Pizza, en masa de follado, saudábel

Bo día, bolboreteirxs! Case finde, verdade? Que ganas temos xa despois desta semana de exames!

Como vedes, aquí estamos un xoves máis cunha nova receita. Desta volta, unha pizza, que nos inspirou TikTok ;). É moi vistosa e saborosa, ademais de ser moi completa nutricionalmente. Nós propoñémosvos estes ingredientes, mais sabedes que hai que xogar cos ingredientes, e ver tamén que temos na casa!

A masa co toque do sésamo queda xenial e moi crocante!

Aquí vos deixamos a receita!

Pizza, en masa de follado, saudábel

Ingredientes:

• 1 lámina de follado
• Pesto:
• Anacardios
• Alfábega
• Parmesano
• AOVE
• Pementa moída
• Tomate cereixa (ou tomate normal)    

Caracolas de allo

Bo domingo, bolboreteir@s. Como estades? Nesta ponte das Letras galegas a verdade é que non nos está quedando tempo para moita cousa entre correccións e correccións así que hoxe presentamos un petisco rápido para ese tipo de xornadas máis atarefadas. 

Xa sabedes que con follado pódense facer mil e unha marabillas simples e no noso frigo ou conxelador nunca falta. É certo que a nós gústanos moito o seu sabor, aínda que for sen nada máis, pero recomendamos igualmente para calquera persoa telo sempre á man porque dá para improvisar receitas moi diversas.

Na receita que aquí segue vai lograr o protagonismo o allo. Os boliños allados, as masas aromatizadas con allo... son éxito seguro e aquí temos unha nova mostra. A textura tradicional do follado, a intensidade do ingrediente principal levan a un petisco do máis agradábel. A por el!

Caracolas de allo

Ingredientes:

• 1 lámina de follado
• 4-5 dentes de allo
• 2 culleradas de manteiga

Falsos calacús

Samaín, Samaín, vente vindo, que nós xa estamos con todo preparado. Andamos facendo probas para a configuración dos días de defuntos e da noite de Samaín e dunha desas probas saíu isto.

Unhas cabaciñas que nin teñen pébedas nin son froito, e que no sitio, teñen un recheo de carne moi moi saboroso. E como vedes, recórdannos na forma exterior aos calacús, como lle din en diferentes zonas da Galiza.

Pois ben, a verdade é que é un aperitivo ou incluso prato principal ben apetitoso que apetece mollar nunha salsa. Neste caso estabamos folgazáns e optamos por un clásico do súper, o ketchup. E moi ben. Se andadades con folgos, preparádelle un mollo caseiro e será xa top. Aquí vai a primeira idea deste ano para o noso Samaín gastronómico. 

Falsos calacús

Ingredientes:

• Masa follada
• 300 g de carne picada
• 1 bóla de mozzarella
• Pementa doce 
• Curry
• Allo en po

Caracolas de chocolate

Ola, bolboreteir@s!!! Si, a ver, o da dieta talvez quede para outra semana, outro verán ou outra pandemia porque non nos podemos resistir ante tantas tentacións cerca. Desta volta, ante a visita dunha amiga pensamos en preparar algo moi lambón en pouquiño tempo e demos coa combinación que cumpre á perfección eses requisitos. Se hai algo que nunca decepciona é a mestura de follado e chocolate. 100% eficaz (senón, devolverémoslle o tempo investido na preparación da receita, que ben pouco é).

Trenzas, flores, caracolas... non é moita innovación. Simplemente damos un aspecto que nos guste e despois simplemente toca gozar. O dito, aquí está a nova lambiscada!

Caracolas de chocolate

Ingredientes:

• 2 láminas de follado
• Crema de cacao con abelás
• 1 ovo

Strudel de mazá

Ola, bolboreteir@s!! Como vai todo?? Despois duns días de moito traballo e ledicia polo Culturgal (viva a nosa cultura!), toca continuar coa rutina blogueira. Desta volta imos tentar adozamos esta semana xa de por si curta. Optamos pois por unha sobremesa (xa había tempo!), de orixe austríaca e alemá que nunca probaramos mais xa tiñamos anotada desde hai tempo. Para nós non tiña moita intriga o resultado pois hai produtos que garanten o éxito. A combinación de follado e mazá asada vén sendo unha das nosas perdicións desde hai tempo así que só quedaba desfrutar. Se por riba o comlementamos como aquí... Vaia festa culinaria. Ñam!

Strudel de mazá

Ingredientes (para 2 unidades):

• 2 láminas de follado
• 4 mazás
• Arandos deshidratados
• Noces
• 4-5 culleradas de azucre
• 1 cullerada de canela

Roliños de paté de olivas e salmón

Boa tarde, bolboreteir@s! Seguen as receitas, segue o sabor en Bolboretas no bandullo! Nunhas semanas de moito movemento e actividade, imos introducíndonos progresivamente na rutina. Na semana pasada, aproveitando que tiñamos unha cea cuns moi bos amigos, decidimos crear, dando lugar ao arroz que vos presentamos no pasado sábado.

Ben, pois adentrámonos nese menú tan saboroso, cun petisco deste que fican no maxín. O salmón afumado, que tanto adoita gustar, convenceunos tamén moito aquí.

Imos por esta apetecíbel receita.

Roliños de paté de olivas e salmón

Ingredientes:

• 1 masa de follado
• 200 g de salmón afumado
• 150 g de olivas

Rolos de xamón

Bo día, bolboreteir@s! E si, por aquí é moi moi bo día. Como comprobastes, ficounos algo menos de tempo ultimamente para o blogue, de aí que levemos un tempo con receitas máis sinxelas e rápidas. Mais todo tiña unha boa xustificación. Andabamos en recta final de opos e finalmente completamos o pack de funcionarios da casa. Beeeeeeennn!!! Agora estamos para celebrar. Aínda que ben, non chegaron completamente as vacacións pois andamos tamén rematando o proxecto que temos entre mans para Bolboretas no bandullo e vos conquistará. Non dicimos moito máis.

Ben, pois hoxe, seguindo a liña das últimas semanas, traemos un petisco moi simple mais moi moi efectivo, principalmente porque tiramos de dous produtos que funcionan á marabilla: follado e xamón. Son dous básicos ben diferentes que nunca faltan na nosa cociña. Imos alá pois co entrante ideal para os vosos menús.

Rolos de xamón

Ingredientes:

• 1 lámina de follado
• Lascas de xamón

Pastéis de Belém

Fin de semana e chega con el a receita dunha das grandes marabillas gastronómicas que probamos no último ano. Estamos a falar dos famosos Pastéis de Belém, un símbolo da repostaría lusa e especialmente de Lisboa. Neste verán, após visitar o Algarve, paramos em Lisboa, cidade marabillosa na que nunca estiveramos até o momento. E como non, achegámonos até o bairro de Belém para, principalmente, probar os sonados pasteis. Ollade como foi a experiencia na famosa fábrica a carón do Mosteiro dos Jerónimos que entramos para comprar media ducia deles para probar e, cando saímos, metímoslle o dente a un deles e tivemos que volver á tenda para coller outros tantos. E iso que había cola e cola para entrar. Mais merecía a pena.

Xa teñen un longo percorrido, desde 1837 cando se comezou a preparar nos anexos do dito mosteiro uns pasteis que rapidamente colleron sona, sobre todo entre a xente que chegaba en barco, xa que no momento a distancia até Lisboa era máis notábel. De todas formas, se quixerdes saber máis da historia destes doces que xurdiron como resistencia dos traballadores expulsados do mosteiro, podedes consultala aquí.

Ollade pois, unha receita histórica!

Pastéis de Belém

Ingredientes (para 12 unidades):

• 1 lámina de follado
• 500 ml de leite
• 250g de azucre
• 1 ovo
• 5 xemas
• 50g de fariña

Tosta salteada de falso meixón e brócoli

Chegou a fin de semana e seguen as receitas de Bolboretas no bandullo despois dunha semana moi especial en que estivemos de visita por Carballo. Por certo, aproveitamos o artigo para agradecermos o convite e a asistencia de todas as persoas que no auditorio estivestes. Non quedou ninguén sen participar o que nos encheu de alegría!
Ben, pois seguimos argalla que te argalla coas receitas! Desta volta cun experimento. Como sabedes, ultimamente andamos con menos tempo por mor do traballo. Así pois, procuramos solucións rápidas para as ceas e tamén para vos presentar no blogue. Desta volta, antolláronsenos as coñecidas como "gulas" así que decidimos procurarlles forma. Para ganar en consistencia, procuramos unha base de follado ao estilo das tostas de pan e gañamos en forza co brócoli que tanto nos gusta.
Agora ben, explicamos o nome do prato. O termo gula non existe no galego para nos referir á cría da anguía. O nome para esa miniatura mariña é meixón. Porén, as que compramos no mercado adoitan estar feitas principalmente con surimi e non cos propios meixóns, de aí que lles chamemos falso meixón. Desta vez non se debe a ningún truco culinario, haha.

Tosta salteada de falso meixón e brócoli

Ingredientes:

• 250 gr de sucedáneos de meixón   
• 1 brócoli
• 1/2 lámina de follado
• 4-5 dentes de allo
• Aceite de oliva
• 1 chile
• Pementa moída
• Sal
• Un chisco de fariña

Bolboreteando con... Nel Vidal

Consideramos que todas as persoas que até o de agora colaboraron connosco axudan en grande medida á dinamización e normalización do noso idioma, mais a figura que hoxe pasa por Bolboretas no bandullo leva anos dedicándose a isto directamente. A normalizar, a dinamizar, a crear, a promover, a visibilizar, a fomentar o uso do galego. Por iso Nel Vidal non podía faltar. Compartimos obxectivos con el e admiramos enormemente o seu traballo.Demos con Nel na súa terra de acollida, Carballo, cando comezabamos a afondar no campo da normalización da lingua, nun destes imprescindíbeis cursos de verán de que teñen saído mil e un proxectos para o idioma. Desde aquela, preséntasenos como un referente do que necesariamente aprender.

Marmelada de cebola con xitaque e queixo sobre follado

Que si, que si, a fin de semana xa está aquí!! E parece que ben con sol así que hai que aproveitar para saír das covas e desfrutar da beleza destes días.

E para darlle máis sabor a estes días, hoxe traémosvos un novo invento. Argallando argallando, fomos chegando a esta curiosa e especial larpeirada. Levamos un par de semanas que andamos vezando nesta masa tan saborosa que é o follado, así que pensamos en complementalo con algo novidoso e arriscado. E entendimos por risco a mestura do salgado e o doce, que neste caso se concretaba na marmelada de cebola. E parece que foi ben. Sobre todo porque logramos un prato cun toque moi moi característico e que se o prabades, veredes que nada ten que ver con ningún outro. Ollade:

Marmelada de cebola con xitaque e queixo sobre follado

Ingredientes:

• 1 lámina de follado
• 8-10 cogomelos xitaque
• 7-8 anacos de queixo San Simón afumado
• Marmelada de cebola
• Un chisco de fariña
• 1 cullerada de aceite
• Pementa moída
• Sal

Flor de chocolate

Que friaxe!!! Que bos días están para nos gardar na casiña e cociñar algo quente para entrar en calor. Sobre todo, co que presta nesas antigas cociñas de leña capaz de resistir contra o inverno máis duro.

Esta ideal situación enxebre non foi a nosa, mais o caso é irmos cociñarndo algunha que outra larpeirada e, sobre todo, desfrutala despois, haha. 

Hoxe imos cunha destas que triunfan sempre pola combinación perfecta de velocidade e sinxeleza. Canto a sabor, pouco hai que dicir. Tod@s sabemos do éxito da combinación simple de follado e chocolate. Non se precisa nada máis. Aínda coa gorentosa trenza de chocolate no maxín, probamos noutro formato.

Coñecímola a través dunha destas contas de que tanto gustamos tipo Tasty, Tastemade e demais. Iso si, antes de nós probar a facela, xa tivemos a sorte de degustala na casa duns bos amigos. Tan encantad@s quedamos que pasou á nosa listaxe de receitas pendentes. 

E aquí a tedes. Unha sobremesa sin complicación e alto rendemento visual e saboroso. Ideal para cando non fica moito tempo para completar o menú.

Flor de chocolate

Ingredientes:

• 2/3 láminas de follado
• 200 gr de crema de cacao e avelás
• 1 ovo batido
• Fariña (opcional)

Utensilios: bandexa de forno, papel vexetal, un rolete, unha culler e un vaso.

Dous aperitivos sinxelos e rápidos

Hoxe imos cunha entrada algo diferente porque xa sabedes que non queremos ficar na monotonía. Así pois traémosvos dúas ideas para esas ceas con convidad@s en que non sabedes que pórlles como aperitivos para os agradar e sen necesidade de perder moito tempo, xa que normalmente prefírese dedicar máis ao prato principal. Ben, pois poucas receitas pode haber máis fáciles e rápidas que estas. En apenas 5-10 minutos teredes preparados dous entrantes deliciosos cos que ir abrindo apetito.

O primeiro parte da idea dos rolos de salchichas, que nos encantan desde ben pequenos, mais que decidimos xuntar en espetos para lograr algo máis orixinal. Sexa como for, aseguran o éxito e dificilmente sobrará ningún.

O segundo aperitivo havos de sorprender como nos sorprendeu a nós. Coñecímolo en Mallorca, onde como xa dixeramos, temos familia. Son uns Doritos feitos ao forno. Dá o mínimo traballo, entre outras cousas porque o elemento principal xa vén preparado, mais co aderezo que lle pomos ganan moitísimo en sabor e fanse irresistíbeis. Ollade, de seguro que gustades destas ideas :-)

Espetos de rolos de salchichas

Ingredientes (para 6 espetos):

• 1 lámina de follado
• 6 salchichas
• 1 ovo batido

Utensilios: 6 picos e un pincel.

Canas de crema de castañas

Fin de semana outonal con frío e auga e nós poñémonos a traballar cun produto tamén moi outonal de grandísima calidade autóctona, a castaña. A nós encántannos, mais a verdade é que non saíramos até o momento das castañas asadas e cocidas, así que puxémonos a pensar nun posíbel prato castañeiro, e o que nos veu á cabeza foron estes doces recheos dunha crema cun sabor inconfundíbel.

A castaña, alén de estar boísima, é un froito seco de pouquísimas calorías polo baixo contido de graxas e a grande cantidade de auga que contén. Con todo, posúe moitísimos hidratos de carbono, o que o converteu nun magnífico recurso da alimentación galega para saciar a fame en temos de necesidade. Ademais posúe moita fibra, o que favorece o tránsito da flora intestinal e tamén potasio.

Na Galiza converteuse, como xa dixemos, nun produto fundamental da alimentación durante moito tempo. E aínda hoxe é en certa medida "adorado" como comprobamos nos populares magostos que celebramos arredor da castaña. O feito de que hoxe en día haxa tantos topónimos no país coa forma "souto" evidencia a grande presenza de castiñeiros no noso territorio.

Así pois, aquí tedes unha sobremesa saborosísima en que lle damos un outro papel á castaña.

Canas de crema de castañas

Ingredientes (para unhas 15 unidades):

• 1 prancha de follado
• 1/2 l de leite
• 200 gr de castañas
• 125 gr de azucre
• 50 gr de maicena 
• 10-15 gr de manteiga
• 4 xemas de ovo
• 50 gr de chocolate (opcional)

Trenza de follado

Xa estamos aquí de novo despois duns días sen vos poder ofrecer a última receita por problemas técnicos coa rede. É que hoxe en día, estar sen internet na casa é un dos grandes dramas vitais, haha.E traémosvos unha larpeirada... apta só para os máis chocolateiros e idónea para os fans das cremas de cacao. Aínda que tamén tivemos un detalle cos/coas fans do chocolate branco, que aínda que son menos, tamén sabemos que son moi fieis :-)A ver que vos parece, mais xa vos adianto que con esta ninguén terá problema na elaboración, é do máis sinxela, mesmo válida para argallaren @s máis pequen@s na cociña:

Trenza de follado

Ingredientes:

• 1 lámina de follado
• 1 ovo
• Para o recheo: crema de cacao, marmelada, chocolate branco

Palmeiras salgadas

Xa estamos aquí de novo amig@s! E desta volta cunha receita un tanto peculiar, que xurdiu destes momentos de inspiración, unhas palmeiras salgadas, ben diferentes das tradicionais que adoitamos degustar como sobremesa. 

Setembro é un mes de reencontros e de despedidas, e por tanto dá lugar a moitas reunións e ceas con amig@s ou compañeir@s. Pois ben, se vos toca cociñar nun destes encontros, coido que esta pode ser unha moi boa idea como aperitivo xa que son sinxelas e rápidas de facer e han de agradar aos convidad@s polo sabor e a novidade.

Ollade, ollade!

Palmeiras salgadas

Ingredientes:

• 1 lámina de follado
• 10 lascas de queixo
• 12 lascas de salchichón, ou o voso embutido preferido

Marabillas de melón

Parece que está asentando un pouco a calor na Galiza, aínda que coa impresibilidade característica de aquí, e por iso optamos por facer desta volta unha sobremesa moi fresca e lixeira, baseada nunha das froitas que máis apetece comer en verán, o melón. Había convidados para cear e xa que traían a cea, era obrigado pór a sobremesa, así que decidimos innovar e crear algo diferente. Así pois, estas marabillas de melón, son unha nova idea que, a verdade, nos encantou como quedou.

Marabillas de melón

Ingredientes:

• 2 láminas de follado
• 1/2 melón
• 4 ovos
• 70 gr de azucre
• 70 gr  de fariña de millo
• Manteiga para os moldes
• Azucre glas para a decoración

Milfollas de chocolate

Xa vos dixemos que o San Xoán en Covas deu para moito, e por iso hoxe traémosvos unha nova versión da milfollas. Se o outro día presentabamos a de cereixas, hoxe imos cunha para @s máis chocolateiros, aínda máis doce que a anterior.

As milfollas véndense normalmente en tamaño individual (pastel) aínda que non é estraño encontrarnos con tortas como a que nós fixemos, ideais para celebracións. Parece ter a orixe en Francia, aínda que tamén hai quen di que en España, e o recheo máis frecuente vén sendo crema, merengue ou incluso chocolate, como aquí nós fixemos. Aí vai:

Milfollas de chocolate

Ingredientes: 

• Dúas láminas de follado
• Crema pasteleira de chocolate (receita aquí)
• 125 gr de chocolate con leite
• 75 gr de chocolate branco

Pastel de verduras

Hoxe pensamos naquelas persoas que polo que sexa (non nos meteremos en temas relixiosos) teñen como costume o de non comer carne neste venres do ano. Fóra de crenzas podémolo facer para probarmos un día con peixe, verduras, froitas... Deste modo presentámosvos unha receita adecuada para tal día, un completo e saudábel pastel de verduras. Este prato é típico de Inglaterra, e de feito, a min chegou grazas a Ana, una amiga de Birmingham coa que estou a realizar un intercambio lingüístico. Unha fabulosa idea para o noso blogue e para vós que lle debemos agradecer :-)

Desde o Reino Unido unha receita perfecta para hoxe, mais por suposto para calquera outro día do ano. Esta receita seguro que encantará aos vexetarianos e aos apaixoados das verduras, e ha de atraer a aquelas persoas que as teñen algo esquecidas :-)

Pastel de verduras

Ingredientes:

• 1 masa de follado
• 1 cabaciña
• 1 pemento vermello
• 1 cebola vermella
• Queixo ao gusto
• 30 gr de abelás
• 1 ovo
• Aceite de oliva

Delicias de Kinder

Non pensedes que tiñamos esquecidos os doces, nin moito menos! Hoxe traémosvos unhas delicias moi amorosas e cun sabor fascinante.
A primeira quincena de febreiro é unha das épocas máis amorosas do ano xa que temos no 2 de febreiro a Candeloria, día da luz e do amor, e no próximo 14 o día de San Valentín, coñecido como o día dos namorados. O segundo, de orixe romana e pagá, vén sendo o máis celebrado actualmente polo seu pulo comercial. Mais na Galiza, a Candeloria, celebración de orixe relixiosa, veuse considerando un preludio do renacer da natureza primaveral. Víase como a época do casamento dos paxaros e tamén como a data en que os mariñeiros voltaban á navegación despois da espera invernal. Está considerada, por tanto, como a Festa do Amor, e desde aquí reivindicámola pola súa tradición galega.
Sendo así, e pensando nestas dúas celebracións amorosas, que menos que elaborarmos unha sobremesa na honra do amor para que elobaredes nos vosos fogares :-)

Delicias de Kinder

 Ingredientes:

• Masa de follado
• Crema de Kinder (ou crema de chocolate, de abelás, pasteleira, de amorodos...).
• Un ovo