Poke bowls

Bolboreteir@s!! Como estades? Nós de cine pois vimos dunha finde moi intensa polo noso amado Lugo, con voda o sábado en Sarria. Maneira de papar, amig@s! Aínda temos gravada na retina a cara dos convidad@s que viñan de fóra ante tal exhibición culinaria, haha.

Pero nós hoxe imos healthy, moi healthy. Como prometemos xa hai unhas semanas, traemos o que foi para nós a descuberta da tempada, os poke bowls. Xa hai uns poucos anos que abriron negocios de comida hawaiana na Coruña mais a verdade é que até este outono non nos dera por probar. E sorprendeunos moitísimo xa que percibimos certos toques da comida xaponesa como os propios arroces pero nun prato moi ambicioso no que se poden incorporar elementos moi diversos. 

A orixe está en Hawai e a palabra "poke" ou "pok-ei" viña a significar cortado en anacos pequenos, referíndose principalmente ao peixe capturado no día, de maneira crúa. A partir de aí sabemos que o paradisíaco destino ten recibido frecuentes chegadas de navegantes polinésicos, xaponeses, estadounidenses o que se mostra en influencias varias que tamén afectan a este prato. E sabe, vaia se sabe o poke bowl. 

Poke bowls

Ingredientes:

Para a base:

• Arroz para sushi
• Auga
• Maionesa
• Salsa sriracha       
• Limón
• Allo en po
• Sal

Para a opción 1:

• Seitán

Verduras gratinadas con patacas

Bo día, bolboreteir@s! Como imos? Hoxe traemos un prato moi moi sinxelo e ao tempo tamén moi eficaz para integrarmos verduras con sabor na nosa rutina. Interesante tamén se hai peques na casa para lles ofrecer unha variedade ampla de produtos ben beneficiosos e nutritivos.
Se algo non falta no noso frigorífico, a verdade, son verduras, xa que as aproveitamos para o que sexa. É certo que en moitas ocasións actúa de acompañantes mais en receitas coma estas ocupan o papel de protagonistas principais de luxo!
Ben, aquí vos vai. Parece obvio mais a clave deste prato non está na elaboración xa que non ten compelxidade ningunha e si en contar cuns bos produtos. E se os temos acabados de saír da nosa hortiña xa sería marabilloso. No noso caso non houbo esa sorte aínda que o saboreamos inmensamente de todas formas.

Verduras gratinadas con patacas

Ingredientes:

• 3-4 patacas
• 2-3 cenorias
• 1 cebola
• 1 pemento
• 1 tomate
• Queixo relado (opcional)
• Allo en po
• Ourego
• Pementa moída
• Sal

Samosas de verduras

Ola, bolboreteir@s!! Como vai todo? Agardamos que esteades moi felices e con apetito para creardes novas receitas porque hoxe vimos con ganas de vos conquistar.
O thai namorounos desde hai uns anos até un punto de se converter nunha auténtica perdición. Tentamos probar todos os restaurantes deste estilo cos que nos encontramos e imos gardando os pratos favoritos. E así chegamos a coñecer as samosas, que aínda que son orixe india, convertéronse nun referente da cociña tailandesa. Ou canto menos nos restaurantes europeos.
Ademais, este prato conta con puntos fortes como o a sinxeleza e o da facilidade para encontrar os produtos, algo que non sempre sucede con este tipo de receitas internacionais. Como vedes, verduras como protagonistas e unha vestimenta ben faciliña. Aquí vai!

Samosas de verduras

Ingredientes:

• Pasta filo/brick
• 1/2 berenxena
• 1/2 cabaciña
• 2 cenorias
• 1/2 cebola
• Sésamo

Fajitas de tofu e guacamole

Bo día, bolboreteir@s! Como vai o remate de xullo? Imaxinamos que moit@s estaredes contentísimos coa chegada de agosto. Nós nerviosos, pois vai ser un mes intenso, polo que parece.
E seguimos avanzando coas receitas. Hoxe preparamos unha variante para un dos clásicos das nosas ceas, as fajitas. Adoitamos preparar as tradicionais con bastante frecuencia así que pensamos noutra posibilidade de as crear para así non as aborrecer. E claro, como alternativa ao polo ou carne picada agora sempre nos vén o tofu. Que descuberta!! Velaquí a receita!

Fajitas de tofu e guacamole

Ingredientes:

• 4 tortillas de millo
• 400 g de tofu
• 2 cenorias
• 2-3 ravos
• Guacamole 
• 2 culleradas de salsa de soia
• Pementa moída
• Allo en po

Biscoito de cenoria saudábel

Bo día, bolboreteir@s! Non vos asustedes, a palabra saudábel está comezando a ganar moito espazo no noso blogue mais non por iso renunciamos ao doce eh! Co larpeir@s que nós somos...

Ben, pois hoxe erguímonos con ganas de argallar na cociña e, previo paso polo super, preparamos unha lambonada idónea para almorzo, sobremesa ou merenda.

Non sei se xa vos contamos algunha vez a paixón que sentimos polas carrot cake. Ben, isto non chega a esas cotas de dozura mais criamos que a cenoria tiña que ser a protagonista desta fin de semana... et voilà!

Se sodes dos que os biscoitos forman parte xa da vosa familia, ollade a idea para ampliar o rexistro. Aí vai.

Biscoito de cenoria saudábel

Ingredientes:

• 300 g de cenoria
• 150 g de fariña integral/avea
• 4 ovos
• 2 culleradas de aceite
• 1 sobre de lévedo en po
• 1 culleriña de canela

Noodles de arroz con gambas

Bo día, bolboreteir@s! Falabamos no último artigo de puntos recomendábeis da cidade da Coruña e claro, con tanto comentar, acabou por nos entrar a fame. Precisamente coa mención do Thai Market, veunos á mente a posibilidade de argallar cuns noodles, un dos produtos estrela da carta thai.

Estes fideos xaponeses andan a gañar visibilidade na nosa gastronomía, convivindo coa xa asentada pasta italiana. Aínda que as similitudes son evidentes, as texturas e sabor dos mesmos fican distantes.

Pensamos desta volta en lle darmos sabor con verduras e gambas mais recomendámosvos sobre todo que experimentedes con eles e procuredes cal pode ser a combinación axeitada para vós. Aquí fica esta idea.

Noodles de arroz con gambas

Ingredientes:

• Noodles de arroz
• 200 g de gambas
• 1/2 cabaciña
• 1 cenoria grande
• 2 dentes de allo
• 1 cullerada de curry

Fideos de arroz con pavo e verduras

Bo día, bolboreteir@s!! Como levades a fin de semana? De seguro que xenial, moit@s andaredes polo San Froilán (desfrutade!) e outr@s agardando a preparar os primeiros magostos da tempada, que xa van tardando.
Nós aproveitando para corrixir e preparar aulas e tamén para elaborar novas receitas entre as que se encontra a que hoxe vos presentamos.
Hai unhas semanas fomos cuns amigos ao restaurante asiático da rúa San Andres da Coruña, KohLanta o cal vos recomendamos moi encarecidamente. Ben, pois alén de gozar de moi diferentes pratos de fusión xaponesa-tailandesa, tamén poñén produtos ao dispor do comensal para mercar, difíciles de adquirir noutros lugares. Como os probaramos ese mesmo día, non puidemos evitar levar estes tallaríns de arroz.
Con eles configuramos un prato de pasta diferente pola textura do produto base e pola variedade de produtos que fomos achegando entre os que destacan, por exemplo, o xenxibre ou a soia. Vaia xoia!!!

Fideos de arroz con pavo e verduras

Ingredientes:

• 200 g de fideos de arroz/noodles
• 2 filetes de pavo
• 1 brócoli
• 2 cenorias 
• 1 cebola
• 1/2 pemento 
• 2 dentes de allo
• 5-6 culleradas de soia
• 1/2 vaso de auga
• 2 culleradas de aceite
• 1 culleriña de xenxibre

Paté de cenoria

Boas, bolboreteir@s! Como levades esta última semana de xuño. Como pasa o tempo, verdade! Xa nos imos meter de cheo no verán aínda que por aquí aínda non tocan vacacións. Para iso faltan un par de semanas.

E facemos máis saborosa a espera con receitas como a de hoxe, un PATÉ DE CENORIA! Porque adoramos o veganismo e as súas múltiplas posibilidades creativas. Quedámonos con esta porque supón unha alternativa ao paté clásico que, se somos sinceros, sempre nos deu un pouco de mal rollo desde que escoitaramos a mítica historia do fígado inflamado, grrrrrr...

Mais con patés vexetais coma este, só hai que pensar en desfrutar porque o que é a elaboración... tampouco ten moita ciencia como veredes. Aí vai:

Paté de cenoria

Ingredientes:

• 4-5 cenorias
• 1 cullerada de curry
• 1 culleriña de coantro
• 1 culleriña de ourego
• 1 culleriña de sésamo
• 1 cullerada de aceite
• 1 cullerada de limón
• 1 culleriña de auga
  

Bocadillo vegano de salchichas

Bo día, bolboreteir@s! Quen dixo que coa dieta vegana non se podían desfrutar tamén da comida rápida? De feito é moito máis recomendábel no tocante á saúde pois afastámonos de certas graxas e está igualmente bo, cun sabor diferente pois non se trata de imitar a carne, mais tremendamente bo.

Así pensando... non coñecemos ningún restaurante vegano de comida rápida mais... ollo, sería un lugar de manxares e ingredientes do máis variados. No día a día percibimos como cada vez existen máis persoas que optan por esta alimentación e de feito percibimos que cada vez que penduramos unha receita deste estilo ten moi boa acollida como o polbo vegano ou os petiscos crocantes de pataca doce.

Con todo, parece difícil imaxinarmos certos pratos que tradicionalmente xiran arredor da carne desde unha perspectiva completamente diferente, mais é posíbel reparándomos nas posibilidades das nosas verduras.

Aínda non sendo veganos, adoramos a proba de receitas coma esta que permiten unha alimentación variada e completa e que ademais nos parece do máis divertida, imaxinando e creando para tecer novas posibilidades alimenticias. Aí vai, pois, este cachorro quente vegano.

Bocadillo vegano de salchichas

Ingredientes:

• Boliños para as salchichas
• 1 cunca de garavanzos cocidos
• 1 cenoria
• 1/2 cebola
• 1/4 de cunca de pan relado
• 4 culleradas de remolachas relada
• Pirixel
• Aceite de oliva

Smoothie de sandía e cenoria

Bo día, aínda que chuvioso polo norte. Que raro... Con todo, o verán está aquí e por iso procuramos prepararmos receitas frescas. Para nós xa é ritual subir, canto menos unha vez ao ano, receita de smoothie, e por iso non podía faltar unha nova versión en que mesturamos froita e verdura nunha combinación de cores e sabores ben interesante.

Ademais, que estes batidos que están tan á moda teñen unha grandísima vantaxe, a de se realizaren en apenas uns minutos. Isto ofrécenos facilidade para argallar cos ingredientes e probar diferentes experimentos en función do que teñamos pola cociña.

Ademais de polo clima, que aquí non tanto, cómpre aproveitar esta época posto que podemos desfrutar de numerosas froitas e verduras de tempadas logrando os mellores resultados. 

Aí vai!

Smoothie de sandía e cenoria

Ingredientes (para 1 bebida):

• 200 g de sandía
• 1 cenoria
• 1/4 de cogombro
• 1 cullerada de iogur natural
• 1 culleriña de xenxibre

Albóndegas recheas de queixo con salsa de verduras

Aquí estamos!! Xa tardaba, non? Pois vimos, como cada sábado, cunha nova receita. E hoxe partimos do clásico, dun prato familiar que se adoita elaborar en moitas casas para lle dar o noso toque, en que o queixo, como non, terá un grande protagonismo.

@s que recordades algo das clases de lingua, podedes intuír cal será a orixe deste alimento con ese 'al' ao comezo da palabra. Pois si, foron os árabes os que crearon este monumento gastronómico, aínda que tampouco se esmeraron moito no nome, "al-bunduga" (a bóla). Deron a coñecer este produto a Europa a través dos seus contactos coa Península Ibérica, pasando tamén a América nas ocupacións alí realizadas. Xa vedes que son moitos os anos que se leva degustando polo mundo adiante deste alimento.

Aí vai. 

Albóndegas recheas de queixo con salsa de verduras

Ingredientes:

Para as albóndegas:

• 500 gr de carne picada
• 50 gr de queixo
• 1 ovo
• 4-5 culleradas de pan relado
• 1 culleriña de curry
• 1/2 culleriña de ourego

Bolo de cenoria e kiwi sen glute

E como por sorte seguimos desfrutando dunhas xornadas de moito sol, continuamos a tirar de froitas e verduras para as nosas receitas. E como xa había tempo que non traiamos nada para @s celíac@s, hoxe vai por eles e elas tamén.

Tiñamos cruzada desde hai tempo unha torta/biscoito de cenoria posto que nos encantan, alén de estar moi na moda ultimamente (as sonadas carrot cake). Mais claro, de vez en cando procuramos innovarmos un pouco para ver que sae... e atrevímonos co kiwi e unhas pébedas de cabaza. Se vos asusta a mestura, teredes que probala e comprobardes que é do máis acertada. 

Ademais, este biscoito non se fai nada aborrecido e resulta ideal para a primeira comida do día polas súas múltiplas vitaminas. Velaquí o tedes:

Bolo de cenoria e kiwi sen glute

Ingredientes:

• 100 gr de fariña de millo
• 75 gr de azucre
• 50 gr de manteiga
• 3 ovos
• 3 cenorias
• 2 kiwis 

Biscoitiños de cenoria e mazá

Como vai lectores/as? Xa recuperastes do Entroido e das súas larpeiradas?? Por aquí aínda andamos hoxe despedíndonos dos freixós :'( Aínda que vexo difícil agardarmos até o ano que vén por eles, algún día teremos que facer unha homenaxe ao Entroido aínda en datas distantes :-) Por certo, podedes botarlle un ollo ao artigo que escribimos para o xornal Sermos Galiza sobre esta larpeirada entroideira e o seu peso na gastronomía e cultura galega (Artigo Sermos) .

Con todo, as larpeiradas nós nunca as deixamos de lado. Esta semana queriamos facer un doce máis suaviño despois de todo o manducado estes días. Pensamos así nun biscoitiño fresco e lixeiro e no que integrarmos dous produtos que lle dan un sabor... impresionante!

Iso si, a modo de estratexia fixémolos cuns moldes de madalenas porque así talvez é máis sinxelo controlarse á hora de comer as porcións. Porque se o facemos o tamaño tradicional do biscoito arriscámonos a cortar cachos enormes deixándonos levar polo apetito dos ollos. E agora toca controlar un pouco e non exceder, haha. Aí vos vai: 

Biscoitiños de cenoria e mazá

Ingredientes:

• 150 gr de fariña
• 50 gr de manteiga
• 30 gr de azucre
• 4 cenorias
• 2 ovos
• 1 mazá
• 1/2 vaso de leite descremado
• 1/2 sobre de lévedo en po

Peitugas en salsa de verduras

Unha outra nova receita en Bolboretas no bandullo!!! A última antes de coller unhas pequeniñas vacacións polo Naseiro, a Romaría do Bo Xantar, á que non podiamos faltar, como sempre :-) Se botades un ollo ao cartaz das festas xa vedes, o venres día do polbo, o sábado da paella, domingo dos callos, luns do caldo, e martes da sardiñada. Unha verdadeira tentación a, para nós, mellor festa do mundo!

E como van ser días de excesos, deixámosvos cunha receita lixeira, nutritiva e moi saudábel pola combinación entre unha carne de pouco graxa coma o polo e as necesarias verduras. Un prato destes, que xorden nun momento vendo que non hai outra cousa pola cociña. E a verdade, esta combinación é garantía de éxito. Ideal!

Peitugas en salsa de verduras

Ingredientes:

• 2 filetes de peituga
• 1 cebola
• 1 cenoria
• 1/2 berenxena
• 1 vaso de mollo de tomate
• 1/2 vaso de viño branco
• Pan relado
• Aceite de oliva
• Sal, pementa moída, ourego e estragón
• Pementos de padrón (opcional)
  

Albóndegas con salsa de verduras

Hoxe traémosvos un clásico da cociña que a todas e todos vos gustará! Unhas saudábeis e saborosas albóndegas acompañadas dunha salsa de verduras. As albóndegas levámolas comendo toda a vida e ben boas que están polo que decidimos presentarvos a nosa receita que, seguramente, sexa moi similar á que vós facedes na casa. Unha boa maneira de aproveitar a carne picada que teñades na casa para desfrutrardes deste prato tan gustoso.

Albóndegas con salsa de verduras

Ingredientes:

Para as albóndegas:

• 500 gr de carne picada (mestura de porco e tenreira)
• 1 ovo
• Queixo relado, ao gusto
• Pan relado, aproximadamente 100 gr
• Fariña, aproximadamente 50 gr
• 1 dente de allo
• Pementa negra
• Ourego
• Sal

Para a salsa: