis de tempo para fuxir da rutina matutina e sen caer no exceso calórico. Presentámosvos a nosa adaptación saudábel dun clásico estadounidense. A maioría de vós coñeceredes esta lambonada coa denominación castelá, tortita, ou inglesa, pancake. Porén, nós optamos por unha adaptación da segunda forma á nosa fonética, procedemento moi utilizado na lusofonía, onde fomos procurar.

Como adoitan ir acompañadas de chocolate, nata ou crema, nós non quixemos quedar atrás, aínda que, procurando non romper a liña de saudabilidade, optamos por un chocolate puro, que, como sabedes é bastante beneficioso para a nosa saúde. Con todo, é unha cuestión de gustos á hora de decorar este noso almorzo. Ou merenda ;-)

Panquecas de avea

Ingredientes:

• 250 ml de leite
• 200 g de avea (integral)
• 1 cullerada de vainilla
• Unhas gotas de aceite

Para decorar: 

• Plátano

Peras en salsa de cítricos

Bo día, bolboreteir@s! Como vai todo? Por aquí seguimos argallando receitas saudábeis aínda que é certo que esta fin de semana pecamos cos ansiados freixós (aí vos queda receita en vídeo, que xa vai tocando). Son a nosa perdición e talvez sexan a nosa lambetada preferida que tamén actúan como símbolo da repostaría galega.

Ben, deixando a xoia do Entroido a un lado, andabamos preocupados porque desde que comezamos con estes pratos sans non presentaramos ningunha sobremesa e non queremos que fiquen desconectados estes dous elementos. Así pois, démoslle unha volta a un dos nosos libros favoritos, "Cocina sana para disfrutar" de Isasaweis e chegamos a esta idea, que collemos prestada para vos presentar.

Gustounos pola asociación da pera cos cítricos xa que adoitan ir por separada. Chamounos a atención e efectivamente comprobamos que o resultado non deixa indiferente. Agora, é a vosa quenda.

Peras en salsa de cítricos

Ingredientes:

• 3 peras
• 2 laranxas 
• 1 limón
• 1 rama de canela
• 1 cullerada de vainilla

Pudin saudábel de plátano

Bo día, lambonciñ@s, como levades a última semana de novembro? Xa desexando a chegada do Nadal ou máis ben teméndoa? Nós agardámola con moita alegría entre outros motivos porque nos gusta o ambiente e tamén para ter uns días de descanso. Con todo, sabemos que veñen tempos de moito papar polo que convén ir compensar con anticipación polo que estamos a traballar en novas receitas saudábeis. Habitualmente adoitan ser estas das máis lidas, percíbese que hai un público lambón mais tamén moi amigo da healthy-food que lle chaman agora.

Desta volta, tiramos proveito dunha web interesante como é Postres saludables en que encontramos esta e outras mil ideas para preparar. Tiñamos claro o obxectivo, un biscoito para os almorzos da semana así que demos co perfecto. Velaquí fica:

Pudin saudábel de plátano

Ingredientes:

• 3 plátanos
• 3 ovos
• 3 culleradas de avea
• 1 culleriña de lévedo

Pisto

Como ides vendo, nesta tempada non paramos de lle tirar proveito a todo o que provén da horta, especialmente tomates e pementos, que están a vir en cantidades inxentes.

Nós somos moi daquelas receitas en que todo o protagonismo recae nas verduras e entre estas o pisto é unha das clásicas que aínda nunca probaramos. E como é que non o prepararamos até agora? Pois tampouco sabemos darlle resposta pois é un grande recurso de validez diaria. 

É moi común en todo o territorio peninsular aínda que parece que comezou a cociñarse na Mancha a partir dos produtos que ían recollendo da horta. 

Aínda que o fundamental no pisto son os pementos, tomates e cabaciñas a verdade é que hai moitísima variedade canto ás elaboracións aínda que en Bolboretas no bandullo optamos pola tradicional para comezar. Iso non quita que vaiamos ir probando novas combinación a partir da idea primixénea. De momento, imos desfrutar desta :-)

Pisto

Ingredientes:

• 250 g de salsa de tomate
• 1 cabaciña
• 1/2 pemento verde
• 1/2 pemento vermello
• 1 cebola
• 2-3 dentes de allo
• 1 chile (opcional)
• Aceite de oliva

Mixtión de quinoa con verduras e gambas

Bolboreteir@s, adiante con máis receitas!!! Falámosvos moitas veces da nosa predilección pola quinoa, que entrou na nosa alimentación xa hai máis dun ano e desde aquela converteuse nun recurso case cotián.

As propiedades son infinitas, as posibilidades de cociñado outro tanto e ademais fica saborosa de calquera forma. Aínda que talvez de ningún modo tan espectacular como na combinación que hoxe vos presentamos, en que absorve os diferentes sabores achegados principalmente a través das especias.

Talvez non sexa este un prato de diario porque leva moitos produtos e entre eles as gambas mais, sen dúbida, é un prato co que conquistar a tod@s @s comensais a que nos enfrontemos xa que sacia e namora.

Velaquí fican os pasos para o lograrmos :-)

Mixtión de quinoa con verduras e gambas

Ingredientes:

• 200 g de quinoa
• 600 ml de caldo de verduras
• 50 ml de viño branco
• 150 g de gambas
• 1 tomate
• 1 cebola pequena
• 3 dentes de allo
• 1 culleriña de alfábega
• 1 culleriña de curry
• 1 culleriña de pemento doce