Samosas de verduras

Ola, bolboreteir@s!! Como vai todo? Agardamos que esteades moi felices e con apetito para creardes novas receitas porque hoxe vimos con ganas de vos conquistar.
O thai namorounos desde hai uns anos até un punto de se converter nunha auténtica perdición. Tentamos probar todos os restaurantes deste estilo cos que nos encontramos e imos gardando os pratos favoritos. E así chegamos a coñecer as samosas, que aínda que son orixe india, convertéronse nun referente da cociña tailandesa. Ou canto menos nos restaurantes europeos.
Ademais, este prato conta con puntos fortes como o a sinxeleza e o da facilidade para encontrar os produtos, algo que non sempre sucede con este tipo de receitas internacionais. Como vedes, verduras como protagonistas e unha vestimenta ben faciliña. Aquí vai!

Samosas de verduras

Ingredientes:

• Pasta filo/brick
• 1/2 berenxena
• 1/2 cabaciña
• 2 cenorias
• 1/2 cebola
• Sésamo
• 1 cullerada de curry
• Allo en po
• Pementa moída
• Sal
• Aceite de oliva
• Para acompañar: salsa teriyaki. 

Utensilios: unha tixola, unha táboa e un coitelo, unha bandexa de forno cuberta con papel vexetal.

Elaboración:

Para comezarmos, temos de rustrir en dúas culleradas de aceite a cebola e a cenoria, ben picadiñas. Cociñamos 6-7 minutos. 

Pasado ese tempo, engadimos a berenxena e a cabaciña, cortadas en cadrados ben pequenos. Tamén, sazonamos co curry, o allo en po, a pementa moída e o sal, ao noso gusto. Cociñamos 7 minutos máis. 

Facemos tiras duns 10 cm coa pasta filo (ou coa brick) e, nun lado, poñemos unha cullerada das verduras. 

Pechamos dándolle forma de triángulo (tal e como vedes na foto) e seguimos até acabar coa tira de masa. Na última parte, botamos un chisco de aceite (ou manteiga) para que peche ben. 

E repetimos a operación até acabar co recheo. Pintamos cun chisco máis de aceite (ou manteiga) e empoamos co sésamo. 

Enfornamos a 200º, calor arriba e abaixo, durante 10-12 minutos, ou até que vexamos que están douradas.

Servimos acompañándoas de salsa teriyaki (ou outro mollo que vos guste) e xa estarían listas para comer! Que pouco vos han de durar, veredes. Son un vicio! Oxalá as gocedes, bolboreteir@s!!