Alcachofas con xamón

Boa noite, bolboreteir@s!! Xa vén o Nadal enriba e algún xa leva a pretempada moi adiantada coas enchentas e as lambetadas. Pois ben, como sabedes, este mes é complicado para comer e vai haber días que mesmo dubidemos se nos compensa preparar a comida e non subsistir coa enchenta da cea/xantar anterior. Pois ben, cremos que un prato como o que aquí hoxe presentamos, que cumpre con moitos requisitos, rápido-saudábel-sinxelo pode encaixar moi ben para as vosas ideas destas semanas. 

Estamos a falar dunha combinación bastante clásica e que en moitas casas xa coñecederedes, xa for así ou con outro tipo de verdura-legume tipo xudías, chícharos... Mais a verdade é que un pouquiño de xamonciño encaixa ben con case todo. Aquí unha proba ben satisfactoria. 

Alcachofas con xamón

Ingredientes:

• 1 bote de alcachofas
• Xamón ben picadiño
• 1 dente de allo
• Aceite

Utensilios: unha tixola, unha culler e un coitelo. 

Elaboración: 

Para comezarmos, temos de rustrir o dente de allo en dúas culleradas de aceite. 

Agregamos os taquiños de xamón. 

E o bote de alcachofas (líquido e verduras). 

E cociñamos 10-15 minutos, até que se evapore bastante o líquido. Servimos.

E xa estarían listas para comer! Unha receita fácil e rápida, como vedes! Xa nos contaredes o resultado ou a variante executada. Forte aperta, bolboreteir@s!!