Torta Arco da Vella (1º aniversario do Xiao)

Boa noite, bolboreteir@s! Hoxe imos traervos unha das receitas máis especiais que aquí presentamos pois é a elaborada para o primeiro aniversario do peque da casa, do Xiao. 

Para non xuntarnos moitos tivemos celebracións en varios días e a verdade é que levamos unha boa tempada de doces. Algúns mercados e outros como o que aquí presentamos hoxe, feitos na casa con toda a ilusión e agarimo posíbeis. 

Tiñamos moitas ganas desde hai tempo de elaborar unha torta deste estilo e este era o momento ideal. Cun pouco de paciencia e tempo, logramos unha larpeirada apetitosa desde a primeira ollada até o último bocado. Que gozada! Imos por ela.

Torta Arco da Vella

Ingredientes:

Para o biscoito:

• 400 g de fariña  
• 400 ml de aceite de xirasol
• 400 g de azucre
• 20 g de lévedo en po
• 3 culleradas de vainilla
• 8 ovos
• Colorantes

Para o recheo e decoración:

• 525 g de manteiga
• 330 g de azucre
• 6 claras de ovos
• Aroma de framboesa (ou vainilla, limón...)
• Galletas oreo
• Labras de azucre

Utensilios: 5 moldes baixos (ou un alto), varias cuncas, un batedor eléctrico, unha espátula metálica e unha manga pasteleira cun bico.

Elaboración:

Para comezarmos, temos de facer os biscoitos. Para iso, mesturamos o aceite co azucre. 

De seguir, engadimos os ovos, un a un. 

Tamén a vainilla.

E a fariña, pouco a pouco.

 

Se imos usar varios moldes, temos de pesar a masa e dividila entre o número de moldes. No noso caso, 5. En cada un, usamos un colorante (fucsia, azul, amarelo, verde e lila).

 

Enfornamos a 180°, calor arriba e abaixo, durante 25-30 minutos. Reservamos. Nós envolvémolos en papel transparente e reservámolos no frigorífico até o día seguinte.

A continuación, toca facer o recheo e a cobertura. Para iso, mesturamos o azucre coas claras e quentámolas ao baño maría até que se desfaga o azucre.

                                 

De seguir, montámolas a punto de neve e agregamos a manteiga, en pomada. Importante que sexa manteiga para que a crema teña máis consistencia.

                                                

Despois, botamos o aroma escollido e o colorante, se decidides usalo. Temos que mesturar moi ben para que nos quede unha crema homoxénea e consistente.

Cortamos a parte superior dos biscoitos para igualalos e botamos unha capa da crema.

Engadimso unhas galletas picadas e repetimos coas outras capas do biscoito.

A última capa de biscoito poñémola ao revés para que a superficie sexa máis lisa. Estendemos unha fina capa de crema cubrindo toda o torta (capa recollemigas) e refrixeramos até que endureza. Pasado un tempo, cubrimos con outra capa e decoramos ao noso gusto. 

Refrixeramos, de novo, un par de horas, como mínimo, e xa estaría lista para comer e mirar un bo cacho para ela xa que dá gusto vela, sobre todo no primeiro corte, onde sorprende con esa combinación cromática. Iso si, ollo, non é só apariencia. Estaba... mmmmmmmmm! Recomendabilísima!