Nubes caseiras

Que tal imos, bolboreteir@s? Tiñamos pendente desde hai ben tempo esta receita así que vola traemos con orgullo e co bandullo moi feliz posto que non se encontra un con larpeiradas coma estas todos os días.
Unha das "chuches" máis míticas coas que nos podemos encontrar é a nube, que a hai en mil e un deseños e cores. Lévanos acompañando desde a infancia e danos a espiña que así vai seguir sendo porque como sabedes, somos demasiados lambonciñ@s!
Desta volta, inspirámonos nunha creación doutra luguesa, Mirta Escudero, que xestiona Dulce Sentimiento e que vos recomendamos encarecidamente. A verdade é que neste caso si que iamos con bastante respecto na elaboración mais podemos xa confirmar que se deixa levar moi ben todo o proceso e o resultado é impecábel. Ollade!

Nubes caseiras

Ingredientes:

• 400 g de azucre
• 250 ml de auga
• 20 g de xelatina neutra
• 2 culleradas de pasta de framboesa (ou do voso sabor preferido)
• 30 g de maicena

Masa crebada sen ovo nin lactosa

Bo martes lambisqueir@s!! Aquí estamos de novo, traéndovos precisamente unha larpeirada despois da que foi para nós unha fin de semana moi doce con celebración de aniversario incluída. Unha das tortas que elaboramos para este festexo foi a Torta 3 chocolates, unha das nosas primeiras receitas. E a outra... pola outra tedes que agardar un pouco máis, aínda que hoxe xa vos deixamos a súa base, que quixemos presentar de maneira independente por ser apta para alérxicos áos ovos e á lactosa, algo non tan sinxelo nas tortas xa que un grande número delas levan algún destes ingredientes na súa base. 

Así pois, gardando este recurso, poderedes procurar despois o complemento adecuado para finalizar a torta adaptada á vosa alimentación. Aí vai:

Masa crebada sen ovo nin lactosa

Ingredientes:

• 250 gr de fariña
• 80 ml de auga
• 65 ml de aceite de oliva virxe extra
• Un chisco de azucre

Churros con chocolate

Si, hoxe é día de clásico da repostaría. Un produto que poucas persoas non terán degustado algunha vez na súa vida, xa for ao almorzo ou ben nesas noites que troula que chegan até xa o sol comezar a aparecer e que decidimos fechar cun bo chocolate con churros, especialmente na noite en que despedimos un ano para dar a benvida a outro.
Con todo, non é tan frecuente que optemos por elaboralos na casa, xa sexa pola comodidade que nos ofrecen as churrarías que xa nolos dan feitos ou ben porque non tiñamos idea de como se facía. Deste modo, nós decidimos probarmos a receita caseira. E a verdade é que pouco máis sinxela pode ser, tanto na elaboración como nos produtos que precisamos: auga, fariña, sal e aceite. Chocolate á marxe, claro.
Recordo que miña avoa tiña unha máquina especial para facer os churros, mais despois de moito preguntar non se volveu saber dela. Porén, non tardamos en comprobar que hai outras formas máis manuais para os elaborarmos, abonda cunha manga pasteleira e o bico correspondente. E que almorzo tan saboroso!!

Churros con chocolate

Ingredientes:

Para os churros:

• 250 ml de auga
• 125 gr de fariña
• 2 culleradas de aceite
• Un chisco de sal
• Aceite para fritir

Para o chocolate:

• 250 ml de leite

Tortillas mexicanas

Estamos por aquí outra vez cunha receita algo diferente das últimas penduradas no blogue. Nós que somos seguidores da cociña mexicana, mercamos frecuentemente o pan e o sazonador para facer fajitas, burritos... Con todo, pensamos en facelas máis naturais/caseiras polo que decidimos probar sorte co pan, con esas tortillas finas idóneas para degustar este tipo de produtos mexicanos.

Este pan é moi moi sinxeliño de facer e resulta bastante económico xa que nin sequera ten que ir ao forno, só debe repousar e pasar pola prancha. Ademais a súa elaboración é bastante entretida pola súa facilidade de amasado e estirado. Se tedes peques pola casa, podédeslle deixar argallar co rolete e que creen as formas que máis lles guste. Talvez non sirvan para reenchelas, mais a eles/elas seguro que lles encantan con esas personalizacións.

Aquí de momento probamos coas formas clásicas para despois degustalas cun pouco de polo, cogomelos, pementos e cebola. Non lle deixan nada que envexar ás que encontramos no supermercado, de feito notaredes un sabor bastante máis natural. A ver que vos parecen ;-) 

Tortillas mexicanas

Ingredientes:

• 250 gr de fariña de trigo
• 125 ml de auga
• 50 ml de aceite de oliva
• 6 gr de sal
• 2 gr de lévedo en po