Aperitivo de queixo e cebola

 Bo día, bolboreteirxs! Como vai a semana? Nós xa desexando que sexa mañá para descansar uns días e cargar as pilas para a recta final do curso. 

Hoxe traémosvos unha receita que se fixo viral nas RRSS, concretamente en TiKToK hai unhas semanas e como bos amantes do queixo e da cebola non podiamos pasar sen facela. Son só dous ingredientes máis as especias coas que queirades sazonalos para darlle un toque extra de sabor. Como ides ver, faise nun momento e pódenos servir para pór de aperitivo, para tapear ou incluso para acompañar outro prato.

Aquí vos deixamos coa receita: 

Aperitivo de queixo e cebola

Ingredientes:

• 1 cebola
• Queixo relado ao gusto  
• Ourego
• Pementa moída

Solombo en salsa de mel e mostaza

Bo día, bolboreteirxs! Feliz ano 🥂! Como se presenta este 2025? Para nós, cheos de ilusión e preparándomos o primeiro aniversario da peque e o máxico día de Reis! 

E, ademais, hoxe traémosvos a primeira receita do ano 🤩 e, neste caso, facemos unha carne cun sabor espectacular, e adictivo 🤤! É ideal para facérmola un día de celebración ou simplemente para alegrármosnos cunha comida deliciosa 😋! 

Solombo en salsa de mel e mostaza

Ingredientes: 

Para o mariñado: 

• 1,5 kg de solombo 
• 1 cullerada de allo en po 
• 1 cullerada de cebola en po     
• 1 cullerada de pemento doce      
• 1 cullerada de pemento picante 
• 1 cullerada de ourego 

Pasta con gambas ao curry

Bo día, bolboreteir@s! Rematadas as vacacións, toca volver á rutina, non? Ha! Hai que o tomar con humor porque senón faise isto longo. Mais que queda menos!
Hoxe imos cunha das milleiras de posibilidades que nos dá a pasta. Non arriscamos e fomos sobre seguro nesta preparación, botando man de dous produtos principais que casan moi ben e dos que gustamos inmensamente: gambas e curry.
Con esta intensidade, lógrase o obxectivo, que a pasta non fique sen sabor, recibindo moi ben todo o achegado por estes ingredientes aquí incorporados.
Aquí vai a última:

Pasta con gambas ao curry

Ingredientes:

• Pasta
• 300 g de gambas
• 2-3 cenorias
• 1 tomate
• 1 cabaciña
• 1 cebola

Albóndegas de cabaciña

Bo día, bolboreteir@s! Pasado xa o Día Nacional da Galiza e aproveitando que polo norte non temos unhas xornadas moi apatecíbeis para pasear puxémonos a argallar na cociña, botando man dunha das nosas verduras favoritas, a cabaciña. Desta volta non houbo que imaxinar. Pensamos nun dos produtos por excelencia de inmensas culturas gastronómicas, como son as albóndegas, e démoslle o protagonismo ao verde.
Tiñamos ademais unha salsa marinara no blogue esperando por un bo produto e vaia, este cumpriu ao grande!

Prácennos moito este tipo de receitas agora que se achega o peque porque cumpren co obxectivo de achegar unha alimentación equilibrada dando entrada a moi diferentes verduras. Pensemos que aquí optamos por cabaciña mais podiamos botar man practicamente de calquera. Velaquí está:

Albóndegas de cabaciña

Ingredientes:

• 2 cabaciñas grandes
• 300 g de espinacas
• 1/2 taza de queixo ricotta
• 6-7 noces
• 2 cullerada de allo en po
• 1 cullerada de cebola en po
• 1 cullerada de ourego 

Arroz con especias e gambas

Boas noites, queridos lectores e lectoras! Vimos dar algo de sabor á noite cun prato exquisito. Desta volta collemos inspiración dunha das nosas blogueiras favoritas, Isasaweis. Concretamente do seu último libro, "Las 100 mejores recetas de Isasaweis".
Pois ben, aínda que iamos sobre seguro porque adoramos este tipo de arroces salteados, estilo asiático, acabou por sorprendernos. E non digamos das que mostraban máis desconfianza na casa. Case relamben o prato!
Dunha forma ou doutra, adoramos arroces tradicionais, arroces modernos e arroces de todo tipo. A papalo!

Arroz con especias e gambas

Ingredientes:

• 1 vaso de arroz
• 3 vasos de auga
• 100 g de chícharos
• 300 g de gambas
• 1 cebola
• 1-2 dentes de allo
• 2 culleriñas de coco relado
• 1/2 culleriña de xenxibre

Petiscos de coliflor

Boas, bolboreteir@s! Como estades? Con fame? Por aquí xa solventamos o apetito grazas a esta nova receita. E de onde sacamos a idea? Pois da viaxe que fixemos esta última semana por Tenerife. Descubrimos unha chea de propostas gastronómicas e recrearemos algunhas delas pois cremos que vos poden resultar interesantes.
A primeira destas ideas que aquí traemos ten unha verdura como protagonista, ofrecendo unha opción para a comer ben diferente. Ademais, gustamos moito deste tipo de ideas para @s peques, que en ocasións son reacios a papar certos alimentos de maneira directa e que acaban namorando deses mesmos produtos unha vez se lles dá unha volta.
A nós canto menos, estes petiscos xa nos conquistaron!

Petiscos de coliflor

Ingredientes:

• 1 coliflor
• 3 ovos
• Fariña
• Curry
• Allo en po
• Pementa moída

Polo ao estilo hindú

Bo día, bolboreteir@s! Continúan as receitas. Imos hoxe cun prato de moito moito sabor procedente da cociña hindú. Xa sabedes o que nos gusta viaxar a través da gastronomía, de feito, disto mesmo falabamos o outro día no programa de Onda Cero "Galicia Viajera", no que contabamos como non hai mellor forma de descubrir culturas a través da identidade culinaria.
Pois ben, a da India é intensa, sen dúbida. Se gustades das especias e procurades unha receita para darlle sabor ao polo, esta é a vosa. Velaquí fica: 

Polo ao estilo hindú

Ingredientes:

• 1 peituga enteira
• 1 berenxena
• 1 cebola
• 2 dentes de allo
• 1 vaso de auga
• Coantro

Para o adobo:

• 2 culleriñas de cúrcuma
• 1/2 culleriña de comiño

Provolone ao forno

Bolboreteir@s!! Preparádevos para abrir a fin de semana con moito sabor porque hoxe ímonos pór queixeiros cun básico moi moi efectivo para sorprender a calquera persoa.
Aquí a clave está realmente no queixo, que debe ser un tipo provolone para que se logre o efecto desexado e non se desparrame completamente. Hai algún outro máis que tamén nos serviría aínda que nós tiñamos claro que esta receita era para este queixo concreto. Pensamos que sería un simple petisco para a cea e de feito tiñamos preparada unha ensalada para acompañar e un pouco de friame. Finalmente, unha vez lle metimos o dente comprobamos máis contundencia do que nun primeiro momento podiamos agardar de queixo derretido. Temos pois, unha idea para unha cea ben saborosa, intensa e apta mesmo para @s menos argalleir@s na cociña. Imos con ela!!

Provolone ao forno

Ingredientes:

• 1 lasca grande de Provolone
• 150 ml de salsa de tomate
• 2 lascas de tomate
• 2 lascas de xamón
• Pementa moída
• Ourego

Polo Tikka Masala

Seguimos! Despois dunha semana de, por sorte,  moito traballo, encaramos a fin de semana con ganas de receitas. E hoxe é bo día para saborear cun prato que non deixa indiferente e que nos cautivará desde o cheiro até o sabor. 

O polo Tikka-Masala é unha receita orixinaria da India que xa se consagrou noutros territorios como Gran Bretaña desde hai anos, por causa da inxente inmigración india que hai neste territorio. De feito, Robin Cook tíñao sinalada como o gran prato británico. Véndense millóns de racións ao ano e adoita ser o plato estrela dos restaurantes hindús espallados polo mundo. De feito, nós degustámolo por primeira vez no que hai en Riazor, por certo, con gran éxito.

Como podedes imaxinar, sobre todo se coñecedes algo desta gastronomía, a intensidade e as especias son a clave deste polo de aí que non deixe indiferente, tal e como comentabamos. Que máis podemos dicir? Nada, ollar, probar e degustar! 

Polo Tikka Masala

Ingredientes:

• 1 peituga de polo en dados
• 200 ml de tomate natural triturado (tamizado)
• 200 ml de leite evaporado
• 1 iogur natural
• O zume dun limón
• 2 dentes de allo
• 2 culleradas de garam masala
• 2 culleriñas de xenxibre
• 2 culleriñas de cúrcuma
• 2 culleriña de comiño

Hummus

Bo día, bolboreteir@s!  Traemos a segunda parte da receita do pasado martes. Da salsa tahini pasamos ao hummus, a súa concreción máis sonada. Este prato de orixe árabe estáa ganar visibilidade a pasos axigantados na gastronomía europea, entre outros motivos por ser un recurso moi habitual na alimentación vegana xa que é altamente nutritivo.

A elaboración é moi sinxela aínda que o resultado debe ser cremoso e non fiar en cemento de garavanzos (tal e como ten afirmado El comidista). 

O produto máis complexo de conseguir para o preparar é precismente a salsa tahini xa que non a hai en moitos estabelecementos, de aí a nosa recomendación de preparar tamén na casa, tal e como mostramos o pasado martes (receita aquí). Non pensedes que por ser dúas receitas, imos deixar moito tempo polo camiño... ao contrario. Aquí o tedes!

Hummus

Ingredientes:

• 400 g de garavanzos cocidos
• 2 culleradas de aceite
• 1 cullerada de zume limón
• 1 cullerada de salsa tahini
• 1 culleriña de comiño
• 1 culleriña de pemento
• 1 culleriña de ourego
• Pementa moída

Bocados de coliflor

Bolboreteir@s, como levades o peche de xullo? Moit@s estaredes a piques de comezar as vosas vacacións así que supoño que coa máxima ilusión. E para @s que as estades acabando, ánimo, que a vida ten moito por desfrutar no día a día.

Nós, como xa sabedes, desfrutamos acotío da elaboración de múltiplas receitas en función do que se nos vai vindo ao maxín ou do que temos pola casa. Desta volta, recollemos da horta unha chea de coliflores e, tivemos que discorrer algo para as aproveitar. Entre outras, destacamos esta idea que aquí hoxe vos traemos por supor unha forma totalmente diferente de comer esta verdura ao que estamos acostumados.

Insistimos sempre na importancia de ofrecer dinamismo á alimentación tentando cociñar os produtos de diversas formas para coñecer novos sabores e tamén para non nos afacer a sempre o mesmo. Así pois, estes bocados de coliflor han de vos ser de axuda e se tedes peques pola casa suporán unha excepcional oportunidade para @s achegar á verdura. Aí o tedes!

Bocados de coliflor

Ingredientes:

• 700 g de coliflor
• 1 cebola
• 3-4 champiñóns
• 150 g de fariña
• 1 ovo
• 1 culleriña de curry
• Pementa moída
• Sal

Torta de salchichas (sen glute)

Bolboreteir@s, como vai esta semana diferente. Por aquí andamos aproveitando para o estudo e para as novas receitas aínda que casualmente a que hoxe vos traemos foi elaborada hai ben tempo. Tiñámola extraviada entre as pendentes de publicar e case queda en terra de ninguén para sempre. Menos mal que falamos de recreala esta semana, chegándomos así a decatarnos da cuestión.

Ben, pois aínda que as salchichas é un alimento que non consumimos con moita frecuencia, si nos apetece de vez en cando, ben para facer con arroz e ovos ou para un cachorro quente. Con todo, matinamos en argallar algo diferente con elas, procurando a autosorpresa.

Ben, pois unha torta de salchichas xa pintaba extravagante e se por riba optamos pola fariña de millo, máis aínda, pois ides percibir como fica moito máis densa, intensa e substanciosa. E ademais apta para celíac@s! Ten un sabor moi peculiar e se sodes de fariña de millo e salchichas resultará imposíbel que non vos conquiste o padal. Iso si, recomendamos o seu proveito como aperitivo e non como prato principal pois se se come en grandes porcións pode chegar a empachar. Imos pois, cunha receita ben innovadora. Adiante!

Torta de salchichas

Ingredientes: 

• 1 taza e media de fariña
• 1 taza de leite
• 1/2 taza de aceite
• 4-5 salchichas
• 3 ovos
• 1 cullerada de lévedo en po
• Ourego ao gusto

Garavanzos crocantes

Bo día, bolboreteir@s!! Agora si, despois da emoción da fin de semana co comezo no Youtube con eses pasteliños de patacas e nabizas, comezamos o ciclo depurativo. Foron moitos os excesos do Nadal, ao igual que todos os anos claro, e agora toca compensar un pouco con receitas saudábeis coas que non perderemos o gusto e goce culinario, por suposto.

Así, a primeira destas opcións foi unha ocorrencia de hai unhas semanas na que sobraron uns poucos garavanzos da elaboración do bocadillo de salchichas vegano, do que vos deixamos aquí a receita, e que como non queriamos desaproveitar pois maxinamos un pouco nunha opción que podemos dicir que bate récord de sinxelexa pois apenas se preparan en dous minutos, sen exaxerar.

E parece que non, mais con nada máis que os pasos que vedes a seguir, este legume adquire unha outra dimensión pois devorámolos como se flocos de millo se tratar. Convértense nun petisco ao que iredes unha e outra vez. Aquí fica a idea!

Garavanzos crocantes

Ingredientes:

• Garavanzos cocidos
• Especias ao gusto:
• 1 culleriña de allo en po
• 1 culleriña de ourego
• 1/2 culleriña de comiño
• 1/2 culleriña de curry

A nosa ensalada césar saudábel

Xa vos dixemos que após o Entroido viña época de recuperación, e aí andamos. Despois do pan de espelta e dos spaguetti de cabaciña, chega un clásico das ensaladas, o que leva por nome o do famoso emperador romano e que talvez sexa a ensalada máis coñecida internacionalmente.

Como a maior parte destas receitas de mestura e combinación, presentan mil e unha variantes, e a nosa será unha máis, con similitudes e diferenzas coas demais. Non todo vale evidentemente, mais por exemplo, o polo, que nós consideramos o elemento distintivo desta ensadala, non aparecía na versión orixinal creada en 1926 en Tijuana, México. Iso si, co tempo, esta ave fíxose imprescindíbel.

Canto á denominación, non hai sorpresa. O seu creador, un imigrante italiano afincado no país azteca, levaba por nome César Cardini.

Nós que sempre defendemos o lugar das ensaladas neste mundo, non iamos deixar de lado unha das ensaladas máis completas que existen; e tamén máis saborosas. 

Coñezádela xa ou non, é bo momento para ollardes a receita e a probardes proximamente. De seguro que gustades dela.

A nosa ensalada César saudábel

Ingredientes (para 2 persoas):

• 3 bistés de polo ou pavo
• 2 lascas de pan
• 1/2 leituga
• 1/4 de coliflor
• 1 tomate
• 1 cebola
• 1 culleriña de romeu

Patacas en flor ao parmesano

Pataqueir@s, estades list@s?? Ultimamente estades de sorte en Bolboretas no bandullo porque estamos tendo unha tempada moi moi pataqueira. E iso que, na verdade, somos máis de pan, postos a comparar os dous grandes acompañantes nos menús galegos.

Mais claro, é que as patacas son tan manexábeis para a elaboración de receitas, que resulta complexo non caermos na tentación de recorrer a elas de pouco en pouco. De feito, aínda non hai moito que presentamos as Papas San Miguel, que tiveron moi boa acollida.

E así ha de ser tamén coas de hoxe, tanto polo sabor, como polo formato de presentación, un tanto diferente, xa que optamos por preparalas nuns moldes de madalenas. Si, si, lestes ben, haha. Evidentemente, este paso non é necesario para desfrutar delas, mais si queriamos darlles unha volta para as presentar no prato dun outro xeito, ocupando menos espazo na procura da verticalidade. Aí vos vai.

Patacas en flor ao parmesano

Ingredientes (para 10 flores):

• 5-6 patacas
• 50 gr de manteiga + 5 gr
• 40 gr de queixo parmesano
• 1 cullerada de allo en po
• 1 cullerada de tomiño

Luriñas e castañas en mollo de millo

Tranquil@s, que xa regresamos cunha nova receita. Xa sabemos que algúns e algunhas xa andabades impacientes por non saber dun novo prato así que despois do artigo gastronómico do pasado sábado, hoxe presentámosvos unha nosa creación diferente en que ten cabida o produto estrela do outono, a castaña, que amamos tanto que tememos constantemente pola súa fuxida invernal. Degustámolas de todas as formas posíbeis, aínda que no prato de hoxe queriamos facer unha homenaxe á castaña cocida, utilizada durante séculos como sustento alimenticio en Galiza, utilizado con moitísima frecuencia, xa for como elemento principal, ou como gornición, tal como nós fixemos aquí.
Comparte pois, protagonismo nesta receita coas luriñas e cun mollo de millo dificilmente comparábel con calquera outra salsa pola súa dozura. Estamos perante un deses pratos completos, dignos de constituír un menú por si só cun rotundo éxito.

Luriñas e castañas en mollo de millo

Ingredientes (para 4 persoas):

• 16 luriñas
• 4 dentes de allo
• 1/2 culleriña de romeiro
• 1/2 culleriña de aneto
• Pirixel ao gusto
• Catro culleradas de aceite de oliva
• Dúas culleradas de viño branco

Focaccia rechea de mozzarella e xamón

Como di o xenio da cociña Ferrán Adriá, "ter ideas é sinxelo... só hai que telas". Pois iso, a nós véñennos continuamente novas ideas para compartir con todos vós aquí e non dubidamos un intre en preparalas para que vexades o resultado. E procuramos complicarnos o máis mínimo para que non lle resulte complexo a ninguén. E desde a simplicidade lógranse os máis exquisitos pratos como esta focaccia.

Xa sabedes que non é a primeira vez que elaboramos focaccia, mais é que talvez esteamos ante un dos nosos favoritos, sexa na versión que for. De feito, estamos preparando un artigo con aquelas receitas do blogue máis recorrentes na nosa alimentación e a focaccia xa vos adiantamos que non faltará.

A verdade é que non a coñecimos até unha viaxe que fixemos a Milano e desde aquela... amor eterno, haha. Mais desta última volta decidimos potenciala, nunca mellor dito, dándolle aínda máis protagonismo para calquera menú cun recheo cremoso de mozzarella, xamón e tomate que a converten nun manxar moito máis completo e contundente. Iso si, sen perder eses trazos que caracterizan a nosa focaccia: crocante, co seu aroma allado, as súas especias... Que delicia, señores e señoras, que delicia!!!

Focaccia rechea de mozzarella e xamón

Ingredientes:

Para a masa:

• Masa de focaccia e aceite aromatizado (receita aquí)

Para o recheo:

• 8-10 lascas de xamón
• 1 bola de queixo mozzarella
• Salsa de tomate
• 1 cullerada de cebola en po

Costela asada ás especias

Aínda que agora andamos un pouco atafegados co inicio do curso e a preparación de oposicións, comer hai que comer sempre, e por tanto, aproveitamos para presentamos algúns dos pratos novos que imos preparando. E o de hoxe é un bo exemplo. Fomos á carnizaría por un pouco de costela e pensamos en como a preparar para variar un pouco, sen tampouco nos complicar demasiado. Ademais, despois fixámonos que non tiñamos aínda ningunha receita de costela no blogue, coa de pratazos que se poden facer con ela. Principalmente o mítico churrasco, claro, haha.

O que procuramos con esta receita foi darlle un sabor intenso á carne, sobre todo a especias, algo moi relevante na cociña, e do que nós gustamos bastante. Desde logo, neste prato resultan claves. Abonda con ver os ingredientes... Aínda que tamén xogan un papel decisivo o mel, o ron, o allo... Unha moi boa combinación que vos ha de agradar. Con seguridade.

Costela asada ás especias

Ingredientes (para 4 persoas):

• 900 gr de costela fresca
• 10-12 dentes de allo
• 2 vasos de viño branco
• 3-4 culleradas de aceite de oliva
• 2 culleradas de ron/brandy

Pollastro in crosta

Nun domingo escuro e frío parece que apetece bastante metérmonos na cociña e preparar algún prato diferente. Como unha das carnes das que máis proveito tiramos nós é o polo e concretamente da súa peituga, decidimos elaborar unha nova receita para non repetirnos demasiado na peituga á prancha, peituga rechea etc. Así pois, coñecimos un prato italiano (como non!) que nos chamou moito a atención e non dubidamos en pola en práctica. É unha receita moi completa xa que é bastante económica, moi sinxela, rápida de elaborar, saudábel e mesmo bonita. O máis raro, o nome, xa que pode soar estraño iso de polo con costra, mais despois é esa capa de fóra a que converte as peitugas en irresistíbeis.

Deste modo, cunha carne ben barata podedes lograr un excelente prato para sorprenderdes a calquera convidad@. E a máis convidad@s, máis peitugas, sen problema ningún. A ver que vos parece:

Pollastro in crosta

Ingredientes (para 2 persoas):

• 2 peitugas de polo
• 50 gr de queixo relado
• 2 culleradas de pan relado
• Maionesa (1 ovo, sal, vinagre e aceite de xirasol)
• 3 chilis 
• 1 dente de allo
• 2 culleriña de ourego
• 1 culleriña de alfábega

Falafel

Ben sabedes que a nosa gastronomía preferida é, con moita diferenza, a galega, mais non é menos certo que adoramos probar moi diferentes produtos doutras gastronomías, xa que a fin de contas, estes din moito das propias culturas. Unha das cociñas que máis nos atrae polo diferente, e pola intensidade de sabor dos seus pratos é sen dúbida a dos países de Oriente Medio. Así que hoxe optamos por vos presentar este falafel. Unha incríbel opción para as persoas vexetarianas e para todas as persoas que procuremos unha dieta equilibrada en que teñan cabida tamén os legumes. Convén que no noso bandullo non fique marxinado ningún elemento, haha.
Parece que este saboroso prato se remonta á época do Corán e que cada vez se elabora en máis países variando algún elemento. Na maior parte dos territorios elaborase con base de garavanzos, mais en Exipto, por exemplo, fano con fabas, e mesmo en sitios mesturan os dous legumes.
Sexa como for, é unha receita que recomendamos levar a cabo pola diferenza con outros moitos pratos degustados e presentados até o momento. Un sabor moi moi intenso que serve tanto para acompañar un prato lixeiro como para actuar de prato principal. Aquí vai: 

Falafel

Ingredientes:

• 300 gr de garavanzos crudos
• 1 cebola
• 2 dentes de allo
• 1 culleriña de lévedo en po
• 1 culleriña de coandro
• 1 culleriña de comiño
• 1 culleriña de ourego 
• Aceite de oliva