Madalenas con sorpresa ( e vaia sorpresa)

Bo día, bolboretei@s! Home vimos con moita forza e ilusión. Ben, non é nada novo isto mais hai moito de especial na receita de hoxe. Si, repetimos madalenas mais desta volta as madalenas traen sorpresa. E vaia sorpresa!! 

Diciámosvos o outro día que para gozar dunhas madalenas abonda coa textura e sabor tan característicos, sendo as de vainilla que presentamos o pasado sábado unha moi boa opción. Pero sabemos tamén que hai lambonciñ@s que perden a cabeza polos recheos, polas cremas, de aí que decidíramos crear unha versión aínda máis larpeira. Xa vos adiantamos que é moi, moi doce! 

Imos contextualizar. Como algúns intuístes por diferentes comentarios, receitas e sobre todo se nos vistes en persoa, estamos agardando a chegada dun pequeno bolboreteiro. E estamos inmensamente felices. As persoas máis achegadas xa o sabían mais tiñamos preparada unha sorpresa para que as amizades coñecesen o sexo do bebé. Eles e elas xa a descubriron. Agora tócavos a vós (tiñamos as opcións de verde azulado para neno- vermello para nena e branco se aínda non se sabía... ;-)). Imos coa receita!

Madalenas con sorpresa

 

Ingredientes: 

• Madalenas de vainilla  

Crema de vainilla:

• 500 ml de leite
• 2 ovos
• 4 culleradas de azucre
• 2 culleradas de maizena
• 2 culleradas de vainilla
• Colorante

Para decorar: boliñas de cores.

Utensilios: unha cunca, unha pota, un batedor manual, un descorazonador de mazás, un coitelo e unha culler. 

Elaboración:

Para comezarmos, temos de facer as madalenas de vainilla, poden ser as da anterior entrada no blog. A continuación, facemos a crema de vainilla. Para comezarmos, batemos os ovos coa maizena até que se integren moi ben.

Despois, agregamos o azucre, a vainilla e o leite e mesturamos de novo até que se integren os ingredientes.

Botamos a mestura nun cazo e levamos ao lume, medio, até que a crema comece a espesar, coma se fose unha crema pasteleira.

Separamos un chisco da crema, dúas-tres culleradas, e á outra crema botámoslle unhas gotiñas de colorante, podedes escoller o que máis vos guste. Neste caso nós tiñamos a opción determinada, hehe.
Remexemos moi ben e reservamos.

Mentre arrefría un pouco a crema, quitamos o centro da madalena coa axuda do descorazonador, non tiredes a tapa porque nos vai ser de utilidade. 

Reenchemos as madalenas coa crema pintada e tapamos co tapón que sacamos antes.

Estendemos unha fina capa da crema sen colorear, e empoamos as madalenas coas boliñas de cores.

 Refrixeramos 1 hora, para que se asenten os sabores e xa estarían listas para comer!

Eeeee, sorpresa!!! Xiao dáse a coñecer! Neno!! O verde tirou finalmente máis a azul ao combinar coa crema mais divertímonos un tanto con esta descuberta e saboreamos unha receita inesquecíbel.

 Agardamos que gustárades vós tamén da sorpresa e que, por suposto, probedes coa receita. Forte aperta!!