Albóndegas con salsa de verduras

Hoxe traémosvos un clásico da cociña que a todas e todos vos gustará! Unhas saudábeis e saborosas albóndegas acompañadas dunha salsa de verduras. As albóndegas levámolas comendo toda a vida e ben boas que están polo que decidimos presentarvos a nosa receita que, seguramente, sexa moi similar á que vós facedes na casa. Unha boa maneira de aproveitar a carne picada que teñades na casa para desfrutrardes deste prato tan gustoso.

Albóndegas con salsa de verduras

Ingredientes:

Para as albóndegas:

• 500 gr de carne picada (mestura de porco e tenreira)
• 1 ovo
• Queixo relado, ao gusto
• Pan relado, aproximadamente 100 gr
• Fariña, aproximadamente 50 gr
• 1 dente de allo
• Pementa negra
• Ourego
• Sal

Para a salsa:

• 1 cebola grande
• 2 cenorias
• Salsa de tomate

Elaboración:

Para comezar, temos de triturar a cebola e as cenorias coa picadora e colocalas nunha pota sobre a salsa de tomate. 

De seguir, facemos as albóndegas. Para iso, mesturamos a carne picada -adobada coa pementa, un chisto de sal e o allo picado finamente- co queixo relado e o ovo. Pouco a pouco, engadimos o pan relado até conseguir unha masa compacta.

O seguinte paso é facer as boliñas, coa axuda das mans, e pasalas pola fariña para que non se deformen durante a cocción, a continuación colocámolas na pota sobre a salsa. 

Cociñámolas, a lume medio, durante 30-40 minutos, aproximadamente, e listas para comer!

Aí o tedes, non é un prato espectacular, mais si un básico do máis efectivo xa que gusta a practicamente toda a xente. Desfrutade destas albóndegas!!