sábado, 4 de febreiro de 2017

Luriñas con mollo de coantro, limón e soia

Comezamos esta fin de semana tempestousa cun dos nosos alimentos favoritos, as luriñas da Ría, da nosa ;-) Esta semana pasada mercamos unhas poucas e matinamos nunha nova forma de os preparar para probar novas combinacións coa certeza de que a este cefalópodo todo lle senta ben.
Escollimos un par de especias, e aprveitamos algo que tiñamos pola cociña para crear un mollo intenso que criamos iría ben. E meu dito, meu feito. Ficou extraordinario.
Non é a primeira volta que presentamos luriñas en Bolboretas no bandullo, cómpre recordar as Luriñas e castañas en mollo de millo ou as Luriñas recheas de gambas e espinacas. Sexa a opción que for, será unha delicatessen na que contar cun bo produto é a clave.
Así mesmo, como xa sabedes, cada dous sábados viñamos presentando video-receita e hoxe tocaba. Porén, transladámola a mañá pois desta volta preparamos o vídeo sobre unha receita que xa hai no blogue e non queremos romper a dinámica de dúas receitas novas á semana. Así que... vaia fin de semana gorentoso nos agarda. Imos comezando 😁


Luriñas con mollo de coantro, limón e soia


Ingredientes (para 2 persoas):



  • 9-10 luriñas
  • 1/2 culleriña de coantro
  • 1/4 culleriña de allo en po
  • O zume de medio limón
  • 1 cullerada de aceite
Para o mollo:
  • 4-5 culleradas de aceite de oliva virxe
  • 2 culleradas de soia
  • O zume de medio limón
  • 1 culleriña de coantro
  • 1/2 pastilla de caldo de peixe

Utensilios: unha prancha (ou tixola), unha cunca e unha culler.


Elaboración:


Para comezarmos, temos de facer o mollo. Mesturamos o aceite, a soia, o limón, o coantro e a pastilla de caldo. Mesturamos moi ben até que se desfaga a pastilla.  Reservamos.


De seguir, preparamos as luriñas. Limpámolas moi ben, secámolas e adobámolas co limón, o coatro e o allo. 


A continuación, na prancha (ou tixola) engadimos o aceite e rustrimos os cefalópodos até que se cociñen polos dous lados. Tardaremos 2 minutos por cada lado, aproximadamente. 


Aliñamos co mollo que tiñamos feito e xa estarían listas para comer! Podémolas acompañar con patacas fritas, pan, ensalada... ou o que vos apeteza! 


Agardamos que vos gusten e as faigades na casa! 


Algún/ha talvez estea con ganas de meter o dente na pantalla xa, verdade? Mais non pasedes ganas deles que, como vistes, son tremendamente sinxelos de preparar. E se tedes a alguén que vos faga o traballo sucio de limpar as luriñas, aínda mellor, hahaha.
Ben, pois deixámosvos cun novo prato ideal para calquera menú diario ou especial no que garantimos o bo resultado. Adiante con el. Unha forte aperta, bolboreteir@s!

4 comentarios:

  1. Se ven espectacular! Que aliño más bueno, sin duda los haré

    Un abrazo

    ResponderEliminar
    Respostas
    1. Moitísimas grazas e xa nos contarás se che gustaron 😋

      Eliminar
  2. Pintaza tienen seguro que estaban de rexupete no lo siguiente no hay mas que ver las fotos no dejan de decir comemeee, si los ve mi hijo se apunta a cenar en vuestra casa le encantan.
    Bicos mil wapos.

    ResponderEliminar
    Respostas
    1. Que ben! Pois podía vir se lle apetecía 😉
      Un bico e mil grazas polas bonitas palabras 😘

      Eliminar