Tacos de polo ao curry

Hai uns días os nosos amigxs de Quinteiro doce, dos que somos fans desde hai ben tempo, ensináronnos as súas especias de Quinteiro 13, na que teñen unha gran variedade e sobre todo, unha pintaza incríbel. Propuxéronnos escoller algunhas para traballar con elas e non foi tarefa doada. O noso propósito finalmente foi elaborar unha receita salgada e unha doce e hoxe ímosvos presentar a primeira.

Tacos de polo ao curry

Ingredientes: 

• Tortillas de millo pequenas
• 1 aguacate 🥑 
• 1 lima    

Para o polo ao curry: 

• 1 peituga de polo
• 1 bote de leite de coco
• 1 cullerada de curry de Quinteiro 13
• 2 dentes de allo 🧄

Katsu curry

Bo día, bolboreteirxs! Estamos de volta! Como nos tardaba este momento, mais primeiro tiñamos que estabelecer a nosa nova rutina sendo 4 🤭😇☺️, e sacar momentos para cociñar pratos novos non foi doado nun primeiro momento. De feito, un bo consello que vos damos é que as semanas antes fagades comida de máis e conxeledes. Iso salvaravos a vida ao principio. 

Volvemos cunha receita deliciosa, tamén sinxela, que é a nosa versión, ou adaptación, do KATSU CURRY, tamén chamado Katsu Karé, que orixinalmente se fai con porco tonkatsu. Nós decidimos facela con polo e a salsa de curry con boniato e cebola e, a verdade, é que quedou espectacular. Como xa sabedes nós somos amantes do picante, polo que usamos un curry picante, mais iso é totalmente opcional. 

Aquí tedes esta deliciosa receita:

Katsu curry

Ingredientes:

• Arroz branco      

Para as peitugas: 

• Filetes de polo 
• Pan relado 
• Especias: ourego, allo en po, cebola en po, pementa moída e sal 

Para a salsa de curry:

• 1 boniato 
• 1 cebola 
• 500 ml de auga 

Pasta con gambas ao curry

Bo día, bolboreteir@s! Rematadas as vacacións, toca volver á rutina, non? Ha! Hai que o tomar con humor porque senón faise isto longo. Mais que queda menos!
Hoxe imos cunha das milleiras de posibilidades que nos dá a pasta. Non arriscamos e fomos sobre seguro nesta preparación, botando man de dous produtos principais que casan moi ben e dos que gustamos inmensamente: gambas e curry.
Con esta intensidade, lógrase o obxectivo, que a pasta non fique sen sabor, recibindo moi ben todo o achegado por estes ingredientes aquí incorporados.
Aquí vai a última:

Pasta con gambas ao curry

Ingredientes:

• Pasta
• 300 g de gambas
• 2-3 cenorias
• 1 tomate
• 1 cabaciña
• 1 cebola

Samosas de verduras

Ola, bolboreteir@s!! Como vai todo? Agardamos que esteades moi felices e con apetito para creardes novas receitas porque hoxe vimos con ganas de vos conquistar.
O thai namorounos desde hai uns anos até un punto de se converter nunha auténtica perdición. Tentamos probar todos os restaurantes deste estilo cos que nos encontramos e imos gardando os pratos favoritos. E así chegamos a coñecer as samosas, que aínda que son orixe india, convertéronse nun referente da cociña tailandesa. Ou canto menos nos restaurantes europeos.
Ademais, este prato conta con puntos fortes como o a sinxeleza e o da facilidade para encontrar os produtos, algo que non sempre sucede con este tipo de receitas internacionais. Como vedes, verduras como protagonistas e unha vestimenta ben faciliña. Aquí vai!

Samosas de verduras

Ingredientes:

• Pasta filo/brick
• 1/2 berenxena
• 1/2 cabaciña
• 2 cenorias
• 1/2 cebola
• Sésamo

Empanadillas de gambas ao curry

Bo día, bolboreteir@s! Como nos gusta maio! Achégase o verán, comezan as festas... Que ben! Entre todo isto, gústanos especialmente por comezarmos a facer as saídas para xantar fóra, no parque ou na praia. Así pois, vimos tendo unha acumulación de receitas para ir de picnic que aumentamos cada ano. E aquí é onde entra en xogo este petisco que hoxe vos presentamos, que vén cargadiño de sabor.
Xa sabedes, o curry non pasa desapercibido e hai quen o adora e quen o odia. Nós obviamente, estamos no primeiro grupo e nunca falta na nosa lacena un pouquiño desta especia asiática, que asociamos principalmente á cociña hindú. Ademais, sabiades que o termo curry chega a través do portugués? De feito, a nosa forma debería de ser "caril", tal e como na lusofonía se di, designando así "kari", que sería salsa en tamul, lingua que se falaba no sur da India.
Ben, denominada dunha forma ou outra, apetecen, non é?

Empanadillas de gambas ao curry

Ingredientes:

• Masa para empanadillas
• 200 g de gambas
• 100 ml de viño branco
• 1/2 cabaciña
• 1 cebola
• 2-3 dentes de allo
• 1 cullerada de curry
• Pementa moída

Petiscos de coliflor

Boas, bolboreteir@s! Como estades? Con fame? Por aquí xa solventamos o apetito grazas a esta nova receita. E de onde sacamos a idea? Pois da viaxe que fixemos esta última semana por Tenerife. Descubrimos unha chea de propostas gastronómicas e recrearemos algunhas delas pois cremos que vos poden resultar interesantes.
A primeira destas ideas que aquí traemos ten unha verdura como protagonista, ofrecendo unha opción para a comer ben diferente. Ademais, gustamos moito deste tipo de ideas para @s peques, que en ocasións son reacios a papar certos alimentos de maneira directa e que acaban namorando deses mesmos produtos unha vez se lles dá unha volta.
A nós canto menos, estes petiscos xa nos conquistaron!

Petiscos de coliflor

Ingredientes:

• 1 coliflor
• 3 ovos
• Fariña
• Curry
• Allo en po
• Pementa moída

Lasaña de pisto

Bo día, bolboreteir@s! Cando vos falamos de pratos preferidos, a lasaña sempre está aí arriba. Desde sempre. Ademais, cumpre cun dos requisitos para ser dos nosos favoritos porque dá moitísimo xogo á hora de cociñar, mil recheos e mil variantes.
Xa vos dicimos que, de non vivirmos en Galiza, unha das mellores alternativas gastronómicas, ao noso ver, sería Italia. Paraíso culinario!
Desta volta, facemos da lasaña un acubillo vexetal que gozarmos. Sabedes que non é a primeira, que temos probado de moi diferentes formas, mais se coñecedes xa o pisto, imaxinaredes o ben que pode chegar a saber este prato.
Aquí tedes a nova receita:

Lasaña de pisto

Ingredientes:

• 12 láminas de lasaña
• Queixo relado
• 200 ml de salsa de tomate
• 1 brócoli pequeno
• 1 pemento vermello
• 1/2 pemento verde
• 1/2 cabaciña

Cuscús ao curry con polo e verduriñas

Bo día, bolboreteir@s! Seguimos con acumulación de receitas para o día a día e para a rutina do inicio de curso. Hoxe imos cun ingrediente habitual na nosa alacena e do que tiramos un proveito infinito: o cuscús. De feito, esta receita ten un claro aroma marroquí grazas tamén á intensidade que nos achega o curry.
Esta sémola de trigo dános moitísimo xogo para combinar con carne, peixes ou verduras. De feito, aquí hoxe mesturamos con varios destes produtos. Que prato saboroso ficou!
Se andades na procura dun recurso con moita utilidade, esta é a vosa oportunidade. A por ela!

Cuscús ao curry con polo e verduriñas

Ingredientes:

• 150 g de cuscús
• 75 ml de auga
• 6-7 espárragos
• 2-3 champiñóns
• 1 cebola
• 1/2 pemento vermello
• 1 dente de allo
• 2 culleradas de curry

Arroz ao forno con curry

Despois duns días sen receita nova, recuperamos forzas e ganamos algo de tempo para argallar novos pratos. Velaquí un arroz ao forno. Non é a primeira vez que probamos este tipo de cociñados para o arroz mais si concretamente esta receita. A idea xurdiu dunha visita que demos esta semana ao Graneiro de Amelia, onde sempre experimentamos con especias novas. Entre os diferentes tipos de arroz, demos con este, afumado, que nos levou co cheiro inmediatamente aos tempos de lareira entre xamóns e chourizos a curar... Adoramos!

E ben, o resto era procurar elementos diferentes aos que temos utilizado outras veces e probar a ver que podía saír. Iso si, veredes que non existe complicación e pódese preparar esta receita nun abrir e pechar de ollos. Ademais, sabéndomos xa as propiedades do arroz, daranos para máis dun xantar e tiraremos todo o proveito posíbel á creación. Imos alá!

Arroz ao forno con curry

Ingredientes:

• 1 vaso de arroz
• 2 vasos de auga
• 1-2 crioulos
• 4-5 champiñóns
• 1 iogur natural 
• Unha cullerada de aceite
  

Albóndegas de polo ao curry

Ola, bolboreteir@s! Como ides? Por aquí seguimos acumulando máis e máis receitas e matinando novas ideas para vos sorprender. De momento, hoxe traemos un dos nosos pratos favoritos, as albóndegas, que xunto coas croquetas representan un clásico da cociña tradicional. Ora ben, estas albóndegas non vos son de todo clásicas. De feito, ollade que salsa! Nós que cada vez gustamos máis do curry e das especias asiáticas ficamos moi orgullosos deste prato. Vaia sabor presentan!

Por certo, deixamos por aquí un recordatorio para os lugueses e luguesas. Este vindeiro luns 9 de abril andaremos pola EOI de Lugo ás 19 para conversarmos arredor de lingua, gastronomía e cultura. Agardámosvos deixando esta delicia como aperitivo. Ñam!

Albóndegas de polo ao curry

Ingredientes:

Para as albóndegas:

• 500 g de carne picada de polo
• 100 g de fariña
• 2 rebandas de pan de molde
• 2 ovos
• Leite
• Unha culleriña de curry
• Allo en po
• Pementa moída
• Aceite
  

Gambón ao curry con panko

Bo martes, bolboreteir@s!! Hoxe traemos unha receita sinxela mais para xornadas especiais pois poucas veces se procura excusa para degustar delicias como a que aquí presentamos. Non para todos os días tampouco polo prezo xa que non nos podemos permitir comer marisco acotío (aínda que non estaría mal ;-o).

Hai un par de anos preparáronnos esta mesma receita uns amigos moi especiais e tamén moi lambonciños, sendo este o noso primeiro encontro co panko. Como se dan moi boa maña para a cociña ficamos marabillados co prato e prometimos reproducilo. Foi ficando aprazado mais esta semana pasada, coa visita destes mesmos amigos, decidimos que era o momento.

O panko, para @s que non coñecedes, procede dun pan xaponés elaborado de forma óhmica e que fica idóneo para ser relado despois. Ademais da textura, máis gorda que o pan relado que coñecemos, achega uns matices do máis interesante. Aquí o tedes!

Gambón ao curry con panko

Ingredientes (para 4 persoas):

• 1 kg de gambón
• 1 cullerada grande de curry (picante)
• Pementa moída
• Sal
• Panko (ou pan relado)
• Fariña

Polo con curry e lima ao vapor

Bo martes, bolboreteir@s! Como levades a semana? Nós xenial despois da marabillosa experiencia que tivemos onte no Mestrado de Didácticas Específicas da Universidade da Coruña en que reflexionamos arredor da lingua e a gastronomía, cociñamos e claro, tamén saboreamos, que para iso somos ben lambonciñ@s!

E entretanto, toca continuar con máis receitas. A de hoxe foi un experimento cunha nova adquisición, unha vaporeira xaponesa coa que andamos a argallar. Desde logo, este saíu moi moi ben. O polo é talvez a carne máis recorrente para a nosa alimentación diaria polo que procuramos moi diversas formas de o preparar e así non aborrecelo. Esta vai directa á nova colección pois alcanzou nota moi alta.

O toque de lima e curry danlle moitísima intensidade e xa acompañado dunha das nosas verduras favoritas logramos un prato exquisito. Velaí vai!

Polo con curry e lima ao vapor

Ingredientes:

• 2 peitugas de polo enteiras
• 2 culleradas de curry
• 1 culleriña de allo
• 1 culleriña de ourego
• Pementa moída
• Un chisco de sal

Petiscos de aguacate

Continuamos na volta á rutina con máis e máis receitas. A cabeza está a traballar para vos traer moi diferentes opcións e hoxe presentámosvos a nosa última ocorrencia, uns petiscos de aguacate, ese produto tan na moda ultimamente polas súas múltiplas propiedades a pesar de non ser unha froita de día a día, entre outros motivos polo seu prezo.

Nós afeccionámonos a eles xa hai uns dous anos e desde aquela pasou a estar no noso menú semanal, habitualmente para os almorzos aínda que desta volta optamos por cociñalos para unha cea lixeiriña e, iso si, moi saborosa.

A árbore non se dá moi ben pola nosa terra debido a que necesita climas temperados (é común en zonas tropicais) aínda que hai zonas na Galiza en que curiosamente aparecen aguacates a moreas. Nós, por se acaso, xa temos a semente preparada, xa vos diremos se hai sorte.

Ademais, como xa sabedes das nosas inquietudes lingüísticas, queriamos comentarvos a orixe do termo, que aprendemos hai uns meses no estudo de americanismos na nosa lingua. Procede do  náhuatl, lingua nativa aínda hoxe de moit@s mexicanos, e vén significando "testículo" nunha asociación visual evidente. Ora ben, non por iso o imos comer con máis reparos, non? A por el ;-)

Petiscos de aguacate

Ingredientes:

• 1 aguacate
• 1 ovo
• 2-3 culleradas de fariña
• 2-3 culleradas de pan relado
• 1/4 de culleriña de curry
• 1/4 de culleriña de allo
• Un chisco de sal

Bocados de coliflor

Bolboreteir@s, como levades o peche de xullo? Moit@s estaredes a piques de comezar as vosas vacacións así que supoño que coa máxima ilusión. E para @s que as estades acabando, ánimo, que a vida ten moito por desfrutar no día a día.

Nós, como xa sabedes, desfrutamos acotío da elaboración de múltiplas receitas en función do que se nos vai vindo ao maxín ou do que temos pola casa. Desta volta, recollemos da horta unha chea de coliflores e, tivemos que discorrer algo para as aproveitar. Entre outras, destacamos esta idea que aquí hoxe vos traemos por supor unha forma totalmente diferente de comer esta verdura ao que estamos acostumados.

Insistimos sempre na importancia de ofrecer dinamismo á alimentación tentando cociñar os produtos de diversas formas para coñecer novos sabores e tamén para non nos afacer a sempre o mesmo. Así pois, estes bocados de coliflor han de vos ser de axuda e se tedes peques pola casa suporán unha excepcional oportunidade para @s achegar á verdura. Aí o tedes!

Bocados de coliflor

Ingredientes:

• 700 g de coliflor
• 1 cebola
• 3-4 champiñóns
• 150 g de fariña
• 1 ovo
• 1 culleriña de curry
• Pementa moída
• Sal

Paté de cenoria

Boas, bolboreteir@s! Como levades esta última semana de xuño. Como pasa o tempo, verdade! Xa nos imos meter de cheo no verán aínda que por aquí aínda non tocan vacacións. Para iso faltan un par de semanas.

E facemos máis saborosa a espera con receitas como a de hoxe, un PATÉ DE CENORIA! Porque adoramos o veganismo e as súas múltiplas posibilidades creativas. Quedámonos con esta porque supón unha alternativa ao paté clásico que, se somos sinceros, sempre nos deu un pouco de mal rollo desde que escoitaramos a mítica historia do fígado inflamado, grrrrrr...

Mais con patés vexetais coma este, só hai que pensar en desfrutar porque o que é a elaboración... tampouco ten moita ciencia como veredes. Aí vai:

Paté de cenoria

Ingredientes:

• 4-5 cenorias
• 1 cullerada de curry
• 1 culleriña de coantro
• 1 culleriña de ourego
• 1 culleriña de sésamo
• 1 cullerada de aceite
• 1 cullerada de limón
• 1 culleriña de auga
  

Tortillas aromatizadas recheas de gambas e verduras

Desde logo que este clima que vimos tendo lle sube o ánimo a calquera. Canto menos, pola Mariña Luguesa, onde a calor se resiste ben. E con tanto ánimo, continuamos a elaboración de receitas para nós e vós.
Xa vos contamos innumerábeis veces o que nos gusta meter as mans entre a masa e argallar até dar con alimentos que presentes características específicas, diferenciábeis. Deste xeito, sempre que podemos aproveitamos para facer pan, pizzas, empanadas... mais tamén tortitas, que nos dan moitísimo xogo á hora de facer pratos mexicanos mais tamén para preparar inventos moi bolboreteiros como o de hoxe. Xa as tortitas ficaron para se degustar elas soas, mais claro, precisabamos consistencia e aí é onde nos centramos nun recheo con protagonismo propio e que conxuga marabillosamente coa capa exterior.
Si, poderiamos inventar un nome, mais desta volta fomos máis tradicionais e optamos por unha denominación máis descritiva que xa nos anima a lle meter o dente!

Tortillas aromatizadas recheas de gambas e verduras

Ingredientes (para 4 tortillas):

Para as tortillas:

• 150g de fariña
• 2 ovos
• 1 culleriña de curry (opcional)
• Ourego, estragón, comiño...

Para o recheo:

• 500g de gambas
• 1 pemento vermello
• 1 pemento verde

Panquecas de remolacha e espinacas con salsa de manga e curry

Veunos o soliño e con el a inspiración para experimentar na cociña e argallar novas receitas. Tan novas, que mesmo algún produto nunca antes o probáramos. Así que fomos á aventura, tirándomos de verduras. E si, saíu ben.

E que vén sendo isto das panquecas? Pois é unha adaptación do termo inglés "pancakes", típica xa no portugués e que nós recollemos para o galego por a considermos axeitada para a comprensión do prato. Xa sabedes que, en casos de dúbida, temos toda unha fonte de recursos no portugués, tanto de Portugal como de Brasil e demais territorios lusófonos.

Aínda que máis que o nome, o importante está no sabor. E aí vai depender do comensal, coma sempre, mais o que esta receita asegura é unha nova experiencia tanto por sabor como pola textura outorgada a certos ingredientes cos que non estamos afeitos a traballar así. 

Estas "tortitas" permítennos xogar coa comida, algo que nos encanta, para despois saborear o resultado personalizado. Así que, ollade a nosa proposta e despois, xulgade ;-)

Panquecas de remolacha e espinacas con salsa de manga e curry

Ingredientes:

Para as panquecas de remolacha (para 4 unidades):

• 4 remolachas pequenas (ou 2 grandes)
• 1 ovos
• 40 gr de fariña
• 1 chisco de lévedo en po
• Pementa moída
• Sal
• Unha cullerada de aceite

Pavo ao curry

Por fin chega o sábado e por fin nova receita de Bolboretas no bandullo! Levabamos varias semanas agardando para a facer e sempre tiñamos outras cousas por comer. Mais xa probamos e podemos animarvos a probar esta marabillosa combinación cunha carne coa que non se adoita traballar tanto mais que ten múltiplos beneficios e para nós un sabor tan bo ou mellor como o do polo.
Ademais, nós contamos coa sorte de ter peitugas dun pavo criado na casa, o que lle dá unha tremenda excelencia ao prato. Sempre insistimos na relevancia da materia prima, adoita ser decisiva entre un bo prato e un óptimo.
Canto ao curry, pois a verdade é que non adoitamos utilizalo moito xa que nos gusta o sabor mais acaba por facérsenos algo pesado. Porén, ao integralo cunha carne tan suave como o pavo logra non excederse e acaba por facer o prato do máis gorentoso. O toque asiático parece que deu á perfección co pavo galego.

Pavo ao curry

Ingredientes (para 2 persoas):

• 1 peituga de pavo
• 250 ml de nata
• 3 culleradas de curry
• Allo en po
• Pementa moída
• Un chisco de sal

Flocos de millo ao curry

Despois do éxito da última receita, esa Torta de Santiago que tan pouco durou pola nosa casa, imos cun petisco moi orixinal. Desta volta a receita non é nosa. Estabamos onte vendo a TV mentres xantabamos e apareceu por alí o famoso Arguiñano. A pesar de que non somos moi seguidores del, si ten pratos moi interesantes e este así nolo pareceu. Atractivo e moi sinxelo de elaborar.

Ademais xa había tempo que tiñamos ganas de probar algo coas mazarocas de millo que temos pola casa alén dos tradicionais flocos de millo, aínda que nunca pensáramos nalgo así. Se gustades dos flocos de millo e do toque que lle dá o curry á comida, esta é a vosa. Ollade que pouco traballo...

Flocos de millo ao curry

Ingredientes:

• 2 mazarocas de millo
• 1 cullerada de curry
• 1 cullerada de aceite
• Un chisco de sal