Polo ao estilo hindú

Bo día, bolboreteir@s! Continúan as receitas. Imos hoxe cun prato de moito moito sabor procedente da cociña hindú. Xa sabedes o que nos gusta viaxar a través da gastronomía, de feito, disto mesmo falabamos o outro día no programa de Onda Cero "Galicia Viajera", no que contabamos como non hai mellor forma de descubrir culturas a través da identidade culinaria.
Pois ben, a da India é intensa, sen dúbida. Se gustades das especias e procurades unha receita para darlle sabor ao polo, esta é a vosa. Velaquí fica: 

Polo ao estilo hindú

Ingredientes:

• 1 peituga enteira
• 1 berenxena
• 1 cebola
• 2 dentes de allo
• 1 vaso de auga
• Coantro

Para o adobo:

• 2 culleriñas de cúrcuma
• 1/2 culleriña de comiño
• 1/2 culleriña de xenxibre
• 1/4 culleriña de canela
• 1 chile
• Pementa moída
• Sal
• O zume dun limón
• 2 culleradas de aceite

Utensilios: unha tixola, unha táboa e un coitelo, papel transparente e unha culler de pau.

Elaboración:

Para comezarmos, temos de adobar a peituga cortada en anacos co zume do limón.

Mesturamos a cúrcuma, o comiño, o xenxibre, a canela, o chile, a pementa moída, o sal e o aceite e engadímosllo á peituga. 

Reservamos no frigorífico 2-3 horas, mellor unha noite enteira. 

Pasado ese tempo, rustrimos o polo nunha tixola.

Cando comece a coller cor, engadimos a cebola e o dente de allo ben picados. Cociñamos 5-7 minutos.

Agregamos a berenxena, tamén cortada en anaquiños, e cociñamos 5 minutos máis.

Engadimos a auga e o coantro, baixamos o lume, e deixamos até que se evapore o líquido, aproximadamente 20 minutos. 

Servimos acompañado de arroz branco e xa estaría listo para comer!

Agardamos que vos guste, que a poñades en práctica e que a desfrutedes tanto coma nós pois adoramos recrear o polo con receitas tan apetecíbeis coma esta. Fortísima aperta, amig@s!