Bo día, bolboreteir@s! Como vai a semana? Aquí andamos de adaptación á rutina, ben pracenteira, tanto co blogue como co regreso ás aulas. Pouquiño a pouco iremos collendo o ritmo con receitas de moi diverso estilo. A de hoxe pertence a esas das que tanto gustades por sinxelas, rápidas e con moi bo resultado tanto na apariencia como no gustoso, que é o que máis nos interesa.
O quiche é unha torta salgada de orixe francesa que nos conquistou xa hai tempo co ovo e as verduras como protagonistas.Aquí vos recordamos o Quiche de espinacas e xamón que tan bo sabor de boca deixou.
Pois desta volta optamos polo tamaño mini botando man dun molde de madalenas. O resultado foi... Ben, xa o ides. Gozádeo!
Mini quiches de pavo e verduras
Ingredientes:
- 12 lascas de pavo
- 1/4 de cabaciña
- 1/4 de pemento verde
- 1/4 de pemento vermello
- 2 queixiños frescos
- 2 ovos
- Aceite de oliva
- Pementa moída
- Sal
Utensilios: un molde para madalenas, un microndas, unha cunca, un coitelo, unha culler e un garfo.
Elaboración:
Para comezarmos, debemos picar as verduras moi finamente.
Engadímoslle unha cullerada de aceite e cociñámolas no microondas durante 5 minutos.
Mentres tanto, cubrimos os moldes para as madalenas co pavo, utilizaremos dúas lascas para cada oco. Reservamos.
Batemos dous ovos coa pementa moída e o sal.
Engadimos os queixiños ao ovo e mesturamos ben.
Agregamos os ovos e os queixiños ás verduras.
Botamos a mestura sobre os moldes forrados co pavo e cociñamos no microondas até que o ovo calle ben. Para iso, cocemos en intervalos de 2 minutos até que o ovo estea ao noso gusto, a nós levounos sobre 7 minutos.
Servimos e xa estarían listas para comer 😉
Agardamos que vos gusten e que desfrutedes destas marabillosas quiches xa for para vos dardes unha pequena homenaxe gastronómica ou para sorprenderdes aos vosos convidados e convidadas. O éxito está asegurado. Animádesvos? Adiante coa esta lambetada! Lémonos, amig@s!
Ningún comentario:
Publicar un comentario