Pizza outonal

Bo día, bolboreteirxs! Aquí estamos un día máis cunha nova receita outonal, cuxa protagonista é a cabaza. Esta é unha nova versión da pizza, xa que en lugar de facer unha blanca ou con salsa de tomate, imos usar a cabaza, o que lle dará un toque diferente, e moi especial á nosa pizza. Para o resto dos ingredientes nós facémosvos esta proposta, que triunfou na nosa casa, mais xa sabedes que hai que xogar cos produtos e os nosos gustos. 

Pizza outonal  

Ingredientes:

Para a pizza:

• Masa de pizza 
• Puré de cabaza 
• Chistorra        
• Champiñóns 
• Cebola 

Champiñóns lacados

Bo día, bolboreteir@s!! Aquí estamos coa barriga cheíña que acabamos de almorzar unha ducia de roscas de Entroido polo menos. Estase achegando a época do ano máis saborosa para nós e isto é un non parar. Porén, non todo ha de ser filloas, roscas e lacón así que tentamos combinar con pratos máis lixeiros como este que hoxe vos presentamos aquí. Uns champiñóns lacados cos que nos beneficiamos da boa recepción deste alimento para todo tipo de especias e aromas, logrando empapalos así de moito sabor. 

Os champiñóns son deses produtos que sempre están no noso frigorífico porque nos renden para múltiplos pratos. Certo é tamén que sos poden chegar a resultar repetitivos mais aí entra en xogo unha receita como esta.

Champiñóns lacados

Ingredientes:

• 400 g de champiñóns
• 2-3 dentes de allo
• Perexil                                                     
• 3 culleradas de aceite, mais 2 para a tixola

Filloas de espinacas recheas

Boas, bolboreteir@s! Filloas en agosto? por favor, non vos asustedes que non imos mostrar a nosa obsesión coa repostaría de Entroido nestes días, mais vimos sempre reivindicando o papel das filloas salgadas para a configuración de receitas exquisitas, nun chanzo superior a aquelas receitas nas que se utilizan pans como tortitas e demais.
Desta volta escollemos unha filloas moi coloridas grazas a esta verdura que asociamos tradicionalmente a aquel querido Popeye da nosa infancia. Ademais, é unha das nosas verduras de referencia para o cociñado debido ao seu sabor suave e á adaptabilidade que ofrecen. Desta volta, aparecen tamén con esa suavidade que se deixa levar por un recheo clásico, dos que non fallan. Aí vai!

Filloas de espinacas recheas

Ingredientes:

Para as filloas:

• 250 g de espinacas
• 100 g de fariña integral
• 5 culleradas de leite
• 1 iogur natural
• 1 ovo
• Noz moscada

Arroz ao forno con curry

Despois duns días sen receita nova, recuperamos forzas e ganamos algo de tempo para argallar novos pratos. Velaquí un arroz ao forno. Non é a primeira vez que probamos este tipo de cociñados para o arroz mais si concretamente esta receita. A idea xurdiu dunha visita que demos esta semana ao Graneiro de Amelia, onde sempre experimentamos con especias novas. Entre os diferentes tipos de arroz, demos con este, afumado, que nos levou co cheiro inmediatamente aos tempos de lareira entre xamóns e chourizos a curar... Adoramos!

E ben, o resto era procurar elementos diferentes aos que temos utilizado outras veces e probar a ver que podía saír. Iso si, veredes que non existe complicación e pódese preparar esta receita nun abrir e pechar de ollos. Ademais, sabéndomos xa as propiedades do arroz, daranos para máis dun xantar e tiraremos todo o proveito posíbel á creación. Imos alá!

Arroz ao forno con curry

Ingredientes:

• 1 vaso de arroz
• 2 vasos de auga
• 1-2 crioulos
• 4-5 champiñóns
• 1 iogur natural 
• Unha cullerada de aceite
  

Verduras á crema

Bo día, as receitas non paran e nós seguimos argallando en novas ideas como a que hoxe vos presentamos.

Esta semana, con motivo do Sant Jordi, chegounos un novo libro de Isasaweis, unha das nosas autoras favoritas e dando unha primeira ollada xa chegamos a unha das súas marabillas que nos serviu para nos inspirar e crear esta delicia que hoxe vos traemos a Bolboretas no bandullo. 

Unha vez máis damos todo o protagonismo ás verduras, destacándomos as espinacas, polo que nos aseguramos un prato ben apetecíbel. Cremos que xa vos dixemos unhas cantas veces o que nos fan perder a cabeza esta tipo de verduras.

Ides ver que achegamos algunha proteína a través dos champiñóns para facermos máis completa a receita. Desta forma imos ter as ceas máis saborosas! A por ela!

Verduras á crema

Ingredientes:

• 400- 500 g de espinacas
• 250- 300 ml de leite evaporado
• 4-5 champiñóns grandes
• 3-4 culleradas de améndoas
• 2 queixiños
• 1 cebola
• 1 dente de allo
• 2 culleradas de aceite

Crema de champiñóns

Bo día, bolboreteir@s! Hoxe traemos unha receita que tiñamos ganas de preparar hai ben tempo. As cremas son garantía de éxito sempre e para nós que somos fans dos fungos esta é unha delicatessen. Ademais, é unha especie de Madalena de Proust para nós pois era un clásico da nosa infancia xunto coa de espárragos, aínda que ben é certo que esta era de supermercado e unha vez degustada a caseira, fica a outra xa no esquecemento.

No noso frigorífico nunca faltan cogomelos e champiñóns xa que é un complemento ideal para carnes e pescados cunha chea de propiedades nutritivas. E agora, xa temos saída para esas ocasións en que sobran uns poucos e non sabemos onde encaixalos. Esta crema rouboounos o corazón. Ou máis ben, o bandullo.

Como o noso inverno se está a alongar en demasía, ollemos pola parte positiva: non hai fin para as cremas caseiras. Viva!

Crema de champiñóns

Ingredientes:

• 800 g de champiñóns
• 1 allo porro
• 1,5 l de caldo de verduras
• 200 ml de leite evaporado
• Aceite de oliva
• Pementa moída
• Sal

Para os crocantes de pan:

• 2 lascas de pan
• 2-3 culleradas de aceite de oliva
• 1/4 cullerada de romeu

Arroz picante con champiñóns

As nosas vacacións polas Illas Baleares chegan á súa fin mais as receitas continúan. Entanto imos acumulando unha chea de pratos coñecidos e degustados en Mallorca que levaremos á práctica proximamente, traémosvos un recurso para o día a día dos que non dan traballo ningún e dos que alimentan ben. 

O arroz así como outros cereais tórnanse fundamentais na nosa alimentación polos hidratos que nos achegan. Con todo, de degustarmos acotío arroz branco con salsa de tomate acabaremos aborrecidos del e obviamente non terá grandes beneficios. Así pois, o ideal é, comermos arroz unha ou dúas veces á semana e facérmolo de diversas formas xa que este ofrece mil e unha posibilidades de combinación permitíndonos integralo con verduras, carnes, peixes...

É clave contarmos cun bo arroz mais tamén cuns bos acompañantes así que nós sempre procuramos aqueles que máis nos gustan. Os arroces son uns dos pratos máis personalizábeis que hai e unha boa oportunidade para dar un "toque de chef importante". Aquí a nosa opción de hoxe :-)

Arroz picante con champiñóns

Ingredientes: 

• 1 vaso de arroz 
• 8 champiñóns 
• 1 cebola 
• 1/2 pemento vermello
• 2-3 dentes de allo 
• 50 g de queixo 
• 1 chile 
• Aceite 
• Auga 

Ovos recheos (2 versións)

Aquí chegou, finalmente, o ansiado momento das nosas vacacións despois dun curso longo. Xa fica máis tempo de novo para o blogue que aínda así non deixamos desantendido en ningún momento. Xa é moito tempo e xa é parte da familia, hahaha.

Ben, pois seguimos, agora que andamos en tempo de festas, cun petisco tradicional en moitos fogares e que presenta mil e unha variantes. Até o momento, só probaramos con moito éxito unha forma de os facer e que xa presentaramos hai ben tempo (ovos recheos) mais quixemos probar, esta semana, novas opcións. Desta forma, traemos hoxe estas dúas variantes para que teñades onde escoller en función dos vosos gustos. Nós non somos capaces de escoller. A ver vós ;-)

Ovos recheos (2 versións)

Ingredientes:

• 9-10 ovos
• 1 cullerada de vinagre
• Sal

Para o recheo de atún:

• 1 lata grande de atún
• 100 ml de salsa de tomate
• Olivas

Para o recheo de champiñóns:

• 200 g de champiñóns
• 1 cebola
• 1 dente de allo

Albóndegas de quinoa con salsa picante

Sabemos que andades agardando para desfrutar deses sábados de receita e vídeo que traemos dúas veces ao mes. Pois estades de sorte pois hoxe toca video-receita, que ha de gustar a tod@s mais especialmente a aquelas persoas que gustan da cociña saudábel e de superalimentos como a quinoa, que conquistou os nosos pratos hai tempo e agora é un dos recursos máis habituais do noso fogar.
Ademais, despois da tempestade chega a calma, e neste caso a primeira está encarnada nos festíns lambóns que nos demos neste pasado entroido. Toca pois recuperar cuns pratos máis lixeiros e menos pesado sen sacrificarmos o sabor. Iso nunca!
As albóndegas sempre son unha delicia, e conforman un dos alimentos máis clásicos da nosa gastronomía adoitando converterse en especialidade tradicional de moitas familias. Con todo, non reparamos ás veces en que o "formato albóndega" permite ir moito máis alá da carne, aproveitándomonos de produtos ben diversos cos que enriquecer e variar a nosa alimentación. Esta é a nosa opción para hoxe, que nos encanta e vos recomendamos totalmente! A ligazón ao vídeo tédela aquí 😜.

Albóndegas de quinoa con salsa picante

Ingredientes: 

• 200 g de quinoa cocida
• 1 cenoria
• 1/2 pemento (vermello, verde)
• 1/2  cebola
• 1 cullerada de salsa de soia
• Pementa moída
• 1 ovo

Entrecosto en salsa de champiñóns ao viño tinto

Xa adaptad@s ao novo ano? Ou precisades uns días mais? Nós continuamos coa rutina para non vos sintades estraños neste 2017 e comezamos forte cun prato estrela para calquera menu pois xa só a carne atrae só con escoitar o seu nome. Estamos a falar do entrecosto, peza que ocupa un lugar privilexiado no maxín de tod@s @s amantes da boa carne.

Evidentemente non é unha receita para todos os días pois nin debemos inxerir acotío produtos cárnicos nin o noso peto o acepta de boa gana pois non é un alimento especialmente económico. Mais o que si ten é sabor. 

Ademais, cando pedimos un entrecosto en calquera restaurante manexamos apenas dúas opcións, ou a que conta con sala de viño Porto ou a que vén sen mollo. Así que na casa preparamos unha versión da primeira aínda que modificando o viño pois non era ese o que tiñamos a man.

O resultado podía ser bo ou moi bo e claro, foi mellor aínda pois a carne quedou tal e como queriamos e a salsa, aínda non sendo como a do Porto, si ofreceu esa humidade intensa que agradecemos ás veces para este tipo de pratos. En resumo, unha xoia gastronómica!!

Entrecosto en salsa de champiñóns ao viño tinto

Ingredientes (para 2 persoas):

• 2 entrecostos de tenreira
• 7-8 champiñóns
• 1 cebola morada
• 2 dentes de allo
• 1 vaso de viño tinto
• 2 culleradas de aceite
• Pementa moída

Polo con salsa de champiñóns

Os cogomelos e champiñóns son un dos nosos alimentos favoritos desde ben pequenos e aproveitamos sempre que podemos para os integrar nas nosas receitas. Son tan relevantes que case poderían dar nome ao blogue, haha. Ademais, encontrámonos no prato de hoxe co polo, un outro produto moi común na maioría das casas galegas e tamén na nosa, claro, tanto polo seu prezo, máis económico que outras carnes, como pola versatilidade que ofrece na cociña.

Ben, pois este polo con salsa de champiñóns foi todo un capricho posto que o xoves fomos cear cuns amigos a La Dolce Vita, na Coruña e gustounos tanto esta tapa que o sábado a primeira hora xa a estabamos preparando para xantar. Quedamos contentísimos porque todo saíu como agardabamos e agora temos xa na listaxe de recursos un novo prato moi moi saboroso. E ademais así tamén afacemos o padal a este tipo de cremas ás que non estamos tan habituados e que teñen moitísimo valor.

Polo con salsa de champiñóns

Ingredientes (para 4 persoas):

• 2 peitugas de polo
• 300g de champiñóns
• 300 ml de nata
• 1 cebola
• 2 dentes de allo
• Aceite

Quesadillas de pavo e champiñóns

Que contentos estamos agora que apareceu o sol polo norte e despois de descubrir un prato que temos segurísimo que se fará moi recorrente na nosa casa. Tiñamos ouvido falar das quesadillas e cremos que tamén probado nalgunha vez mais non debeu ser un grande éxito posto que non o lembramos.

Mais procurando nas orixes e variantes desta receita comprobamos que tiña toda a pinta de nos saber moi ben. Ademais, ofrécenos a posibilidade de utilizar produtos dos que tod@s temos na casa e xa sabedes que iso para nós é moi importante. Coñecemos a xente e na cociña diaria valórase moitísimo a accesibilidade.

Ben, pois a palabra quesadilla móstrase claramente española, con esa terminación "delatora" que neste caso non conleva o valor diminutivo. Con todo, é un alimento asociado especialmente ás terras mexicanas, onde o degustan con frecuencia con mil e unha variantes sendo sempre imprescindíbel o queixo, claro.

Con este prato demóstrase tamén que non toda a gastronomía mexicana se define polo picante aínda que nada impide utilizarmos algún mollo que nos traia os colores á cara. Ollade, ollade!

Quesadillas de pavo e champiñóns

Ingredientes (para cada quesadilla):

• 2 tortillas de trigo/millo
• 3 lascas de pavo
• 1 champiñón
• Queixo relado ao gusto