Zamburiñas

Boas festas, bolboreteir@s! Esperemos que esteades pasando uns días marabillosos coa vosa xente. Nós estamos a vivir un Nadal do máis especial mais iso si, en calquera momento, rebentamos!

E falando de comida. Non vos pasou nunca que non sabedes como puidestes vivir sen algo até o momento en que o probades. Pois as zamburiñas entraron hai ben pouco na nosa listaxe de mariscos e fixérono para quedar para sempre. E este foi o primeiro Nadal en que as preparamos na casa e guauuuuuuuu. Que delicatessen! Un destes mariscos aos que apenas lles fai falta nada para sobresaír. Ben, en realidade como a maior parte dos nosos produtos do mar. Aquí vai!

Zamburiñas

Ingredientes:

• Zamburiñas
• Aceite de oliva

"Cociñando con Bolboretas no bandullo", (Edicións Xerais)

Bo día, bolboreteir@s! Estades preparados para esta fin de semana chuviosa? Ben, se andades aínda procurando plan, nós dámosvos unha opcións. A lectura de "Cociñando con Bolboretas no bandullo" e o preparado dalgunhas das receitas máis saborosas que nel podemos encontrar. Que vos parece?

Ben, como xa vistes nas RRSS, levamos tempo comentando a concreción deste noso soño que desde o pasado venres 16 de novembro está nas librarías de todo o país e nas diferentes plataformas dixitais.

Estamos encantadísimos co resultado e moi agradecidos a todas as persoas que o fixeron posíbel, comezando pola editorial, Xerais, até o ilustrador Iván Rodríguez (que gran traballo), ou o editor Ramón Domínguez e Plumería Fotografía.

Ben, pois queriamos aproveitar a entrada de hoxe para vos meter apetito dunha forma diferente, presentándovos un pouquiño o libro, este noso fillo literario e gastronómico, o primeiro. 

Bolboreteando con... Xiana Lastra

Bolboreteir@s, vaia agasallo traemos para o martes de Entroido, nada máis e nada menos que unha nova entrega do Bolboreteando, a primeira desde 2017. Por tanto, tiña que ser especial. E éo, e moito. Hoxe temos en Bolboretas no bandullo a que para nós é a mellor voz da música galega. Un dos grandes descubrimentos do pasado ano, que nos deixou abraiados co seu Puntada sen Fío (moit@s xa tedes preguntado polos fermosos temas das nosas video-receitas; aquí a tedes). Desde aquela vimos seguindo de preto o seu percorrido pois alén de grande artista é unha persoa marabillosa e implicada fondamentecoa nosa cultura. 

O pasado venres 17 de febreiro presentou, na homenaxe ao benquerido Agustín  Fernández Paz en Ferrol, o último no que anda, A Banda da Loba, que vai chegar para arrasar. Aproveitamos pois, para falarmos un pouco deste novo proxecto, de gastronomía e moito máis con Xiana Lastra. E para que saibades algo máis dela, isto é o que nos di:

"Nacín o 12 de novembro de 1983 en Ferrol, se ben estou inscrita nas Pontes porque miña nai era de alí e facíalle ilusión. Ao final foi medio certo, pois crieime a cabalo entre Ferrol, As Pontes e Ortigueira, de onde era miña avoa. Sempre tiven (e sigo tendo) moit@s amizades en calquera dos dous sitios.

Luriñas con mollo de coantro, limón e soia

Comezamos esta fin de semana tempestousa cun dos nosos alimentos favoritos, as luriñas da Ría, da nosa ;-) Esta semana pasada mercamos unhas poucas e matinamos nunha nova forma de os preparar para probar novas combinacións coa certeza de que a este cefalópodo todo lle senta ben.

Escollimos un par de especias, e aprveitamos algo que tiñamos pola cociña para crear un mollo intenso que criamos iría ben. E meu dito, meu feito. Ficou extraordinario.

Non é a primeira volta que presentamos luriñas en Bolboretas no bandullo, cómpre recordar as Luriñas e castañas en mollo de millo ou as Luriñas recheas de gambas e espinacas. Sexa a opción que for, será unha delicatessen na que contar cun bo produto é a clave.

Así mesmo, como xa sabedes, cada dous sábados viñamos presentando video-receita e hoxe tocaba. Porén, transladámola a mañá pois desta volta preparamos o vídeo sobre unha receita que xa hai no blogue e non queremos romper a dinámica de dúas receitas novas á semana. Así que... vaia fin de semana gorentoso nos agarda. Imos comezando 😁

Luriñas con mollo de coantro, limón e soia

Ingredientes (para 2 persoas):

• 9-10 luriñas
• 1/2 culleriña de coantro
• 1/4 culleriña de allo en po
• O zume de medio limón
• 1 cullerada de aceite

Para o mollo:

• 4-5 culleradas de aceite de oliva virxe
• 2 culleradas de soia
• O zume de medio limón

Navallas á prancha con aceite e allo

Chegou o último día do ano mais vimos igualmente con receita, coa derradeira deste 2016. E con algunha sorpresa máis pois como xa sabedes, onte foi o noso 3º aniversario. Si, que rápido pasa o tempo. Xa tres anos pola rede convosco, tres anos de lambetadas, salgados, artigos e moita ledicia da vosa man. Así pois, a noticia para estes tres anos é a chegada de Bolboretas no bandullo a Youtube. Unha noticia que xa adiantáramos na Sala Capitol no LGx15 mais que agora vos presentamos a tod@s. Xa podedes visitar a nosa canle e ollar o vídeo de chegada no que anunciamos a primeira videoreceita co novo ano, concretamente no 8 de xaneiro Youtube: Bolboretas no bandullo. Agardámosvos neste novo formato que non lle restará tempo nin espazo a este senón que o complementerá.

E voltándomos ao comestíbel, presentámosvos un luxo de Nadal co que despedirmos 2016. Un manxar que tiñamos encaprichado desde hai tempo e que cumprimos coa excusa destes días de celebración. Cremos que este é o modo máis sinxelo de preparar as navallas, mantendo ao tempo o seu propio sabor. Desfrutámolas moitísimo. Agora, xa tedes en disposición a receita para seguirdes:

Navallas á prancha con aceite e allo

Ingredientes:

• 800 g de navallas
• Aceite
• Sal

Para a salsa:

• 100 ml de aceite
• 2 dentes de allo

Carballo, bocado a bocado

Bo día, amig@s! Hoxe deixamos as receitas a un lado mais non a gastronomía. Como xa fostes vendo nas redes sociais, esta fin de semana visitamos Carballo e fixémolo cunha clara intención, desfrutar dos seus sonados produtos e do Dálle un bocado ao Fiot (Festival Internacional Outono de Teatro). O concello decidiu contar connosco para un percorrido que resultou do máis saboroso. Antes de nada, queremos agradecer a oportunidade e a amabilidade do persoal que nos recibiu e acompañou nestes días, en especial ao concelleiro Xosé Regueira, ao alcalde Evencio Ferrero, á técnica de Turismo Maite Parga e ao técnico de Normalización Lingüística Nel Vidal. Ademais, cómpre parabenizar tamén a organización do FIOT pola iniciativa e pola dimensión que ofrece ao teatro con estas actividades paralelas*. É difícil combinar mellor estes dous campos culturais. 

Presentámosvos pois o noso percorrido gastronómico polos estabelecementos de Carballo, onde fomos recibidos con moito agarimo.

Lambetadas de Licor café

Chegou o sábado e con el unha receita que morriamos de ganas de vos presentar. Porque xa vos coñecemos e sabemos que sodes moi larpeiros. 

Para luns, 25 de xullo, celebramos o Día da Patria. E para o ir preparando como corresponde pensamos nunha das bebidas identitarias d@s galeg@s, o licor café, e pensamos en darlle forma nunha lambetada. E que se nos ocurriu? Pois estes caramelos de goma que tanto adoramos desde peques e que con este toque de licor café se converten nunha larpeirada de país. 

Si, esta delicia pode pórlle un toque de simpatía e de dozura ao noso menú do día 25. E si, seguro que sorprendedes as persoas que estean á mesa. Iso seguro.

Ademais, quen non soñou algunha vez con preparar "gominolas" na casa? Pois botando man do artigo de hoxe isto xa é posíbel con pouquísimo traballo. Ademais, intuímos que esta receita se vai converter na larpeirada oficial de todas as festas galegas. E senón... tempo ao tempo, haha! Tamén, deixámosvos a ligazón para poderdes ver a receita en Youtube: Lambetadas de Licor Café.

Lambetadas de Licor café

Ingredientes:

• 100g de azucre
• 50 ml de auga
• 1 sobre de xelatina neutra
• 3 culleradas de Licor café

O bolo boleiro de Manuel María

Chegou xa o 17 de maio, día especial para festexarmos as nosas letras e máis neste ano en que honramos a unha das figuras máis completas, poliédricas e de maior compromiso coa lingua galega como é Manuel María.

Nos nosos anos de vida, este está a ser o ano de máis orgullo da figura honrada para nós. Sentimos que toda a poesía para desfrutar está no Manuel. E por riba, nunha obra tan ampla, non faltou a temática gastronómica porque el era consciente da realidade identitaria que supoñía na Galiza. E porque sabemos que era amigo de comer. De feito, mesmo nos pasaron información de cal era o seu prato favorito. Sabedes? Pois segundo nos conta Mercedes Queixas, di Saleta, a súa compañeira, que adoraba degustar un bo año de leite ("cordero lechal" como malchamos normalmente). 

Mais a través da súa poética imos vendo tamén outros alimentos que lle ben sabían e ben debía apreciar. Nas redes xa fomos dando conta dos versos ao pan de trigo, ao viño, aos capóns, á xata, ás patacas, aos nabos... Porén, deixabamos tres composicións coas que hoxe imos crear a receita máis poética de Bolboretas no bandullo. Unha larpeirada en que se combinan tres poemas diferentes de Manuel María aínda que xira principalmente arredor do título infantil "O bolo"

O bolo boleiro de Manuel María

Ingredientes:

Para a masa:

• 300 gr de fariña de centeo (integral)
• 150 gr de fariña de trigo
• 300 ml de auga
• 15 gr de lévedo fresco
• Un chisco de sal

Para o recheo:

Torta de Santiago

Día de receita e non un día calquera xa que hoxe celebramos o Día da Patria, unha xornada que Castelao definía como  "a festa maor de Galicia, a festa de todol-os galegos" e que debe dar pé a nos reivindicar como nación demostrando a unidade necesaria mais tamén para festexar e exhibir a nosa identidade galega. Alén da nova entrada no blogue, hoxe poderedes encontrar no Sermos Galiza un artigo que elaboramos a respecto da que consideramos unha sobremesa simbólica para este 25X: A torta de Santiago e o éxito das améndoas na Galiza.

Matinamos alí un pouco sobre a orixe da sobremesa, sendo moi discutíbeis algunhas das teorías existentes mais o que tod@s podemos confirmar é que é unha das xoias da nosa repostaría que alcanzou unha dimensión internacional grazas á chegada de miles de peregrinos cada día a Santiago. Ademais resulta moi curioso ese éxito dos amendoados na Galiza cando nunca fomos terra de destacar polas amendoeiras e si por outras árbores frutais.

E o bo desta larpeirada está na súa elaboración, sen ningunha complicación máis que a mestura de ingredientes e o enfornado. E que tremenda recompensa nos agarda. Non seredes quen de resistirvos, haha. Aí vos vai:

Torta de Santiago

Ingredientes:

• 300 gr de améndoa moída 
• 300 gr de azucre 
• 5 ovos