Focaccia rechea de mozzarella e xamón

Como di o xenio da cociña Ferrán Adriá, "ter ideas é sinxelo... só hai que telas". Pois iso, a nós véñennos continuamente novas ideas para compartir con todos vós aquí e non dubidamos un intre en preparalas para que vexades o resultado. E procuramos complicarnos o máis mínimo para que non lle resulte complexo a ninguén. E desde a simplicidade lógranse os máis exquisitos pratos como esta focaccia.

Xa sabedes que non é a primeira vez que elaboramos focaccia, mais é que talvez esteamos ante un dos nosos favoritos, sexa na versión que for. De feito, estamos preparando un artigo con aquelas receitas do blogue máis recorrentes na nosa alimentación e a focaccia xa vos adiantamos que non faltará.

A verdade é que non a coñecimos até unha viaxe que fixemos a Milano e desde aquela... amor eterno, haha. Mais desta última volta decidimos potenciala, nunca mellor dito, dándolle aínda máis protagonismo para calquera menú cun recheo cremoso de mozzarella, xamón e tomate que a converten nun manxar moito máis completo e contundente. Iso si, sen perder eses trazos que caracterizan a nosa focaccia: crocante, co seu aroma allado, as súas especias... Que delicia, señores e señoras, que delicia!!!

Focaccia rechea de mozzarella e xamón

Ingredientes:

Para a masa:

• Masa de focaccia e aceite aromatizado (receita aquí)

Para o recheo:

• 8-10 lascas de xamón
• 1 bola de queixo mozzarella
• Salsa de tomate
• 1 cullerada de cebola en po

Utensilios: batedor (eléctrico ou manual), cazo, culler, papel vexetal e bandexa de forno.

Elaboración:

Para comezarmos, temos de facer a masa para a focaccia, tedes unha receita aquí. Nós fixemos o dobre de cantidade, facendo dúas bólas para poder tapar o recheo. 

Da mesma forma, temos de aromatizar o aceite, como tedes na mesma receita anterior. Tamén aquí dobramos as cantidades xa que van ser dúas masas a aromatizar.

De seguir, estiramos a metade da masa sobre papel vexetal coas mans e botamos unha cuarta parte do aceite aromatizado estirándoo cun pincel (non máis, xa que nos interesa gardar a maior parte de aceite para a capa de arriba)

A continuación, estendemos unha boa capa de salsa de tomate, o xamón -cortado en anacos- e a mozzarella, reservando unha pouca para a decoración final.

Estiramos a outra metade da masa e cubrimos o recheo, non é necesario selar os bordos. Pintamos, de novo, co aceite e colocamos uns anaquiños do queixo.

Enfornamos a 210º, calor arriba e abaixo, durante 30-35 minutos.

E xa está preparada para comer! Que vos aproveite!! 

Veredes que esta focaccia está a medio camiño entre a nosa empanada e a pizza italiana, mais na verdade ten unhas características moi particulares que logran que cando a comas non te lembres de ningunha das outras receitas. Esa mozzarella dálle un salto de calidade importante e xunto co xamón logran fartarnos con ben pouco creando o dilema no comensal posto que sentiredes adicción e non poderedes parar de comer nela, haha.

Agardamos que vos guste, canto menos, tanto coma nós. E iso xa é moitísimo!! Pasade unha boísima fin de semana, amig@s!