mércores, 1 de febreiro de 2023

Biscoito saudábel de chocolate e plátano

Bo día, bolboreitxs! Que tal? Empezamos mes, empezamos febreiro, un dos mellores meses, o mes do Entroido!! E para comezar ben traémosvos un biscoito chocolateado absolutamente delicioso e saúdabel.  No instituto celebramos a semana pasada, a semana saudábel e pedíronnos un biscoito de acordo á ocasión e cando vimos esta receita non tardamos nin 24h en facernos cos ingredientes e probar este doce. Foi un éxito e, na casa, encantounos polo que seguro ha estar presente todas, ou case todas, as semanas. Ademais, é un recurso xenial para mandarlle ao peque ao cole como petisco de media mañá 😉😋. 



Biscoito saudábel de chocolate e plátano



Ingredientes: 

  • 500 g de plátano 
  • 200 g de fariña de améndoa 
  • 150 g de fariña de avea 
  • 60 g de chocolate negro chocolate 
  • 50 g de cacao puro en po 
  • 13 g de lévedo 
  • 13 g de bicarbonato 
  • 7 ovos 
  • 2 culleradas de vainilla 
  • O zume de 1/2 limón 

Utensilios: un batedor eléctrico, dúas cuncas, dúas espátulas (ou culleres) e un molde apto para o forno.


Elaboración:


Para comezarmos, temos de mesturar todos os ingrendientes, menos os chocolates, e trituralos até obtermos unha masa homoxénea.


De seguir, repartimos a masa en dúas cuncas. Nunha delas botamos o cacao puro e mesturamos moi ben. 
E, na outra, agregamos o chocolate negro, cortado en anacos. Mesturamos moi ben.


No molde escollido, botamos a metade da masa á que lle botamos o cacao puro. Nós puxemos papel vexetal e engrasamos para que desmoldar fora máis sinxelo.


E, sobre esta capa, agregamos a outra. Coa axuda dunha espátula, mesturámos un pouco para darlle ese efecto marmolado.


A continuación, cortamos dous plátanos e colocámolos por encima da masa. Enfornamos a 180°, calor arriba e abaixo, durante 45-50 min.


Deixamos que repouse uns minutos e xa estaría listo para comer!


Que aproveite! Agardamos que vos guste e que poñades este receitón en práctica.

Como vedes, é unha receita moi sinxela e vistosa. Un biscoito ideal para cumprir eses caprichos doces mais sendo saudábel e con ingredientes sinxelos 🍰🍫🍌. Antollóusevos? 🤤🤩❣️Lémonos! Aperta forte, bolboreteirxs 🥰❤️!

Ningún comentario:

Publicar un comentario