Cupcakes de vainilla con chocolate e banana

Esta fin de semana prevese moi mal tempo (choiva, vento e frío), polo que, que mellor plan que meterse na cociña e facer estes riquísimos cupcakes en familia? É, sen dúbida, un dos pasteis máis de moda ultimamente, un clásico desde hai anos nos EUA que pouco a pouco se foi estendendo a outros países. Converteuse nun auténtico "boom" nestes últimos anos e non é estraño ver na Galiza estabelecementos dedicados exclusivamente á súa venda. Dun produto básico como a madalena podemos chegar a facer un verdadeiro manxar totalmente personalizado, ao noso gusto, xa que admite milleiros de variábeis como veredes na seguinte receita.

Cupcakes de vainilla con chocolate e banana 

Ingredientes:

Para as madalenas:

• 130 gr de manteiga
• 140 gr de azucre
• 150 gr de fariña
• 2 ovos
• 1 culleriña de fermento
• 1 culleriña de vainilla
• A raiadura dun limón

Para o recheo:

• 187 gr de manteiga
• 187 gr de azucre
• 1 banana
• 75 gr de chocolate negro
• 1 cullerada e media de leite
• 1 cullerada e media de vainilla 

Para a decoración:

• Fideos de chocolate
• Nubes de gominola
• Lacasitos
• Etc. 

Elaboración:

Madalenas:

Temos de mesturar a manteiga en pomada, co azucre, os ovos, a vainilla e a raiadura do limón. Batemos durante 3-5 minutos. A continuación, engadimos pouco a pouco a fariña e o fermento até conseguir unha mestura homoxénea. Reenchemos as cápsulas, previamente colocadas no molde, sen sobrepasar as 3/4 partes do molde. E enfornamos a 170º (calor abaixo e ventilador) durante 20 min. Deixamos que arrefríen. 

Recheo:

Derretemos o chocolate ao microondas e deixamos que arrefríe, mais sen que chegue a endurecer. Mentres, batemos a manteiga co azucre, o leite e a vainilla até que branquee; pouco a pouco imos engadindo o chocolate sen deixar de bater até que notemos que a masa sexa consistente. Relamos a banana na mestura anterior e remexemos de novo. 

Agora chegou o paso máis divertido que é montar os nosos cupcakes. Coa axuda dun descarozador facemos un oco nas madalenas (mais non tiredes o anaco que sacaredes xa que nos servirá para as tapar de novo).  Cunha culleriña pequena ou unha xiringa (nova) recheamos coa mestura de chocolate e banana e tapamos co anaco de biscoito que quitaramos anteriormente.

A continuación, estendemos unha fina capa da crema por riba das madalenas e coa axuda dunha manga decorámolas. A continuación, podemos engalanar os nosos cupcakes cos fideos de chocolate, as nubes ou co que máis vos apeteza.  Metémolos no refrixerador durante unha hora, aproximadamente, para que a crema endureza. 

Agora xa os podedes comer, no almorzo, sobremesa ou merenda!! Que aproveite lambereteir@s!!

Por certo, se os facedes non esquezades enviarnos a vosa foto a bolboretasnobandullo@gmail.com