Paté de olivas negras

Bo día, bolboreteir@s! Como vai a entrada deste outono con aspecto estival? Agardamos que esteades a desfrutar do sol e tamén das terrazas, que estes días aínda prestan moito. Ben, falando de terrazas, esta semana fomos xantar a unha cafetaría da Coruña que non coñeciamos, o Grand Cru Café La Cantera (na rúa Cidade de Lugo). Situada fronte ao Palacio da Ópera, collemos sitio nunha terraza do máis agradábel e na que nos sorprendeu moi agradabelmente a calidade dos produtos. Alén dos pratos principais (canelóns de filloas e hamburguesa de chocos na súa tinta), quedamos conquistados cun petisco que nunca antes probaramos, un paté de olivas que hoxe vos imos presentar aquí. O bo, haino que compartir!

Paté de olivas negras

Ingredientes:

• 100 g de olivas negras
• 1 cullerada de alcaparras
• 3 culleradas de zume de laranxa
• 2 culleradas de aceite de oliva
• 1 culleriña de tomiño
• 1/2 culleriña de ourego
• 1/2 culleriña de pementa moída

Para acompañar: unhas galletas salgadas, nós usamos Mariñeiras con chía. 

Utensilios: un batedor eléctrico e un vaso.

Elaboración:

Para comezarmos, botamos as olivas no vaso do batedor. 

Engadimos tamén as alcaparras. 

O tomiño,  o ourego, a pementa, o zume e o aceite. 

Trituramos moi ben. 

Servimos acompañándoo dunhas galleta e xa estaría listo para comer!

Agardamos que vos guste e que o poñades en práctica 😉

Ten boa pinta, non é? Pois puxemos o cronómetro e descubrimos que se completa o proceso en menos de cinco minutos. Probade vós e xa nos comentades tempo de elaboración e, sobre todo, resultado culinario. Havos de sorprender! Forte aperta, amig@s!!