Caracolas de allo

Bo domingo, bolboreteir@s. Como estades? Nesta ponte das Letras galegas a verdade é que non nos está quedando tempo para moita cousa entre correccións e correccións así que hoxe presentamos un petisco rápido para ese tipo de xornadas máis atarefadas. 

Xa sabedes que con follado pódense facer mil e unha marabillas simples e no noso frigo ou conxelador nunca falta. É certo que a nós gústanos moito o seu sabor, aínda que for sen nada máis, pero recomendamos igualmente para calquera persoa telo sempre á man porque dá para improvisar receitas moi diversas.

Na receita que aquí segue vai lograr o protagonismo o allo. Os boliños allados, as masas aromatizadas con allo... son éxito seguro e aquí temos unha nova mostra. A textura tradicional do follado, a intensidade do ingrediente principal levan a un petisco do máis agradábel. A por el!

Caracolas de allo

Ingredientes:

• 1 lámina de follado
• 4-5 dentes de allo
• 2 culleradas de manteiga

Gulas con gambas

Boa sábado de Entroido, bolboreteir@s! Hai un ano andabamos preparando todo para coñecer o entroido do sur: Xinzo, Laza, Verín... Foi unha experiencia tan espectacular que prometemos volver este ano. Mais xa vedes, igual que aos demais, tamén nos tocou aprazar unha promesa. Desta volta toca disfrazarse para andar pola casa, pasear e mesmo cociñar. Aínda que non vos é moi cómodo preparar a masa das roscas ou facer os freixós con algún conxuntiño que temos, hehe.

Vaia homenaxe nos imos dar nesta ponte. Recordade que tedes polo blogue a maiorías das receitas tradicionais do entroio: orellas, flores, filloas, roscas... Tedes para escoller. 

E entretanto, máis sabor por aquí, hoxe, algo moi sinxeliño!

Gulas con gambas

Ingredientes:

• 250 g de gulas
• 200 g de gambas
• 2 dentes de allo        
• 1 chile
• Pementa moída

Robaliza estilo Donosti

Bo día, bolboreteir@s! Como vai todo? Por sorte, parece que imos recuperando a normalidade pouco a pouco. Ou algo parecido á normalidade. Pero iso si, seguiredes facendo pan, ou? Nós como xa somos moi panadeiros de sempre, estabamos na gloria vendo as RRSS cheas de masas nestes meses.

Sexa como for, hoxe non vai de pan senón de peixe, un dos puntos fracos do blogue a pesar de sermos de terra mariñeira. A verdade é que non é o produto que máis dominamos á hora de cociñar (fica moito por aprender) e tampouco é o recurso máis económico para a cociña do día a día, aínda que é certo que hai peixes e peixes. 

Mais non pensedes que non nos gustan, eh, de feito a un de nós, encántanos. A outra non tanto, haha. E como había tempo que non presentabamos nada de mar, optamos por un dos nosos peixes favoritos. Por dous motivos: o sabor e o feito de ser o pescado que comemos o día da nosa voda. Ai, que recordos! 

Ben, pois procurando pola rede ideas, ficamos con esta de "Directo al paladar" que nos pareceu sinxela e ben apetecíbel. A ver que vos parece. Por certo, robaliza, quedade co nome que cada vez é máis difícil encontralo ben chamado ;-)

Robaliza estilo Donosti

Ingredientes:

• 2 filetes de robaliza
• 2 dentes de allo
• 4-5 culleradas de aceite

Verduras gratinadas con patacas

Bo día, bolboreteir@s! Como imos? Hoxe traemos un prato moi moi sinxelo e ao tempo tamén moi eficaz para integrarmos verduras con sabor na nosa rutina. Interesante tamén se hai peques na casa para lles ofrecer unha variedade ampla de produtos ben beneficiosos e nutritivos.
Se algo non falta no noso frigorífico, a verdade, son verduras, xa que as aproveitamos para o que sexa. É certo que en moitas ocasións actúa de acompañantes mais en receitas coma estas ocupan o papel de protagonistas principais de luxo!
Ben, aquí vos vai. Parece obvio mais a clave deste prato non está na elaboración xa que non ten compelxidade ningunha e si en contar cuns bos produtos. E se os temos acabados de saír da nosa hortiña xa sería marabilloso. No noso caso non houbo esa sorte aínda que o saboreamos inmensamente de todas formas.

Verduras gratinadas con patacas

Ingredientes:

• 3-4 patacas
• 2-3 cenorias
• 1 cebola
• 1 pemento
• 1 tomate
• Queixo relado (opcional)
• Allo en po
• Ourego
• Pementa moída
• Sal

Pan naan

Bo día, bolboreteir@s! Agardamos que manteñades o ánimo e a forza para resistirmos estes días/semanas que fican de confinamento. Por aquí xa temos case para un novo libro de tantas reeitas que levamos feitas nesta semana. 

Desta volta imos cun pan bastante diferente. Xa sabedes que é unha das nosas paixóns e gústanos probar unha e mil variantes. Esta non é a mellor xa que a nosa perdición máxima son as receitas de pan tradicional galego (aí si que o noso é o mellor, con diferenza, ha!) mais si é un dos tipos de pan con máis sabor que até agora encontramos.  De orixe india sorprende por non precisar forno e por non deixar indiferente. Ollade que apetitoso!

Pan naan

Ingredientes:

• 250 g de fariña
• 30 ml de auga morna
• 15 ml de aceite
• 9 g de bicarbonato
• 5 g de sal
• 5 g de azucre
• 1 iogur natural

Zamburiñas

Boas festas, bolboreteir@s! Esperemos que esteades pasando uns días marabillosos coa vosa xente. Nós estamos a vivir un Nadal do máis especial mais iso si, en calquera momento, rebentamos!

E falando de comida. Non vos pasou nunca que non sabedes como puidestes vivir sen algo até o momento en que o probades. Pois as zamburiñas entraron hai ben pouco na nosa listaxe de mariscos e fixérono para quedar para sempre. E este foi o primeiro Nadal en que as preparamos na casa e guauuuuuuuu. Que delicatessen! Un destes mariscos aos que apenas lles fai falta nada para sobresaír. Ben, en realidade como a maior parte dos nosos produtos do mar. Aquí vai!

Zamburiñas

Ingredientes:

• Zamburiñas
• Aceite de oliva

Boliños de queixo

Bo día, bolboreteir@s! Mimadriña como estamos aproveitando para cociñar receitas novas neste mes. Lemos hoxe que vai todo o mes con auga e nós aquí vemos unha oportunidade para nos beneficiar do tempo na casa.

Desta volta preparamos un petisco sinxeliño que xunta dous dos nosos produtos favoritos: pan e queixo. Ou máis ben, botamos man do queixo para chegar a un pan ben especial, cheo de sabor.

É certo que estes vémolos máis como entrante de menú que como outra cousa. Sexa como for, ides gozar dunha boa delicia que podemos adaptar a calquera queixo e tamén a calquera tamaño. Aquí vai a nova receita.

Boliños de queixo

Ingredientes:

• 250 g de fariña
• 150 g de queixo
• 70 g de manteiga
• 1 sobre de lévedo en po
• 1 cullerada de allo en po
• 1 culleriña de azucre
• Un chisco de sal

Para a decoración:

• 50 g de queixo
• 50 g de manteiga

Cogomelos ao allo

Bo día, bolboreteir@s!!! Aquí seguimos, agardando xa a chegada do verán e das vacacións e especialmente do bo tempo que parece vai chegar nos próximos días. Hoxe presentamos un destes pratos con escasa dificultade e que se converten nun recurso do máis interesante tanto como gornición como cea lixeira.

Aínda que non é época forte de cogomelos, no noso frigorífico nunca faltan e desta fixemos acopio de diferentes tipos para prepararmos unha delicia. Por certo, tarefa pendente. Aprender a recoller cogomelos. A ver se para o próximo outono... Haha.

Ollade e saboreade :-)

Cogomelos ao allo

Ingredientes:

• 400 g de cogomelos variados
• 3-4 dentes de allo
• 2 culleradas de pirixel
• 1 chile
• Pementa moída

Pan allado con queixo

Bo día, bolboreteir@s! Con canta fame nos levantamos hoxe. Cando é así apetécenos aínda máis escribir estas receitas aínda que estas provocan que esa fame vaia aumentando recordando delicias como esta última, co queixo como protagonista principal e o allo secundario de luxo. Ha! 

Realmente, este foi un deses caprichos visualizados nestas páxinas de Tasty en redes sociais e que decidimos pór en marcha ipso facto pois veredes que só a foto abre o apetito.

Nós é certo que o pan desfrutámolo só e no camiño da panadaría á casa papamos media bola ou barra mais ninguén pode rexeitar unha oportunidade coma esta de o engalanar cun dos outros produtos de máis honra no país. A que non? Imos a pola nova receita!!

Pan allado con queixo

Ingredientes:

• 1 bóla de pan
• 1 bóla de queixo mozzarella
• 50-60g de queixo San Simón
• 2 dentes de allo
• 2 culleradas de manteiga
• Perexil

Lagostinos ao forno

Bolboreteir@s! Como foron estes días de comiolas e enchentas? Agardamos que moi ben e sen ningunha indixestión. Ás veces é difícil pór freo ante tantos manxares.

Ben, hoxe, traémosvos un clásico dos menús natalicios, os lagostinos. Un dos mariscos de maior éxito que se adoitan degustar sen mollo desfrutando do seu sabor exquisito. Pero é certo que ás veces se presentan dúbidas á hora de os cociñar pois na grella deixan moitísimo fume pola casa adiante e este tarda en marchar despois, aínda que teñamos o extractor aceso durante un bo anaco de tempo.

Pois nós, desde xa hai anos optamos por preparalos ao forno, non existindo apenas diferenzas no sabor ao tempo que temos un cociñado moito máis cómodo e limpo.

De paso, para @s que nos vos coincidiu lernos nas RRSS nestes días, comentámosvos o que deixou o Apalpador para vós, bolboreteir@s! Até o día 30 deste mes, o sábado, poderedes conseguir un exemplar de "Os arquivos de Escarlatina" (Editorial Xerais), a sensación literaria do Nadal en Galiza, que chega da man de Ledicia Costas, con ilustracións de Víctor Rivas. Este libro cheo de xogos, imaxes e receitas macabras pode ser voso con comentar en calquera destas últimas receitas (esta, por exemplo) e seguirnos ben en Twitter ou ben en Instagram [nas dúas tamén serve, claro ;-)]. Se non tedes ningunha destas redes, na nosa páxina de Facebook poderedes ver outra forma de o conseguir.

Con isto queremos celebrar o 4º aniversario de Bolboretas no bandullo que se cumprirá o vindeiro sábado. Ese día anunciaremos o gañador. Agora, a participar e a desfrutar destes lagostinos. Ñam, ñam! 

Lagostinos ao forno

Ingredientes:

• 1 kg de lagostinos
• 6-7 culleradas de aceite
• 6-7 dentes de allo
• 1/4 culleriña de sal

Navallas á prancha con aceite e allo

Chegou o último día do ano mais vimos igualmente con receita, coa derradeira deste 2016. E con algunha sorpresa máis pois como xa sabedes, onte foi o noso 3º aniversario. Si, que rápido pasa o tempo. Xa tres anos pola rede convosco, tres anos de lambetadas, salgados, artigos e moita ledicia da vosa man. Así pois, a noticia para estes tres anos é a chegada de Bolboretas no bandullo a Youtube. Unha noticia que xa adiantáramos na Sala Capitol no LGx15 mais que agora vos presentamos a tod@s. Xa podedes visitar a nosa canle e ollar o vídeo de chegada no que anunciamos a primeira videoreceita co novo ano, concretamente no 8 de xaneiro Youtube: Bolboretas no bandullo. Agardámosvos neste novo formato que non lle restará tempo nin espazo a este senón que o complementerá.

E voltándomos ao comestíbel, presentámosvos un luxo de Nadal co que despedirmos 2016. Un manxar que tiñamos encaprichado desde hai tempo e que cumprimos coa excusa destes días de celebración. Cremos que este é o modo máis sinxelo de preparar as navallas, mantendo ao tempo o seu propio sabor. Desfrutámolas moitísimo. Agora, xa tedes en disposición a receita para seguirdes:

Navallas á prancha con aceite e allo

Ingredientes:

• 800 g de navallas
• Aceite
• Sal

Para a salsa:

• 100 ml de aceite
• 2 dentes de allo

Revolto de gambas e espárragos verdes

Avante coa finde, bolboreteir@s! Após un semana ben estraña con tanto feriado de por medio, chega o sábado de receita cun prato xa pensado para os menús especiais das vindeiras datas natalicias. Como procuramos que Bolboretas no bandullo sirva de inspiración ou de axuda para as vosas creacións, imos pensando xa nese Nadal que se aproxima á velocidade da luz.
E como talvez teñades pensado incluír como pratos fortes algunha carne ou peixe, nós matinamos nun entrante no que a verdura sexa ingrediente chave, neste caso a través dos nosos benqueridos espárragos verdes ao que tanto nos afeccionamos ultimamente. Un revolto era unha das mellores opcións pois dá lugar a todo tipo de variantes admitindo moi diversos produtos. Con todo, parece que aquí a combinación levou a unha fusión de sabores exquisita! Estaban agardando uns por outros, haha.
Dificultade do prato... mínima. Así que, xa sabedes, na Noiteboa ou Fin de Ano, podedes deixar a preparación deste prato ao máis inexpert@ cociñeir@ da casa. Así sentirase importante na configuración do menú e talvez lle colla mesmo gusto a isto ;-) Aí o tedes!

Revolto de gambas e espárragos verdes

Ingredientes (para dúas persoas):

• 200 g de gambas
• 5-6 espárragos
• 1/2 cebola
• 2-3 dentes de allo
• 1 chile
• 1 ovo
• Pementa moída
• Sal

Escalivada

Cantas ganas de Mediterráneo e cantas ganas de Catalunya, que tanto nos encanta! Como nos entrou morriña daquelas terras tivemos que botar man do modo máis rápido e sinxelo que se nos ocurriu, a través dunha das súas receitas tradicionais, a escalivada que xira arredor das tan saborosas verduras que por alí teñen. Non pode estrañar, con ese clima...

Esta denominación, que por certo nos encanta, provén do verbo catalán caliu que significa brasa, e do verbo escalivar, asar ás brasas. Nós na cociña carecemos das brasas así que optamos polo modo simple, que traballe o forno! 

É un dos pratos máis sinxelos do mundo e que ao seu tempo teñen o toque de quen cociña mais a clave está no produto. Non temos berenxena, pemento e cebola mediterráneas mais si temos uns produtos da horta que dan para facer a mellor festa de verduras do mundo e desta volta lográmolo coa receita da escalivada! 

1,2,3... endavant!

Escalivada

Ingredientes:

• 1 berenxena
• 1 pemento vermello
• 1 pemento verde
• 2 cebolas
• 3-4 dentes de allo
• Aceite de oliva 
• Sal

Lacón asado

Imos tirar de clásicos nesta última receita de xuño. Porque ás veces reparamos en que non traemos certas receitas pensando que poden ser demasiado simples mais que realmente son elementos de valor da gastronomía do día a día. Ademais, que estes pratos van tamén pensando n@s máis nov@s, que en moitas ocasións nos mantemos distantes con alimentos de consistencia como o de hoxe por respecto. Ou o fermoso que é ver un rapaz ou unha rapaza a preparar un caldo galego ou un lacón asado. Hummm, resulta mesmo estimulante a idea :-)

Pois desta volta nós aproveitamos o menú das festas de San Xoán para dar cabida ao lacón. Hai quen di que esta carne se fai algo seca mais cremos que iso se pode deber a unha preparación defectuosa. Require un bo cociñado e certa atención ao adobo para lograr unha carne substanciosa, mais seguíndomos os pasos aquí indicados non deberiamos ter problema. De feito, seguro que moit@s de vós o preparades tamén así. Ollade e comparade ;-)

Lacón asado

Ingredientes:

• 4 kg de lacón
• 6-7 dentes de allo
• 250 ml de viño branco
• 1/2 vaso de brandy
• 1/2 vaso de auga
• 1/2 vaso de aceite de oliva
• 1 culleriña de pemento doce

Tosta salteada de falso meixón e brócoli

Chegou a fin de semana e seguen as receitas de Bolboretas no bandullo despois dunha semana moi especial en que estivemos de visita por Carballo. Por certo, aproveitamos o artigo para agradecermos o convite e a asistencia de todas as persoas que no auditorio estivestes. Non quedou ninguén sen participar o que nos encheu de alegría!
Ben, pois seguimos argalla que te argalla coas receitas! Desta volta cun experimento. Como sabedes, ultimamente andamos con menos tempo por mor do traballo. Así pois, procuramos solucións rápidas para as ceas e tamén para vos presentar no blogue. Desta volta, antolláronsenos as coñecidas como "gulas" así que decidimos procurarlles forma. Para ganar en consistencia, procuramos unha base de follado ao estilo das tostas de pan e gañamos en forza co brócoli que tanto nos gusta.
Agora ben, explicamos o nome do prato. O termo gula non existe no galego para nos referir á cría da anguía. O nome para esa miniatura mariña é meixón. Porén, as que compramos no mercado adoitan estar feitas principalmente con surimi e non cos propios meixóns, de aí que lles chamemos falso meixón. Desta vez non se debe a ningún truco culinario, haha.

Tosta salteada de falso meixón e brócoli

Ingredientes:

• 250 gr de sucedáneos de meixón   
• 1 brócoli
• 1/2 lámina de follado
• 4-5 dentes de allo
• Aceite de oliva
• 1 chile
• Pementa moída
• Sal
• Un chisco de fariña

Costelas con salsa barbacoa

Benqueridos amigos e amiga, chegou o día preferido da semana. Xa é fin de semana e por riba, nova receita de Bolboretas no bandullo de agasallo, ideal para afrontar con forza a última semana de abril.

E tiramos unha outra vez de clásico. Xa sabedes que gustamos da combinación entre pratos máis tradicionais e outros innovadores. Pois ben, a costela con salsa barbacoa é unha receita que, non sendo propia de Galiza, nin moito menos, todo o mundo coñece. Principalmente por ese mollo característico que normalmente mercamos no supermercado mais que desde hoxe seguro que o deixades para o facer na casa.

De feito, a salsa barbacoa é unha das nosas salsas preferidas e críamos que xa ía sendo hora de nos animar con ela. Ademais, que sempre nos chamou moito a atención os elementos que dela formaban parte (coca-cola, mel, vinagre...). Soa estraño, haha.

E como as salsas de por si soas perden sentido, optamos por ir ao seguro cunha costela de porco. Pouco vos podemos dicir, cremos que xa intuídes o resultado :-)

Costelas con salsa barcaboa

Ingredientes:

Para a costela:

• 2 tiras de costela
• Pementa moída 
• Sal

Para a salsa barbacoa:

• 1 cebola 
• 4 dentes de allo
• 1 vaso e medio de Kétchup
• 3 culleradas de mostaza
• 3 culleradas de mel

Spaguetti de cabaciña con tomate seco

Estades preparad@s? Porque o de hoxe seguro que non o esquecedes. Xa vos adiantamos que nós, desde que probamos este prato, volvímolo facer tres veces. E probámolo hai moi pouco, haha.

No mesmo menú en que incluímos as falsas madalenas, presentamos esta xoia que tamén adoita sorprender a quen ten oportunidade de a probar. Unha cabaciña cortada que nos recorda claramente á pasta italiana, de aí o nome. Canto á textura, preséntanse máis brandos, aínda que moi "carnosos" para desfrutar de cada un dos bocados que degustamos.

Chama a atención, como estes spaguetti absorven os sabores de todo aquilo que os acompaña. Por iso resulta importante non pasarse co aceite. Neste caso, estas liñas de cabaciña acabaron por facerse co toque do allo, queixo, chile e demais, converténdose nunha verdadeira potencia deliciosa. Aí vos vai:

Spaguetti de cabaciña con tomate seco

Ingredientes (para 4 persoas):

• 3 cabaciñas grandes
• 1 bote de tomate seco en aceite
• 2-3 dentes de allo
• 2 culleradas de aceite
• Queixo relado ao gusto
• 1 chile
• Pementa moída

Boliños integrais de allo e mozzarella

Xa fin de semana! Tardaba, verdade?? Para nós esta foi unha semana moi boa así que tampouco tiñamos moita présa por que remara, mais si é verdade que sempre agardamos impacientemente polo sábado para vos traer unha nova receita. E hoxe toca unha nova larpeirada, non por doce, senón porque cremos que só con maxinala, xa se nos fai a boca auga...

Vimos hai tempo en Youtube unha receita en inglés similar a esta e decicimos preparala xa que existe algo mellor que eses produtos que gardan un centro de queixo que se derrete na nosa boca ao meterlle o dente? E si, nesta receita, o queixo obtén o protagonismo, aínda que se acompaña moi ben dunha masa integral e toque allado, que sempre se fai imprescindíbel.

Que tal os vedes para acompañar un pouquiño de pasta? Mmmmm...

Boliños integrais de allo e mozzarella

Ingredientes (para 20 boliños):

Para a masa:

• 300 gr de fariña integral
• 200 ml de buttermilk 
• 70 gr de manteiga
• 1 cullerada de allo en po
• 1 culleriña de cebola en po
• 1 culleriña de lévedo en po
• Un chisco de azucre
• Un chisco de sal

Faragullas de pescada

Non queremos que pensedes que nos esquecemos do peixe, eh! Que ben bo que está, aínda que talvez o deberiamos aumentar na nosa alimentación. E un dos que sempre temos a man é a pescada, xa que o consideramos superversátil e recorrente.

Mais para que vexades que non todo está planificado na cociña e non todo sae ben, contámosvos como chegamos a esta receita. De seguro que vos teñen pasado cousas parecidas:

Tiñamos pensado aproveitar media pescada que tiñamos no forno para lle sacar uns filetes e facelos á grella. Mais claro, era a nosa primeira vez para dito labor. E fracasamos, haha. Non fomos capaces de lamilas a pescada, a falta de experiencia pagouse desta volta. Mais claro, non iamos desaproveitala, por suposto que non. E o que fixemos foi retirar os anacos que desfixemos na tentativa, para elaborar unha receita con eles. E isto foi ao que chegamos:

Faragullas de pescada

Ingredientes (para 2 persoas):

• 1/2 pescada
• 1/2 cogombro
• 2-3 dentes de allo
• 1 presa de pirixel
• 1 chili
• 2 culleradas de aceite

Focaccia rechea de mozzarella e xamón

Como di o xenio da cociña Ferrán Adriá, "ter ideas é sinxelo... só hai que telas". Pois iso, a nós véñennos continuamente novas ideas para compartir con todos vós aquí e non dubidamos un intre en preparalas para que vexades o resultado. E procuramos complicarnos o máis mínimo para que non lle resulte complexo a ninguén. E desde a simplicidade lógranse os máis exquisitos pratos como esta focaccia.

Xa sabedes que non é a primeira vez que elaboramos focaccia, mais é que talvez esteamos ante un dos nosos favoritos, sexa na versión que for. De feito, estamos preparando un artigo con aquelas receitas do blogue máis recorrentes na nosa alimentación e a focaccia xa vos adiantamos que non faltará.

A verdade é que non a coñecimos até unha viaxe que fixemos a Milano e desde aquela... amor eterno, haha. Mais desta última volta decidimos potenciala, nunca mellor dito, dándolle aínda máis protagonismo para calquera menú cun recheo cremoso de mozzarella, xamón e tomate que a converten nun manxar moito máis completo e contundente. Iso si, sen perder eses trazos que caracterizan a nosa focaccia: crocante, co seu aroma allado, as súas especias... Que delicia, señores e señoras, que delicia!!!

Focaccia rechea de mozzarella e xamón

Ingredientes:

Para a masa:

• Masa de focaccia e aceite aromatizado (receita aquí)

Para o recheo:

• 8-10 lascas de xamón
• 1 bola de queixo mozzarella
• Salsa de tomate
• 1 cullerada de cebola en po