Verduras gratinadas con patacas

Bo día, bolboreteir@s! Como imos? Hoxe traemos un prato moi moi sinxelo e ao tempo tamén moi eficaz para integrarmos verduras con sabor na nosa rutina. Interesante tamén se hai peques na casa para lles ofrecer unha variedade ampla de produtos ben beneficiosos e nutritivos.
Se algo non falta no noso frigorífico, a verdade, son verduras, xa que as aproveitamos para o que sexa. É certo que en moitas ocasións actúa de acompañantes mais en receitas coma estas ocupan o papel de protagonistas principais de luxo!
Ben, aquí vos vai. Parece obvio mais a clave deste prato non está na elaboración xa que non ten compelxidade ningunha e si en contar cuns bos produtos. E se os temos acabados de saír da nosa hortiña xa sería marabilloso. No noso caso non houbo esa sorte aínda que o saboreamos inmensamente de todas formas.

Verduras gratinadas con patacas

Ingredientes:

• 3-4 patacas
• 2-3 cenorias
• 1 cebola
• 1 pemento
• 1 tomate
• Queixo relado (opcional)
• Allo en po
• Ourego
• Pementa moída
• Sal
• 1 vaso de leite
• Aceite de oliva

Utensilios: unha táboa e un coitelo e unha cunca apta para o forno.

Elaboración: 

Para comezarmos, temos de cortar as patacas en lascas e poñémolas como base da cunca. Salpementamos ao noso gusto.

Cortamos a cebola e o pemento en xuliana e colocámolos sobre a pataca. Agregamos allo e ourego ao gusto. A cenoria en lascas. Por último, o tomate e engadimos allo, pementa, sal e ourego ao noso gusto.

Agregamos o vaso de leite e dúas ou tres culleradas de aceite.

Enfornamos a 200º, calor arriba e abaixo, durante, aproximadamente, 1 hora. Pasado ese tempo,  podemos engadir un chisco de queixo!

 E xa estarían listas para comer!

É un prato único lixeiro mais tamén o podemos aproveitar para acompañar un peixe ou carne. Dun modo ou outro, que vivan as verduras! Agardamos que lle estades tirando proveito ao blogue e á cociña nestes días. Moita forza e ánimo, que xa queda menos. Aperta forte, bolboreteir@s!