Solombo en salsa de mel e mostaza

Bo día, bolboreteirxs! Feliz ano 🥂! Como se presenta este 2025? Para nós, cheos de ilusión e preparándomos o primeiro aniversario da peque e o máxico día de Reis! 

E, ademais, hoxe traémosvos a primeira receita do ano 🤩 e, neste caso, facemos unha carne cun sabor espectacular, e adictivo 🤤! É ideal para facérmola un día de celebración ou simplemente para alegrármosnos cunha comida deliciosa 😋! 

Solombo en salsa de mel e mostaza

Ingredientes: 

Para o mariñado: 

• 1,5 kg de solombo 
• 1 cullerada de allo en po 
• 1 cullerada de cebola en po     
• 1 cullerada de pemento doce      
• 1 cullerada de pemento picante 
• 1 cullerada de ourego 
• 1 cullerada de romeu 
• 1 cullerada de tomiño 
• Pementa moída 
• AOVE 

Para a salsa: 

• 5-6 dentes de allo 
• 1/2 cunca de mel 
• 1/2 cunca de mostaza 
• 2 culleradas de siracha 
• 3-4 culleradas de salsa de soia 

Utensilios: unha tixola, unha fonte apta para o forno (nós usamos a mesma tixola, xa que ten mango extraíbel), unha táboa e un coitelo, un par de cuncas e culleres. 

Elaboración: 

Para comezarmos, temos de mesturar o allo en po, a cebola en po, o pemento doce, o pemento picante, o ourego, o romeu, o tomiño e a pementa moída. Empoamos a carne con ela e, se podemos, deixamos repousar varias horas no frigorífico. 

Pasado ese tempo, douramos a carne, a lume alto, nunha tixola con chisco de AOVE, aproximadamente 2 minutos por cada lado. 

Mentres tanto, preparamos a salsa mesturando moi ben todos os ingredientes (allo, soia, mostaza, siracha e mel). 

Pasamos a carne dourada á fonte de forno e botamos a metade da salsa. 

Enfornamos a 220º, calor arriba e abaixo, durante 15 minutos, tapamos con papel de aluminio e baixamos o forno a 180º. Cociñamos durante 30 minutos, agregamos o resto da salsa e deixamos no forno 30 minutos máis. 

Deixamos que repouse un momento e cortamos en lascas finas! E xa estaría lista para comer. Esperamos que vos guste. 

Como vedes, é unha forma diferente de asar o solombo, coa que necesitamos pan ou patacas para mollar esa salsa 😋🤤! Xa nos contaredes se vos gusta e oxalá a poñades en práctica. Se mirades máis abaixo, o peque deu a súa aprobación.

Mil grazas, bolboreteirxs, por seguir as novas aventuras un ano máis! Oxalá sigamos xuntxs moitos máis 😘! 

Aperta fortísima! Lémonos 😉😍❤️!