sábado, 10 de setembro de 2022

Torta de lima (Lime pie)

Váisenos escapando progresivamente o verán mais ímolo deixando bocadiño a bocadiño, coas últimas celebracions e coas últimas comiolas. Traemos pois unha receita espectacular desta tempada.
Unha torta fresca e deliciosa para deixar cun bo sabor de boca unha comida de amizades ou familiar, ou para almozar, merendar… en realidade, está saborosísima en todos os momentos do día. 
O que tiñamos claro cando matinamos nesta sobremesa é que nos apetecía unha sobremesa que non nos empachara e que deixase ese matiz de frescura que procuramos no verán. Así que limón ou lima tiñan moitos números de ser a protagonista optando finalmente pola segunda. 
Non nos engrellamos máis. Aquí a tedes. 


Torta de lima   



Ingredientes:


Para a base da torta: 
  • 250 g de galletas tipo “digestive) 
  • 50 g de azucre moreno ou panela          
  • 140 g de manteiga 
Para o recheo: 
  • 780 g de leite condensado 
  • 240 ml de zume de lima 
  • 6 xemas 
  • A reladura de 5-6 limas 
Para decorar: 
  • 3 claras de ovo 
  • 180 g de azucre 



Elaboración:


Para comezarmos, temos de facer a base da nosa torta. Para iso, trituramos as galletas, mesturámolas co azucre e engadimos a manteiga derretida. 


Estendemos a mestura no fondo do molde e un pouco polos laterais. Refrixeramos. 


Para a crema, batemos as xemas até que dupliquen o seu tamaño. 


Agregamos o leite condensado e mesturamos moi ben. 


Botamos o zume de lima e a reladura da pel. Remexemos moi ben até que se integren, a textura será coma un iogur. 


Vertemos a crema no molde e enfornamos a 180º, calor arriba e abaixo, durante 20 minutos. 


Deixamos arrefriar totalmente e refrixeramos toda unha noite. 


Para a decoración, temos que quentar as claras co azucre ao baño María até que se funda totalmente o azucre. Seguidamente, montamos a punto de neve e decoramos coa axuda dunha manga pasteleira e un bico. 



E xa estaría lista para comer! 


Agardamos que vos guste esta deliciosa torta, que é adictiva, quedades avisadxs, bolboreteirxs! 
Aperta forte!

Ningún comentario:

Publicar un comentario