Pequenas pavlovas de trufa

Bolboreteir@s! Estamos aquí mes e medio despois, tras tomarnos un descanso mais vimos cargadiños de ilusión acompañados con Xiao para vos seguir traendo moitas máis receitas. Iso si, durante unha tempada reducimos a subida de artigos a só un por semana. Xa sabedes, o tempo cun bebé dá para algo menos, haha. Un período de adaptación, claro.

Ben, pois decidimos volver fortes, cun tipo de receita que adoramos e que marcou os inicios do blogue aínda que ultimamente non as temos tan traballadas. Falamos das sobremesas, unha perdición mais o noso campo favorito de creatividade.

A plavova non é a primeira vez que aparece por Bolboretas no bandullo, de feito xa temos publicado unha vídeo-receita á que podedes acceder abaixo. Chamada así na honra da bailarina Anna Pavlova sendo publicada a receita por primeira vez en Nova Zelandia. Desta volta fixemos a versión en pastel, con racións xa individuais. Difícil descrivirvos o pracer da degustación. Faltan adxectivos. Aí vai. 

Pequenas pavlovas de trufa

Ingredientes:

Para o merengue:

• 6 claras de ovo
• 300 g de azucre glas
• 1 cullerada de vinagre
• 1 cullerada de maicena

Para o recheo:

• 600 ml de nata
• 2-3 culleradas de crema de cacao

Para a decoración:

• 200 g de chocolate
• 200 ml de nata
• Abelás

Utensilios: unha bandexa de forno e papel vexetal, dúas ou tres cuncas, un batedor eléctrico, unha manga pasteleira e un bico e unha culler.

Elaboración:

Para comezarmos, temos de facer o merengue. A ligazón aquí (escrito) e aquí (vídeo). A única diferenza é que non usamos cacao. 

Metemos o merengue nunha manga cun bico que nos guste e facemos pequenas cuncas sobre unha bandexa de forno cuberta con papel vexetal. Prequentamos o forno a 220º, calor arriba e baixo, e no momento de meter no forno, baixamos a 130º. Cociñamos durante 1 hora e 30 minutos. Pasado ese tempo, apagamos o forno e deixamos que enfríe dentro del.

Cando estea o noso merengue frío, pasamos a facer o recheo. Para iso, montamos a nata. Cando estea semimontada, engadimos a crema de cacao e seguimos batendo até conseguir unha masa firme. 

Reenchemos unha manga pasteleira coa nosa trufa e imos cubrindo as cuncas de merengue. Refrixeramos 30-40 minutos.

Mentres tanto, facemos a crema da decoración. Quentamos a nata e botámola sobre o chocolate (branco, con leite, negro... ou como máis vos guste). Deixamos repousar 1 minuto e remexemos cunha culler até que se integren completamente. 

Deixamos que arrefríe a crema durante 30-35 minutos. 

Pasado ese tempo, coa axuda dunha culler, imos facendo debuxos sobre a os merengues coa trufa e empoamos con abelás picadas. 

Refrixeramos, de novo, até que endureza o chocolate e xa estarían listas para comer! 

Agardamos que vos gusten e que as poñades en práctica! Non encontraredes mellor maneira de vos dar unha homenaxe larpeira. Nós temos a sensación de que había tempo que non gozabamos tanto cunha sobremesa. Delicia! 

Forte aperta, amig@s. Lémonos :-)