Torta flor

Bo día, bolboreteir@s! Como foi ou está indo o Samaín? Decorastes cabazas? Preparastes os colares cos zonchos? E saístes de festa poñendo as ánimas como excusa?
Nós como sempre andamos argallando receitas e lambetadas pois nestas datas coinciden moitas celebracións e aniversarios pola nosa casa.
Así pois, matinando novas creacións, chegamos a coñecer unha torta grega coñecida como torta flor que ten como ingredientes principais a masa filo e a manteiga. Nós achegamos algo máis, claro. E non podía faltar o produto estrela de calquera lambón: o chocolate.
Vai pois esta delicia que ides ver entra como quen come pébedas de xirasol.

Torta flor

Ingredientes:

• Varias láminas de pasta filo
• 2-3 culleradas de manteiga
• 2-3 culleradas de crema de cacao
• 1 plátano
• Abelás

Para a crema:

• 400 ml de leite

Torta tenebrosa

Bo día, amig@s! Como vai. Aquí andamos emocionados xa coa chegada da primeira festa temática do outono. Aproxímase o Samaín, que por sorte vén recuperando terreo nos últimos anos e que nós queremos reforzar desde Bolboretas no bandullo coa creación de receitas axeitadas. Ademais, évos unha festa que dá moi ben co noso carácter. Xa sabedes, aquí somos moi de ánimas en pena, cemiterios e contos de medo arredor da lareira antigamente e agora pois... arredor dunha torta coma esta.

É ideal se tedes peques na casa. O Xiao de momento non dá a súa opinión mais nós imos practicando para cando se emocione máis con estas argalladas gastronómicas de seus pais. Entretanto, agardamos que vos poda servir para darlle un pouco de sabor e escuridade a estes días que se aproximan. Aquí a tedes.

Torta tenebrosa

Ingredientes:

Para o biscoito:

• 200 g de manteiga
• 200 g de azucre
• 190 g de fariña
• 4 ovos
• 1 cullerada de vainilla
• 1 cullerada de cacao puro

Pequenas pavlovas de trufa

Bolboreteir@s! Estamos aquí mes e medio despois, tras tomarnos un descanso mais vimos cargadiños de ilusión acompañados con Xiao para vos seguir traendo moitas máis receitas. Iso si, durante unha tempada reducimos a subida de artigos a só un por semana. Xa sabedes, o tempo cun bebé dá para algo menos, haha. Un período de adaptación, claro.

Ben, pois decidimos volver fortes, cun tipo de receita que adoramos e que marcou os inicios do blogue aínda que ultimamente non as temos tan traballadas. Falamos das sobremesas, unha perdición mais o noso campo favorito de creatividade.

A plavova non é a primeira vez que aparece por Bolboretas no bandullo, de feito xa temos publicado unha vídeo-receita á que podedes acceder abaixo. Chamada así na honra da bailarina Anna Pavlova sendo publicada a receita por primeira vez en Nova Zelandia. Desta volta fixemos a versión en pastel, con racións xa individuais. Difícil descrivirvos o pracer da degustación. Faltan adxectivos. Aí vai. 

Pequenas pavlovas de trufa

Ingredientes:

Para o merengue:

• 6 claras de ovo
• 300 g de azucre glas
• 1 cullerada de vinagre
• 1 cullerada de maicena

Para o recheo:

• 600 ml de nata

Madalenas frías de chocolate (sen forno nin microondas)

Boa tarde, bolboreteir@s!! Vai moitísima calor e talvez se nos derreta a receita de hoxe só de vola presentar mais tiñamos moitas ganas de doce e non puidemos resistir ante esta delicia. 

Esta creación é ideal para os lambóns e lambonas máis folgazanas pois crearán unhas madalenas exitosas sen preocupacións de que quede ben ou non a masa. Iso si, tedes que gustar do chocolate. Aínda que supomos que iso non será un problema, non?

Ben, fixádevos que larpeirada e ollo, non molledes o teclado babexando ;-)

Madalenas frías de chocolate

Ingredientes (para 8 madalenas):

• 210 g de crema de cacao
• 150 g de chocolate 
• 16 galletas redondas

Gofres saudábeis

Tremendo día solleiro temos hoxe, bolboreteir@s! Nós xa temos a nosa ensalada preparada para saír xantar fóra. Hai que aproveitar! Mais antes de fuxir, temos un compromiso que cumprir por aquí. Un compromiso doce, por certo. Mais ollo, que ultimamente vedes que estamos probando a argallar con larpeiradas reducidas de calorías e moito máis saudábeis como as últimas bolachas de avea, a crema de cacao saudábel e o gofre que hoxe vos traemos. Si, si, podemos papar un gofre sen pecar, haha.
Por que escollemos este produto? Porque nos perden os gofres. E o curioso é que até hai apenas 5 anos non nos coincidira de comer un (si, non sabemos como puido pasar...). Ben, mais desde aquela, sempre no top das sobremesas. E claro, como facemos para degustalo con máis frecuencia sen caer no exceso? Pois aquí temos a solución.

[Ides ver que nós contamos con gofreira (agasallo vendo a nosa devoción haha) mais podedes optar, se non tedes, por facer a mesma masa nunha tixola, estilo tortitas.]

Gofres saudábeis

Ingredientes:

• 130 ml de bebida de améndoa
• 80 g de fariña de avea
• 30 g de manteiga
• 1 ovo
• 1 culleriña de lévedo

Bombóns de dous chocolates e nocilla

Bolboreteir@s, imos comezar o ano como nos gusta de forma moi doce aínda que vos prometemos que vos deixamos descansar despois de hoxe. Iremos traendo unha serie de pratos saudábeis despois de reis para compensar os excesos destas datas. Realmente xa son sobreexcesos, mais é que todo está tan bo...
E que hai máis doce que un bombón? Pois aínda que xa preparáramos hai tempo uns básicos, apetecíanos procurar unha fórmula destas que namoran. Non sabemos que están listos para competir con Lindt ou Ferrero mais a verdade é que se converteron na lambetada máis saborosa deste Nadal, ideal ademais para facer da sobremesa un peche do máis lustroso. Aínda que se somos sinceros, nós papámolos case todos á merenda, segundo rematamos de facelos.
Estes bombóns con corazón de nocilla son perfectos para todos eses bolboreteiros e bolboreteiros con corazón doce e bandullo larpeiro. 3, 2, 1... a gozalos :-)

Bombóns de dous chocolates e nocilla

Ingredientes:

• 100 g de chocolate con leite
• 100 g de chocolate branco

Tortaleta de choconata

Bolboreteir@s, imos rematando maio e achégase o verán aínda que a nós aínda nos queda a etapa de máis apuro, mais sempre cumprindo con este blogue que tanto nos leva dado. Hoxe continuamos co noso afán de inzar a rede de vídeos en galego, concretamente de vídeos gastronómicos e presentamos unha outra vídeo-receita, chea de dozura e que podemos alcanzar con moi pouco esforzo.
Desta volta nós preparámola para unha encarga que nos fixeron mais, como non, probamos o que iamos facendo e a verdade é que sobrepasaba as cotas máis altas de sabor pois certos ingredientes mesturados dan o mellor de si.
Sabedes o que nos encanta cociñar mais cando nos metemos coas tortas a verdade é que perdemos a cabeza. Non é comida para todos os días mais unha boa torta é sinónimo de festa, de celebración arredor da maxia que ofrece a gastronomía máis doce.
E despois desta introdución deixámosvos o camiño audiovisual: https://www.youtube.com/watch?v=IdS-l37o9GII , e o camiño da escrita. Agora, ao voso gusto. O caso é que a desfrutedes!

Tortaleta de choconata

Ingredientes:

Para a base:

• 300 g de galletas
• 170 g de manteiga
• 1 cullerada de azucre moreno
• 1 chisco de sal
• 1 cullerada de manteiga (para o molde)

Para a crema de cacao:

• 375 ml de nata
• 300 g de crema de cacao
• 200 g de queixo de untar
• 150 g de azucre
• 1 cullerada de vainilla

Torta de chocolate e crema de cacao

Hoxe é un deses días en que os bolbereteir@s máis larpeir@s se poñen supercontent@s pois traemos unha nova oda ao chocolate. Cacao, chocolate, crema de cacao, galletas Oreo, galletas Príncipe... Parece unha festa chocolateira e así foi. Puxémonos tod@s as botas con esta creación. 

Proba do boa que está esta torta é que, dos 13 comensais que había na mesa, boa parte deles repetiron sobremesa. 

Ademais, que o pasamos xenial facéndoa e aproveitando todo o que ía sobrando. Si, esta é unha estraña manía que temos algúns cociñeir@s na cociña. Sobre todo, @s que somos moi lambóns.

Por aquí, os aniversarios caracterízanse pola dozura xa que adoita haber máis dunha torta. Canto menos unha para a celebración en familia e outra para a celebracións coas amizades. E nós aproveitando para crear novas receitas para Bolboretas no bandullo. E se saen tan saborosas coma esta...

Torta de chocolate e crema de cacao

Ingredientes:

Para a base:

• 200g de galletas Oreo
• 200g de galletas Príncipe
• Leite (opcional)

Para o recheo:

• 800ml de nata
• 400g de crema de cacao
• 100g de chocolate
• 100ml de leite

Nutellotti

Vaise aproximando o verán, cada día erguémonos con máis claridade e forza, e nós, entre tanto, seguimos coas larpeiradas, que sempre son ben recibidas. Hai outros produtos que poden responder máis a unha tempada ca outra, mais as lambonadas sempre se manteñen.
E imos cunha outra oda ao chocolate e contretamente á crema de cacao. Unha receita sinxelísima que nos leva á dozura irresistíbel.
E foi destas que coñecimos argallando pola rede. Como normalmente dedicamos certo tempo a ollar páxinas gastronómicas de moi diferentes lugares, os nosos ollos pararon casualmente nestas bolachas chocolateiras capaz de nos roubar o sentido e de namorar o noso padal.
Ademais, como tiñamos unha celebración para o sábado á noite e faltábanos tempo para unha torta, este foi o noso detalle. Iso si, seguro que os nutelloti nunca pensaron en ser degustados nunha localización tan fermosa. Tiveron a sorte de ser devoradas conxuntamente na praza da Catedral de Mondoñedo, acompañados do amigo Cunqueiro, nun solpor marabilloso. E falando de Cunqueiro, gustaríanlle estas galletas a el que era tan tradicional? Eu créovos que si, que era moi larpeiro ;-)

Nutellotti

Ingredientes (para 30 unidades):

• 360 gr de nutella
• 300 gr de fariña
• 2 ovos

Para decorar: 2-3 culleradas de nutella.

Flor de chocolate

Que friaxe!!! Que bos días están para nos gardar na casiña e cociñar algo quente para entrar en calor. Sobre todo, co que presta nesas antigas cociñas de leña capaz de resistir contra o inverno máis duro.

Esta ideal situación enxebre non foi a nosa, mais o caso é irmos cociñarndo algunha que outra larpeirada e, sobre todo, desfrutala despois, haha. 

Hoxe imos cunha destas que triunfan sempre pola combinación perfecta de velocidade e sinxeleza. Canto a sabor, pouco hai que dicir. Tod@s sabemos do éxito da combinación simple de follado e chocolate. Non se precisa nada máis. Aínda coa gorentosa trenza de chocolate no maxín, probamos noutro formato.

Coñecímola a través dunha destas contas de que tanto gustamos tipo Tasty, Tastemade e demais. Iso si, antes de nós probar a facela, xa tivemos a sorte de degustala na casa duns bos amigos. Tan encantad@s quedamos que pasou á nosa listaxe de receitas pendentes. 

E aquí a tedes. Unha sobremesa sin complicación e alto rendemento visual e saboroso. Ideal para cando non fica moito tempo para completar o menú.

Flor de chocolate

Ingredientes:

• 2/3 láminas de follado
• 200 gr de crema de cacao e avelás
• 1 ovo batido
• Fariña (opcional)

Utensilios: bandexa de forno, papel vexetal, un rolete, unha culler e un vaso.

Torta de Ferrero Rocher

Bo día larpeir@s!! Estades preparad@s para a receita de hoxe?? Seguro? Pensade que imos superar as barreiras do doce e talvez despois de probardes a lambonada de hoxe todo o veredes con outros ollos. Nada volverá ser igual! Despois dos momentos emotivos que pasamos con receitas xa míticas como a Torta Kinder, a Torta Kitkat ou a Torta Oreo, hoxe xa imos coa torta entre as tortas: TORTA DE FERRERO ROCHER! Si, un soño cumprido, que se nos ocorreu tras vela na fabulosa páxina de Ó carón da lareira :-)
Pensade que estes bombóns convertéronse na fantasía gastronómica no Nadal de moitísimas familias, e aínda que pareza que leven connosco toda a vida, creáronse en 1982 na Italia. Desde o comezo estiveron asociados ao luxo dando moito valor á presentación do produto a través dun coidado envoltorio e tamén de anuncios do máis elegantes. Con todo, non son os bombóns máis caros do mercado, nin moito menos, e de vez en cando podémonos permitir un luxo con eles. E a pesar de que o normal é degustármolos pouco a pouco de forma directa, caben outras posibilidades a ter en conta, e unha das mellores podédela ver hoxe en Bolboretas no bandullo.

Torta de Ferrero Rocher

Ingredientes:

Para a base:

• 120 gr de obleas para xeado
• 80 gr de manteiga
• 3-4 culleradas de crema de cacao con avelás

Para a crema:

• 800 ml de nata (35%)
• 400 gr de crema de cacao con avelás
• 10 bombóns Ferrero Rocher

Torta de trufa

Aínda coa emoción da entrada do pasado xoves en que contamos con Miro Villar, xa regresamos cunha outra receita, dirixida como non, aos máis lambóns e lambonas e só apta para chocolateir@s.

Esta torta xa a fixeramos hai un par de meses para o aniversario dunha amiga moi especial, mais esquecímonos da maior parte das fotografías, quedando pendente unha nova elaboración para a presentarmos aquí, para tod@s vós. E que xa sabedes, encántanos cociñar e degustar os nosos pratos mais sobre todo pór á vosa disposición todas aquelas receitas que imos traballando para que leades, probedes e nos comentedes.

Pois ben, finalmente nesta última fin de semana encargáronnos unha torta moi moi doce para un aniversario e veunos esta á cabeza inmediatamente. Polo que parece os e as comensais quedaron tan satisfeit@s como cando nós a degustamos así que perfecto! 

Torta de trufa

Ingredientes:

Para o biscoito:

• 300 gr de chocolate con leite
• 225 gr de manteiga
• 180 gr de azucre
• 100 gr de fariña
• 1/ 2 sobre de lévedo en po
• 6 ovos

Brioche de cabelo de anxo e crema de cacao

Aquí estamos unha vez máis para vos presentar unha larpeirada especial. Desde que fixemos o cabelo de anxo, estabamos con ganas de crearmos algo con que aproveitarmos este produto. E demos cunha marabillosa solución, o brioche recheo. Certo é que como esta é unha sobremesa contundente e na nosa casa hai quen non gusta moito do cabelo de anxo, decidimos partir o recheo, e dedicarmos unha metade á sempre triunfante crema de cacao. Podedes seguir esta mesma opción, escoller un dos dous recheos ou mesmo probardes con outro que vos praza. Iso si, ímosvos confesar un segredo. Para nós a opción máis fascinante para rechear o brioche, despois de probalo, é a do cabelo de anxo. Totalmente irresistíbel.

Veredes que se precisan moitos máis mais esta é unha receita ao alcance de tod@s. Se procurades unha sobremesa para un xantar ou cea de bastantes convidad@s, esta opción sorprenderá e deixará moi satisfeit@s os comensais. Aí vos vai!

Brioche de cabelo de anxo e crema de cacao

Ingredientes:

• Para a primeira masa:
• 140 gr de fariña de forza
• 20 gr de lévedo fresco
• 80 ml de auga temperada

• Para a segunda masa:
• 500 gr de fariña de forza
• 90 gr de manteiga

Cupcakes de crema de cacao para celíac@s

Nova receita e como hai que estar a todo pois tamén pensamos naquelas persoas que non poden degustar moitos dos produtos que aquí presentamos. Así pois, o doce de hoxe é especial para celíacos, mais xa vos aseguramos que non perde nin un ápice de sabor. Mesmo non soubo bastante máis que algunha outra vez que temos feito esta receita. O motivo da elaboración veu dado por unha nosa boa amiga que estaba de aniversario e que cada vez que vén de visitar hai que pensar en alternativas, e desta pensamos nunha sobremesa que non posuíse gluten e que estivese moi boa, e así chegamos a estes cupcakes. 

É a segunda vez que vos traemos este tipo de doces ao blogue, máis desta son especiais, e queremos mostrar que sen gluten tamén se poden facer auténticas marabillas, simplemente é cuestión de matinar un pouco máis nas posibilidades, xa que os produtos son máis reducidos. Certo é tamén que algún supermercados van mellorando e cada vez teñen máis recursos para celíacos mais outros aínda nolo poñen realmente difícil. Sexa como for, nós fixemos unha boa cantidade deles nun abrir e pechar de ollos foron desaparacendo da mesa. Xa queda anotado como óptimo recurso. Iso si, se tedes algún convidado celíaco e queredes sorpréndelo con algunha sobremesa destas, é moi importante confirmar que os produtos non leven gluten e que todos os utensilios utilizados non teñan restos de fariña. En caso de dúbida con algúns produtos, como nos pasou a nós, recomendamos procurar alternativas.

Cupcakes de crema de cacao para celíacos

Ingredientes:

• 200 gr de azucre moreno
• 120 ml de leite
• 100 ml de aceite de oliva
• 90 gr de fariña de arroz
• 90 gr de fariña de millo
• 3 ovos
• 1 sobre de lévedo en po
• 1 culleriña da vosa esencia preferida
• 80 gr de chocolate en anacos (apto para celíacos)
• Para a buttercream:
• 250 gr de manteiga
• 250 gr de azucre glas
• 200 gr de crema de cacao e avelás
• Para decorar: boliñas de chocolate, frores de azucre...