sábado, 22 de outubro de 2016

Terroríficas madalenas de castaña con crema de cabaza

Aí vén, aí chega, aproxímase o Samaín. Xa sabedes, pola conquista dos escaparates, da tendencia destas semanas: medo, cabazas, laranxa, caveiras... Ben pois nós sumámonos pondo como base dous produtos de tempada: as castañas e as recorrentes cabazas, aínda que no noso caso tirando proveito alimenticio.
Ano tras ano procuramos aproveitar as castañas dos soutos galegos para crearmos receitas orixinais como luriñas e castañas en mollo de millocanas de crema de castañas ou croquetas de castañas.  E como xa ía tempo que non preparabamos madalenas pois... era a solución perfecta. E coa cabaza, ademais de lle ofrecer un contraste canto ao sabor, tamén lle pomos algo de cor.
Xa podedes imaxinar que a caracterización terrorífica non é canto ao padal senón para os ollos con esa ornamentación doce con presenza de diferentes bechos de goma. Canto a decoración seguro xa tedes mil e unha ideas coas que lograr pratos espectaculares mais recomendámosvos especialmente que teñades en conta esta combinación para as madalenas pois resulta moi sorprendente. Nós gustamos especialmente do corpo mais a cobertura havos de agradar moito tamén. Ollade a idea:

Terroríficas madalenas de castaña con crema de cabaza


Ingredientes:


Para as madalenas:
  • 200 g de castañas cocidas
  • 150 g de fariña 
  • 150 g de azucre
  • 150 g de manteiga
  • 3 claras de ovo
  • 1 xema de ovo
  • 1 cullerada de ron
  • 1 culleriña de lévedo en po
Para a crema:
  • 225 g de queixo mascarpone
  • 100 g de cabaza
  • 45 g de azucre glas

Para a decoración (opcional): papel de arroz con debuxos, lambetadas...


Utensilios: varias cuncas, un batedor (eléctrico e manual), unha espátula, moldes para madalenas, cápsulas para madalenas, papel transparente, unha manga pasteleira e un bico. 


Elaboración:


Para comezarmos, temos de facer a crema de cabaza e queixo. Para iso, temos que pelar e cortar a cabaza en anacos e asala no forno a 160º, calor arriba e abaixo, durante 40 minutos. Pasado ese tempo, deixamos que arrefríe e triturámola co batedor eléctrico. 


De seguir, engadimos o azucre glas e mesturamos ben. 


Agregamos o queixo mascarpone e mesturamos de novo. Tapamos con papel transparente e refrixeramos mentres facemos as madalenas. 

Mentres arrefría a crema, facemos as madalenas. Comezamos batendo a xema xunto co azucre. 


Engadimos a manteiga e mesturamos. 



Despois, botamos, pouco a pouco, a fariña mesturada co lévedo.


Agregamos as castañas, previamente trituradas coa axuda dun garfo. 









Engadimos as claras, montadas a punto de neve.  


Repartimos a mestura nas cápsulas e forneamos a 180º, calor abaixo e ventilador, durante 20-25 minutos. 


Deixamos que se temperen. 




Botamos a crema de cabaza na manga pasteleira e decoramos as madalenas ao noso gusto. Así mesmo, se as queremos facer terroríficas para Samaín, colocamos unhas figuras de papel de arroz e unhas lambetadas "noxentas": vermes, cerebros, arañas...


 Vedes que delicia de madalenas? E ademais están saborosísimas! Agardamos que vos gusten! Ou que vos arrepíen? Ben, que as desfrutedes dun xeito ou doutro e que argalledes con elas para traballardes a vosa vea creativa e lle dardes un agasallo ao voso bandullo festexeiro. Chegadas desde o mundo de Lucifer, fican convosco as terroríficas madalenas de castaña con crema de cabaza. Unha forte aperta!

2 comentarios:

  1. Uummmmmmmmmmm no dudo lo mas minimo que estas magdalenas esten de muerte relenta no lo siguiente.
    Como siempre receta y fotos del paso a paso son de 20 points.
    Bicos mil wapos.

    ResponderEliminar