Salsa tahini

Como vai o inicio de semana, bolboreteir@s? Agardamos que moi ben. Para vos dar máis forza e tamén apetito contamos cunha nova receita que talvez moit@s descoñezades mais que veredes as posiblidades que ofrece, especialmente dentro do veganismo.

A salsa tahini é moi utilizada nos países árabes e nos últimos anos estase introducindo tamén en territorios europeos, especialmente para a elaboración do hummus. Con todo, ten moita rendibilidade en receitas como o baba ganush ou o halva e mesmo para degustar de forma directa con pan ou bolachas salgadas.

Sendo sinceros, non tiñamos pensado preparala xa que a iamos mercar, mais vendo as dificultades para a encontrar decidimos probar sorte. E saíu ben. Ollade:

Salsa tahini

Ingredientes:

• 4 culleradas de sésamo torrado
• 8 culleradas de aceite de oliva
• 2 culleradas de auga (opcional)
• Un chisco de sal

Utensilios: unha trituradora.

Elaboración:

Para comezrmos, temos de botar o sésamo na trituradora. Se non o tedes torrado, tedes que rustrilo un par de minutos nunha tixola ben quente. 

Engadimos o aceite e o sal. 

Trituramos moi ben até obter unha pasta homoxénea. Se vedes que o sabor é forte, agregamos as dúas culleradas de auga para facelo máis suave e cremoso. 

Esperamos que vos guste e que a poñades en práctica!

A degustación foi positiva, aínda que non a comemos de forma directa senón que a utilizamos para unha receita moi de moda que vos imos presentar o próximo sábado. Entanto vos ides preparando, que tal este aperitivo?

Pasade moi boa semana e sede felices, bolboreteir@s!