Torta natalicia de chocolate con ganache de chocolate branco

Bo día, bolboreteirxs! Que tal estades? Chegou decembro o mes do Nadal, e con el unhas receitas deliciosas cun toque natalicio. Ao final conseguimos aguantar até o día 1, eu creo que nin nós mesmos tiñamos confianza niso!

Comezamos cun doce exquisito, moi vistoso que se alonxa un pouco das lambonadas típicas desta época mais sería unha opción xenial para unha comida/cea con amigos ou para sorprender na mesa de Nadal ou fin de ano. Iso si, é unha torta para adictxs ao chocolate, biscoito de chocolate e ganache de chocolate branco! Aínda que a torta sexa un pouco laboriosa, é moi sinxela de facer, ao igual que a decoración. 

Torta natalicia de chocolate con ganache de chocolate branco

Ingredientes (para un biscoito alto de 22 cm): 

Para o biscoito: 

• 800 g de fariña 
• 520 g de azucre 
• 500 ml de leite        
• 500 ml de auga 
• 360 ml de aceite de oliva suave 

Biscoito saudábel de chocolate e plátano

Bo día, bolboreitxs! Que tal? Empezamos mes, empezamos febreiro, un dos mellores meses, o mes do Entroido!! E para comezar ben traémosvos un biscoito chocolateado absolutamente delicioso e saúdabel.  No instituto celebramos a semana pasada, a semana saudábel e pedíronnos un biscoito de acordo á ocasión e cando vimos esta receita non tardamos nin 24h en facernos cos ingredientes e probar este doce. Foi un éxito e, na casa, encantounos polo que seguro ha estar presente todas, ou case todas, as semanas. Ademais, é un recurso xenial para mandarlle ao peque ao cole como petisco de media mañá 😉😋. 

Biscoito saudábel de chocolate e plátano

Ingredientes: 

• 500 g de plátano 
• 200 g de fariña de améndoa 
• 150 g de fariña de avea 
• 60 g de chocolate negro chocolate 

Bo día, bolboreteir@s! Como vai a fin de semana? Aquí chegamos en hora de sobremesa traéndovos xa a merenda. Así dá tempo de preparala e que estea lista para papar nun par de horiñas.

Como vos diciamos nunha das últimas receitas, a espelta ten moito éxito nesta casa e sempre hai un par de paquetes desta fariña na alacena. Desta volta pensamos exclusivamente nun almorzo que levase un pouco menos de azucre do habitual polo que aproveitamos os froitos vermellos do frigo (aquí adoita haber arandos porque o peque tolea por eles) e botamos man da panela, en pequena cantidade. 

O resultado, como ides ver, un biscoito substancioso, nada seco e que logra dozura nas froita froita cocida. Xa temos acompañante do café para esta semana! 

Biscoito de espelta con froitos vermellos

Ingredientes:

• 240 g de fariña de espelta integral
• 140 ml de aceite de oliva 
• 180 g de panela         
• 1 sobre de lévedo en po
• 4 ovos

Torta Arco da Vella (1º aniversario do Xiao)

Boa noite, bolboreteir@s! Hoxe imos traervos unha das receitas máis especiais que aquí presentamos pois é a elaborada para o primeiro aniversario do peque da casa, do Xiao. 

Para non xuntarnos moitos tivemos celebracións en varios días e a verdade é que levamos unha boa tempada de doces. Algúns mercados e outros como o que aquí presentamos hoxe, feitos na casa con toda a ilusión e agarimo posíbeis. 

Tiñamos moitas ganas desde hai tempo de elaborar unha torta deste estilo e este era o momento ideal. Cun pouco de paciencia e tempo, logramos unha larpeirada apetitosa desde a primeira ollada até o último bocado. Que gozada! Imos por ela.

Torta Arco da Vella

Ingredientes:

Para o biscoito:

• 400 g de fariña  
• 400 ml de aceite de xirasol
• 400 g de azucre
• 20 g de lévedo en po
• 3 culleradas de vainilla
• 8 ovos
• Colorantes

Para o recheo e decoración:

• 525 g de manteiga
• 330 g de azucre
• 6 claras de ovos

Biscoito de manga

Boa tarde, bolboreteir@s! Como vai esta última semana deste maio tan estraño? Aquí, como andamos de estrea de vivenda andamos a probar os novos trebellos de cociña para elaboración de novos pratos e estamos a gozar como ananos, claro. 

Para probar os fornos, sempre se lle preparou un biscoito así que o obxectivo estaba claro. Ora ben, tamén é habitual mentres se lle colle o truco aos electrodomésticos, que haxa algunha desfeita, así que fomos con moito coidadiño para que non se nos queimase a nosa larpeirada.

E facémolo de manga porque é unha froita que estamos a redescubrir tempo despois. Había tempo que non se facía moito oco na nosa cociña e nestas últimas semanas volvémolo mercar e vaia gozada. Os que collemos están que se desfán na boca. Así que tiñamos claro que lle darían todo o sabor que precisabamos a esta receita.

Biscoito de manga

Ingredientes:

• 
• 250 g de fariña
• 200 g de manga
• 180 g de azucre
• 100 g de aceite de oliva

Torta de chocolate e crema de framboesas

Bo día, bolboreteir@s! Nótase que estamos de festa e de paparota que ollade tremenda lambetada vos presentamos hoxe. Nada máis e nada menos que unha torta de chocolate con crema e framboesas. Haivos poucas maneiras mellores de adozar o voso menú.

Andamos matinando estes días en que preparar para o noso xantar de San Xoán e acabamos por chegar a esta idea que conquistou os nosos bandullos chocolateiros pola dozura e os contrastes achegados polas froitas.

Agora que veñen festas unha detrás de outra cremos que é ben ter á man ideas coma estas para así non andar toleando coa maneira de como sorprender as vosas convidadas e convidados. E ben, con isto ides gozar moito vós tamén, que a fin de conta quen cociña é quen máis merece papar, haha.

Aquí está!

Torta de chocolate e crema de framboesas

Ingredientes:

Para o biscoito:

• 270 g de fariña
• 225 g de azucre
• 225 g de manteiga
• 200 g de chocolate
• 5 ovos
• 1 iogur e medio natural
• 1 culllerada de vainilla
• 1 sobre de lévedo en po

Bica de Laza

Xa andan chegando os mecos, o Entroido e todas as lambetadas de identidade coas que deixamos as preocupacións calóricas a un lado para desfrutar de cada bocado de festa e país.

Ben, pois tiñamos prometido ampliar o corpus de receitas entroideiras polo que tocou matinar na nova posibilidade e estamos moi contentos pois demos cunha que aínda que non era a primeira vez que probabamos si que superou totalmente as expectativas. Falamos da bica de Laza.

Cremos recordar que nola tiñan dado de petisco nalgún momento nunha cafetaría pero non nos era a chave das noces para nós. Con todo, esta preparación caseira demostrounos que a fama non é casual xa que estamos ante toda unha delicia. 

Tiñamos algunha indicación para a preparación aínda que nos foi de moitísima axuda o portal de receitas, Recetas de rechupete.

Aínda que nós asociámolo máis a esta época do ano pois é un dos símbolos culinarios dunha das localidades do triángulo máxico do Entroido. Iso si, para os ourensáns, existen moi diversas variantes desta larpeirada, con matices entre diferentes localidades, aínda que nós quedámonos coa versión que talvez sexa a máis sonada e que se leva degustando desde o XIX. Imos alá!

Bica de Laza

Ingredientes:

• 4 claras de ovo
• 200 g de azucre
• 180 g de nata 

Torta multicolor

Larpeiros, larpeiras, estades preparad@s? Hoxe traemos unha receita espectacular que fica xa na historia das dozuras desta casa e que agardamos pase tamén á historia de Bolboretas no bandullo pois cremos que vos vai namorar.
Ben, antes de nada cómpre recoñecer que o principal aspecto co que nos cautiva esta torta é o estético pois o brillo e degradación de cores vivos dan ganas de ficar ollando horas para a torta. Mais claro, unha sobremesa así non pode fallar no fundamental polo que dedicamos empeño para que fose unha delicia inigualábel. E si, podemos ficar satisfeit@s xa que se logrou o obxectivo con creces. Entre oito papamos a torta dunha vez. E porque disimulamos senón cremos que a poderiamos degustar nós nos, hahahaha.
Na realidade era unha torta especial ao ser para o 28 aniversario de quen a preparou e non se podía escatimar na autohomenaxe.
Deixámosvos que comprobedes o proceso para lograr esta marabilla.  

Torta multicolor

Ingredientes:

Para o biscoito:

• 300 g de manteiga
• 300 g de azucre
• 270 g de fariña
• 60 g de cacao
• 1 sobre de lévedo en po
• 6 ovos

Para o almibar:

• 150 ml de auga
• 150 g de azucre
• 1 cullerada de aroma/pasta de framboesa

Biscoito de plátano e coco

Agora si, aquí ficamos xa definitivamente de vacacións e ademais con moita alegría xa que tivemos moi moi boas novas esta semana. Toca desfrutar do verán e das festas así que hoxe xa vos presentamos unha das sobremesas preparadas para unha destas festas, neste caso nas Pontes, onde fomos como convidad@s esta pasada semana.
Como aínda non tiñamos todo o tempo dispoñíbel para elaborarmos unha torta máis complexa optamos por un biscoito, mais un biscoito diferente, especial en que sobresaen certos sabores como o do coco, esa froita amada por tant@s e dehostada por outr@s moit@s.
Talvez os biscoitos sexan a larpeirada máis feita en Galiza e parte do estranxeiro pois é algo que se fai relativamente rápida, sen complicación e que ademais dá para todas as comidas do día, desde o almorzo até a sobremesa. Así pois, deixamos unha nova opcións á hora de nos enfrontar a esta elaboración. 

Biscoito de plátano e coco

Ingredientes:

• 6 plátanos
• 300 g de azucre
• 250 g de fariña
• 225 g de manteiga
• 140 ml de leite
• 125 g de chocolate con avelás
• 30 g de coco
• 16 g de lévedo en po
• 4 g de bicarbonato
• 4 ovos

Biscoito multifroitas

Adiante coas lambetadas saudábeis, bolboreteir@s! Había tempo que non preparabamos un biscoito e esta semana entrounos ansia dun que cumprise os requisitos destas semanas sen excesos de doce nin graxas e despois de lle darmos un par de voltas pensamos que a froita tiña que ser entón a protagonista. Poderiamos concretar nunha froita aínda que iso xa o fixeramos máis veces. Desta volta queriamos facer un festival froiteiro xuntando varias desas que tanto gustamos: amorodos, plátano, pera, mazá ou mandarina. Si, imaxinade o saborosa que pode estar unha combinanción como esta. Ademais, engadimos un froito seco para lle achegar algo de crocante. Xa imaxinades, éxito seguro, e así foi. Estaba pensado para aproveitar como almorzo desta semana mais ao final non nos resistimos tampouco nalgunha merenda e nalgunha sobremesa.

Este biscoito caracterízase polo esponxoso, substancioso e lixeiro que nos ofrece. Porén, o máis sorprendente para nós está na súa mellora co paso dos días. En lugar de resecarse como sucede con algún outro doce, este vai adquirindo máis sabor, probabelmente polo rastro que van deixando no seu interior as froitas. Fixémolo o martes, o venres comimos os últimos anacos e estaban irresistíbeis. Así que... xa sabedes, se procurades un biscoito non demasiado calórico, saboroso e que resista uns cantos días, tedes que gardar esta opción si ou si.

Biscoito multifroitas

Ingredientes:

• 300 g de fariña integral
• 100 g de panela (ou azucre moreno)
• 100 ml de aceite de oliva virxe
• 1/2 vaso de leite (opcional)
• 2 ovos
• 1 plátano
• 1 mandarina
• 3-4 amorodos

Bananenschnitte

Como xa van centos de receitas as que aquí trouxemos nestes dous anos e media, pois ás veces quédanos esquecida temporalmente algunha sección. Mais só temporalmente. Porque esta semana pasada, acordámonos das "receitas internacionais" e decidimos que era hora de a recuperar cun novo prato. Cunha larpeirada alemá que coñecín grazas a unha alumna nacida no país xermánico. Unha vez nola presentou, non o dubidamos, aínda que para comprendermos o nome... xa nos levou un pouco máis de tempo, haha.

Sexa como for, parte dunha combinación clásica e eternamente efectiva como a do plátano e o chocolate polo que o risco era mínimo. O que si nos sorprendeu foi a presentación e tamén o xogo que dá ese húmido biscoito de soporte.

Finalmente, quedamos contentísimos. E non quedou nadiña. Tamén eramos catro a comer, e parece que a todos encantou. Aí vai!

Bananenschnitte

Ingredientes:

• 1 biscoito (receita aquí)
• 250 gr de nata montada
• 5-6 bananas
• 100 gr de chocolate con leite
• 100 gr de chocolate branco
• 1/2 vaso de zume de laranxa

Tronco de Nadal

Se non o estaba aínda, damos xa por comezada a etapa de receitas natalicias. Iremos recuperando nas redes sociais as dos anos anteriores e iremos presentando tamén novos pratos da época. Porque xa sabedes o que desfrutamos das larpeiradas de época, e nesta hai moitísimas a elaborar, sen termos porque depender tanto dos supermercados. Xa sabedes, na casa podemos conseguir turróns, polvoróns, mazapáns e demais moito máis saborosos.

E por iso hoxe dámosvos unha idea máis para a sobremesa de Nadal, que vén tendo moito éxito en Reino Unido, Francia e no norte de Europa desde hai ben anos. Con todo, este tronco non sempre foi comestíbel xa que na orixe consistía unicamente nun tronco de madeira decorado que se deixaba arder durante toda a xornada do 25 de decembro. Mais xa vedes que acabou por procurárselle unha solución máis larpeira tentando manter eses trazos tan característicos da árbore. Hai moi diversas formas de elaborar o tronco, principalmente referidas ao recheo, mais nós optamos por unha versión bastante tradicional e que garante éxito. 

"La Buche de Nöel" constitúe un peche final para a cea de Noiteboa ou ben para o xantar do 25. Será imposíbel quedar cun mellor sabor de boca.

Tronco de Nadal

Ingredientes:

Para o biscoito:

• 80 gr de fariña
• 80 gr de azucre
• 4 claras de ovo
• 2 xemas de ovo
• Reladura de limón

Para o recheo e a cobertura:

• 400 gr de chocolate de cobertura

Doce terrorífico para Samaín

3,2,1... que chega o Samaín... uhhhhhhhhhhhhhh. E canto desfrutamos nós destas festas, que ademais vemos que, por sorte, nos últimos anos se están fortalecendo ao tempo que se recupera a esencia tradicional en detrimento do alleo Halloween.

Sexa como for, gustamos inmensamente do ambiente terrorífico e da decoración destes días, coas tradicionais cabazas, teas de araña, tortas sanguentas... haha! E xa vos adiantamos que alén da sobremesa de hoxe, estamos preparando algo máis para os vindeiros día. 

E xa vedes que este ano a etimoloxía resulta acertada xa que Samaín significaba "fin de verán" e parece que esta semana están a baixar as temperaturas... Será sinal de que algo aterrador se aveciña?? Si, de que vén o inverno, haha. Ou estaranse a abrir as portas entre este e outro mundo para que regresen os defuntos?? Ups...

Por se acaso, recomendámosvos ir comendo todo o que podades, cantas máis larpeiradas mellor, non vaia ser o demo... Se vemos que sobrevivimos á noite do 31, pois xa recuperaremos a dieta máis saudábel, haha. E aquí unha boa opción para nos adozar estes últimos días... Veredes que ten ingrediente sorpresa!

Doce terrorífico para Samaín

Ingredientes:

• 300 gr de crema Kinder/crema de cacao e avelás
• 100 gr de fariña
• 50 gr de chocolate con bolas de cores

Torta de cereixas

Xa por aquí de novo. Xa nos coñecedes así que non creo que vos estrañedes de ver unha nova torta en Bolboretas no bandullo xa que, a fin de contas, é o produto co que máis desfrutamos na cociña. Mais o feito de as presentar seguidas vén determinada polas datas en que nos encontramos. Sabemos que en grande parte da Galiza se celebra o San Xoán así que queremos darvos o maior número de ideas posíbeis para as sobremesas destas celebracións. Despois dun clásico como a Torta San Marcos, hoxe presentamos unha creación propia. Tiñamos un aniversario moi especial para o que nos encargaron unha torta que non levase chocolate. Ademais, a decoración tiña que ter algo de blaugrana pola paixón futboleira do homenaxeado. 

Despois de dubidar entre algunha que outra froita de tempada, acabamos por nos decidir pola cereixa, tanto polo sabor como pola cor vermella que harmonizaría esteticamente a torta. E realmente quedou moi ben integrada coa nata, logrando unha torta doce e para nada seca.

Iso si, quedaba a parte máis complexa, a da decoración. E aí, despois de pensarmos en utilizarmos unha oblea, acabamos por arriscar e probar sorte co fondant, a pesar de até agora non ter traballado en moitas ocasións con el. Foi un traballo complexo, sobre todo porque o fixemos con colorantes ao non termos fondant de tantas cores na casa. O resultado aínda que non perfecto si nos parece tan bo como para nos sentir orgullosos del. Iso si, desta volta tivemos a axuda dunha moi boa amiga na decoración sen a que sería posíbel tan bo resultado.

Torta de cereixas

Ingredientes:

• 1 biscoito xenovés (receita aquí)
• 800 gr de cereixas
• 600 ml de nata 35%
• 60 gr de azucre

Para a decoración:

• Fondant de cores
• 100 gr de améndoas

Rocambole de amorodos e nata (brazo de xitano)

Hoxe toca sobremesa tradicional, daquelas que nunca nunca fallan e que se converten en éxito seguro en calquera celebración. A quen non lle gusta un doce coma este? Uns/unhas preferirano de chocolate e outros de amorodos, como o de hoxe, mais adoita cumprir coas expectativas. Nós facémolo con relativa frecuencia xa que na casa encanta. De feito, xa vos presentáramos outra receita, máis orientada aos chocolateiros e chocolateiras: Brazo de xitano de chocolate e nata con améndoas

Nestoutra receita tiñades explicado a teoría da curiosa orixe do nome "brazo de xitano", segundo a que foi un monxe berciano quen trouxo de Exipto este doce, denominándoo brazo "egipciano"  e acabando por evoluír popularmente na forma "xitano" que dá lugar a teorías do máis estrañas...

Na Galiza adoptamos esta forma, aínda que nós desta volta optamos pola denominación "rocambole", procedente do Brasil e que ademais nos parece do máis divertida. Igualmente o podemos chamar "bolo de rolo", tamén como en Brasil, xa que a fin de contas, estamos perante un biscoito enrolado.

Sexa a denominación que for, está boísimo e resulta do máis personalizábel. Nós desta volta preparámolo por un encargo, e claro, xa nos entraron ganas de facer un outro para nós. Xa vos contaremos de que o facemos. Mentres tanto, aquí vos queda este clásico.

Rocambole de amorodos e nata (brazo de xitano)

Ingredientes:

Para o biscoito:

• 375 gr de azucre moreno
• 300 gr de fariña
• 300 gr de manteiga
• 6 ovos
• Unha culleriña de lévedo en po
• Unha culleriña de vainilla
• Un chisco de sal

Biscoitiños de cenoria e mazá

Como vai lectores/as? Xa recuperastes do Entroido e das súas larpeiradas?? Por aquí aínda andamos hoxe despedíndonos dos freixós :'( Aínda que vexo difícil agardarmos até o ano que vén por eles, algún día teremos que facer unha homenaxe ao Entroido aínda en datas distantes :-) Por certo, podedes botarlle un ollo ao artigo que escribimos para o xornal Sermos Galiza sobre esta larpeirada entroideira e o seu peso na gastronomía e cultura galega (Artigo Sermos) .

Con todo, as larpeiradas nós nunca as deixamos de lado. Esta semana queriamos facer un doce máis suaviño despois de todo o manducado estes días. Pensamos así nun biscoitiño fresco e lixeiro e no que integrarmos dous produtos que lle dan un sabor... impresionante!

Iso si, a modo de estratexia fixémolos cuns moldes de madalenas porque así talvez é máis sinxelo controlarse á hora de comer as porcións. Porque se o facemos o tamaño tradicional do biscoito arriscámonos a cortar cachos enormes deixándonos levar polo apetito dos ollos. E agora toca controlar un pouco e non exceder, haha. Aí vos vai: 

Biscoitiños de cenoria e mazá

Ingredientes:

• 150 gr de fariña
• 50 gr de manteiga
• 30 gr de azucre
• 4 cenorias
• 2 ovos
• 1 mazá
• 1/2 vaso de leite descremado
• 1/2 sobre de lévedo en po

Torta sanguenta "Red velvet"

Ai, o que nos pasou, iamos facer unha torta para un outro aniversario, neste caso de miña nai, e resulta que lle metimos unha tallada á man sen querer, co conseguinte rego de sangue por toda a torta. Evidentemente non a iamos tirar, así que deixámola así, que máis dá. Non se comen tamén as filloas de sangue?

Bon, por sorte, o vermello que encontraredes dentro da torta non procede das nosas veas, senón que é un simple colorante con efecto sanguento para celebrarmos o Samaín ou tamén o que no estranxeiro se coñece como Halloween, aínda que non son exactamente o mesmo. 

A etimoloxía do Samaín, este ano parece estar máis acertada que nunca, xa que significaba "fin de verán" Como algúns/has sabedes, esta celebración tivo un gran peso histórico na Galiza até hai trinta anos, cando foi desaparecendo en favor da celebración do Halloween que tanto se coñece en todo o mundo.

Nós que nos apuntamos a todas estas festas pois xa andamos argallando coa decoración das cabazas e na elaboración de tartas arrepiantes como a que hoxe vos traemos que espero que vos guste e que vos atrevades a facer. E se é nestes días mellor que mellor :-)

Torta sanguenta "Red velvet"

Ingredientes:

Para o biscoito

• 250 gr de fariña
• 250 gr de azucre
• 200 ml de aceite
• 1 iogur de amorodos
• 2 ovos
• 1 sobre de lévedo en po
• 3 culleradas de leite
• 1 cullerada de cacao 
• cullerada de vinagre
• 1 culleriña de vainilla

Torta caveira para Samaín

Despois dunha ensalada tan lixeira e saudábel como o TREMPÓ que trouxemos o xoves, pois tiñamos que volver cunha desas tortas que tanto nos gusta, aínda que a de hoxe é ben especial tanto porque tentamos darlle un lixeiro aspecto tenebroso polo Samaín que se nos achega e sobre todo por ser ideada para o aniversario dunha amiga moi especial que celebraba nada máis e nada menos que a pasaxe á maioría de idade. Parabéns unha vez máis Tamara!! ;-) E como sabiamos que as caveiras lle encantan, pois a conxunción para o Samaín era perfecta. Así mesmo, co recheo, debía de ser crema de Kinder para asegurarnos o triunfo! Unha torta moi persoal mais que seguro que a tod@s vos gustará. 

Torta caaveira para Samaín

Ingredientes:

Para o biscoito:

• 400 ml de nata (35% materia graxa)
• 300 gr de azucre
• 300 gr de fariña de forza
• 50 gr de fariña de trigo
• 6 ovos
• 1 cullerada de esencia de vainilla

Para o recheo: crema de Kinder, crema de chocolate, crema pasteleira, nata etc.

Torta mousse de amorodos

Onte estivemos de celebración xa que era o aniversario de David, o meu mozo, e por tanto tocou preparar unha nova torta, e tal e como o coñezo, sabía que tiña que ser de amorodos. E a que se me veu á cabeza desta volta era unha mousse, que xa probara a facer tempo atrás e quedara realmente boa.

Como ben sabedes, a principal característica da mousse é a súa textura, esponxosa, de feito o vocablo francés mousse significa esponxa. Esta torta, que se consagrou no sabor a chocolate, é de orixe francesa e parece que do século XIX, aínda que hai certa controversia sobre en que etapa foi e en que lugar concreto da Francia. Sexa como for, é unha torta recoñecida por ser ben diferente a outras certamente tradicionais por esa textura, e tamén por ser lixeira e fresca.

Torta mousse de amorodos

Ingredientes:

Para a base:

• 125 gr de azucre moreno
• 100 gr de fariña
• 100 gr de manteiga
• 2 ovos
• Unha culleriña de lévedo en pó
• Unha culleriña de vainilla
• Un chisco de sal

Para a mousse:

• 600 ml de nata
• 500 gr de amorodos

Biscoito de plátano

Nesta mañá de domingo aproveitamos para elaborar un delicioso biscoito que vos imos presentar. Xa sabedes, unha das múltiplas vantaxes dos biscoitos é que serven para calquera momento do día: de almorzo, de sobremesa, merenda... E cando se elaboran cunha das froitas máis doces como é o plátano, aínda entra mellor. Ben é certo, que o podedes elaborar coa vosa froita preferida: amorodos, laranxas, melón...

Ademais podemos aproveitar este biscoito como base para unha torta, que vos traeremos moi proximamente.

Biscoito de plátano

Ingredientes:

• 3 ovos
• 1 plátano
• 1 iogur de plátano
• 3 iogures de fariña
• 2 iogures de azucre
• 1 iogur de aceite de oliva
• 1 sobre de fermento