Baos de polo picante

Ola, bolboreteirxs! Aquí estamos unha semana máis cunha nova receita. Desta volta, o peque tiña antollo de pan bao e decidimos facer baos recheos de polo picante, para el reducimos o a cantidade de picante mais igualmente estaban deliciosos.

A verdade é que estes pans, que son tan sinxelos de facer, son moi versátiles porque podemos xogar cos ingredientes que máis nos gusten ou os que teñamos pola casa. Alén de que se vos gusta a cebola, recomendámovos ter un bote de cebola encurtida, xa que lle vai dar un toque diferencial aos vosos pratos: ensaladas, hamburguesas, pizzas...

Oxalá vos guste, aquí vola deixamos.

Baos de polo picante

Ingredientes:

• Pan bao
• Cebola encurtida
• Leituga
• Salsa maionesa
• Polo picante:
• 100 ml de siracha mayo      
• 100 ml de auga
• 1 cullerada de allo en po
• 1 cullerada de cebola en po
• 1 cullerada de ourego en po

Ensalada de garavanzos crocantes

Bo día, bolboreteirxs! Despois duns cantos días sen publicarvos receitas, aquí estamos con esta deliciosa ensalada, ideal para esta tempada estival e perfecta para levarmos á praia ou de paseo.

O ingrediente principal son os garavanzos, que nos decimos combinar cos seguintes productos. Porén, xa sabedes podedes usar a combinación que máis vos guste deixando voar a vosa creatividade. 

Ensalada de garavanzos crocantes

Ingredientes:

• Para os garavanzos: 

• Unha cullerada de allo en po 
• Unha cullerada de cebola en po 
• Unha cullerada de coantro         
• Unha cullerada de ourego 

Tacos de leituga con carne

Como ides, bolboreteir@s? Desde Bolboretas no bandullo dámosvos a benvida a xullo cunha nova receita, improvisada para a cea de onte mais que tiña moito de seguro e pouco de risco.

Diciamos xa hai tempo que un día tiñamos que facer uns roliños coas follas da leituga ou do repolo e chegou o momento. Poderiamos optar por mil e un recheos mais fomos desta volta clásicos querendo recrear os míticos tacos mais cun envoltorio ben diferente.

Estas follas de leituga dan un toque de frescura que contrasta coa carne acabada de saír da tixola e resulta novidoso para o padal.

Ademais, é unha destas ceas de preparar en apenas uns minutiños pois apenas está o traballo en picar e mesturar. Queda o paso máis complexo, saborearmos estes tacos de leituga con carne cos que iniciarmos este mes estival! A por eles!

Tacos de leituga con carne

Ingredientes (para 2 persoas):

• 4 follas de leituga
• 200 g de carne picada
• 1 cenoria 
• 1/2 cebola
• 1/2 tomate
• 1 dente de allo
• 1 chile (opcional)
• 1 cullerada de aceite
• 1 cullerada de mostaza

Tártaro de salmón e mazá verde

Ola bolboreteir@s! Como levades o novo mes? Agardamos que moi ben. Por aquí tiñamos unha receita doce na recámara mais pensamos que talvez vos empachabamos con tanta larpeirada e decidimos facer para cear unha proba coa que vos soprender.

Sabedes esas veces que comprades un alimento e na caixa ou sobre vén unha receita? Habitualmente non nos fixamos mais a verdade é que se reparamos nalgunha delas encontraremos algunha creación ben interesante á que lle tirar proveito. 

Isto foi o que nos pasou desta volta; mercamos unha caixa de espárragos (que nos encantan, por certo) e fóra traia esta idea que nos cautivou. Casualmente tiñamos ganas de preparar un tártaro na casa após probar ultimamente uns espectaculares por aí e así se nos presentou unha oportunidade. 

E unha vez probado... espectacular!!! E como ides ver, apenas necesitamos os ingredientes adecuados e un molde para lograr o noso tártaro! Aí vai:

Tártaro de salmón e mazá verde

Ingredientes:

• 50-70 g de salmón
• 10-12 olivas
• 8-10 espárragos
• 1 mazá verde
• 1 tomate
• Leituga
• Aceite de oliva virxe
• O zume dun limón

Gamelas de pavo con salsa picante

Bo día, bolboreteir@s! Como vai todo? Como pasa o tempo, verdade? Comezamos onte a primavera e xa temos aí a chegada do verán, nun abrir e pechar de ollos. Si é boa verdade que o tempo corre, fuxe! Debemos pois aproveitalo e vivir as posibilidades de goce que se nos presenta cada día e aí e onde nós valoramos a gastronomía como unha fonte continua de pracer. Desde o prato cotiá máis simple até as elaboracións máis ornamentais deixan pegada, por iso adoramos deixar tantas receitas rexistradas neste noso e voso caderno dixital.

Pois ben, traémosvos neste martes algo moi sinxeliño, económico e, como non, moi gustoso! Aproveitamos unha peituguiña de pavo que tiñamos no frigorífico e algunha verdura e, nun formato diferente, creamos esta receita que aquí vedes. E iso das gamelas? Pois débese a estas barquiñas de trigo que venden xa feitas no super, a carón das tortillas para burritos e fajitas. E como xa sabedes que adoramos a lingua, procuramos unha das mil denominacións que temos na Galiza para as embarcacións. Parástesvos a reparar algunha vez en cantas hai? E todas coas súas particularidades. A da nosa gamela está no sabor, haha!

Gamelas de pavo con salsa picante

Ingredientes (para 2 persoas):

• 4 barquiñas de trigo
• 2 peitugas de pavo
• 1 cabaciña pequena
• 1 tomate
• Leituga
• Estragón
• Allo en po
• Pementa moída
• Sal
• Aceite de oliva

Para a salsa picante:

• 150 ml de salsa de tomate
• 1 cullerada de aceite de oliva
• 1 dente de allo

Arepas

Gardada tiñamos esta marabillosa receita desde hai semanas e xa non nos recordabamos de a presentar. Así pois, onte, lembrándonos dela reelaborámola e volvimos desfrutar da sinxeleza e eficacia das arepas.

E tod@s coñecedes este prato? Non pasa nada. O que pasa é que nós temos vantaxe por contar con amizades galego-venezolanas que nos dan a coñecer receitas tradicionais do outro lado do Atlántico. Ai, unha outra xoia para a sección de receitas internacionais!

As arepas son un outro exemplo de grandes resultados con moi pouco: apenas fariña e auga. Despois para o recheo... mil e unha posibilidades, coma sempre. Aínda que nós non resistimos e tivemos que papar algunhas acabadas de pasar pola tixola, sen nada por dentro. Ñam!

Arepas

Ingredientes:

• 300 gr de fariña de millo (PAN)
• 350 ml de auga
• Un chisco de sal

Recheo: Leituga, queixo e pepperoni (opcional)

A nosa ensalada césar saudábel

Xa vos dixemos que após o Entroido viña época de recuperación, e aí andamos. Despois do pan de espelta e dos spaguetti de cabaciña, chega un clásico das ensaladas, o que leva por nome o do famoso emperador romano e que talvez sexa a ensalada máis coñecida internacionalmente.

Como a maior parte destas receitas de mestura e combinación, presentan mil e unha variantes, e a nosa será unha máis, con similitudes e diferenzas coas demais. Non todo vale evidentemente, mais por exemplo, o polo, que nós consideramos o elemento distintivo desta ensadala, non aparecía na versión orixinal creada en 1926 en Tijuana, México. Iso si, co tempo, esta ave fíxose imprescindíbel.

Canto á denominación, non hai sorpresa. O seu creador, un imigrante italiano afincado no país azteca, levaba por nome César Cardini.

Nós que sempre defendemos o lugar das ensaladas neste mundo, non iamos deixar de lado unha das ensaladas máis completas que existen; e tamén máis saborosas. 

Coñezádela xa ou non, é bo momento para ollardes a receita e a probardes proximamente. De seguro que gustades dela.

A nosa ensalada César saudábel

Ingredientes (para 2 persoas):

• 3 bistés de polo ou pavo
• 2 lascas de pan
• 1/2 leituga
• 1/4 de coliflor
• 1 tomate
• 1 cebola
• 1 culleriña de romeu

Roliños saudábeis (WRAP)

Parece que así con este soliño nos erguemos con mellor ánimo pois xa apetece que vaian vindo días calorosos para desfrutarmos da praia, do río ou simplemente dun pouco de verde para tomarmos o sol. Mais tamén nos tarda para irmos introducindo certos produtos máis axeitados para o verán na nosa alimentación. Produtos máis lixeiros e sobre todo frescos acordes a días de altas temperaturas.

A receita que traemos hoxe ten como base a verdura e faise ideal para a cea. Nós elaborámolo pensando en traspasarmos a ensalada a un formato máis divertido, nun rolo elaborado a través destas saborosas tortillas mexicanas, moi sinxelas de elaborar tamén na casa. Aínda que non pensamos neles cando estabamos a cociñar, si nos decatamos posteriormente que este formato está tendo moito éxito nalgúns países desde hai tempo, sendo coñecidos como WRAPs. Hai mil e unha forma de os preparar, e nós pensamos que este, no que destaca o frescor da ensalada, lle quedaba realmente ben. A ver que opinades vós.

Roliños saudábeis (WRAP)

Ingredientes (para 4 roliños):

• 4 tortillas mexicanas (receita aquí)
• 8-10 cogomelos
• 8 lascas de pavo (ou xamón curado)
• 4 follas de leituga
• 1-2 tomates
• 1 cebola
• 1 dente de allo
• Queixo ao gusto

"Burritos" mexicanos da casa

Levamos unha tempada do máis mexicanos. En calquera momento poñémonos a cociñar co poncho e cantando rancheiras, haha. Como os produtos do país azteca están bastante de moda e se comercializan moi ben, queremos mostrar como podemos elaboralos tamén na casa sen perder o sabor tradicional.

Despois das fajitas, atrevímonos cuns burritos. Despois de probar exitosamente coa elaboración das tortillas, ficábanos o sazonador para lograr que estes burritos fosen totalmente caseiros. E así foi. Cunha sinxela mestura de especias conseguimos o toque tan característico deste prato.

O nome é do máis curioso, aínda que non está moi clara a súa orixe. A teoría máis arriscada defende que a denominación deriva do parecido da tortilla envolta coa orella dos coñecidos animais de dito nome. Moito supoñer, creo eu, haha. O que si, identifícase como un termo da zona de Guanajuato, que despois se estendeu a todo México e a todo o mundo. De México para Galiza!

Burritos mexicanos da casa

Ingredientes (para dúas persoas):

• 2 tortillas mexicanas (receita aquí)
• 200 gr de carne picada 
• 1/2 vaso de auga
• Leituga picada
• Queixo relado ao gusto
• 1 dente de allo
• Perexil
• 2 culleradas de aceite
• Sazonador:
• 2 culleradas de allo en po
• 2 culleradas de comiño
• 1 cullerada de pemento picante
• 1 cullerada de pemento doce

Ensalada de salmón

A miña preferencia, como xa sabedes, son as larpeiradas, mais unha das claves para poder desfrutar destas está nunha alimentación equilibrada, en que as ensaladas ocupan un posto moi relevante. Estas son totalmente personalizábeis, hai millóns de combinacións podendo engadir os produtos de que máis gustades. Porén, se non vos apetece moito pensar en cal facer, aquí vos traemos unha moi recomendábel que se caracteriza principalmente por levar peixe, neste caso salmón, mais tamén outros moitos produtos.
No meu caso o único peixe que acostumaba acrecentar ás ensaladas era o bonito, mais descubrín que con salmón está aínda máis boa, xa que é un produto de sabor moi lixeiro e suave, que combina á perfección coas verduras. Aquí vos deixamos esta completiña ensalada con salmón:

Ensalada de salmón

Ingredientes:

• Leituga
• 1 tomate
• 1/2 cebola
• 1/2 mazá
• 3 paíños de surimi
• 12 olivas
• Queixo, ao gusto
• 150 gr de salmón
• Aceite
• Vinagre

Mini-hamburguesas da casa

Despois do fabuloso doce que vos trouxemos o último día, hoxe presentámosvos unhas hamburguesas totalmente caseiras, xa que elaboramos tanto o pan como a hamburguesa en si, engadindo aquelas especias de que máis gustemos. Se tedes pequen@s na casa, gostarán moitísimo deste clásico, aínda máis polo seu tamaño reducido que as fan moi atraíbeis.
Unha vez canto menos tedes que probar a elaborar este produto na casa para poderdes comparalo co que mercades nas carnizarías. É certo que require un pouco de tempo, a diferenza das mercadas, mais o sabor é moito máis natural.

Mini-hamburguesas da casa

Ingredientes:

Para as mini-hamburguesas (8 unidades aproximadamente):

•         300 gr de carne picada metade de porco e metade de tenreira
•         1 clara de ovo
•         1 cenoria relada
•         Pan relado
•        Allo picado
•        Pementa moída
•         Estragón
•     Ourego

Hot Dog venezolano

A receita de hoxe vén desde América do Sul, máis concretamente desde Venezuela. Porén, nós coñecímola en terras mallorquinas cando pasabamos uns días coa familia de alí. Como comprobaredes é unha receita sinxelísima e deliciosa, ademais de rápida xa que vos pode sacar de algún apuro. Con ela seguro que sorprendedes aos vos@s convidad@s pola súa orixinalidade. 

Parece ser que o bocadillo de salchicha, (tamén coñecido como hot dog, cachorro quente ou perrito caliente) ten a súa orixe alá por 1867 e, ao contrario do que poderiamos pensar, non nos EUA, senón na Alemaña, levando posteriormente os bávaros este manxar a América na súa emigración. Canto ao nome, canto menos curioso e divertido, parece que veu dado por analoxía con ese can de corpo alongado que tod@s coñecedes. Estes bocadillos encontrámolos en postos de rúa en todo o mundo, mais aquí deixámosvos unha receita diferente para o facerdes nos vosos fogares.

Hot Dog venezolano

Ingredientes:

• Salchichas 
• Pan
• Leituga 
• Cebola
• Cebola fritida
• Queixo relado
• Patacas fritidas de bolsa
• Salsas ao gusto (Mostaza, ketchup, brava, ali-oli...)