“Donuts” de pera e améndoa

Bo día, bolboreteirxs 🤗! Que tal estades? Hoxe traémosvos u ha receita sinxela, rápida e deliciosa 😋, que faremos só  con 4 ingredientes (+). A pera vai ser o ingrediente principal, dálle un toque fantástico e difícil de recoñecer! Coa excusa de coñecer á pequena da casa, estamos tendo moitas visitas e intentamos facer algunha rceitiña para sorprendelxs e que leven un bo sabor de boca, e esta foi unha desas receitas escollidas! 

O máis importante a receita é escoller a froita madura, e unha varidade que teña moito sabor,  para que sexan máis deliciosas 🥰🤤! Aquí vai a receita: 

Donuts de pera e améndoa

Ingredientes:             

• 250 g de pera 🍐 
• 160 g de fariña de améndoa. 
• 4 ovos
• Unha cullerada de lévedo en po

Empanada de chocolate

Bo día, bolboreteir@s! Como vai iso? Por aquí con ganas de que chegue mañá xa que poderemos saír tomar o aire un pouquiño por fin co peque. Pouco a pouco.

E mentres, máis lambonadas para vós e para nós, claro. A de hoxe talvez vos soe diferente. Quixemos argallar algo novo, que nunca viramos até o momento. E ao mesmo tempo, é un prato que ten os ingredientes básicos para funcionar de marabilla. A empanada de chocolate veu á nosa cabeza despois de degustar a pizza de chocolate nun napolitano da Coruña. Era un produto de 10, a verdade e pensamos por que non iamos ter unha versión galega tamén. Ademais, xa temos versións doces da empanada con moito éxito como a de mazá.

Así pois, matinamos na preparación para que non fose apenas masa e chocolate. E isto foi o que se nos ocorreu. Adiante!

Empanada de chocolate

Ingredientes:

Para a masa:

• 400 g de fariña de trigo, máis extra
• 100 g de  améndoa moída
• 300 ml auga, aproximadamente
• 1 sobre de lévedo seco de panadaría

Trufa de mazapán

Rematamos o ano de maneira doce, como non podía ser doutra forma. Tal e como foi o 2019 para nós. E agardamos que para vós tamén. Que por certo, onte cumprimos xa 6 anos de Bolboretas no bandullo. Como pasa o tempo!!!!

Ben, pois imos partir dun clásico nas sobremesas de Nadal mais cunha reviravolta. Os mazapáns non adoitan faltar nos fogares galegos mais é certo que ao igual que os acompañantes doces adoitan ser mercados xa que nestes menús natalicios xa se inviste moito tempo no resto dos pratos. Pois ben, como vimos dicindo xa noutras publicacións destas datas, nós animámosvos a deixardes uns minutos tamén para preparar algunha sobremesa vós mesmos. E precisamente os mazapáns é un deses pratos que gaña moito moitísimo na versión caseira. Somos conscientes de que outros produtos (véxase o turrón de Suchard) logran un sabor inconfundíbel que é difícil de imitar ou superar mais noutros como no caso que aquí hoxe presentamos, imos superar por moito a versión comercial. Ademais, dándolle unha nova volta. Velaquí está!

Trufa de mazapán

Ingredientes:

• 300 g de améndoa moída
• 200 g de azucre glas
• 100 g de galletas "maría"

Ósos de santo

Bo día, amig@s! Preparad@s para o Samaín! Tedes a vosa caveira ou calacú xa preparada? Recordade que se son da casa e non estropeades por dentro as podedes aproveitar para facer larpeiradas ben interesantes aínda que estas non son as que hoxe levan o protagonismo senón un doce non orixinario da Galiza mais que xa podemos considerar tradicional posto que levan anos consagradas nas nosas pastelarías. Resulta complexo pasar estas semanas por diante dunha que non teña os famosos ósos de santo.
Encóntranse tanto aquí como nos demais territorios do estado e non están vinculados ao Samaín nin a Halloween senón á festividade de Defuntos e Todos os Santos, de tremenda relevancia na nosa cultura polo apego aos mortos. De todas formas, encaixan moi ben tamén na temática terrorífica destes días con esa denominación tan curiosa que alude ao parecido cos membros do esqueleto. Porén, é unha paradoxa ben curiosa a de os santos teren ósos... 

Nós fixemos unha primeira tentativa e, aínda non quedando coa estética de perfección típicas das pastelarías, si deixaron a dozura no noso padal durante un bo tempo. Preparámolos co recheo orixinal, a crema de xema, aínda que tedes mil e unha opcións diferentes. Aí vai!

Ósos de santo

Ingredientes:

Para os ósos:

• 130 g de améndoa tostada moída
• 70 g de azucre
• 35 ml de auga

Para o doce de xema:

• 4 xemas

Galletas de vainilla e améndoa

O regreso das vacacións adoita non gustar, excepto cando é para voltar a Bolboretas no bandullo con novas publicacións. Nese caso, o retorno é do máis feliz, canto menos para nós. Agardamos que xa esteades desexos@s de novas lecturas gastronómicas e que estas vos animen tamén o voso regreso á realidade.
E con que novidades chegamos? Pois con galletas, sempre efectivas e recorrentes para calquera detalliño. Neste caso estas viñeron por unha encarga para o Naseiro. E claro, para rematar rápido e lograr algo efectivo, as galletas sempre cumpren. Aínda que certo é que hai galletas e... galletas. E esta é das que deixan moi bo recordo.
Con eses ingredientes xa se intúe un óptimo resultado e só queda amasar co agarimo común d@ reposteir@ e agardar a que chegue o momento de degustar! Preparad@s? A facer galletas! 

Galletas de vainilla e améndoa

Ingredientes (para 15 unidades):

• 200g de fariña
• 100g de azucre
• 100g de manteiga
• 30g de améndoas
• 1 ovo
• 2 culleradas de vainilla
• 1 culleriña de bicarbonato
• Un chisco de sal

Galletas de améndoa recheas de chocolate

Andamos atarefados nesta fin de semana primeira de xullo e que xa trae mil e unha feiras por todo o país. Especialmente ligados andamos á Feira do Libro de Ribadeo, que ten lugar até mañá, domingo, no Parque de San Francisco. Precisamente mañá visitará a vila Merchi Rodal quen admiramos polo seu traballo no programa Larpeiros, que tamén contribúe ao fortalecemento do idioma no ámbito gastronómico.

Ben, pois revisando o seu último manual, "Novas lambetadas dunha larpeira feliz" encontramos moitísimo de interese e a primeira receita coa que demos xa nos levou dun impulso á cociña. Ademais, que unhas bolachas sempre veñen ben para matar a gana de cociñar e para ter un recurso larpeiro a man nestas tardes de visitas como a que hoxe temos.

Mesturamos aquí, unha paixón, o chocolate, e as améndoas, produto utilizado frecuentemente na tradición reposteira galega. A ver que vos parecen!

Galletas de améndoa recheas de chocolate

Ingredientes (para 15 galletas):

Para as galletas:

• 250 gr de fariña, unha pouca máis para estirar
• 150 gr de manteiga
• 75 gr de azucre glas
• 50 gr de améndoa moída
• 3 ovos

Macarons

Fin das vacacións de Bolboretas no bandullo, mais esta volta ao traballo é diferente a outras xa que a nós sempre nos tarda volver a presentarvos novas receitas. Non hai cousa mellor.

E facémolo cun dos doces de moda, que encontramos en moitísimas pastelarías, normalmente con cores ben rechamantes. E claro, nós até agora non nos animáramos con eles. Ten unha explicación xa que cando os probamos, en Compostela, non nos chistaron moito. Porén, esta semana decidímonos a probar na casa, para ver como saían. E o resultado foi moito mellor do esperado. Talvez sexa pola crema de cacao, mais estes macarons dan boa alegría ao bandullo.

Esta larpeirada provén da Francia, de onde recollemos o termo, aínda que con orixe no italiano (maccarone, denominación dunha pasta seca do momento). Xurdiron no XVI como simples bases e non foi até o XIX cando se comezaron a unir de dúas en dúas cun recheo no medio, normalmente moi doce.

Nas últimas décadas, os macarons comezaron a ser comercializados nas grandes capitais mundiais, alcanzando cada vez máis éxitoso, sobre todo nestes anos de apoxeo da repostaría creativa. Ollade pois, que xeitosos son:

Macarons 

Ingredientes (para 8 macarons):

• 70 gr de azucre glas
• 2 culleradas e media de améndoa moída
• 1 clara de ovo
• 1 cullerada de azucre
• Crema de cacao
• Colorante (opcional)
• Labras de chocolate (opcional)

Torta de Santiago

Día de receita e non un día calquera xa que hoxe celebramos o Día da Patria, unha xornada que Castelao definía como  "a festa maor de Galicia, a festa de todol-os galegos" e que debe dar pé a nos reivindicar como nación demostrando a unidade necesaria mais tamén para festexar e exhibir a nosa identidade galega. Alén da nova entrada no blogue, hoxe poderedes encontrar no Sermos Galiza un artigo que elaboramos a respecto da que consideramos unha sobremesa simbólica para este 25X: A torta de Santiago e o éxito das améndoas na Galiza.

Matinamos alí un pouco sobre a orixe da sobremesa, sendo moi discutíbeis algunhas das teorías existentes mais o que tod@s podemos confirmar é que é unha das xoias da nosa repostaría que alcanzou unha dimensión internacional grazas á chegada de miles de peregrinos cada día a Santiago. Ademais resulta moi curioso ese éxito dos amendoados na Galiza cando nunca fomos terra de destacar polas amendoeiras e si por outras árbores frutais.

E o bo desta larpeirada está na súa elaboración, sen ningunha complicación máis que a mestura de ingredientes e o enfornado. E que tremenda recompensa nos agarda. Non seredes quen de resistirvos, haha. Aí vos vai:

Torta de Santiago

Ingredientes:

• 300 gr de améndoa moída 
• 300 gr de azucre 
• 5 ovos 

Polvoróns de chocolate caseiros

BO NADAL!!!!!! 24 de decembro, xa chegou o día que moit@s agardabamos , especialmente @s máis pequen@s que hoxe han de recibir, con seguridade a visita do noso grande amigo O Apalpador!! É amigo de verdade xa que nos encargou hai tempo que propuxeramos receitas ben gorentosas para que as probasen a facer en moi diferentes fogares e así despois, @s cativ@s non teren o bandullo baleiro. Así que, xa sabedes, hoxe comede todos moi ben, que estamos na tempada de excesos.

E por iso, presentámosvos unha receita moi moi sinxela e idónea para facerdes pola tarde. Un dos doces máis comúns nestas datas, ben contundentes e que practicamente imposibilitan falarmos cando os estamos mastigando J Xa sabedes, os polvoróns, aínda non sendo unha sobremesa tradicional galega do Nadal, si leva moito tempo asentada nos nosos menús natalicios. E como sempre vos dicimos, se se poden elaborar na casa, para que mercalos?? E nada, entre que se fai o polo no formo, se coce o mollo das ameixas ou preparades o peixe, dávos tempo de facerdes polvoróns.

O nome deste produto vén dado pola sensación de po que dan, unha vez listos para degustar. Parece que a súa orixe está na Andalucía do século XVI (algúns din en Antequera, outros en Estepa) por mor do exceso de trigo e de manteiga. Hoxe en día, hai localidades españolas especializadas na súa produción como Tordesillas ou a propia Estepa. O seu consumo expandiuse non só á Península, senón tamén a outros territorios.

Polvoróns caseiros

Ingredientes:

• 200 gr de fariña
• 100 gr de manteiga
• 75 gr de azucre glas
• 75 gr de améndoa moída
• 1 cullerada de cacao puro
• 1/2 culleriña de canela

Torta de améndoa e pexegos

Se por algo se caracteriza o verán na Mariña Luguesa, e a Galiza, é pola cantidade de festexos e celebracións. E desta volta tocoume ir de convidada ás festas de Xunqueira (barrio viveirés) polo que decidín, como non, facer a miña achega para o xantar. A premisa desta volta era facer unha torta sen chocolate así que reducimos un pouco as posibilidades. Despois dun bo cacho dándolle voltas decidín probar cunha froita nova, que ademais me coincidía ben por telos naturais, recollidos uns días antes. A devandita froita eran os pexegos, que decidimos probar cunnha masa un pouco diferente. Así demos coa idea dunha torta de améndoa con pexegos cuxos pasos tedes a seguir.

Torta de améndoa e pexegos

Ingredientes:

Para a masa crebada:

• 225 gr de fariña
• 150 gr de manteiga
• 100 gr de azucre
• 1 ovo
• Raiadura dun limón

Para o recheo:

• 200 gr de manteiga
• 200 gr de azcure
• 200 gr de améndoa moída
• 50 gr de fariña
• 4 ovos
• 4 pexegos

Torta de dous chocolates con améndoa

Esta semana tiven un par de encargos para dous aniversarios así que entón aproveitei para pór en práctica algunha torta que tiña en mente e que tiña ganas de facer xa hai un tempo. Hoxe preséntovos unha delas, unha verdadeira oda ao chocolate e ao doce en xeral, a torta de dous chocolates con abelás. Como xa veriades noutras receitas, tiro moito proveito da mestura destes elementos, aínda que a verdade poucas veces ficou un resultado tan óptimo como nesta sobremesa. Segundo as miñas informacións non durou máis de 10 minutos na mesa, todo un éxito :-)

Torta de dous chocolates con abelás

Ingredientes:

• 4 ovos
• 175 gr de manteiga
• 125 gr de azucre
• 150 gr de chocolate negro
• 100 gr de chocolate con leite
• 140 gr de améndoa 

Para a decoración:

Mazapáns

Feliz ano 2014!! Esperamos que este ano sexa moi bo para tod@s vós, que se cumpran todos os vosos desexos e que levedes a cabo todos os propósitos!! E non esquezades pór doces na vosa vida, que seguro que a fan máis agradábel. Desde aquí tentaremos axudar para que así sexa.

Hoxe, para compensar a laboriosa receita do luns, presentámosvos unha sinxela e rápida. Os mazapáns son típicos desta época do ano, o Nadal, así que aínda estades a tempo de os facer. Xa haberá tempo de baixar os excesos destes días! 

Mazapáns

Ingredientes:

• 150 g de améndoa en pó
• 120 g de azucre glas
• 1 ovo