Tiramisú de amorodos

Bo día, bolboreteir@s! Como vai todo? Por aquí andamos xa iniciándomos a tempada de festas. E claro, isto sempre dá para menús ben completos. Aínda que desta volta tocounos ir como convidados así que o menú non correu da nosa conta. Iso si, como celebrabamos tamén o aniversario dunha das nosas mellores amigas, decidimos levar unha sobremesa espectacularmente saborosa! Había ben tempo que non preparabamos unha torta coma esta así que gozamos a preparación e sobre todo a papatoria. Vaia festival.

Por aquí xa adoitamos degustar os tiramisú cando visitamos italianos porque representan moi ben a cociña identitaria desta terra aínda non sendo nós amantes do café. Pois desta volta decidimos preparar dita receita clásica renovada, dando o protagonismo a unha das nosas froitas favoritas, os amorodos. Velaquí esta xoia!

Tiramisú de amorodos

Ingredientes:

Para a crema:

• 600 g de amorodos
• 600 g de nata
• 500 g de queixo mascarpone
• 100 g de azucre moreno
• 2 culleradas de vainilla

Para a montaxe:

• 200 g de amorodos
• 200 g de biscoitos de soleta
• O zume de 2-3 laranxas
• Cacao en po

Utensilios: dúas cuncas grandes, dous moldes, un batedor eléctrico, unha espátula e un coitelo.

Elaboración:

Para comezarmos, temos de triturar os 600 g de amorodos, ben lavados, con 50 g de azucre. Reservamos. 

Mesturamos o queixo mascarpone xunto coa vainilla. 

E engadímoslle os amorodos triturados. Reservamos no frigorífico. 

Montamos a nata cos outros 50 g de azucre e cando a teñamos ben firme ímola agregando á crema de amorodos con mascarpone. Reservamos no frigorífico. 

Facemos o zume de laranxa e comezamos coa montaxe. Emborrachamos os biscoitos co zume e colocámolos no fondo dos moldes. 

Cubrimos cunha boa capa da crema anterior. 

Laminamos uns amorodos e colocámolos sobre a crema. 

Repetimos o proceso: biscoitos emborrachados co zume e outra capa de crema. Refrixeramos 1 hora. A continuación, decoramos a torta. Empoámola co cacao puro e colocamos uns amorodos laminados. 

Refrixeramos un pouco máis, mellor se é unha noite enteira e xa estaría listo para comer! 

Apetecíbel, verdade? É unha receita idónea para as persoas que non aproveitan moito o tiramisú por mor do café. Aquí non hai rastro, prometemos, haha. Toda para vós desde hoxe! Aperta lambona, amig@s!