Torta Arco da Vella (1º aniversario do Xiao)

Boa noite, bolboreteir@s! Hoxe imos traervos unha das receitas máis especiais que aquí presentamos pois é a elaborada para o primeiro aniversario do peque da casa, do Xiao. 

Para non xuntarnos moitos tivemos celebracións en varios días e a verdade é que levamos unha boa tempada de doces. Algúns mercados e outros como o que aquí presentamos hoxe, feitos na casa con toda a ilusión e agarimo posíbeis. 

Tiñamos moitas ganas desde hai tempo de elaborar unha torta deste estilo e este era o momento ideal. Cun pouco de paciencia e tempo, logramos unha larpeirada apetitosa desde a primeira ollada até o último bocado. Que gozada! Imos por ela.

Torta Arco da Vella

Ingredientes:

Para o biscoito:

• 400 g de fariña  
• 400 ml de aceite de xirasol
• 400 g de azucre
• 20 g de lévedo en po
• 3 culleradas de vainilla
• 8 ovos
• Colorantes

Para o recheo e decoración:

• 525 g de manteiga
• 330 g de azucre
• 6 claras de ovos

Galletas americanas

Ola, bolboreteir@s!! Esta semana tivemos algo desatendido isto pois andamos metidos en plena mudanza e iso si que xa non é tan compatíbel coa creatividade gastronómica. Con comer si, aínda que esta semana vímonos comendo uns bocadillos no chan a horas un tanto descadradas. Mais iso tamén está simpático unha vez de vez en cando, haha.

De todas formas, traémosvos a última creación, feita o pasado luns, con motivo da visita a algúns amig@s e familia que faciamos meses que non viamos con esta situación que estamos a vivir. Xa sabedes, para celebrar, a gastronomía e a dozura sempre da man. E esta receita que collemos prestada de Alma Obregón é top!

Ollade unha nova idea para facer galletas e galletas sen parar. A babexar un pouco!

Galletas americanas 

Ingredientes:

Para as galletas de vainilla:

• 300 g de fariña
• 150 g de manteiga
• 100 g de azucre moreno
• 100 g de azucre branco
• 1 ovo
• 1 cullerada de vainilla

Flan de vainilla

Bo día, bolboreteir@s!!! Como vai todo? Supoñemos que agora xa algo mellor posto que xa podemos pór o pé na rúa con máis frecuencia e iso axuda a levalo mellor aínda que non alcancemos de momento a ansiada normalidade.

Nós damos por rematada a fase -1 que podemos denominar case que a de engorde, haha, posto que foron moitas lambetadas papadas e pouco exercicio. Agora xa podemos saír correr un pouquiño pero ollo, que as lambetadas non paran. Mentres haxa saúde, seguirán a ser un luxo para darnos de vez en cando. 

Ben, pois hoxe presentamos unha receita clásica onde as haxa, o flan de vainilla. Cando compramos o do super sempre optamos por esta versión así que tiñamos claro que o caseiro sería tamén coa vainilla como protagonista. Imos por el!

Flan de vainilla

Ingredientes:

Para o caramelo:

• 100 g de  azucre
• 3 culleradas de auga

Para o flan:

• 500 ml de leite
• 100 g de azucre

Madalenas de vainilla

Bo día, bolboreteir@s! Imos pór algo de doce nesta fin de semana chuviosa. Que por certo, xa tocaba!! Éravos moito sol para o que levamos de ano. Ben, imos entón por un clásico da repostaría, as madalenas. Un clásico que nunca pasa de moda por moito que exista a sombra dos cupcakes e dos muffins. 

Ademais, as madalenas sempre se prestan moito para cociñar con peques na casa por ese proceso de construción fugaz vivido desde o forno. Ides ver hoxe aquí a versión máis tradicional, sen máis recursos que o do propio sabor achegado pola madalena. 

Hai certa escuridade arredor da orixe. Sempre veu triunfando máis a da orixe francesa, cunha campesiña que logrou que rapidamente conquistara a súa creación o Palacio de Versalles. A outra teoría ten Galiza no punto de mira xa que se di que unha rapaza de nome Madalena as vendía no camiño de Santiago tendo a concha da vieira como referente (de aí os moldes e o recheo). Sexa como for, hoxe triunfan en todo o mundo. Ollade que apetecíbel!

Madalenas de vainilla

Ingredientes:

• 240 g de fariña
• 125 g de azucre
• 60 g de aceite
• 3 ovos
• 1 iogur natural
• 1 cullerada de vainilla

Roliños de canela

Boa cicloxénese, digo, boa fin de semana, amig@s! Aquí seguimos, gardadiños do frío e da auga e comezando oficialmente a tempada de cocido e freixós. Vaia finde nos imos pegar!

Mais esta semana estivemos preparando outras larpeiradas, onde a canela foi a protagonista.

Esta especia traénos moi bos recordos e transpórtanos inmediatamente cal madalena de Proust á infancia e ao arroz con leite, co que a coñecemos tanto tempo atrás. 

Puxémonos cunha especie de "cinamon rolls" dos que quedamos prendados nas rúas de New York, onde despredían un cheiro que adozaba o outono. Ollade:

Roliños de canela

Ingredientes:

Para a masa:

• 440g de fariña, máis extra
• 240 ml de leite morno
• 56g de manteiga
• 35g de azucre 
• 25g de lévedo de panadaría
• 2 ovos
• Un chisco de sal

Galletas de vainilla e framboesa

Boa tarde, bolboreteir@s! Andamos a tope estes días e temos o blogue un chisco marxinado mais nunca esquecido. De feito, andamos creando a receita case ao tempo que a publicamos. De feito, aínda podedes percibir que estas galletas están quentiñas, non?
Pois fixámonos que había tempo que non publicabamos nada de repostaría en Bolboretas no bandullo e optamos por algo rápido, sinxelo e efectivo.
Ultimamente estamos a ter moitas visitas na casa e non sempre convén tirar dos bombóns Lindt ou Nestlé. Senón vaia blogueiros, haha. Así pois, con creacións coma estas, gardamos un recurso para as merendas mais tamén para sobremesas ben saborosas.
Ides ver que optamos por sabores tradicionais, vainilla e framboesa mais xa sabedes. Isto vai no gusto de cada quen. A idea deixámosvola aquí!

Galletas de vainilla e framboesa

Ingredientes (para unhas 12-14 galletas):

• 280 g de fariña
• 125 g de manteiga
• 100 g de azucre
• 1 ovo
• 1 cullerada de vainilla

Brownie con doce de leite

Poucas veces o título dunha receita soou tan lambón, verdade? Pois non pensedes que leva ao equívoco. Nin moito menos. Encontrámonos perante unha das lambetadas máis doces da traxectoria de Bolboretas no bandullo. Tan tan doce, que si, resulta difícil repetir pois cada porción é unha bomba que nos deixa tremendamente satisfeitos. 

E como xa tiñamos elaborado varios brownie con total éxito, aventurámonos a probar unha nova versión coa seguridade do resultado final pois chocolate e doce de leite deben estar no top 5 de lambetadas. Ademais, como estas últimas semanas están a ser moi estadounidenses por cuestións mediáticas, tiramos do caixón unha das últimas receitas, preparada para un aniversario hai un par de semanas e que versiona a receita orixinal creada por un pasteleiro dos EUA cando esqueceu botar o lévedo a un pastel de chocolate, quedando este biscoito non demasiado elevado e sendo máis ben un bloque substancioso cargadísimo de sabor. Aí vos vai!

Brownie con doce de leite

Ingredientes:

• 350 g con chocolate con leite
• 300 g de doce de leite
• 400 g de azucre moreno
• 250 g de fariña
• 230 g de manteiga
• 60 g de cacao puro
• 1 cullerada de vainilla

Pastéis de Belém

Fin de semana e chega con el a receita dunha das grandes marabillas gastronómicas que probamos no último ano. Estamos a falar dos famosos Pastéis de Belém, un símbolo da repostaría lusa e especialmente de Lisboa. Neste verán, após visitar o Algarve, paramos em Lisboa, cidade marabillosa na que nunca estiveramos até o momento. E como non, achegámonos até o bairro de Belém para, principalmente, probar os sonados pasteis. Ollade como foi a experiencia na famosa fábrica a carón do Mosteiro dos Jerónimos que entramos para comprar media ducia deles para probar e, cando saímos, metímoslle o dente a un deles e tivemos que volver á tenda para coller outros tantos. E iso que había cola e cola para entrar. Mais merecía a pena.

Xa teñen un longo percorrido, desde 1837 cando se comezou a preparar nos anexos do dito mosteiro uns pasteis que rapidamente colleron sona, sobre todo entre a xente que chegaba en barco, xa que no momento a distancia até Lisboa era máis notábel. De todas formas, se quixerdes saber máis da historia destes doces que xurdiron como resistencia dos traballadores expulsados do mosteiro, podedes consultala aquí.

Ollade pois, unha receita histórica!

Pastéis de Belém

Ingredientes (para 12 unidades):

• 1 lámina de follado
• 500 ml de leite
• 250g de azucre
• 1 ovo
• 5 xemas
• 50g de fariña

Galletas de vainilla e améndoa

O regreso das vacacións adoita non gustar, excepto cando é para voltar a Bolboretas no bandullo con novas publicacións. Nese caso, o retorno é do máis feliz, canto menos para nós. Agardamos que xa esteades desexos@s de novas lecturas gastronómicas e que estas vos animen tamén o voso regreso á realidade.
E con que novidades chegamos? Pois con galletas, sempre efectivas e recorrentes para calquera detalliño. Neste caso estas viñeron por unha encarga para o Naseiro. E claro, para rematar rápido e lograr algo efectivo, as galletas sempre cumpren. Aínda que certo é que hai galletas e... galletas. E esta é das que deixan moi bo recordo.
Con eses ingredientes xa se intúe un óptimo resultado e só queda amasar co agarimo común d@ reposteir@ e agardar a que chegue o momento de degustar! Preparad@s? A facer galletas! 

Galletas de vainilla e améndoa

Ingredientes (para 15 unidades):

• 200g de fariña
• 100g de azucre
• 100g de manteiga
• 30g de améndoas
• 1 ovo
• 2 culleradas de vainilla
• 1 culleriña de bicarbonato
• Un chisco de sal

Tortaleta de chocolate branco e amorodos

Dixémosvos que vos traeríamos a continuación da base que presentamos o martes, e xa vedes o pouco que tardamos. Mais é que nos levaba a vida mostrarvos unha larpeirada coma esta en que se mesturan dous elementos que combinan á perfección, chocolate branco e amorodos. Ademais, para aqueles/as que non gusten moito do chocolate porque se lles fai demasiado doce ou aborrecido, hai que lles dicir que se animen con esta receita xa que logramos darlle un sabor suavísimo grazas á vainilla e aos propios amorodos.
Ademais esta torta é moito máis lixeira e suave ca outras, perfecta para xantares en que non sodes moitas persoas xa que veredes que se come con moita facilidade e se acabará rapidamente. Ollade que dozura!

Tortaleta de chocolate branco e amorodos

Ingredientes:

• 1 masa crebada (receita aquí) 
• 300 ml de nata
• 180 gr de chocolate branco
• 150 gr de amorodos
• 3 follas de xelatina

Whoopie pies

Hai días nos que te levantas e tes ganas de cociñar mais non sabes moi ben o que, entón poste a mirar nos libros de receitas e encontras algunha que chama a túa atención e xa comezas a pensar nas súas posíbeis variábeis, se tes os ingredientes na casa... E así xurdiron estes pasteis, os whoopie pies.  Resulta bastante curiosa a súa orixe xa que se pensa que foi un doce creado polas mulleres Amish de Pensilvania. Canto ao nome, "pies" xa sabemos que significa tarta ou doce, mais parece ser que "whoppie" era o que berraban contentos os fillos e maridos das cociñeiras cando vían isto para almorzar. Comezaron a pórse de moda en Nova Inglaterra a partir de 1930 e a partir de entón foron cada vez máis vendidos nos EUA. Aquí vos vai a nosa versión destas Woopie pies!

Whoopie pies

Ingredientes:

Para os pasteis:

• 175 gr de manteiga en pomada
• 150 gr de azucre moreno
• 1 ovo grande
• 1 culleriña de esencia de vainilla
• 225 gr de fariña
• 75 gr de cacao en pó
• 1 cullerada de lévedo
• 150 ml de leite
• 2 culleradas de iogurt de froitas do bosque

Cupcakes de vainilla con chocolate e banana

Esta fin de semana prevese moi mal tempo (choiva, vento e frío), polo que, que mellor plan que meterse na cociña e facer estes riquísimos cupcakes en familia? É, sen dúbida, un dos pasteis máis de moda ultimamente, un clásico desde hai anos nos EUA que pouco a pouco se foi estendendo a outros países. Converteuse nun auténtico "boom" nestes últimos anos e non é estraño ver na Galiza estabelecementos dedicados exclusivamente á súa venda. Dun produto básico como a madalena podemos chegar a facer un verdadeiro manxar totalmente personalizado, ao noso gusto, xa que admite milleiros de variábeis como veredes na seguinte receita.

Cupcakes de vainilla con chocolate e banana 

Ingredientes:

Para as madalenas:

• 130 gr de manteiga
• 140 gr de azucre
• 150 gr de fariña
• 2 ovos
• 1 culleriña de fermento
• 1 culleriña de vainilla
• A raiadura dun limón

Para o recheo:

• 187 gr de manteiga
• 187 gr de azucre
• 1 banana
• 75 gr de chocolate negro