Pan de pasas e noces

Bo día, bolboreteir@s! Como vai? Aquí andamos de novo para vos traer un petisco que tiñamos ganas de preparar desde hai tempo. Este pan de noces e pasas é a nosa opción para este 17 de maio. E por que? Pois estamos relendo a Begoña Caamaño e imaxinamos este acompañante como ideal para os múltiplos banquetes que Penélope ofrece en Ítaca en tanto avanza a trama de Circe e o pracer do azul. O pan nunca faltaba nas cestas destes banquetes e adoitaba asociarse á grandeza do ser humano. Se ben é certo que era un pan máis denso que o que comemos aquí hoxe en día, era un manxar prezado e para o que había persoas (segundo se conta na Odisea) dedicadas a moer o gran para a fariña. 

Non temos constancia de que xa experimentaran con combinacións mais nós vimos este pan de noces e pasas como unha idea fantástica para entreter e sorprender os hóspedes que recibía Penélope. Imos ver que vos parece!

Pan de pasas e noces

Ingredientes: 

• 400 g de fariña de forza, máis 50 g extra
• 140 g de fariña de espelta integral
• 325 g de auga, máis un vaso extra   
• 25 g de mel
• 5 g de lévedo de panadaría en po

Pan de hamburguesa de espelta integral

Bo día, bolboreteir@s! Como estamos??? Hoxe traemos unha parte dunha receita que terá continuación no próximo día. Un deses pratos proveitosos para calquera. Non é común encontrar rexeitamento ás hamburguesas.

Alén diso, estamos ante un alimento que permite un abano inmenso desde a maior das simplezas até grandes complexidades. E despois está o pan da hamburguesa. E vaia, como o exterior pode cambiar toda a receita. Nós a verdade é que somos moito máis de pan de boliños (real) que do pan tipo molde aínda que é certo que cos primeiros ás veces custa acabalas. Claro, ese pan real pesa, hehe. 

Pois ben, aquí probamos unha nova variante de pan para as hamburguesas, nas que cambiamos a fariña de trigo pola espelta integral mais non só. Hai algunha sorpresa máis.

Pan de hamburguesa de espelta integral

Ingredientes:

• 370 g de espelta integral
• 150 ml de leite
• 15 ml de aceite             
• 1 ovo, mais outro para pintar
• 2 dátiles

Pan con sementes

Ola, bolboreteir@s! Hoxe publicamos a unhas horas que vaia, vaia. E sen moito motivo a verdade, xogando co peque pasounos o día e as encomendas, haha.

Hoxe traemos unha das nosas perdicións, o pan. Si, hai casas de pan, outras de patacas, algúns que nin un nin outras... Nós somos panadeir@s, moi panadeir@s, destes cuxo percorrido desde a panadaría até a casa é un perigo para a peza de pan.

E claro, cando sobra o tempo, como sucede con frecuencia esta tempada, pois optamos por preparalo na casa e aí xa temos que atar as mans pois segundo sae do forno andamos roendo nel. De seguro que a vós tamén vos dixeron sempre que non é bo comer o pan quente. Nós non sabemos se é bo ou non pero ollo, poucos luxos tan simples na vida. Velaquí unha idea dun outro pan. 

Pan con sementes

Ingredientes:

• 500 g de fariña 
• 325 ml de auga morna
• 100 g de sementes variadas (opcional)    

Crumpets

Ola, bolboreteir@s! Como estades? Nós andamos en modo lambóns e traemos unha receita que vos vai adozar a fin de semana. Especialmente para as persoas que sodes seguidoras das tortitas, pancakes e demais. 

Hoxe traemos unha variante inglesa, que a nós nos sorprendeu moitísimo e explicámosvos os motivos. Procurando receitas da cultura británica encontrámonos con isto e dubidabamos se igualarían as tortitas ao modificar algúns ingredientes. E están tan ricas ou máis. Son diferentes a pesar dos parecidos evidentes. Lémbrannos máis ao pan, hai un sabor máis puro da masa e a verdade percíbese nun sabor moi suave que nos conquistou. 

Aí van!

Crumpets

Ingredientes: 

• 250 g fariña de trigo
• 200 ml de leite
• 150 ml de auga tépeda
• 6 g de lévedo de panadaría
• 1 cullerada de azucre

Pan naan

Bo día, bolboreteir@s! Agardamos que manteñades o ánimo e a forza para resistirmos estes días/semanas que fican de confinamento. Por aquí xa temos case para un novo libro de tantas reeitas que levamos feitas nesta semana. 

Desta volta imos cun pan bastante diferente. Xa sabedes que é unha das nosas paixóns e gústanos probar unha e mil variantes. Esta non é a mellor xa que a nosa perdición máxima son as receitas de pan tradicional galego (aí si que o noso é o mellor, con diferenza, ha!) mais si é un dos tipos de pan con máis sabor que até agora encontramos.  De orixe india sorprende por non precisar forno e por non deixar indiferente. Ollade que apetitoso!

Pan naan

Ingredientes:

• 250 g de fariña
• 30 ml de auga morna
• 15 ml de aceite
• 9 g de bicarbonato
• 5 g de sal
• 5 g de azucre
• 1 iogur natural

Pan caseiro de fariña de kamut

Bo día, bolboreteir@s!! Como vai todo? Agardamos que ben. Levabamos un tempo que cada vez que vos estabamos a escribir, ollabamos como diluviaba fóra, tal e como se espera no inverno claro. Pois esta semana, xa vedes que nos puxeron o mel nos labios, e non o dicimos pola última receita, senón por este sol que tanto anima a pasear e facer vida fóra.

Mais ben, ao que imos. Por aquí andamos dous amantes do pan, das masas polo que vos imos presentar unha receita que desfrutamos ben.

Para algúns, o título da receita será novidoso pois talvez non coñezades o kamut, tal e como nos pasaba a nós. Con todo, uns días atrás unha marabillosa compañeira de traballo mostrounos este recurso que a ela tanto lle prestaba en pan, empanadas e tortas.

Investigamos e fomos por el a unha tenda ecolóxica na Coruña. Podédelo conseguir tamén nestes estabelecementos que venden a granel.

Falamos dunha variedade antiquísima de trigo que, segundo din, xa se cultivaba no Exipto hai millóns de anos e que se dá en zonas excepcionalmente cálidas e que na actualidade se comercializa a través da empresa Kamut Internacional, protexéndoo baixo a marca kamut (trigo en exipcio).

O que sorprende desta subvariedade do cereal é a gran cantidade de propiedades que ofrece. Aínda que descoñecidos para moitos e moitas, entre os que nos encontrabamos, é apreciado por ser moi rico en proteínas, contido en minerais (zinc e magnesio, por exemplo) e en xeral destaca pola súa capacidade antiinflamatoria e antioxidante. Vaia, toda unha xoia sobre a que vos animamos a vos informar.

E claro, quedábanos un detalle importante xa que aquí viñemos para papar: está boísimo!! Velaquí a receita!

Pan caseiro de fariña de kamut

Ingredientes:

• 400ml de auga
• 350g de fariña de kamut
• 150g de fariña de forza
• 100g de masa anterior
• 10g de lévedo de panadaría

Roliños de canela

Boa cicloxénese, digo, boa fin de semana, amig@s! Aquí seguimos, gardadiños do frío e da auga e comezando oficialmente a tempada de cocido e freixós. Vaia finde nos imos pegar!

Mais esta semana estivemos preparando outras larpeiradas, onde a canela foi a protagonista.

Esta especia traénos moi bos recordos e transpórtanos inmediatamente cal madalena de Proust á infancia e ao arroz con leite, co que a coñecemos tanto tempo atrás. 

Puxémonos cunha especie de "cinamon rolls" dos que quedamos prendados nas rúas de New York, onde despredían un cheiro que adozaba o outono. Ollade:

Roliños de canela

Ingredientes:

Para a masa:

• 440g de fariña, máis extra
• 240 ml de leite morno
• 56g de manteiga
• 35g de azucre 
• 25g de lévedo de panadaría
• 2 ovos
• Un chisco de sal

Brownie de froitos vermellos

Ola, bolboreteir@s! Canto había que non preparabamos un doce coma este. O brownie é unha das nosas larpeiradas favoritas e non falla cando nos queremos dar unha homenaxe, subir o ánimo ou simplemente desfrutar do chocolate en todo o seu esplendor.
Desta volta necesitabamos un biscoito ou torta para o aniversario da avoa e para non perdermos moito tempo agora que andamos algo enleados co inicio das aulas, optamos por un brownie no que as froitas entrasen en xogo.  

Se quixerdes arrasar entre os vosos comensais ou gozardes inmensamente desta lambetada, esta é a vosa receita. Para non perder!!

Brownie de froitos vermellos

Ingredientes:

• 125 g de framboesas
• 125 g de arandos
• 225 g de manteiga
• 200 g de azucre moreno
• 100 g de chocolate negro
• 50 g de fariña
• 50 g de cacao en po
• 1 cullerada de vainilla

Galletas de vainilla e améndoa

O regreso das vacacións adoita non gustar, excepto cando é para voltar a Bolboretas no bandullo con novas publicacións. Nese caso, o retorno é do máis feliz, canto menos para nós. Agardamos que xa esteades desexos@s de novas lecturas gastronómicas e que estas vos animen tamén o voso regreso á realidade.
E con que novidades chegamos? Pois con galletas, sempre efectivas e recorrentes para calquera detalliño. Neste caso estas viñeron por unha encarga para o Naseiro. E claro, para rematar rápido e lograr algo efectivo, as galletas sempre cumpren. Aínda que certo é que hai galletas e... galletas. E esta é das que deixan moi bo recordo.
Con eses ingredientes xa se intúe un óptimo resultado e só queda amasar co agarimo común d@ reposteir@ e agardar a que chegue o momento de degustar! Preparad@s? A facer galletas! 

Galletas de vainilla e améndoa

Ingredientes (para 15 unidades):

• 200g de fariña
• 100g de azucre
• 100g de manteiga
• 30g de améndoas
• 1 ovo
• 2 culleradas de vainilla
• 1 culleriña de bicarbonato
• Un chisco de sal

Berenxenas ao mel

Vaia primavera invernal que temos, non vale moito para saír da casa. Así que, a argallar na cociña nos tempo libre que nos fica.
Estes días non se fai máis que falar da "Feria de Abril", desa grande troula sevillana. E claro, con Sevilla ás voltas, a nós veunos á cabeza o noso paso por esta cidade hai uns meses. E si, algún que outro prato gorentoso que degustamos naquelas fabulosas terrazas. E por que non animarnos a revivir momentos tan saborosos?
Por tanto, optamos hoxe por unha das larpeiradas que máis nos sorprendeu, e coa que pechamos a nosa viaxe por Andalucía, deixando moi bo sabor de boca. Realmente, xa as probáramos en Granada, nos aperitivos ao que nos convidou Puleva. Dicimos que nos sorprendeu porque nós apenas gustamos do mel, e cando fai parte dun prato, é difícil que pase desapercibido.
Porén, berenxena e mel parece que foron creados para se xuntar posto que calquera dos dous gana ao se combinar co outro. Unha mestura crocante, de suavidade e intensidade, que consideramos toda unha revelación. Que opinades?

Berenxenas ao mel

Ingredientes (para 2 persoas):

• 1 berenxena
• 1 cervexa
• 2-3 culleradas de mel
• 2 culleradas de fariña
• Un chisco de sal
• Aceite para fritir

Nevados natalicios

Non é nada común encontrármonos por aquí un mércores mais a ocasión merece a pena e por iso retrasamos un día a nova publicación. Hoxe estamos de segundo aniversario!! Si, si, xa de segundo. Resulta incríbel comprobar a velocidade con que pasa o tempo! Un 30 de decembro do 2013 dábamos saída a un desexo de había tempo atrás que superou, con moito, as nosas expectativas, e iso unicamente grazas a vós e á xenial acollida da proposta. Nestes dous anos xa pasaron por aquí máis de 200 receitas, cifra enorme, alcanzando algunhas delas un grande éxito. E sobre todo, cremos que cumprimos o obxectivo principal, realizar a nosa achega á normalización do idioma neste ámbito gastronómico-dixital, tan potente nos últimos tempos. De seguro que entre todos aprendimos a chamarlle a varios produtos polo seu nome axeitado.
Desde o 30 de decembro de 2013 sentímonos apoiados, sobre todo nas redes sociais, polos seguidores e seguidores que fostes aumentando até ser un número ao que non contabamos chegar. Grazas ás vosas lecturas e interaccións, Bolboretas no bandullo seguiu para diante e así publicamos algún artigo en prensa, presentamos entrevistas inesquecíbeis ou mesmo asistimos a un congreso sobre alimentación en Granada. Mais o que máis nos satisface é cando algunha ou algún de vós nos fala ben por Facebook, Twitter ou na rúa para nos comentar que van facer algunha das nosas receitas ou que desfrutaron con algún dos pratos de Bolboretas no bandullo. Iso non se cambia por nada!
Así pois, de igual modo que fixemos hai un ano, queremos agradecervos de xeito moi humilde toda a vosa axuda e por iso sortearemos unha táboa de turrón caseira de chocolate e uns nevados como os que presentamos hoxe. Poderiámolo facer entre tod@s os seguidores de Facebook e Twitter máis resultaría algo complexo, polo que decidimos reducilo a todas aquelas persoas que interactúen desde hoxe, día 30, en calquera das nosas publicacións nestas redes sociais (rechouchiando en Twitter ou comentando en Facebook) ou que deixen algún comentario no blogue, ben nesta receita, ou ben na que publicaremos o próximo sábado. Así teremos un número máis limitado para compartirmos con vós estas dúas nosas creacións ligadas ás datas do Nadal, ficando como data límite o domingo 3 de xaneiro ás 23:00. Adiante!

Nevados natalicios

Ingredientes (para unhas 20 unidades):

• 250 gr de fariña
• 100 gr de manteiga de porco
• 50 ml de viño branco
• Unha culleriña de vainilla

Masa crebada sen ovo nin lactosa

Bo martes lambisqueir@s!! Aquí estamos de novo, traéndovos precisamente unha larpeirada despois da que foi para nós unha fin de semana moi doce con celebración de aniversario incluída. Unha das tortas que elaboramos para este festexo foi a Torta 3 chocolates, unha das nosas primeiras receitas. E a outra... pola outra tedes que agardar un pouco máis, aínda que hoxe xa vos deixamos a súa base, que quixemos presentar de maneira independente por ser apta para alérxicos áos ovos e á lactosa, algo non tan sinxelo nas tortas xa que un grande número delas levan algún destes ingredientes na súa base. 

Así pois, gardando este recurso, poderedes procurar despois o complemento adecuado para finalizar a torta adaptada á vosa alimentación. Aí vai:

Masa crebada sen ovo nin lactosa

Ingredientes:

• 250 gr de fariña
• 80 ml de auga
• 65 ml de aceite de oliva virxe extra
• Un chisco de azucre

Torta crema de cacao

Tiñamos o día larpeiro larpeiro, así que, sen ningún motivo nin  causa, decidímonos pór a facer unha torta coas únicas condicións de ser rápida e moi chocolateira. E cumprimos co obxectivo. Como xa sabedes, hai mil e unha formas de realizar biscoitos para tortas mais nós desta volta queriamos que nel destacase o chocolate, non inserindo unha capa no medio senón que pretendiamos que o biscoito todo levase un sabor intenso. Para iso, claro, botamos un bo número de culleradas de crema de cacao. E non pensedes que foi de máis. Xa sabedes, hai días así, que está para chocolate :-)

Estamos seguros que a maior parte de vós desfrutaredes esta torta ao máximo, mais se tedes pequen@s na casa veredes que eles o fan dunha forma diferente. Porque xa sabemos o felices que @s fan estas cremas, haha.

Aquí vos deixamos esta receita para cando teñades ganas dunha sobremesa máis contundente, un larpeirada ao grande coa que pórvos as botas:

Torta de crema de cacao

Ingredientes:

Para o biscoito:

• 18-20 culleradas de crema de cacao e avelás
• 300 gr de fariña
• 100 ml de leite
• 50 ml de nata
• 3 ovos
• 1 sobre de lévedo en po

Churros con chocolate

Si, hoxe é día de clásico da repostaría. Un produto que poucas persoas non terán degustado algunha vez na súa vida, xa for ao almorzo ou ben nesas noites que troula que chegan até xa o sol comezar a aparecer e que decidimos fechar cun bo chocolate con churros, especialmente na noite en que despedimos un ano para dar a benvida a outro.
Con todo, non é tan frecuente que optemos por elaboralos na casa, xa sexa pola comodidade que nos ofrecen as churrarías que xa nolos dan feitos ou ben porque non tiñamos idea de como se facía. Deste modo, nós decidimos probarmos a receita caseira. E a verdade é que pouco máis sinxela pode ser, tanto na elaboración como nos produtos que precisamos: auga, fariña, sal e aceite. Chocolate á marxe, claro.
Recordo que miña avoa tiña unha máquina especial para facer os churros, mais despois de moito preguntar non se volveu saber dela. Porén, non tardamos en comprobar que hai outras formas máis manuais para os elaborarmos, abonda cunha manga pasteleira e o bico correspondente. E que almorzo tan saboroso!!

Churros con chocolate

Ingredientes:

Para os churros:

• 250 ml de auga
• 125 gr de fariña
• 2 culleradas de aceite
• Un chisco de sal
• Aceite para fritir

Para o chocolate:

• 250 ml de leite

Tortas galesas

Unha nova receita, tamén especial por ser a que levamos a cabo para as premiadas no sorteo con motivo do primeiro aniversario do blogue. 

Prometimos enviar unhas galletas saborosas e cremos que así foi. Iso si, tamén queriamos que foran diferentes ás traídas até agora a este caderno dixital así que pensamos nestas bolachas que non son moi coñecidas por aquí, mais que triunfan en Gran Bretaña desde hai moitos anos. Con todo, mudamos algúns elementos da receita tradicional, e así, por exemplo, decidimos enfornalas no lugar de pasalas pola tixola. Iso si, probamos as dúas opcións claro. Mais como a que nos convenceu máis, con diferenza, foi a do forno, pois quedamos con ela. Pasándoas pola tixola fanse un pouco máis graxentas e dan algún que outro problemiña para lles dar a volta.

Con todo, é cuestión de que cada un/ha probe e escolla a súa versión preferida. A nós desde logo encantáronnos. E polo que contaron Ás votlas coa moda e Orballo parece que a elas tamén lles gustaron. Estas foron algunhas das súas palabras:

- Ás voltas coa moda: "Que riquísimas e onde van xa!! Un millón de grazas de novo"

-Orballo: "As galletas de @bolbonobandullo chegaron e estaban riquísimas! MIL GRAZAS"

Aproveitamos para lles agradecer unha vez máis a súa participación, ao igual que tod@s aqueles que non ganastes, e deixámosvos aquí a ligazón aos seus blogues. Cadernos ben fermosos polos que merece moito a pena pasarmos diariamente. Adoramos os dous, ben diferentes e ben necesarios:

ÁS VOLTAS COA MODA

DEITADA FRENTE AO MAR

Tortas galesas (welsh cookies)

Ingredientes:

• 200 gr de fariña de trigo, máis extra
• 100 gr de manteiga
• 75 gr de azucre
• 75 gr de chocolate
• 1 sobre de lévedo en po
• 1 ovo grande

Galletas azuis

Imos cunha nova receita, moi sinxeliña, saborosa e atractiva aos ollos. Para a noite de fin de ano tivemos un encargo especial aquí en Viveiro. Un dos locais de referencia da noite viveiresa quería agasallar as súas clientas e clientes cuns petisquiños, a poder ser da mesma cor que dá nome ao pub, así que, non había máis que pensar. Como a do 31 para o 1 é unha noite sen fame despois da enchenta correspondente, queriamos facer algo moi lixeiriño mais que si chamase a atención así que elaboramos unhas pequenas galletas en forma de bolboretas e tinguidas dunha intensa cor azul. Combinabamos pois, o nome do Blue Bar co de Bolboretas no bandullo. A ver que vos parecen estes doces petiscos :-)

Galletas azuis

Ingredientes:

• 300 gr de fariña
• 150 gr de manteiga
• 80 gr de azucre
• 2 xemas
• 1 culleriña de vainilla
• 1 culleriña de colorante azul
• Un chisco de sal
  

Torta KitKat

Outro aniversario máis que tivemos e unha nova torta. E cando é así poñemos o maxín a traballar até dar coa larpeirada máis larpeira. Doutra volta probaramos cos produtos Kinder que tanto nos gustan, e desta pensamos nestas míticas barras de chocolate tan saborosas, os KitKat. Con todo, sería difícil imaxinarmos unha torta feita toda ela con isto xa que non os Kitkat non levan crema, senón galleta e chocolate, así que para o recheos optamos pola típica crema de cacao que nos garantía o triunfo e que faría imposíbel que nos quedara seca.

E nesta ocasión nos nos preocupamos tanto en realizar unha decoración con debuxos ou letras, simplemente deixamos caer unha doce chuvia de bolas de chocolate e lacasitos que lle ofrece a esta sobremesa moitísimo colorido e que se converte nunha oda ao chocolate. Aí vos vai ;-)

Torta KitKat

Ingredientes (para un molde de 26 cm):

Para o biscoito:

• 175 gr de fariña, máis extra para engrasar
• 175 gr de manteiga, máis extra para engrasar
• 175 gr de azucre
• 3 ovos
• 1 sobre de lévedo en po
• 1 cullerada de esencia de vainilla

Para o recheo:

• 500 gr de crema de cacao

Croquetas de castañas

Boas amig@s!!!! Tiñamos unha receita gardada hai un par de semanas e entre volta e revolta case vaia aló o outono, así que xa era hora de vos presentar esta novidosa receita que está máis que boa!  Quen os teña, debe tirar prexuízos, xa que hai outras moitas formas de degustar as castañas alén de asadas e cocidas, e con moi bo resultado, asegúrovolo. Xa nos temos encontrado con moitas persoas que no relativo á castaña é moi conservadora, mais na verdade, este produto un grandísimo recurso e ofrécenos moitas variantes pola intensidade do seu sabor.

Ben, é certo, nós ao principio tampouco o tiñamos moi claro mais decidimos probar tanto coa crema de castañas como agora con estas croquetas e quedamos moi satisfeitos. O malo, coma outros moitos produtos, é que temos un tempo reducido para desfrutar delas xa que os nosos castiñeiros non traballan todo o ano, haha. E aínda por riba, temos a sensación de que este ano non viñeron moi boas as castañas... Encontrámonos con moitísimas de mala calidade... Con todo, dedicando un pouco de tempo á escolla, xa que abonda con poucas, podemos elaborar delicatessen como estas:

Croquetas de castañas

Ingredientes:

• 12-15 castañas asadas 
• 1 cebola 
• 40 gr de manteiga
• 40 gr de fariña, máis extra para empanar
• 500 ml de leite
• 1 ovo
• Pan relado
• Pirixel
• Pementa moída
• Sal
• Aceite

Petit choux

Xa andamos por aquí unha outra vez, despois duns días de inactividade blogueira, que non gastronómica. Comentamos varias veces que a cociña que máis apreciamos é a galega, posibelmente polo feito de ser a nosa, mais tamén é certo que nos atrae moitísimo probar produtos de diferentes partes do mundo. Así pois, hoxe presentámosvos a nosa incursión na cociña francesa, a través destes pequenos doces feitos con masa de orixe gala. Con todo, non está clara a súa procedencia, xa que parecen existir documentos en que se menciona a Catalina de Medici como a persoa que levou a masa de Italia a Francia. O que si parece estar máis claro é que foi inventado por un pasteleiro chamado Popelini que nun primeiro momento lle daría o seu nome ao doce.

Son unha delicias de pequeno tamaño, como di o seu nome, que decidimos facer aínda máis petit para aproveitar a masa e desfrutarmos dun bo número destes pasteis.

Petit choux

Ingredientes (para 45 unidades):

• 125 gr de fariña
• 75 gr de manteiga
• 3 ovos
• Para o recheo: crema pasteleira
• Para a decoración: chocolate con avelás

Tortillas mexicanas

Estamos por aquí outra vez cunha receita algo diferente das últimas penduradas no blogue. Nós que somos seguidores da cociña mexicana, mercamos frecuentemente o pan e o sazonador para facer fajitas, burritos... Con todo, pensamos en facelas máis naturais/caseiras polo que decidimos probar sorte co pan, con esas tortillas finas idóneas para degustar este tipo de produtos mexicanos.

Este pan é moi moi sinxeliño de facer e resulta bastante económico xa que nin sequera ten que ir ao forno, só debe repousar e pasar pola prancha. Ademais a súa elaboración é bastante entretida pola súa facilidade de amasado e estirado. Se tedes peques pola casa, podédeslle deixar argallar co rolete e que creen as formas que máis lles guste. Talvez non sirvan para reenchelas, mais a eles/elas seguro que lles encantan con esas personalizacións.

Aquí de momento probamos coas formas clásicas para despois degustalas cun pouco de polo, cogomelos, pementos e cebola. Non lle deixan nada que envexar ás que encontramos no supermercado, de feito notaredes un sabor bastante máis natural. A ver que vos parecen ;-) 

Tortillas mexicanas

Ingredientes:

• 250 gr de fariña de trigo
• 125 ml de auga
• 50 ml de aceite de oliva
• 6 gr de sal
• 2 gr de lévedo en po