martes, 3 de xaneiro de 2023

Roscón "Pink Velvet"

Feliz 2023, bolboreteirxs! Esperamos que este ano veña cargado de moita felicidade e que todos os vosos desexos se cumpran 🥰❣️ Nós esperamos seguir acompañándovos un ano máis e que as nosas receitas vos gusten e as poñades en práctica 😉.
Primeira receita do ano e, como non podía ser doutra forma, traémosvos unha nova versión do Roscón de Reis 👑. Xa sabedes que tedes a versión clásica, unha das máis lida do noso blogue, e a versión chocolateada.  A torta "Red Velvet" é unha das nosas favoritas e cando lle vimos a Alma Obregón a receita deste delicioso Roscón non dubidamos en poñela en práctica. Veña! Tomade nota, que aínda nos dá tempo de facelo para a noite do 5 ou o almorzo do 6. 



Roscón "Pink Velvet"



Ingredientes:

  • 415 g de fariña de forza
  • 160 ml de leite
  • 90 g de azucre 
  • 60 g de manteiga
  • 7 g de lévedo seco de panadaría      
  • 2 ovos
  • 3 culleradas de esencia de vainilla
  • 1 cullerada de cacao puro
  • Unha culleriña de zume de limón
  • Un chisco de sal
  • Colorante rosa (ou o que máis vos guste)
Para o recheo:
  • 300 g de azucre glas
  • 200 g de queixo de untar
  • 125 g de manteiga

Utensilios: dúas cuncas, un batedor eléctrico ou manual, unha bandexa apta para o forno cuberta con papel vexetal, un pano (ou papel transparente).


Elaboración:

Para comezarmos, temos de mesturar o leite co zume de limón e deixámolo repousar. Mentres tanto, botamos nunha cunca a fariña co azucre, o sal, o cacao e o lévedo. Mesturamos moi ben. 


De seguir, incorporamos o leite e os ovos batidos. 


E o colorante e a vainilla. 


Amasamos moi ben até obtermos unha masa elástica e homoxénea.  Cando teñamos a textura correcta, agregamos a manteiga, pouco a pouco. 


Tapamos e deixamos repousar até que duplique o seu tamaño. Aproximadamente 1 hora. 


A continuación, debemos darlle forma. Para iso, temos que botar unha pouca de fariña (non moita para que non cambie a cor) ou cacao en po e darlle forma ao roscón. Nós usamos un molde para facerlle a forma e forneámolo así.  Forneamos a 190º, calor arriba e abaixo, durante 20 minutos. Deixamos repousar. 



Para o recheo nós fixemos a crema de queixo tan típica desta torta. Mesturamos o azucre coa manteiga até que se integren ben. E, cando estean ben homoxéneos agregamos o queixo e mesturamos moi ben. Abrimos o roscón e botámoslle unha boa capa e podemos pór tamén un por enriba para decorar. 


E xa estaría listo para comer!


Nós, o ano pasado, deixámoslles un anaco do roscón, xunto cuns bombóns e leite para o Reis e unhas cenorias e auga para o camelos e non deixaron absolutamente nada. A verdade é que é un doce diferente mais está moi moi saboroso. 


Nós xa estamos desexando que chegue o día 5, xa que desde que está Xiao, é unha noite súper máxica para nós! Agardamos que tamén o sexa para vós e que desfrutedes moito do que queda do Nadal 👑🎄. 

Ningún comentario:

Publicar un comentario