Torta de lima (Lime pie)

Váisenos escapando progresivamente o verán mais ímolo deixando bocadiño a bocadiño, coas últimas celebracions e coas últimas comiolas. Traemos pois unha receita espectacular desta tempada.

Unha torta fresca e deliciosa para deixar cun bo sabor de boca unha comida de amizades ou familiar, ou para almozar, merendar… en realidade, está saborosísima en todos os momentos do día. 

O que tiñamos claro cando matinamos nesta sobremesa é que nos apetecía unha sobremesa que non nos empachara e que deixase ese matiz de frescura que procuramos no verán. Así que limón ou lima tiñan moitos números de ser a protagonista optando finalmente pola segunda. 

Non nos engrellamos máis. Aquí a tedes. 

Torta de lima   

Ingredientes:

Para a base da torta: 

• 250 g de galletas tipo “digestive) 
• 50 g de azucre moreno ou panela          
• 140 g de manteiga 

Para o recheo: 

• 780 g de leite condensado 
• 240 ml de zume de lima 

Pavlova de chocolate

Tiña que ser, tiña que ser, a primeira torta da canle de Youtube. A primeira receita do blogue, alá por finais do 2013 foi unha torta sendo este tipo de receitas nas que nos centramos nos comezos. Curiosamente, cinco meses despois de abrir a canle de receitas no Youtube aínda non subiramos ningunha co que xa sentiamos un baleiro importante. É certo que a elaboración de tortas na nosa casa está orientada ás celebracións, de aí que nestes últimos meses, ao non coincidir apenas aniversarios ou festexos, non subiramos tortas.

Ben, pois agora nesta tempada veredes como se incrementan pois tivemos algunha persoa a cumprir anos, días especiais e aproxímanse xa as moi diversas festas de primavera e verán. 

Imos pois con esta xoia da cociña oceánica. Si, nunca tan lonxe chegaramos coas receitas e iso que probamos desde Brasil, a Alemaña até chegar a Rusia ou China. Porén, esta torta que encontramos nun vello libro de cociña transportounos a este novo continente. Non se sabe moi ben o país de orixe, ou máis ben, hai unha gran discusión entre dous territorios próximos arredor da súa propiedade orixinal: Australia e Nova Zelandia. 

Iso si, antes de nos adentrarmos na historia, por aquí estabamos seguros da orixe rusa debido a ese nome tan peculiar. Claro, está ligado a unha bailarina dese mesmo país que foi honrada coa elaboración desta torta á chegada a un destes países oceánicos. De feito, na actualidade é unha das sobremesas máis consagradas na repostaría deste territorio. Non sei vós, mais nós non nos perderiamos esta vídeo-receita por nada. Aquí vos deixamos a ligazón á receita na nosa canle de Youtube.

Pavlova de chocolate

Ingredientes:

Para o merengue:

• 6 claras de ovo
• 300 g de azucre glas
• 5 culleradas de cacao en po
• 1 cullerada de vinagre
• 1 cullerada de maicena

Para a crema de queixo:

• 500 ml de nata
• 250 g de mascarpone
• 2 culleradas de azucre

Torta S'mores (merengue)

Aquí seguimos, bolboreteir@s! Como vai a semana? Agardamos que ben, e con ocos para prepararmos novas receitas de Bolboretas no bandullo, aínda que a de hoxe... seguro que preferides deixala para a fin de semana para vos dar unha homenaxe. 

Retornamos aos doces con esta variante da americana torta S'more, unha lambetada que naceu na primeira metade do século e que vemos como unha típica torta que @s estadounidenses levan para os días de parque. Parece que a creadora foi Loreta Scott Crew, facéndoa para as súas compañeiras e compañeiros Scouts. Ben é certo que a orixinal presenta por arriba unha capa de nubes, que pasaban cun pau polo lume para lle dar algo de cor. Nós optamos por substituír estas nubes por merengue porque sabiamos que vari@s comensais non gustaban dese primeiro elemento.

Así pois, engadimos ao noso corpus de tortas unha nova opción saborosa, rápida e apta para inexpertos no campo da repostaría. Mais... dirixida a persoas moi lambonas que gustan moitísimo do chocolate porque estamos perante unha bomba calórica, das que precisan un pouco de deporte para compensar, haha. Aí vai!

Torta S'mores (merengue)

Ingredientes:

Para a base:

• 500 g de galletas
• 225 g de manteiga

Para a crema de chocolate:

• 450 g de chocolate con leite
• 300 g de crema de cacao con avelás
• 360 g de nata

Torta de merengue e crema de limón

Se analizades a traxectoria deste case tres anos de Bolboretas no bandullo, xa saberedes que por estas datas toca unha torta especial posto que celebramos as Festas da Xunqueira en Viveiro. E por suposto que non vai faltar sobremesa.

Iso si, de vez en cando debemos controlar os nosos impulsos para non preparar inmediatamente unha receita chocolateira porque senón non sairíamos do chocolate, haha. Por tanto, tocou darlle un pouco máis ao maxín para lograr unha nova larpeirada. Fomos recollendo ideas dun libro e doutro para acabar fusionando nesta sorprendente torta de merengue e crema de limón. 

E cal é a novidade desta vez? Pois que estamos coma vós de momento. A torta está no frigoríficio agardando a ser degustada. Non vos podemos enganar. Acabamos de facela onte á noite e aínda temos que agardar unhas horas para lle meter o dente. Así que... atrevédesvos a mimetizar a receita ou agardades que vos contemos?

Torta de merengue e crema de limón

Ingredientes:

Para a base:

• 1 lámina de masa crebada 

Para a crema de limón:

• 200g de azucre
• 200ml de auga
• 125ml de zume de limón
• 100g de manteiga
• 3 xemas de ovo
• 1 ovo enteiro

Merengues de cores

Xa estamos por aquí unha vez máis. Xa veriades polas redes sociais que levamos unhas semanas de moitísimo movemento. E iso é bo, moi bo!

Como xa anunciamos en Facebook e demais, o venres 28 de abril estaremos no Hotel Hesperia Finisterre, no congreso "Gastronomía y Alimentación 2.0", convidados por Ecom Events. Teremos a sorte de compartir mesa dentro da sección "Experiencias de éxito" con Gastro y Política, Lucía Baballa ou Beis-Burguer Culture. Tedes máis info e o programa aquí. Nós, estamos contentísimos de desfrutar dunha oportunidade coma esta para visibilizar a nosa proposta e tamén a relevancia do galego na rede.

E para festexalo, démonos un festexo de cores! Ben, para festexalo e para recibir a Begoña Fontenla e o equipo da Revista da TVG, que pasaron onte por Viveiro para gravar unha reportaxe sobre Bolboretas no bandullo. Estamos contentísimos coa experiencia e agradecidísimos a Begoña pola oportunidade. Xa avisaremos, claro, da emisión :-)

Aquí vai este resultado larpeiro de tanta ledicia:

Merengues de cores

Ingredientes:

• 4 claras de ovo (140 gr)
• 280 gr de azucre
• 1 cullerada de vainilla
• Colorantes alimentarios
• Para decorar: boliñas de cores