Crema de champiñóns

Bo día, bolboreteir@s! Hoxe traemos unha receita que tiñamos ganas de preparar hai ben tempo. As cremas son garantía de éxito sempre e para nós que somos fans dos fungos esta é unha delicatessen. Ademais, é unha especie de Madalena de Proust para nós pois era un clásico da nosa infancia xunto coa de espárragos, aínda que ben é certo que esta era de supermercado e unha vez degustada a caseira, fica a outra xa no esquecemento.

No noso frigorífico nunca faltan cogomelos e champiñóns xa que é un complemento ideal para carnes e pescados cunha chea de propiedades nutritivas. E agora, xa temos saída para esas ocasións en que sobran uns poucos e non sabemos onde encaixalos. Esta crema rouboounos o corazón. Ou máis ben, o bandullo.

Como o noso inverno se está a alongar en demasía, ollemos pola parte positiva: non hai fin para as cremas caseiras. Viva!

Crema de champiñóns

Ingredientes:

• 800 g de champiñóns
• 1 allo porro
• 1,5 l de caldo de verduras
• 200 ml de leite evaporado
• Aceite de oliva
• Pementa moída
• Sal

Para os crocantes de pan:

• 2 lascas de pan
• 2-3 culleradas de aceite de oliva
• 1/4 cullerada de romeu
• 1/4 cullerada de coantro

Utensilios: unha pota, unha tixola, unha bandexa de forno e papel vexetal e un batedor eléctrico.

Elaboración:

Para comezarmos, temos de rustrir o allo porro en dúas culleradas de aceite e cun chisco de sal.

A parte, noutra tixola, rustrimos os champiñóns, ben lavados e cortados ao medio, até que estean ben dourados. Así mesmo, salpementámolos ao noso gusto.

Cando os champis estean listos, engadímolos á pota co allo porro (reservamos uns poucos para a decoración) e botamos tamén o caldo. 

 Cando ferva, deixámolo cociñando 20 minutos a lume medio e, de seguir, triturámolo.

Agregamos o leite evaporado e mesturamos moi ben. 

Para os crocantes de pan, temos de mesturar 2-3 culleradas de aceite, o romeu e o coantro.

Cortamos o pan en cadradiños e impregnámolo ben coa mestura anterior. 

Estendémolo sobre unha bandexa de forno cuberta con papel vexetal e enfornamos a 180º, calor arriba e abaixo, durante 5-6 minutos. 

 Servimos a crema de verduras con algún champiñón e os crocantes de pan.

 Agardamos que vos guste e que a poñades en práctica ;)

Resulta apetecíbel, non é? Nós puxeramos eses champis para decorar mais é certo que unha vez degustados na crema comprobamos que encaixan á perfección así que para a próxima será unha crema con tropezóns de picatostes e champiñóns. Dunha ou outra forma, conforman un recurso marabilloso. Forte aperta, amig@s!